Ka Nupepa Kuokoa, Volume LIX, Number 52, 30 December 1921 — Page 4
| This text was transcribed by: | Genesis Kauhi |
| This work is dedicated to: | Awaiaulu |
Ka Nupepa Kuokoa
KE KILOHANA POOKELA O KAN LAHUI HAWAII.
NUPEPA KUOKOA, HONOLULU, T. H. POALIMA, DEKEMABA 30, 1921
______________________________________________________________________________
N U P E P A K U O K O A
SOLOMON HANOHANO, LUNAHOOPONOPONO HOOPUKALA I NA KAKAHIAAKA POALIMA APAU
POALIMA . . . . . . . . . . DEKEMABA 30, 1921
______________________________________________________________________________
HAUOLI MAKAHIKI HOU KAKOU!
Ke haawi aku nei ka Nupepa Kuokoa i kona hauoli makahiki hou i kona poe heluhelu. Aloha Makahiki Hou Kakou!
Aole paha he mea nui e ae lloko o ka noonoo o kakou na kanaka Hawaii, i kela ame keia makahiki, o ka loaa wale no o ka makahiki hou; o ua manawa la ua hoea mai ia, no ka mea ma ka hora umi-kumamalua o ka po o ka la apopo, e lele ae ai ke aho hope loa o keia makahiki, a lomo aku kakou i ka makahiki hou; he mea hauoli i'o, ka loaa hou ana ia kakou o ia makahiki.
He nui no nae na kumu maikai a kakou e komo ai iloko o na hauoli ana, aole no ka loaa wale ana no ia kakou o kela makahiki hou, aka no ke ola i loaa mai ia kakou, iloko o keia makahiki e pau ana ahiki wale no i ke komo ana aku iloko o ka makahiki hou; no na, pono ame na pomaikai i loaa mai ia kakou iloko o keia makahiki, ame kekahi mau pomaikai e ae he nui a kakou no apau e hoohewahewa ole ai, na pomaikai hoi, i loaa ole i na lahui kanaka, e noho ana ma na aina mawaho aku o Hawaii nei.
I ko kakou komo ana aku nae iloko o na hauoli ana o ka makahiki hou, o ka makou wale no e iini nei, e hoohala kakou ia hauoli ana, iloko o na palena kupono; mai hana aku a oi mawaho o kela mau palena, o lilo auanei na hauoli i manaoia, i mea e hookomoia aku ai iloko o ka pilikia ame ka poino, e ukali mai ai ka kaumaha ame na auwe ana.
He hana maikai ka mea i hoomaaia e na Hawaii o na manawa ae nei i hala, o ia ka hoomakaukau ana i na meaai kupono o kela ame keia ano, alaila hoohauoli ia lakou iho ame ko lakou mau ohana, ma ka lawe ana mai ia mau mea a ai me na manao hoomaikai aku i ke Akua, ka Mea a lakou i kau aku ai i ko lakou manaoio, mai laia wale mai no, i loaa ai ia lakou ka makahiki hou.
Ia kakou e huli aku ai ihope a nana i ka nee ana mai o keia makahiki e pau ana aole a kakou mau mea e kaniuhu iho ai ka manao , no ka mea, ua kaawale loa aku na mea hoopilikia, a hookaumaha mai ia kakou aku. Aole no kakou i nele loa me kekahi mau mea e hookui-heia mai ai ka noonoo eia nae, ua uhiia kela mau mea liilii loa, e na maikai he nui i loaa ia kakou; a ma ke ano nui ke olelo ae, aia na kumu maikai apau ma ka aoao o na makaaiuana o Hawaii nei e hauoli ai.
Ua kaawale loa aku na ma'i ahulau mai ia kakou aku; aole ka wi ame ka nele me kakou ma Hawaii nei, aole no hoi na mea hoopilikia e ae, elike me kekahi mau aupuni o ka honua nei no lakou na moolelo ku i ke aloha a kakoa i ike ai mai na aina mamao mai; nolaila e pono kakou apau e komo iloko o ka hauoli ana, no ko kakou kaawale loa ana mai ia mau pilikia mai, ame na poino.
Oiai nae, aole kakou i malihini, i ke ano o ka hoohauoli ana o kekahi mahele o na Hawaii ia lakou iho ma keia la ano nui o ko kakou ola ana, o ia ka inu nui ana i ka waiona; o ka keia pepa e kauleo aku nei ia kakou e na Hawaii, mai lawe mai ia ano o ka hoohauoli ana, ma keia makahiki hou; no ka mea, he alahele ia e ala mai ai ka hakaka, ka noho haunaele ana, ame na haawina poino he nui.
He oi ae ko kakou hoohauoli ana ia kakou iho, me na meaai maikai i hoolakoia, na himeni hoonanea kupono paha, a i ole ma kekahi mau lealea maikai: mamua o ke ake ana aku, i na hana, e hooliloia ai ka hauoli, i kaumaha.
E hoomaka kakou i ka makahiki hou e hoea mai ana, me na hana maikai, a e hoomau aku ia mau hana maikai, ahiki i ka pau ana o ia makahi, e ike no ananei kakou, i ka loaa o ka hauoli i'o, ka mea nana e hapai ae ia kakou ma na amuu kiekie o ke ola lahui ana.
Me na kalokalo ana no ka loaa ia kakou apau o na hauoli ana no ka makahiki hou e hoea mai ana: me na manaolana hoi no na haawina po maikai apau e ukali mai ana i ka makahiki hou, ke haawi hou aku nei ke Kuokoa i kona aloha. Aloha Makahiki Hou Kakou apau!
__________________________________________________________________
E HOOI AE I KA HOAHU ANA!
Ma ka Poakahi, ka la eiwa o ka mahina ae nei o Ianuari o ka makahiki hou, e hoon aka hou ai ke Kalapu Hoahu Karisimaka, ke pappai ikaika aku nei keia pepa i na Hawaii apau, e komo i mau lala no ke kalapu hoahu o keia makahiki ae a e hoahu elike me ka hiki ke hoomau i ka uku ana ia huina i kela ame keia pule me ka haule ole.
He elima papa o ka hoahu ana no keia makahiki, mai ka elima dala ke kiekie no ka pule, e hoahu mau ai i ua pule apau, no kanaha-kumamahiku pule, ahiki i ka iwakalua-kumamalima keneka no ka pule. Ua hiki keia ano o ka hoahu ana i na mea apau, ina no me ka huina liilii loa e hoahu ai o ka mea nui, o ia no ka loaa ana, o kekahi huina dala mahuahua me ka maopopo loa i ka piha ana o kela mau pule, e loaa ai na makemake no na la kulaia, elike me ke Karisimaka aku la i hala ame ka Makahiki Hou.
He mea hauoli na keia pepa, ka olelo ana ae, i ka nui maoli o na Hawaii i komo i mau lala no ke kalapu hoahu, o ka makahiki e pau ana; a ke lana nei ko makou manao, e hooi hou ia ae ana ka nui o ka poe e komo ana i ke kalapu hoahu o keia makahiki ae.
Ua nui maoli ka hoahu ana a kekahi poe elike me na kikoo dala, i loaa ia lakou i na la aku la i hala: o ka makou e a'o aku nei ia kakou na Hawaii, mai ike kakou i ka nui o na dala i hoahuia, a i ka wa e loaa mai ai, o ka wa aku la ia e kuai ai i kela ame keia mea e makemake ai, aia no ka pono o ka pau, alaila hoomaka hou aku ana e hoahu, o kela kekahi o na hana hawawa loa; a o keia no hoi ke kumu i pipili mau mai ai ka pilikia me kakou i na manawa apau i kaahope ae nei.
O ka hana naauao, o ia no ka hookomo hou ana aku i kekahi hapa o ka huina i hoahuia maloko o ka banako, a e hoolilo aku i kekahi hapa, no na mea i makemakeia, no ka pono o ka ohana, a no kekahi mau pilikia pili loa paha i ka noho ana; mamuli auanei o kela hookaawale mau ana i kekahi hapa, o na dala i hoahu liilii ia, e loaa ai kekahi huina mahuahua; o ka loaa iho la no ia na mea nao nui loa a na Hawaii i makemake ai, e laa paha na aina ame na home no lakou e noho ai, ma ke ano kuokoa, aole hoi o ka noho mau maloko o na hale hoolimalima.
Eia aku na aina hoopulapula ma Molokai a weheia mai, i keia makahiki aku no na Hawaii e hoi ai a noho malaila; o ka ohana i maakukau me ke dala, maloeloe ke ku ana ae, a haalele iho i ka noho paaua ana, a hoi aku ma kahii a lakou e olelo ae ai he honua paa; a o ka mea i nela, a i hemahema, hookuanui ke alahele e hoea ai no kela mau aina hoopulapula.
Ua hiki no i na Hawaii ke hoahu i ka lakou dala ma na banako apau nei ke ano hoomakaulii, me ke komo ole iloko o ke Kalapu Hoahu Karisimaka; o ka mea nae i nani ai ke komo ana iloko o keia kalapu hoahu nei koi mau mai ana ia i na lala e hoomau ka hoahu ana i na pule apau, oiai nae, ina ma kekahi hoahu ano e ae, aia no ka manawa a ka mea hoahu e makemake ai e hookomo aku i kaua mau dala, he mea hookuemi keia i ka manao hoahu, e hoomahuahua i ka mea i hoahuia.
A hoea mai i ka la no ka wehe ana i ke Kalapu Hoahu Karisimaka hou, o ka 1922, mai hoalo e na Hawaii i ko oukou lilo ana i mau lala no kela kalepu!
__________________________________________________________________
HE LEO PAIPAI I KA
POE LAWE PEPA.
O keia ka helu hope loa e puka aku nei o ka Nupepe Kuokoa no keia makahiki, alaila komo aku kakou i ka makahiki 1922.
No ka hoomaopopo hou ana aku i ka poe lawe kumau i ka nupepa ma ka makahiki, a ma ka eono mahina paha, he elua dala me ka hapalua ($2.50) ka auhau o ka nupepa no ka makahiki, ua hoomaka keia hoopii hou ana ae i ka auhau o ka nupepa mai ka mahina mai nei o Augate i hala aku nei, o keia makahiki, no ka poe i uku ole mai i ka lakou nupepa ahiki i ka la hope o keia mahina; aka no ka poe i uku piha mai, ua kaawale lakou, mai ka uku hou ana iho, i ka paku'i, maluna o ka auhau mua no keia makahiki.
E hoomaka ana nae mai ka mahina aku O Ianuari, e uku like ana na mea apau i keia auhau hou, o elua dala me ka hapalua no ka makahiki holookoa; ua hiki no nae ke uku mai no na mahine eono, o ia, hoi he hookahi dala me ka hapaha; elike me ka hiki i ka mea lawe nupepa ke uku.
Ma keia hoakaka hou ana aku, ke lana nei ko makou manao, aole he mau kuhihewa ana i koe, ma ka aoao o ka poe, lawe nupepa; ua lawa loa kela mau mahina i hala ae nei, o ka hoikeia ana aku o keia hoololi pili i ka auhau o ka nupepa, e pohihihi ole ai kekahi mea.
He mea no na makou e hauoli ai, ka ike ana i ka makaala o ka hapanui o ko ke Kuokoa poe lawe kumau, i ke ola o ka nupepa, i na makahiki ae nei i hala, a ke lana nei ko makau manao, e hoomau mai ana lakou i ka makaala ana maka nee ana aku o ka makahiki hou.
Ke hauoli pu nei no hoi makou, no ka nui ohohia o na Hawaii i keia nupepa, a ua hooiaia mai ia ohohia, mamuli o ka hoopiha mau ia ana o kona mau aoao, me na manao like ole, i kakauia mai e na makamaka, i kela ame keia manawa; he hana a makou e manaoio nei, e hoomau ia aku ana no ia ma keia makahiki ae e hoea mai ana.
Ua hoomahuahua hou ia ae na aoao o ke Kuokoa, mamuli o ka hookaawaleia ana o kekahi aoao holookoa, no na manao pili i na hana hoopulapula i keia lahui kanaka, o keia kekahi o na aoao ano nui loa; a i hoopomaikaiia aku ai ka poe heluhelu, mamuli o ka heluhelu ana i na mea e puka mau aku ana i kela ame keia pule.
O keia wale no ka nupepa i makaukau mau e hoolawa aku i na makemake apau o na Hawaii, ke panee mau aku nei ia i na mea heluhelu o kela ame keia ano, mai na moolelo hoonanea, na manao hoonaauao, ame na nuhou o na ano like ole; nolaila he ipukukui malamalama ia no na home Hawaii, e pono ai i na ohana Hawaii apau elawe i ka Nupepa Kuokoa ka nupepa e loaa ai ka ike ame ka makaukau i ka kakou olelo makuahine e hiki ai ke kamailio i ka olelo Hawaii me ka pololei.
__________________________________________________________________
Ua hoomaikai ko ke kulanakauhale nei poe, no keku maoli ana i ka maluhia, o ke ahiahi o ka Poaono aku la i hala, ke ahiahi mamua iho o ka la Karisimaka; ina pela i'o, e hoomauia aku ia kulana maluhia, ma ka po o ka la apopo, ma keia kulanakauhale, aole no ke Karisimaka ana o kekahi, a no ka Makahiki Hou ana o kekahi, pela iho la e hookaokoaia ai ke ano o keia mau ahiahi, aka e kapae loa ia aku na ano kupono ole i ike mau ia o na manawa ae nei i hala!
__________________________________________________________________
O ka poe e noho aie nei no ka lakou nupepa, no ka makahiki e pau ana, he pono e hoomanao koke mai i ko lakou aie, a pela pu hoi ka uku ana mai i ka auhau no ka makahiki hou. O ka noho aie ole ka lanakila!
__________________________________________________________________
NUHOU
KULOKO
__________________________________________________________________
I ke kulanakakauhale iho nei ka Rev. P. Puuki o Kealia, Kauai, a ma ka po o ka Poakolu nei i huli hoi aku ai oia no ka Mokupuni Kaili La.
__________________________________________________________________
E hoomaka ana ma ka la 9 ae nei o ka mahina o Ianuari e wehe hou ia aku ana ke Kalapu Hoahu Karisimaka ma ka hale banako hoahu liilii o Bihopa ma.
__________________________________________________________________
E kukulu aku ana ka hui hana uwila i hale hou makai ae nei o Iwilei iloko o na mahina elua mai keia manawa aku, i hiki aku na hoolilo ma kahi o ke kanaono kaukani dala.
__________________________________________________________________
I ke kulanakauhale iho nei ku Hope Makai Nui Levi Joseph o Molokai kahi i hoohala ai i kona Karisimaka, a ma ka Mikahala o ka Poalua nei i huli hoi hou aku ai oia no Molokai.
__________________________________________________________________
Ma ka paina awakea a ke Kalapu Hoeueu a na haole o ke awakea o ka Poakolu nei, i hoonanea ae ai o Sam Toomey ame Lot Kauwe i na lola o kela kalapu, me na himeni Hawaii.
__________________________________________________________________
Mamuli o ka pihaku'i loa o na kolamu o ke Kuokoa i keia pule i hoopanecia ai ka hoopuka ana aku i kekahi mau palapala a na makamaka a loaa kahi kaawale o ka pepa no keia pule ae.
__________________________________________________________________
Piha mau na po a ka Hui Phoenix e hoikeike mai nei i na hana hoopihoihoi noonoo, malalo ae nei a Aala Paka, i kau a mea o ke ku maoli no o ua hana hoikeike i ka nani ame ka maemae.
__________________________________________________________________
Ku i ka nani na ha i lawelaweia maloko o ka pa'lii, ma ke ahiahi o ka Poaono aku Ia i hala, me ka nui o ka poe i hoea ae malaila ma kela po, no ka ikemaka ana i na hoikeike ame na himeni.
__________________________________________________________________
Imua o ka Lunakanawai Kemp, ma ke kakahiaka o ka Poalua iho nei, i lawe ae al ka Lunakanawai Andrade i kaua hoohiki oihana, ma ke ano he lunakanawai mua no ka aha kaapuni ma Honolulu nei.
__________________________________________________________________
I kulike ai me ka maa i ua makahiki ae nei i hala, he mau dala makana ka na kanaka lawelawe oihana o ka haawi makana ana ae i ka Makai Haumea, o ke@@@ Kalopa me Papu, ma keia Karisimaka iho nei.
__________________________________________________________________
E hoomaka ana ma ka la l o ka mahina ae nei o Ianuari, e hoemi ana ka hui kaaahi o Dilinahama ma i ka auhau o na ohua ame na ukana, mamuli kela o ka hoopauia ana o na auhau kaua i kauia no na tikiki.
__________________________________________________________________
Mamuli o ka nui o na makai i hoonohoia no ke kiai ana i ka poe koloke ma ke ahiahi o ka Poaono aku nei i hala, he maluhia ka mea i ikeia ma kela po, aole hoi elike me na la Karisimaka e ae, ka piha i na hana kolohe a hoopilikia i ka lehulehu.
__________________________________________________________________
NA MARE.
Paul Keahi Adams ia Mrs. Agnes Kanui, Dec. 24.
Benjamin H. Mahoe ia Helen Akau, Dec. 24.
Ah Kung Young ia Ah Moi Kam, Dec. 24.
Miner Colburn ia Bertha Landgraf, Dec. 24.
Lawrence K. Perez ia Philomena Lei Kamaile, Dec. 26.
Vernon H. Kilhorn ia Evaline Saffrey, Dec. 26.
Charles K. Kealoha ia Annie Kahoiwai, Dec. 27.
__________________________________________________________________
NA HANAU
Na Dewey Keohohina ame Eliza Kakalia, he kaikamahine, Dec. 13.
Na Robert Correa ame Mary Grace, he keikikane, Dec. 15.
Na Harry Kuhia ame Rachael Holualoa, he kaikamahine, Dec.13.
Na Joseph Alana ame Agnes Wright, he keikikane, Dec. 14.
Na William Landford ame Mary Kaaa, he kaikamahine, Dec. 19.
Na Abraham Amoy ame Adeline Hoke, he kaikamahine, Dec. @!.
Na Manuel Silva ame Emily Stubblebeen, he keikikane, Dec. 22.
Na D. Kalauokalani ame M. K. Ryan, he kaikamahine, Dec. 25.
Na Mr. ame Mrs. Joseph R. Hoke, he kaikamahine, Dec. 26.
Na Mr. ame Mrs. Daniel Kahikina, he keikikane, Dec. 26.
NA MAKE.
Rebecca N. Kakano, ma ka Halema’i Moiwahine, Dec. 20.
Edward Ano, ma ke alanui Dowsett, Dec. 20.
Luka Fraser, ma ka Home Leahi, Dec. 22.
Kalua Kanawaliwali, ma ka Halema’i Pupule, Dec. 23.
Ben Napua Maihui, ma ke alanui Hustace, Dec. 22.
He bebe na Mr. ame Mrs. Kalauokalani, ma Kaimuki, Dec. 22.
Maleka Keawe, ma ka Halema’i Moiwahine, Dec. 25.
George Palikapu Kanai, ma ke alanui Dayton, Dec. 26.
Mrs. Hilda I. B. Teehera, ma ka Halema’i Moiwahine, Dec. 26.
Kauhi K. Koahou, ma ke alanui Keawe, Dec. 27.
Carrie Mahele, ma ka Halema’i Moiwahine, Dec. 27.
Sarah Ho, ma ke alanui Manana, Hilo, Dec. 27.
William Kealoha, ma ke alanui Aald, Dec. 27.
N U H O U
K U W A H O
HAVRE, France, Dec. 21.-Ua hoi mai nei mai Amerika mai i keia la ka Ilamuku Ferdinand Foch. Ka alihikaua nui o na pualikoa a na aupuni huiia, ame Rene Viviani, ke kuhina nui Palani mua. O Viviani kekahi i akoakoa pu aku ma ka ahakuka uni a na elele aupuni ma Wakinekona ma kea no he poo no na elele Palani, a no ka Ilamuku Palani Foch hoi he malihini kie kie oia na ka American Legion ma Kansas City. Ua hookipaia mai laua me ka houoli nui ma ka uwapo maanei.
NU IOKA, Dec.22, - I ka mauawa o ka weheia ana o na puka o ka Banako Woff e ku nei maauei i keia la i ikeia ai ka aihueia ana e ka poe aihue $100,000 mai na pahu waiho dala aku i wawahiia ai me ka hamare mahope o ke komo ana mai o ka poe aihue iloko me kekahi ihoiho acetylene.
WAKINEKONA, Dec. 22-He bila kanawai ka i hookomoia ae iloko o ka hale o na lunamakaainana i keia la e noi ana e aeia ka hana ana i ka bia 2:75 pakeneka alekohola iloko a e hoakaka ana i $7 ka auhau e kauia maluna o ka barela, a o na dala apau e loaa mai ana mai ka bia mai e hooliloia aku no ka uku ana i mau uku man @
MALTA, Dec. 23. – Ekolu mau mokukaua Pelekane i kauohaia e holo Hoke aku i keia la a Aigupua no ka mea e pili ana i na haunaele i ala ae maloko o Cairo. Ua kauoha pu ia aku kekahi mau mokukana e ae e ku nei maanei e hoomakaukau no ka holo ana aku iloko o ka Manawa pokole loa e hoike ia mai ai.
WAKENEKONA, Dec. 23-O ka Amerika makana Kalikimaka he $20,000,000 i na lahui kanaka poloi o Rusia, ua ikeia he mea oiaio ia i keia la i ka Manawa a ka Peresidena Harding i kakau ai i kona inoa i ka olelo hooholo e kauoha ana no ka hooliloia aku o ia huina no ke kuai ana i ka palaoa amen a meaai e ae no ka hoounaia ana aku i Rusia.
TOKIO, Dec. 27-O ke kuikahi mawaena o Amerika, Beritania Nui, Iapana ame Palani, i kakauinoaia ai ma ka ahakuka ma Wakinekona maluna o ua hana e pili ana i ka Hikina Loa, aole i komo pun a mokupuni nui o ke aupuni o Iapana maloko o ia kuikahi, o keia wehewehe ana a na luna aupuni Kepani i manao o ia kuikahi. Na Iapana ana no e lawelawe i na hauhaele kuloko apau e ala ae ano maloko o Iapana me ke noi ole aku i na aupuni mana nui e ae i aelike ma ke kuikahi e kokua mai o keia ko olelo hooholo i hoikeia ae a ke aupuni.
MA NA OTOMOBILE E LAWEIA AI KA OKOLEHAO.
No ka hookolo ana aku mahope o ka poe hakihaki i ke kanawai hookapu waiona, i hoolilo ai o Patrick Gleason ame kona mau kanaka i ka wanaao o ka Poaono aku la i hala, ahiki i kea o ana ma ka hakilo ana i na kaa halihali ukana main a apana kuaaina mai, ina paha o ka waiona kekahi ukana a kela mau kaa e halihali mau nei no keia Kulanakakauhale, @ ka mea papiki nae @ aohe he kolehau @ iki i loaa ia lakou.
No kela hoi hele ana mai o na luna oihana e hooko ana i ke kanawai hookapu waiona, i hoakaka ae ai o Patrick Gleason, aole maluna o na kaa halihali ukana, e laweia mai nei ka okolehao no ke kulanakauhale nei, aka maluna mai o na kaa otomobile.
Ua nui na kaa halihali ukana i hoohuoiia, o ka noke ia ana i ka huli, me ka loaa ole he okolehao maluna o ia mau kaa.
Ma ke alanui Kukui ae nei nae i loaa aku ai he Korea o Kim Hun Gun ka inoa e lawe hele ana i ka okolehao me ke suaipa mai kekahi hale a i kekahi, me kona paa ana mai i ka hopuia.
Maloko o na eke a kela Korea e paa ana i loaa aku ai he hookahi galani anoipa ame elima mau galani okolehao i hookomoia iloko o na omole liilii.
K A V I C T R O L A
-Ka Meakani Mele Kilakila- he meakani e pono e loaa ma kou home. Kauoha mai i na buke hoakaka o na Pahuolelo amen a Papa Leo Mele.
NA PIANO PAANI
NA ROLA PAANI
NA PEPA MELE HOU
NA PILA AHA
ame na mea apau pili i na mele.
Bergstrom Music Co.
1020 Alanui Papu
Honolulu
HE INOA NO KAWEHILANI.
Hu mai ke aloha no ka aina,
No Hana i ka Ua Lanihaahaa.
Ka home aloha a na’lii,
I luakaha ai me ka Moae.
Hanohano Kauiki ku kilakila,
Me he kaupu aukai la no ka moana.
Keku ohaoha i ka malie,
Me he aoopua kuhao ma ka hikina.
He kiai ia no Kapueokahi.
No ka wai hoehaa a o Punahoa.
He halia he haupu o ka Uakea,
Me ka ua kupunikapa o Lanakila.
Me he akaku hoohia a la.
Ke aloha e hoonipo nei ia loko.
Me he la e kono okoa mai ana no,
E hoi e pili me Kukii.
E o e Kalani i ko inoa,
Ka wehi hooheno a Anoipua.
Haina ia mai ana ka puana,
E Kawehilani e, e o mai.
Hakuia e
PAILAKOLOHALAIKAWAIAPO.
MOSCOW, Dec. 23.-O ka heluna nui o ka poe i make maloko o na apana aina o Rusia ke pii mahuahua mau loa ae nei ia, oia ka mea i hoikela ae keia la. Aneane ma kahi o 200 mau kanaka i kanu ola ia aku i kela ame keia la maloko o ka apana Saratos ke hanai mai la na luna aupuni Amerika he 800,000 a oi aku mau keiki polloi maloko o ka apana e holopapa mai la ka wi, o ia ka mea i hoikeia ae.
WAKINEKONA, Dec. 22.-Maloko o ka Hale Keokeo i kukakuka ni ka Peresidena Harding me ka Loio Ku hina Harry M. Daugherty i keia la no ka mea e pili ana i na paohao o hui kalaia aku ana ma ka la Kalikimaka. Ua kuekaa ia e laua na moolelo o ka poe hakihaki kanawai 197 ka nui iloko o ka Manawa kaua. He nui ka poe huikala ia aku ana, pela ka manaoia.
PALAMA THEATER
KA HALEKEAKA NANI MAWAHO AKU O HONOLULU”
Sabati-MARY PICKFORD iloko o “DADDY LONG LEGS.”
Poakahi-CHARLIE CHAPLIN, iloko o “TILLIE’ PUNOTURED ROMANCE.”
Poalua-MARY ALISON iloko o ka “BIG GAME.”
UKUKOMO: 5, 10, 20, 30 Keneka.
E M P I R E
Hoikeike mau, 12 m. a 10:15 p. m.
Elua hoikeike Poaono, Sabati me na La Kulaia, 6:30 ame 8:30
Ke paani nei—TOM MIX iloko o “THE TERROR.”
Hoomaka i ke Sabati—EILEEN PERCY iloko o “BEWARE OF THE BRIDE”
Hoomaka i ka Poakolu—SHIRLEY MASON iloko o ‘GIRL OF MY HEART.”
UKUKOMO: 15, 25, 40 Keneka; Ukuia ka auhau, kaua.
H A W A I I
Elua hoikeike Poaono Sabati me na La Kulaia, 6:30 ame 8:30
Hoikeike mau i na la apau.
Ke paani nei—JUSTINE JOHNSTONE iloko o “SHELTERED DAUGHTERS.”
Hoomaka i ka Poalua—ANITA STEWART iloko o “THE MORE EXCELLENT
WAY.”
Hoomaka i ka Poaha—MARY ROBERTS RINEHART’S STORY iloko o
“DANGEROUS DAYS.”
UKUKOMO: 15, 25, 40 Keneka; ukuia ka auhau kaua.
L I B E R T Y
Hoikeike ao i na la apau, koe ke Sabati, 2:45. Ahiahi, 7:45
Elua hoikeike, Poaono, Sabati amen a La Kulaia, 6:30 ame 8:30
Ke paani nei—THOMAS MEIGHAN iloko o “CAPPY RIOKS”
Hoomaka i ke Sabati—MARY PICKFORD inloko o “SUDS.”
Hoomaka i ka Poaha—CLARA KIMBALL YOUNG iloko o “HUSH.”
Ukukomo: 25, 40 keneka, Noho i hookaawaleia 60c. Kalepona 5060
KUAI I NA NUPEPA ME NA BUKE NUPEPA
Buy Your MAGAZINES, NEWSPAPERS PERIODICALS
F I S H E R ‘S N E W S C A R T
BRAIN FOOD REGISTERED TRADE MARK
FISHER’S NEWS AGENCY, P.O. BOX 1224, HONOLULU, T.H.
WE TAKE SUBSCRIPTIONS
Ma ke Kaa Lawe Meahou a Fisher
He Ekolu Wale No Mau Po i Koe
No na Lealea ma Aala Paka
* * *
E naue malaila i ike i na mea ano hou loa o keia au
* * *
DON FRITZ
Ka Haole nana na hana aiwaiwa lua ole ma o ka hiki ana iaia ke ale i ka pahikaua
* * *
E ike i kahi kanaka ukulii, a i ole, ka waha i piha me ke okooko ahi
Lawe Mai e Hoohauoli i na Kamiki
* * *
MA KA FEA A KA PHOENIX
Aala Paka