Ka Nupepa Kuokoa, Volume LIX, Number 50, 16 December 1921 — LILO KA AINA O MRS. SWANZY I KE AUPUNI KULANAKAUHALE. [ARTICLE]

LILO KA AINA O MRS. SWANZY I KE AUPUNI KULANAKAUHALE.

I kulike me ia a ka Meia Wilson o ka hoike ana ae ma ka Poaono aku la o ka pule i hala, ua kakauinoaia o Mrs. Swanzy ka palapala kuai e hoolilo ae ana i kela apana aina ewalu eka ma Kaaawa, komo pu me kekahi mau haneri kapuai e pili ana i kahakai, i ke aupuni kulanakauhale no ka hooliloia ana aku o ia wahi i paka no ka lehulehu. O keia kekahi o na paka lehulehu a ka Meia i hoolala ai a i hele like aku ai no hoi me ke Kiaaina ame ka enekinia kulanakauhale ame ke komisina o na aina aupuni e nana ma kekahi manawa i hala aku nei. He mau haneri kaukani dala ka waiwaiio o ia apana aina o ka lilo ana ae i ke aupuni kulanakauhale, a no ka paka wale no ka mea i makemakeia aku ai ia wahi e lilo ae ia i ke aupuni, aole no kekahi hana e ae. E lilo aku ana kela wahi i makaha e piha mau ia aku ana e na malihini kaahele a o ka poe puni lealea pu o Honolulu nei, no ka mea, he wahi maikai i ka auaukai a e piha mau aku ana i ka poe e manao ana e holo malaila e hoomaha ai, a malaila e malama ai i mau paina liilii. O ka hana i hoolalaia me he mea la, e hookoia aku ana e ke aupuni o ia ke kukulu ana aku i mau hale malumalu maloko o ia paka a i mau haleauau no na malihini kaahele. Aole o keia paka wale no ka i holo pono ke kuaiia ana, he mau paka hou ae no kekahi mawaho ae o keia i kuaiia a i lilo ae i ke aupuni kulanakauhale, mahope o na kukakuka ana no kahi a ke aupuni kulanakauhale o ka hoolala ana no ka lilo mai o kela mau eka ekolu ma Waialae ame kekahi apana ololi 1000 kapuai ka loa ame 50 kapuai ka laula ma Wailupe ame kekahi apana aina 3 1/4 eka ma Maunalua, a he apana aina hou aku no ewalu eka mawaena o Makapuu ame Niu, o keia apana aina hope e hoolimalimaia ana e ke aupuni, no kekahi manawa, a i ka manawa e lawe ai ke dala no ke kuai ana ia apana aina

ia manawa e ku ai ke aupuni. Ua ae pu mai ka Bishop Estate e hoolilo mai i ka hoolimalima o kela mau eka he 10 ma Waialua i ke aupuni, ma ke ano i kahua paka, he apana aina i paaia e ka hui kaaahi ma ka hoolimalima no kekahi mau makahiki, a ke hoolalaia mai nei i nei manawa kekahi hana no ke noi ana aku i ka hui kaaahi e hoolilo mai ia mau eka he umi i ke aupuni kalana. Ke holopono na hana apau e hoolalaia mai nei o ka puni no ia o Oahu i na paka a loaa no hoi na wahi no ka lehulehu e hele aku ai e hoohala i kekahi manawa ma na kuaaina.