Ka Nupepa Kuokoa, Volume LXI, Number 5, 3 February 1922 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

 

 

NUPEPA KUOKOA

SOLOMON HANOHANO, LUNAHOOPONOPONO      HOOPUKAIA I NA KAKAHIAKA POALIMA APAU

            POALIMA                                                                             FEBERUARI 3, 1922

 

 

E HOOMANO E NA MAKUA I KEIA MEA ANO NUI.

 

Mamuli o ka hoomaopopo ana, i ka hoohemahema maoli o kekahi mau maukua i ka lawe ana ae e hoike i ka papa ola o ke Teritore, i ka manawa o ka hanau ana o ka lakou poe keiki, eia ke lawelaweia mai nei na hana huli a noii pono, e na luna oihana o ka papa ola, me ka manaoio, e lilo na keehina, e hookoia aku ana, i kumu, e malamaia ai ke kanawai, i hanaia, e pili ana i na makua hanau keiki.

Aia he kanawai e ku nei i keia manawa, e kauoha ana i na makua, na wahine hoohanau keiki ame na kauka, e waiho ae lakou i ka lakou mau hoike i ka papa ola, a i ole i na akena paha o ka papa ola, e noho kokoke ana ma ko lakou mau apana, o ka hooko ole ana i kela kanawai, e kauia no ka hoopa’i o kanalima dala ke kiekie, ke ku ka hewa i ka poe i ikeia ka hoohemahema i kela hana.

Ua loaa mai ka ike i ka papa ola, no ka hooko ole ia o keia kanawai, mamuli o ka hookuku ana i na hanau iwaena o ka lahui Kepani, i waihoia aku i ke Kanikela Kepani, me na hanau i waihoia aku i ka papa ola, aia he like ole nui loa, e hoike mai ana keia.i ka noho naaupo maoli o na Kepani, i ke kanawai i hanaia no ka hanau ana o na wahine i ka lakou mau keiki.

Ua hooiaiaoia mai keia noho naaupo o kela lahui kanaka, mamuli o ka ikeia ana o ka hanauia ana o ke keiki a kekahi kauka Kepani o Honolulu nei, he hanau ia i loaa ole ka ike i ka papa ola ahiki i kela mau la aku nei no i hala, o ka hopena nae, o ia no ka hopuia ana o kela kauka, a hoopaneeia nae ka hoopa’i, no ke kumu. o kela ka hihia mua loa i laweia ae imua o ka aha hookolokolo, i pili iaia.

Ehia nae iwaaena o na makua Hawaii i noho me ka hoohemahema maoli, elike ae la me kela kauka, ame ka hapanui paha o na Kepani? Ke manaoio nei keia pepa, e loaa ana no kekahi mau makua Hawaii, i hoomapopop ole i keia hana a ke kanawai i kauoha mai ai, a i waiho ole ae hoi i na hoike, no ka hanau ana o ka lakou poe keiki, no kekahi mau makahiki ae nei i hala.

He mea maikai ka lawe ana ae e hoike i na akena o ka papa ola, mahope iho o ka hanau ana o na keiki; no ka mea e lilo ana ia hoopaaia ana o ko lakou manawa i hanau ai, i kumu e hoopauia ai ua pohihihi, no na ninau ano nui e ala mai ana ma keia mua aku.

Ma na ninau i pili aku i na makua oiaio o kekahi keiki, kona manawa i hanau ai, ame ka nui paha o kona mau makahiki, e lilo ana ka hoopaaia ana maloko o ka papa ola, i kumu kokua nui mai, i ka mawehe ana ae i kekahi mau pohihihi, e laa paha, na hoopaapaa pili waiwai, ame kekahi mau hana pohihihi e ae, i konoia mai ai, ma o ka manawa i hanauia ai o ke keiki, e hoopauia ae ai na hoopaapaa ma na ano apau.

Ina ua hoohemahema maoli kekahi mau makua Hawaii i keia hana a ke kanawai e kauoha mai nei, o na wa aku nei i hala, e hoopau i kela hoohemahema ana, a e lawe ae e hoike, i ka hanau ana o na keiki mua aku. i ka papa ola, a i na akena paha, e noho kokoke ana ma ko lakou mau apana iho.

Aole no ka hoopa’i wale no a ke kanawai e hookau mai ana maluna o na makua hoohemahema, i makemake ai keia pepa, e hoeueu aku i keia manao, aka mamuli o ko makou ike ana, o kekahi ia o na mea maikai loa, pela wale no e hoopauia ae ai na hoopaapaa, a mau pohihihi paha, ma kekahi mau ninau ano nui, a mau hoopii kanawai paha.

Malia paha, ua pakele ka poe hoohemahema o na manawa aku nei i hala, no ka hooko ole ia o ke kanawai; no keia mua aku nae, e lawe aku i keia a’o a ke Kuokoa, a e hele koke ae e hoike i ka hanau ana o na makuahine i ka lakou mau keiki, ma aole i hoohanauia e na kauka, a mau wahine hoohanau keiki paha, a ina hoi na na kauka, a na na malaila, ua kaawale aku ia hana mai ia oukou aku, aka no na hanau i lawelawe ole ia e na kauka, maluna iho o na makua, ke ko’iko’i o ka hoike ana ae i ka papa ola, a i kona mau akena paha.

 

MAI PUNI I NA ALAKAI HEWA

 

            Ma ke ano he wahaolelo no na Hawaii, ua ili iho ke ko’iko’i maluna o keia pepa, ke a’o ana aku ia kakou na Hawaii, o ka oi loa aku, na limahana. e akahele loa, mai ka puni wale ana aku, i na alakai hewa ia, e na alakai o na hui uniona maloko nei o keia kulanakauhale, ka poe i makemake wale no, e imi i ko lakou mau pomaikai iho, a i ka loaa ana o ka pokeokeo ia lakou, o ke ku ae la no ia a hoi ana no ko lakou wahi i hele mai ai, a haalele iho la ia oukou, e noke ana i ka mihi, he mihi make nae, oiai ua lohi loa ko oukou ike ana i ka manao o na alakai o kela hana kukulu hui uniona.

Ke makemakeia nei na limahana apau o na kui uniona liilii, maloko nei o keia kulanakauhale, e komo ae iloko o kekahi hui nui, i kukuluia ae nei, e kekahi mau alakai ili keokeo uniona, me ka manao, pela wale no e hiki ai ke hoomaka’u ka’u ia aku na hakuhana, a ke laweia ae hoi kekahi mau keehina, e hookoia ai na manao, a lakou i hoolala ai no ko lakou pono iho.

He hana maikai no ka hoala ana ae i na hui uniona, ke manao na limahana Hawaii e hana pela. aole nae, ma ke komo ana mai a na malihini ili keokeo, ka poe aole loa o lakou wahi aloha no Hawaii nei, a i makee hoi i na oihana mikiala kuloko, ma ke ano na lakou e alakai i na hui uniona; ua hiki loa ia kakou ke ike aku me ka hoohewahewa ole, he mea liilii loa kou lilo ana e ke kanaka Hawaii, i lala no ka hui uniona; o ka mea nui a ko’iko’i i ko lakou noonoo, no kekahi mau pomaikai a lakou i nana mai ai e loaa ia lakou ina aole mai ia oukou aku e na limahana, aka mai kekahi wahi okoa mai, ma o na hana maalea la e lawelaweia ana.

He poe pupuahulu wale kakou na Hawaii, ma ke komo ana iloko o na ano hui apau e kukuluia mai ana imua o ko kakou alo; e punihei aku ana i na olelo pahele o kela ame keia ano; o ka mea pololei a kakou e hana ai, o ia no ka haawi ana i manawa e noonoo ai, a i ole, e ninau aku i na kanaka ko’iko’i a kakou i hilina’i ai; aia a loaa mai na hooiaio ana, no ke kupono i’o, e komo aku iloko o ka hui, alaila komo; aole o ko kakou alakaiia, me he poe makapo la, malalo o ka poe a kakou i noho pouliuli ai, no ko lakou mau ano oiaio ame ka lakou mau hana.

No kakou na kanaka Hawaii, eia mau no ko kakou noonoo, no ko kakou ainahanau, o ka holopono o kona mau oihana mikiala apau, o ka pono iho la no ia o na limahana; a o ka poino o ko kakou mau oihana mikiala, o ke komo ana no ia o na limahana iloko o ka pilikia.

Nolaila e hele me ke akahele, a e kaupaona no oukou iho me ka naaupo, ma ka hoao ana e ku no oukou, me ka lilo ole na ha’i, na na malihini, e alakai ia oukou me he poe makapo la.

 

E HAPAIIA I NINAU KANAWAI E PONO AI.

            I hoala ae la ke Kuokoa nei i ke poomanao maluna ae, mamuli o ka pohihihi o ke kulana o na wahine. maluna o ke kuleana e paa ai i na oihana kohoia e ka lehulehu; a mamuli hoi o ka puka okoa ana mai nei o Mrs. Atcherley iwaho, a hoike ae he moho elele lahui oia, e holo ana ma keia kau koho baloka kuikawa e hoea mai ana, ma ka aoao Demokarata, ma ke ano he moho kuokoa.

Ma ke kau koho baloka aku nei i hala. no na hoa o ko kakou ahaolelo kuloko, o Mrs. Mary Ateherley kekahi moho senatoa o Oahu nei, me kela pohihihi no. i kona kuleana e paa ai i kekahi oihana kohoia; ina paha no kona kohoia a puka ma ia kau, ina ua laweia he ninau kanawai imua o ko kakou aha kiekie, no ka hooholo ana mai, aole nae pela, ua haule oia, nolaila pau loa ka noonoo hou ia ana no ka ninau pili i ke kuleana paa oihana o na wahine.

Mamuli o ka manao kanawai o ke keena o ka loio kuhina o Hawaii nei, ma ia manawa. aole i loaa ka mana i ke kakauolelo o ke Teritore, e kapae ai i ka inoa o kekahi moho, i waiho aku i kona palapala noi holo moho imua ona, aka e pa’i aku oia i ka inoa o ka moho, ina no ia he wahine, maluna o ka baloka; a o ka ninau no kona kuleana holo moho a paa oihana, o ka aha hookolokolo kiekie wale no ka mana e hooholo mai ai.

Ke holo hou nei o Mrs. Atcherley no ke kulana elele lahui i Wakinekona, no ka makalua i hoohakahakaia iho, mamuli o ka make ana o ka Elele Kalanianaole, a i wahi e koho aku ai na makaainana ma ka ano maopopo, a i hoopakeleia ae ai no hoi o Mrs. Atcherley, mai na luhi mai o na hana kalaiaina, ame na hoolilo o kela hana. he mea pono, e noiia aku ka aha kiekie e hooholo mai i kela ninau i hoopauia ae ai na pohihihi o na mana koho baloka.

Ma ka mea maopopo e ku nei, i ke koho baloka ua haawiia mai ka pono koho baloka i na wahine i keia wa. ma o ka hoololiia ana o ke kumukanawai o Amerika Huipuia, o ia hoi, e haawi like ana i ka pono koho i na makaainana kane ame na makaainana wahine.

Ke ku nei hoi ko kakou kanawai kumu o Hawaii nei, o na makaainana kane wale no, ke paa i na oihana kohoia; nolaila ua maopopo loa, aia wale no a hoololiia ko kakou kanawai kumu, alaila holo aku i na wahine, ke kuleana e paa ai i na kulana kohoia.

He ninau keia i pili i ke kuleana paa oihana o na wahine, e pono ai i ko kakou mau aoao kalaiaina ke hapai mai, imua o ka aha kiekie; o ka hookuukuu wale ana, me ka hana ole i kekahi mea, iloko o keia mau la, mamua ae o ke koho baloka kuikawa ana, he hana ia e ku mau aku ai ke pohihihi iwaena o na mana koho baloka. a e hiki pono ole ana ia lakou ke koho i ka lakou moho.

 

 

Ua wae ae nei ka Aono Demokarata i ka lakou moho elele lahui, oia no o L. L. McCandless, o ka mea apiki nae, ke kakali aku nei oia i ka hoike ana ae i kona kahuahana a hoike mua ae ka Aoao Repubalika i kana kahuahana. No keaha mai ke kakali ana. no ka manao anei pela e loaa ai he kahuahana nana, ma ke ku-e ana aku i na mea a na Repubalika, i manao ai e hana aku iloko o ka ahaolelo lahui, ke puka ka lakou moho elele? O ka moho mua i waeia, he pono iaia ke hoike mua ae i kona kahuahana, eia no ke ku mau mai nei, kana mau maunu kii baloka o na kau lehulehu ana i holo baloka ai, no keaha ke kakali ana aku?

 

 

 

Nuhou Kuloko

 

Ua huli hoi mai nei ka Makai Nui Charles H. Rose mahope o kona hoohala ana aku nei i kekahi mae mahina me kona ohana ma Amerika.

 

Ma ka Poalua iho nei, Ianuari 31, ka la hope loa e hoihoi ae ai kela ame keia i ka hoike auhau loaa makahiki i ke keena o ka luna auhau.

 

Ma ka hora 7 o ke ahiahi o ka la apopo e kohoia ai na elele mai na kalapu mahele mai i ka Ahaelele Repubalika e noho mai ana ma ka Poalua, Feberuari 14.

 

Mamuli o ka ua o keia mau la iho nei ua hoomahaia ka hana ana a na limahana hana alanui ma ka apana o Kakaako, no kekahi mau la, no ke kakali ana ahiki i ka manawa malie.

 

Maloko o ka Odd Fellows Hall ma ka hora 7:30 p.m., o keia po Poaono iho e haawi ana ke kalapu a na “Makapo” he ahamele, ame hulahula ame hula Hawaii no ka pomaikai o ke Kula Sabati Home.

 

O na kane ame ua wahine i kupono e koho baloka a i hoopaa ole i ko lakou mau inoa me na kalapu mahele kahi e noho ana, a i hoopaa ole hoi i ko lakou mau inoa ma ka buke a ke kakauolelo, e makaala koke ae o hala ka wa pono.

 

Ua hoole o Jonah Kumalae ame Mrs. Mary Haaheo Ateherley, na moho elele kuokoa Demokarata, i ka huki ana i ka laua mau inoa, na ka lehulehu e hoole i ko laua kupono a kupono ole ma ka pahu baloka.

 

E malamaia ana ka halawai a ka Hui Pailina o Kalaepohaku ma kahi o Daniel K. Maunakea, ma ka hora elua o ka auwina la o keia Sabati iho. Feberuari 5. Ua makemakeia na lala apau e hoea ae ma ia halawai.

 

He halawai ka ka Ahahui Hawaiian Savings &. Loan association, e malama ae ana maloko o ka hale waiho buke o ke aupuni, ma ke alanui Puowaina me Moi, ma ka hapalua o ka hora ehiku, o ka po’o ka Poaha, ka la 9 o keia mahina.

 

Ua nee mai nei ka halekuai meaai o James L. Holt, mai ka Makeke Aala, a i ka Makeke Kulanakauhale i keia manawa, a malaila wale no e kuaiia ai na meaai o na ano like ole. Ke kuaiia nei ka poi ma keia makeke, ma ka umi-kumalimalima paona i ke dala, ma ke kuike.

 

Ua hoike ae nei o Senatoa C. E. King, oia kekahi e alualu aku ana e loaa iaia ka waeia maloko o ka ahaelele iaia ka waeia maloko o ka ahaelele a na Repubalika, no ke kulana elele lahui i Wakinekona.

 

Mai ka puhaka mai o Mrs. Emily K. Marino, i hanau mai ai, ma ka la 30, o ka mahina i hala he kaikamahine, ua mae koke no nae ka pua, iloko o ua la elua o kona hanu ana i na ea o keia ao inea.

 

Maloko o ka hale pohaku kahiko mahope aku o ka luakini o Kawaiahao e ku nei ma ke kihi o na alanui Mission ame Kawaiahao e malama ai ke kalapu o ka mahele umi-kumamalua o ka Apana Eha i kana halawai koho i na elele ma ka hora 7 o ka po o ka la apopo. E makaala ae e na lala o keia kalapu.

MAKE HE KEIKI NO KAUAI MA KE ANO ULIA

 

Nawai mau poka o ke ki ana aku ia mau kao o ka holo ana ma ke kualapa, aohe nae hookahi o ia mau kao i ku aku iaia.

            Ia manawa hoomaka aku la o Nawai e iho ilalo no kahi ana i haalele aku ai ia Puulei, eia nae, aole o Puulei ma ia wahi ana i haalele aku ai. Alaila hoomaka aku la ka oia e kahea a nui ka leo ia Puulei, a lohe aku la oia i ka leo o Puulei i ke kahea ana mai kekahi wahi kiekie mai maluna o ke kualapa. Ia manawa hoomaka aku la oia e pii no kahi o ka leo o Puulei ana o ka lohe ana aku, a ia hoea ana aku ana ike aku la oia ua kuke keiki i kekahi o na poka ana o ke ki ana ma ka opu.

O kona haawe ae la no ia i ke keiki a hoomaka aku la ka iho ana i lalo ma ka pali, he hana hiki pono ole nae ia uo ka nui loa o ko ke keiki uwe i ka eha, nolaila ua haalele oia i ka lawe ana i ke keiki a holo aku la i kauhale no ke kii i kekahi mea no ka hele ana mai e kokua iaia. Ia hoiana mai ana me ka makuakane pu o ke keiki ame kekahi mau lio. Ma ka Puulei olelo ka i ka makuakane ua ku oia i ka poka ma ke ano ulia. I ko laua hoea ana aku i kahi e waiho ana o Puulei ua hoomaka koke ko laua hapai ana iaia uo kahi o na lio i hoopaaia ai, a mamua o ka hoea ana o lakou no kahi o na lio i hoopaaia ai ua lele loa ae la ke aho o Puulei.

 

 

Nuhou Kuwaho

 

WAKINEKONA, Jan. 31.-E loaa aku ana ia Hawaii he haawina dala pakui o $500,000 no ka hoopau pono ana aku i na hana o ka hale aupuni federala ma Honolulu.

 

NU IOKA, Jan. 31,-Ua lilo ka ma’i flu i pahola ae ai maloko o Nu Ioka i ma’i luku maoli, elike me ia a ke ko misina o ka papa ola o ka hoike ana ae ma ka po @ la i hala. Iloko o na hora he 24 i @ he 813 ka @ o na ma’i i ikeia a he 283 mau ma’i numonia i hoikeia ae.

 

TOKIO, Iapana, Jan. 31.-O ka ma’i kihe mamuli o ke anu ke pahola nei maloko o keia kulanakauhale. a ke waiho mai la ke Kamaliiwahine Yasuhito o Atsunomiya i ka ma’i. Aohe koikoi loa o kona ma’i. Ua panikuia ke kula Gakushuin, ke kula alii, no hookahi pule mamuli o keia ma’i kihe e pahola nei ma o a maanei.

WAE NA REPUBALIKA I NA ELELE.

 

Mahele Umi-kumamakahi, Kakaako, he 5 mau inoa i waeia. O keia iho na inoa i waihoia ae: S. Leialoha, Mrs. A. K. Mendiola, F. Mendiola, Manuel Paresa, Wm, Huihui, A. I. Bright ame Solomon Hanohano.

Mahele Umi-kumamalua. Kakaako, he 6 mau inoa i waihoia ae, he 3 nae i makemakeia. O keia iho na inoa i waihoia ae: J.C. cohen, J. Auld Jr., Mrs. Emily S. Day, Mrs. Susan K. Kaahea, Mrs. Hannah En Sue Pung ame Philip E. Kaauwai.

Mahele Umi-kumamakolu, Ema Kuea, he 6 mau inoa i waihoia ae; aohe paonioni. O keia iho na inoa i waihoia ae: O. P. Soares, Thos. Treadway, H. H. Williams, E. K. Woodward ame E. Schwarzberg.

Mahele Umi-kumamaha, home o A. H. R. Vieira, 414 alanui Magellan, 1 inoa i makemakeia; aohe paonioni- A. H. R. Vieira.

Mahele Umi-kumamalima, home o J. Kukunakala, alanui Emma; he ekolu i makemakeia: aohe paonioni-Mrs. Hilda Armitage Jr., John Kukunakala ame R. N. Linn.

Mahele Umi-kumamaono, 39 Alanui chaplain, he 4 mau inoa i waihoia ae; he 2 nae i makemakeia-Mrs. Anna Callahan Akau, C. K. Wong, Jas. K. Jarrett ame E. P. Fogarty.

Mahele Umi-kumamahiku, Pauoa, he 4 mau inoa i waihoia ae; aohe paonioni- J. H. S. Kaleo, Andrew McCabe, F. Machado ame J. K. Woodward.

Mahele Umi-kumamawalu, Alanui Nuuanu ame Alanui Pauoa, he 4 mau inoa i makemakeia; aohe paonioni- J. H. Wise, G. H. Angus, M. R. Bisho ame M. F. Prosser.

Mahele Umi-kumamaiwa. Waimanalo, he 1 inoa i makemakeia; aohe paonioni-Geo Chalmers.

Apana Elima

Mahele Elima. Hokele Haleiwa, Waialua, he 4 mau inoa i makemakeia; aohe paonioni- O. P. Cox, John Kauwalu, J. G. Duarte ame W. W. Geodale.

Mahele Eiwa, Kalihi-kai, he 10 mau inoa i waihoia ae; he 7 mau inoa i makemakeia- Albert K. Akana, E. J. Crawford, E. Genet, H. Godfrey, J.P. Gomes Jr., Mrs. F. S. James, C. C. James, Mrs. Theresa Marino, E. H. F. Marino Jr., Fred Oliveira.

Mahele Umi, Kalihi-waena; he 9 mau inoa i waihoia ae, he 5 mau inoa i makemakeia-S. K. Nawaa, F. K. Cockett, R. S. Lono, J. F. Nobriga, E. K. Fernanadez, S. C. Dwight. E Hopkins, F. Schnack ame M. K. Richards.

Mahele Umi-kumamakahi, Palama, he 6 mau inoa i makemakeia; aohe paonioni-J. A. Young, A. E. Kahele, H. Vieira, W. C. Aohi, John Naiwi ame J. H. Hakuole.

Mahele Umi-kumamalua, Palama, he 4 mau inoa i makemakeia; aohe paonioni-Harry Auld. J. C. Anderson, C. E. King ame J. M. Young.

Mahele Umi-kumamakolu Alanui Liliha, he 12 mau inoa i waihoia ae, he 7 mau inoa i makemakeia-W. Paikuli, H. McInerny, O. K. Stillman, Geo, Waterhouse, J. L. Fleming, S. P. Correa, A. L. Castle, A. W. Seabury, G. R. Carter, John Goo Kim. Herman von Holt ame W.O. Smith.

Mahele Umi-kumamaha, na Alanui Muliwai ame Vineyard, he elua mau inoa i makemakeia: aohe paonioni- A. K. Vierra ame M. B. Enos.

Mahele Umi-kumamalima, Aala Paka, he 5 mau inoa i waihoia ae, he 2  mau inoa i makemakeia-Thos Pedro, W. H. Knox, Moses Kekahio, W. Kaka ame Herman Kaili.

Mahele Umi-kumamawalu halenoho o John Keola, alanui Buckle, he 5 mau inoa i makemakeia, aohe paonioni-J. N. Keola; Mark Ned, Chang Chau. D. L. Awai ame D. S. Notley.

 

OLELO HOOLAHA

 

Ke hoikeia aku nei ka lohe ma keia i na lala apau o ka Hui Kokua a Hookuonoono o na Wahine Oiwi Hawaii e akoakoa ae ma ka luakini o Kawaiahao ma ka hora 10 a. m., o ke Sabati, Feberuari 5, 1922.

Ma ke kauoha,

            MRS. MAIKAI KALEO,

  K. K. Moolelo o ka H. K. H. W. O,

 

HALE O NA ALII O HAWAII.

 

E malamaia ana ka halawai kumau o ka Hale o na Alii o Hawaii (Ahahui Poo), ma keia Sabati, Feb. 3, ma ka Phoenix Hall, hora 2 p. m. He hoolaa mamo hou kekahi.

   Ma ke kauoha a ka Iku Hai.

                        WM. J. COELHO,

                                    Iku Kau.

 

NA MARE.

 

Lum Kim ia Mrs. Rebecca Kualii, Jan. 28.

Au Quan Yan ia Hattei Nuhi, Jan. 31.

 

NA HANAU.

 

Na Mr. ame Mrs. Grantking Kanakaole he kaikamahine, Jan. 21.

Na John Joseph Meyer ame Elizabeth P. M. Moek he keikikane, Jan. 23.

Na Samuel Mani ame Rose Aimoku, he keikikane, Jan. 24.

Na Dan Stone ame Florence McCandless he kaikamahine, Jan. 26.

Na Mr. ame Mrs. James Kahalewai, he keikikane, Jan. 28.

Na Mr. ame Mrs. Henry Keola he keikikane, Jan. 30.

 

NA MAKE.

 

John Kamaka, ma ka Halema’i Moiwahine, Jan. 24.

Alice Robert, ma ka Halema’i Kepani, Jan. 25.

Margaret K. Manewa, ma ke alanui Kamehameha IV, Jan. 25.

Joseph Kahananui, ma ke kihi o alanui Moi ame Kamehameha, Jan. 26.

Alice Friel, ma ka Halema’i Moiwahine, Jan. 26.

Kahoino Aweau, ma ke alanui I, Kaimuki, Jan. 28.

Joseph K. Kanuha, ma ke alanui Kilihi ame Kanakanui, Jan. 30.

Abedin F. K. Kahookano, ma ke alanui Moi Hema, Jan. 31.

Joseph Keouli, ma ke alanui Kauluwela, Jan. 31.

 

 

 

MAOPOPO KA AE O BALDWIN E LILO I MOHO.

 

(Mai ka Aoao 1 Mai.)

 

oia, e hooko aku i ko lakou mak@ a ua makaukau hoi oia, e lilo @ paahae no ka aoao Repubalika.

Uo hoakaka pu mai o Mr.B@ no ka nui o kana mau hana mahope nei, a e hoopilikiaia ana kela @ haua, ina e kaawale aku ana @ kahi e: a ina he moho e ae kekahi @ ka ahaelele e noonoo ai, me ka @ o kona kulana ikaika, alaila @ kaukau oia, e haawi aku i na @ ana no ka waeia ae o kela @ no kona kohoia aku hoi, i elele lahui mai Hawaii aku nei.

Ua lilo kela haawi ana mai o Mr. Baldwin, i kona ae i moho elele. i @ hoohauoli, i ka manao o kona mau hoaloha, ame ka pohai o na Repubalika ko’iko’i o keia kulanakauhale @ paa loa ko lakou manao, oia @ ka waeia, maiwaena mai o ka @ na moho elele. e waihoia ae aha ko lakou mau inoa iloko o ka @ noho mai ana.

 

HE HOOMAIKAI NUI.

 

Mamuli o na makana pua a na ma kamaka ame na hoaloha i hoohiwahiwa iho ai maluna o ke kino wailua o ka makou mea aloha i haalele mai i kela ola ana. oia o Mrs. Anna Kaluahi@ Shaw, ma ka la 28 o ka mahina aku la i hala, pela hoi ka poe i k@  mai iloko o ke kaumaha pu ana @ makou, ke haawi aku nei mak@ ka ohana i na hoomaikai ana he @ ia oukou apau, a ke nonoi aku nei, e lawe aku i keia hoomaikai, me na manao ku i’o mailoko aku o ko makou mau @ wai.

Owau iho no me ka oiaio.

            GEORGE N. SHAW.

 

NEW PALAMA THEATER

 

“KA HALEKEAKA NANI MAWAHO AKU O HONOLULU”

Hoomaka Sabati- “MARY PICKFORD iloko o “SUDS.”

Poakahi-“DON’T CALL ME LITTLE GIRL.” starring MARY MILES MINTER

Poaha-JACK PICKFORD iloko o ka “ THE DOUBLE DYED DECEIVER.”

Hoikeike i na la apau. Elua hoikeike ahiahi. 6:40 ame 8:40.

 

EMPIRE

 

Hoikeike mau, 12 m. a 10:15 p. m. Poaono, 10 a.m. a 10:15 p.m.

Elua hoikeike Sabati, 6:30 ame 8:30.

 

Ke Paani Nei- “SKIRTS.” Fox Sunshine Feature Comedy.

Hoomaka Sabati-“TOM MOORE iloko o “BUDS.”

Hoomaka Poakolu-WILLIAM RUSSELL iloko o ka “THE CHALLENGE OF THE LAW.”

 

 

HAWAII

 

Hoikeike mau i na la apau koe ka Poaono ame Sabati.

KA POE HANA KEAKA A DICK WILBUR

 

Ke Paani Nei-“THE GIRL HE COULDN’T BUY.”

Hoomaka Poakahi-“THE CHURCH AND THE PEOPLE.”

Hoomaka Poaha-“OUT YONDER.”

 

 

LIBERTY

 

Hoikeike i na la apau, koe ke Sabati, hora 2:45.

Elua Hoikeike, Poaono ame Sabati, 6:30 ame 8:30.

Ke Paani Nei-KATHERINE MACDONALD iloko o ka “THE TURNING POINT.”

Hoomaka Sabati-“D. W. GRIFFITH’S Production. “THE LOVE FLOWER.”

 

E HOOMAKAULII

ma o ke kuai ana i kau mau

meaai ma ka

BAILEY’S GROCETERIA

ma ka Makeke Aala

 

O KA HOEA ANA MAI NEI NO LA

48C--- Waiubata Nukilani---48C

Ua hiki ia makou ke hooiaio o keia waiubata maikai loa e kuaiia nei ma Honolulu nei.

 

Kini Waiu Kalima Carnation Nunui .... $1.40 no ke Kakini

Kini Waiu Kalima Federal Nunui........  1.30 no ke Kekini

Kini Waiu Kalima Milk Maid Liilii.....   .60 no ke Kekini

Kini Waiukia......................................... 2.25 no ke Kekini

 

Kopaa

 

17 Paona o ke Kopaa Keokeo Helu Ekahi i ka ..........$1.00

 

 

O NA MEAAI E AE APAU UA LIKE NO KE EMI. O KE KIPA ANA MAI HE MEA IA NANA E HOOEMI MAI I KOU LILO.