Ka Nupepa Kuokoa, Volume LXI, Number 6, 10 February 1922 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

 

 

 

He Moolelo no

NA PUUWAI ELUA

A I OLE

Ka Hewa o ka Wahine---He Moolelo i

Owiliia me na Haawina Hoopihoihoi

Noonoo o ke Au o ka Manawa

 

“E hoomaikaiia na lani no kena pane au e Ela. Ua maopopo no ia oe e kuu kaikuahine, ka nui o ko’u noonoo no olua. oiai au ma kahi he mau kaukani mile ka mamao mai mamua mai, aka ke halawai hou nei nae kaua iloko o ka @.

“Ke ike mai la oe i kuu hoaloha nei, he kanaka oia i make he eono a ehiku ae nei paha mahina. He kino ma’i no kona i keia wa, ua ahona ka hoi keia, mamua o kona na i loaa aku ai ia’u ma Nu Ioka, ua hele a koe na iwi, @hona i ka imoimo mai o na maka.

Mawaena ou ame a’u e Ela, e lilo kaua i mau mea hoihoi hou aku i ka ikaika iloko o kona kino, a o ka’u wale no @ aku nei ia oe e kuu kaikuahine, mai kamailio wale aku @ ka nui ame ka lehulehu, i ka moolelo o kuu hoaloha nei. Ke hele nei o Kapena Ivana, ma ke ano pee, o ka wiwi o kona kino, ame ke puhuluhulu o kona umiumi, ka mea nana ohuna aku i kona ano oiaio maoli, mai na kanaka mai o Pelekane nei; e hoea mai ana no nae, i ka manawa ana e hoike ae ai iaia iho imua o ke akea. Aohe a kakou houlolohi hou ana iho, ua kauoha aku nei au i kekahi kaa. aia ke kakali mai la o ko kakou hoea aku,” o ko lakou nei hele aku la no ia no kahi o ke kaa a Mebure i hoolimalima aku ai.

Ia lakou nei o ka hoea ana aku no kahi o ke kaa, eleu aku la no o Ela Mebure a kau ana iluna o ke kaa, me ka ukali ana aku hoi o na keonimana elua mahope ona, a iloko o na minuke helu wale no, aia ke kaa ke holo ia, ma ke alahele e hoea aku ai no ko lakou home.

Oiai nae maluna o ke kaa, huli mai la o Mebure a kamailio ae la i kona kaikuahine:

“Ua hoopiha loa ia mai au me ka hauoli, no na pomaikai i loaa ia’u, ma keia huli hoi ana mai nei, mai ka’u huakai aku nei no Nu Ioka. O ka mua, ua makana mai nei ka hui ia’u, me kekahi kikoo dala. o iwakalualkumamalima paona, mamuli mai keia o ka nui hauoli o ko’u mau haku, no ka holomua aku nei o ka’u huakai, a o ka lua, o ia no ka haawi ana mai nei o ka hui ia’u he elua pule hoomaha, nolaila ua kupono loa keia mau makana, oiai kuu hoaloha e hoohala ana i kekahi manawa ma ko kakou home.”

“Aole ana e nele ko kakou komo like iloko o na hauoli ana iloko o keia mau la aku,” i hawanawana mai ai o Ela i kona kaikunane, me ka pii ana ae nae o ka ula ohelohelo ma kona mau papalina, i kona wa i ike mai ai, e nana pono loa aku ana o Kapena Ivana iaia. me ka loaa ole aku nae o ka ike ia Mebure, no ka nana loa o kona hoaloha ia Ela, alaila hoomau hou aku la ua o Mebure i ke kamailio ana:

“Ua lohe wale no au i kou kamailio mai ia’u e pili ana ao ka Haku Fanadale e Ela, akahi no nae au a ike iaia i keia la, a ma ko’u manaoio, o kela kekahi o na kanaka ino me ko’u hoihoi ole e ike hou ku i kona helehelena.”

Aohe a Ela pane no kela mau hoakaka a kona kaikunane, aka huli ae la nae o Mebur imua o kona hoaloha, a hoomau aku la no i ke kamailio ana:

“E lilo aku ana ka Haku Fanadale i mea noho kokoke mai ma kou home e kuu kapena maikai. O kela kekahi o na kanaka puni i na hana lealea, o ka’u mea nae e minamina loa nei, o ia no ka pauaka wale ia o kekahi wahine e mare aku ana me ia. Aole no i maopopo iki ia’u, ina paha ua hoopalau oia me kekahi wahine, ahiki i kuu lohe ana aku, i ke kamailio ana mai o kekahi hoaloha o ua haku nei, e ninau mai ana no kana wahine hoopalau.”

Mamuli o keia mau hoakaka a Mebure, i maopopo loa ai ia Ela, aole kona kaikunane i lohe iki, no ka hoopalauia ana o ka Haku Fanadale me Miss Kalani, a iloko o na mahina elua, e hookoia ai ka mare mawaena o laua.

“He hookahi no manawa a’u i ike ai i ka Haku Fanadale, iloko nae o ia ike ana, i koho koke iho ai au, aole kela he kanaka maikai,” i pane mai ai o Ela.

Na ka hoea ana aku o ko lakou kaa imua o ka puka o ka hale. i hoopau ae i na kamailio mawaena o lakou, aia hoi ma ka puka o kekahi hale maikai, e ku ana ka makuahine o Mebure, he lede aoo, i hele na lauoho a keokeo, puili ae la ka makuahine me kana keiki iloko o ke aloha kui’o, a ia kualana ana ae o ke aloha o ka makua no ke keiki, i hoolaunaia aku ai o Kapena Ivana, me kela lede oluolu.

 

MOKUNA VII.

 

Ma ke ahiahi mua loa a Kapena Ivana i hoohala ai maloko o kela home, aole loa e hiki iaia ke hoopoina i ka hio na ana i ike ai, o ia no ka hoopuniia ana o ke ola ana o ka makuahine me kana keiki, me ke aloha oiaio.

Ua halawai oia me kekahi poe wahine he mau haneri ma kana mau wahi like ole i kaahele ai, me he mea la, aole oia i ike i kekahi wahine, i like mai kona mau ano me Ela Mebure; a o kana mea i oi aku ai o ka mahalo, o ia no ka piha oluolu me ka waipa-he o kana mau olelo, e kaili mao li ia aku ai no kona puuwai.

Ma ka aoao hoi o Ela, ua nana mai oia ia Kapena Ivana, ma ke ano oia kekahi o na kanaka koa loa, a i ka manawa a kona kaikunane i hoike aku ai i ka moolelo piha o ko Ivana ola ana, ua komo ka manao aloha iloko o Ela no Ivana, no ka pakele mahunehune ana mai o kela kanaka mai ka make mai.

Mamuli o ke koikoi loa o Mebure, ua hoi koke no o Kapena Ivana e hiamoe i na hora o ke ahiahi; a iaia i haalele mai ai i na kamaaina o kela home, ua lawe pu aku oia me na hoomanao ana no Ela, ka mea hookahi a kona puuwai i ike maoli iho ai no ka hoohihi ame ka makemake.

He oiaio, iloko o na la opio o Kapena Ivana, he mau manawa lehulehu kana i noonoo nui ai, no ke ano o kana wahine, i kona wa e kanaka makua ai, he wahine ana i aloha ai; i kulike me kona makemake iho me ka hookikina ole ia mai, aka nae, mamuli o ka paakiki loa o kona makuakane e mare oia me Miss Kalani, kela kaikamahine ana i lawe mai ai, no ka hooko ana aku i ke kauoha, a ka makuakane o kela kaikamahine, ua haawi aku la oia i kona ae, no ka hooluolu wale ana aku no i ka manao o kona makuakane.

Ke noonoo la oia, ina nei no kona mare aku me Miss Kalani, aole no e lilo ana ia mare ana, i mea e hoohauoliia mai ai oia no ka mea ua kaokoa loa ko Miss Kalani ano, mai kona ae, a ina no paha ua lilo ae na ano o ua kaikamahine nei, mai keia manawa ana i haalele hope iho ai iaia, he ehia makahiki i kaahope aku, aole ona mauao elike mai ana kona ano me ko Miss Mebure, ka mea ana i koho maoli iho ai no, ua kupono maoli e lilo i wahine nana. Me kela mau noonoo like ole iloko o ke kapena opio, i haule aku ai oia hiamoe, a oiai hoi oia e hihi’o la i na moe uhane lehulehu, aia o Mebure maloko o ke keena hookipa o ko laua wahi home, kahi i hoike aku ai i kona makuahine ame ke kaikuahine e pili ana no Ivana ame na mea a kona makuakane i hoolala mua ai, no kana keiki ame kana kaikamahine hanai.

“Ua paa ka manao o Kapena Ivana, e hooko aku elike me ka makemake o kona makuakane, a o ia ka’u e kanalua loa nei, i ka holopono o kela manao o ka makuakane, no ka mea aole he wahi lihi aloha iki o Ivana no Miss Kalani. Aole nae oia i hoike maoli mai ia’u pela, aka ma ke ano o kana mau olelo, i hiki ai ia’u ke hoomaopopo aku, aole he wahi lihi hoihoi iki iloko ona no kela kaikamahine, a ua lilo no hoi i mea pohihihi loa iaia, ke kumu nui o ka lawe ana mai o kona makuakane ia Miss Kalani maloko o na kaupoku o kona home.

“O ka mea hu aku o ka aka, ina paha no ka loaa aku o ka ike ia Miss Kalani, eia no ka hooilina oiaio o na waiwai ana e uhauha mai nei, ke ola nei, e pii ana ka lena o kela kaikamahine; no ka mea ua kuhihewa maoli no oia, aole he mea kuleana e ae i na waiwai o Sr. Leonada, aka oia wale no. No kela manao ona pela, i hoopauia aku ai ka Loio Malo, ka mea nana e hooponopono ana i kela mau waiwai, no na makahiki he iwakalua a oi, a lawe mai la oia nana ponoi e hooponopono i ka waiwai, ma ke ano uhauha.”

“Aia i’o kekahi mea maikai ole e hoea mai ana ma keia mua aku,” i pane mai ai ka makuahine o Mebure. “Oiai ua hala aku oe no Amerika no kekahi mau mahina, nolaila aole au mea i maopopo i na nuhou pili i na kane ame na wahine.”

“He mea liilii loa na nuhou o kela ano i ko’u noonoo. he hookahi wale no a’u mea noonoo nui, o ke kamailio o na kanaka, no ke poho o ka kakou mau dala.

Ina nae ua pili keia nuhou ia Kapena Ivana, alaila ma ia ano wale no, i makemake ai au e lohe, no ka mea he kuleana nui ko’u. ma ke ano he hoaloha nona, e lohe ai i na mea apau’i pili aku iaia. Aole olua i ike i ka mea a Kapena Ivana e hana mai ana no’u, i kekahi la e ike aku ana no olua, owau ana kekahi hoahui iloko o ka hui a’u e noho hana nei, a o kekahi mea ano nui, e hoea mai ana he mare iloko o ko kakou ohana i kekahi la. e ike ana keia kanaka o Konela Guini, e hoea mai ano nui, e hoea mai ana he mare iloko o ko kakou ohana i kekahi la. E ike ana keia kanaka o Konela Guini, e hoea mai ana he la ma keia hope aku, e ai ai oia i ka pai iloko o ka pono o kona mau lima, a o ke kulana ana e paa nei i keia la, owau aku ana ma ia wahi.”

“Mai kikoo wale aku no oe e Keaka. i na mea i maopopo ole.” i pane mai ai o ela me ka noke pu ana ae i ka akaaka.

“E kakali malie iho oe e Ela pela, e ike aku ana no oe i ka mea oiaio loa. Pehea ua lohe mai anei oe i kekahi mau mea mai ia Kakalina mai?”

“Ae, eia oia ame kona mau makua. i ke kulanakauhale nei i keia mau la, a ma ka’u koho aku, e hoolaunaia aku ana o Kakalina iwaena o ka pohai o ka poe hanohano a lalawai o ke kulanakauhale nei.”

“He keu ke kanaka hilahila ole, o ka manao ana pela iho la e hana ai i kana kaikamahine, o ka hoikeike aku imua o ka poe hanohano, pela e loaa ai kana kane. Ua ahona kona waiho ana aku ia Kakalina ma ke kudala, a o ka mea kiekie loa o kana haawi ana, iaia e lilo ai kela wahine opio, no ka mea o ke dala wale no ka makemake o kela kanaka. me ka manao aloha ole no kana keiki. Ina ka hoi no ka loaa koke ia’u o ka waiwai i keia manawa. aole loa au e hoohakalia i ka hele koke ana aku e kii ia Kakalina. a lawe mai iaia i wahine mare na’u, ua hiki nae hoi, e hoea mai ana ka la a Konela Guini e mihi ai me ka walania loa.”

“E hoomanawanui e kuu keiki. e hoea mai ana no i ka holopono ana o na mea apau no kou pono,” wahi a ka makuahine, no ka hooluolu ana mai i na manao kukahalake o kaua keiki, no kona hooneleia ana mai i ke kaikamahine ana i aloha ai, mamuli o kona ilihune.

“Malia paha ua pololei oe e mama; aka no kau mea i manao ai e kamailio mai e pili ana ia Miss Kalani, ua makaukau au e hoolohe aku i keia manawa!”

“Owau ka mea nana e hoike aku ia oe e Keaka,” i pane mai ai o Ela. “Ua hoopalauia o Miss Kalani me ka Haku Fanadale, a iloko o na mahina elua i koe, e hoohuiia ai laua iloko o ka berita o ka mare; eia nae iloko o keia mau la kakaikahi wale no o ke kaa ana aku o na waiwai o Sr. Leonada malalo o kela wahine opio, ua hiki aku ma kahi o ke kanalima kaukani paona, a Miss Kalani i haawi aku ai i kana kane hoopalau, no ka uku ana i kona mau aie.”

“He keu maoli keia o ka nuhou maikai ole, no ka mea o Ivana hookahi wale no ka mea kuleana i na dala apau a kona makuakane, a o na dala kela a Ivana, e uhauhaia la e kela mau aeahaukae, wahi a Mebure, me ka luliluli ana ae o kona poo.

“Me he mea la, ma na wahi apau o Enelani nei ua piha na mea apau i ka hoowahawaha no Miss Kalani, ua like pu oia me kekahi wahi mea paani iloko o na lima o ka Haku Fanadale, o na makemake apau o kela kanaka. e hooko wale ia ana no, ina no ia he mea e hooliloiaa aku ai na waiwai apau a Miss Kalani e paa nei.”

“Ke hauoli loa nei au i ka loaa ana mai la ia’u o ka ike, i na mea i hanaia mahope nei, o ka’u a’o wale no ia olua, e hamau loa kakou, aole e kamailio iki aku ia Ivana. i kekahi o keia mau mea, ahiki i ka hala ana o na pule elua, a i ole i ka wa paha e ikaika pono mai ai ke ola kino o Ivana.

“Ua hoohauoli ia mai no hoi au, no ke kaawale loa ana o Ivana, mai ka hoohiki i hanaia e kona makuakane no ka mare aku ia Miss Kalani. Ua lilo keia mare i hoolalaia mawaena o laua, i kumu nana e hookaumaha mau i ka noonoo o kuu hoaloha, akahi nae a loaa ka maha iaia, ua mokumokuia ae la ke kaulahao nana i kupee i kona kino ame kona uhane, a paa me kekahi kaikamahine, i like aku kona ino me ko ke diabolo.

“Aole olua i ike i ke ano maoli o Ivana, oia kekahi o na keonimana maikai loa, aia a hoi pono mai ka ikaika iloko o kona kino, e koi aku ana au, e kahi oia i kona umiumi, ia wa auanei e ike maopopo aku ai olua, oia kekahi o na kanaka huapala maoli me ka hiehie o kona ano, o ia no oe o kekahi o na keikialii o Europa.”

Ma kela wahi o ka lakou mau kamailio, i haawi aku ai o Mebure i kona aloha poeleele i kona makuahine ame ke kaikuahine. a hoi aku la e hiamoe, pela no hoi na lede i hoi pu aku ai e hiamoe maloko o ko laua mau rumi.

Ma ke kakahiaka nui ae o kekahi la mai, o Ivana ka mea mua loa i ala ae mai kona hiamoe mai, me ka hele ana e holoholo maloko o na malapua, a ke nana aku i ua kapena nei, ua loli hikiwawe loa kona ano no ka maikai ame ka oluolu, ua lilo hoi ia, i mea hoohauoli aku i ka manao o kona hoaloha.

Oiai lakou apau e ai ana i ko lakou aina kakahiaka, hoea mai la ke kanaka laweleka. me kekahi leka, na Ivana, mai ia Mr. Malo mai, ka loio o kona makuakane. Maloko o ua leka nei, kekahi kikoo dala, a ma kahi nae o ka elua haneri paona, elike me ka Ivana, i noi aku ai e loaa mai iaia. ua hoouna mai kela loio, he kanalima paona hou ae mawaho, ua like me elua haneri me kanalima paona.

Penei iho ka leka a ka Loio Malo i kakau mai ai ia Ivana:

“E Kapena Ivana Leonada:-Ke hooko aku nei au i ka mea a’u i hoopaa aku ai ia oe, i keia kakahiaka, aka nae ke hoouna pu aku nei au he kanalima paona mawaho ae o na haneri paona elua au i makemake ai, malia he mea kokua aku no hoi keia ia oe no kekahi manawa. Ina he manao kekahi iloko ou, e koi koke aku i kou kuleana i na waiwai o kou makuakane i make, o ka’u a’o wale no ia oe, o ia kou hoike mua ana mai ia’u, a mai hana me ka pupuahulu.”

Mahope o ka aina kakahiaka, ua hoohalaia kekahi mau minuke e Ivana ame Mebure, ma ke kukakuka ana, no ka waiwaiio o na dala Pelekane ma ke dala Amerika, a i ka maopopo ana, ia wa i kakau iho ai o Ivana i kekahi leka, na kona hoaloha, ke kapena o ka mokuahi, nana i haawi mai he elima haneri dala iaia, a o keia ka manao o kela leka ana i kakau iho ai:

“E kuu Kapena Vanaba aloha: Ua maopopo ia’u e hookahaha loa ia ana oe, i kou wa e heluhelu iho ai i na manao maloko nei o keia leka. O ka mua, aole loa oe i moeuhane iki, e ike hou ana oe i kela elima haneri dala au i haawi mai ai ia’u ma ke ano aie; pela hoi ka loaa hou o ke ola maikai ia’u; ua lohe au i kou kamailio no keia mau mea, i kekahi o kou mau hoaloha maluna o ka mokuahi. Ke pii hikiwawe ae nei ka makai o ko’u ola kino i keia manawa; a oiai he hana maikai ole ma ko’u aoao, ka huna ana ia’u iho, iloko o kau mau hana ku i ke aloha ame ke kokua i hana mai ai no’u, ua konoia mai au e hoike okoa aku i ko’u ano imua ou, o ia keia: Owau no kela aliikoa Pelekane i manaoia ai ua make i ka haulelau aku nei i na kanaka o Aferika. I hoike aku la au ia oe no ko’u ano, mamuli o ko’u makemake e lohe mai ia oe mai i kela ame keia manawa kupono au e manao ai e kakau mai ia’u.

“I noho nae oe, a ku ka makemake e holo mai no Enelani nei, ua hamama na ipuka o Kanale Hale ia oe i na manawa apau, a e lilo no oe i malihini hanohano loa na’u, na kau kauwa na Ivana Leonada.”

I ka paa ana o kela leka a Ivana. hookomo iho la oia he hookahi haneri paona bila dala pepa o Pelekane, ua like hoi ia me elima haneri dala Amerika, alaila koi aku la oia ia ela Mebure, e hele like laua, no ka hookomo ana aku i ka leka maloko o ka haleleka.

Ia laua e hele la ma ke alanui, ke noke aku la o Ivana, i ka haha’i i kekahi mau hana hoopihoihoi noonoo, o kana mea e paha’oha’o la, o ia no kona ike maoli iho, i kona piha hoihoi maoli, aole hoi elike me na manawa mamua aku, ka wa ana i manao ai, aole hoi elike me na manawa mamua aku, ka wa ana i manao ai, aole he waiwai o kona ola ana aku.

“He hookahi wale no iini nui iloko o’u, mamua o ko’u halawai ana me Keaka ma Nu Ioka, o ia no ke ake ana e maopopo, ina paha ke ola nei no kuu makuakane, a i ole, ua make paha oia. I ka manawa nae i loaa mai ai ka ike ia’u, ua haalele iho oia i keia ola ana, ua pau loa ae la ka hoihoi iloko o’u, no ke ola ana aku,” i kamailio mai ai o Ivana ia Ela.

“Owai hoi ia mea nele ole, i ke komoliia o ka manao o kena ano, mamuli o ka ike ana iho, ua hala ka makua ma kela ao.” wahi a Ela i pane aku ai me ka leo o ka mea i piha me ke kaumaha.

“Ua hooikaika maoli no o Keaka ma na ano apau, e loaa ia’u ke ola kino maikai a ikaika, a i keia manawa, akahi no a komo mai ka makemake iloko o’u, e ola aku, a e hakoko me na inea o keia ao luhi.”

“Ae, ua hoakaka mai o Keaka kuu kaikunane i na mea apau i ka po nei e pili ana ia oe ame na mea a kou makuakane i hoolala ai mamua o kona make ana.”

“He mea makehewa ko kaua kamailio ana, no na mea a kuu makuakane i hoolala ai, no ka mea aole e liiki ia’u ke mare ia Miss Kalani, a manao no au. aole he wahi lihi noonoo iki iloko ona no’u. O he wahi kaikamahine uuku wale no oia ma ka’u manawa o ka ike hope loa ana aku iaia.”

“Aole oia he wahi kaikamahine uuku, elike me kau i manao ai, aka oia kekahi o na wahine nui, malia paha no ka loihi loa o kou kaawale ana, ke kumu o kou manao ana, he o ia no ka uuku o kona whai kino.”

“Ae, he elima makahiki keia o ko’u ike ole ana iaia: ma kela manawa o ko’u kaawale ana aku no na aina mamao, he wahi kino uuku wale no kona, a ua nele hoi me na ano e hoohihi aku ai ka manao. Aole e hiki ia’u ke hoomanao ae i keia manawa, no ka’u mau mea i hoomaopopo nona.”

“O ka mea oiaio ea, he keu o Miss Kalani a ka wahine kino loihi, a ua kapa aku kekahi poe iaia, i ka wahine huapala. Aole nae au e akena wale aku ana i kona u’i, aka e loaa aku ana no ka ike ia oe nona ma keia mua aku, a nau no e haawi i kau olelo hooholo e pili ana iaia.”

“Malia paha ua pololei kena mau mea au e hoakaka mai nei e Miss Mebure, ua paa kuu manao e hele aku e hui pu me ia i kekahi la, no ka hooponopono ana i ko’u mau waiwai, a e haawi aku i kekahi hapa o ka waiwai nona, me he kaikuahine la oia no’u.”

Ma kela wahi o na kamailio mawaena o Ivana ame Ela hoea aku la laua no ka haleleka. a i ka hookomo ana aku o Ivana i kana leka, a hoomakaukau mai la laua e huli hoi no ka hale, ia wa i kamailio aku ai o Ivana, i ka i ana mai:

“Ina aole au mau hana e ae o keia kakahiaka e Miss Mebure, ke nonoi aku nei au ia oe e hele ou me a’u i ka holoholo iloko o ka ululaau. He manawa loihi loa keia, akahi no a loaa he manawa maikai no’u e hele ai e honi aku i ke ala o na pua waioleka makanahelehele.”

“Aole a’u mau hana o keia kakahiaka; ua hiki ia’u ke hele pu i ka holoholo me oe. o ka’u wale no nae e kanalua nei, o ia ka ikaika kupono ole o kou kino e Kapena Ivana. Ina no kou loohia hou i ka nawaliwali, e kau mai ana na hoahewa ana a Keaka maluna o’u.”

“Aole o’u wahi pilikia iki: ua lilo ka hele holoholo ana, me ka honi aku i na ea hu’ihu’i i kumu e hoikaika ia mai ai o ko’u kino, nolaila aole au hopohopo ana, no ka nawaliwali mai o ko’u kino ma ko kaua hele ana i ka holoholo.”

 

MOKUNA VIII.

 

Iloko o kela mau la, a ka Haku Fanadale e holoholo la, ke pahola pu la kekahi lohe, no ka hoomamao ana mai o ua haku opio nei, mai kona mau hoaloha kahiko mai, a ua hoopau aku hoi i kana mau hana uhauha. I kinoliii o ka pahola ana ae o kela lohe, aole loa he manaoio iki o kekahi poe, i kamaaina i ka Haku Fanadale, aka nae, ia lakou i ike pono ai i ka oiaio, akahi no a nana aku lakou i kela kanaka opio, ma ke ano, aole ka oia he kanaka ino maoli, aka mamuli wale no o kona punihei waie aku, i na alakai lalau ana a kona mau hoaloha, pela iho la oia i lilo ai i kanaka uhauha, a puni lealea.

Mamuli o na dala a Miss Kalani i haawi mai ai iaia. i hiki ai i ka Haku Fanadale ke uku aku i kona mau moraki, ame kekahi mau aie e ae, ma keia ano iho la, i nana mai ai na kanaka kalepa maluna o ka Haku Fanadale, ma ke ano e hoea mai ana ka la, a lakou e kipa aku ai ma ka home o ka haku opio, no ke komo like ana iloko o na hauoli; hoopau loa ae la no hoi lakou, i na manao hoowahawaha no kela kanaka, koe wale no ka nana ana aku maluna ona, ma ke ano, oia aku ana kekahi o na kanaka hiki ia lakou ke hilinai mai maluna ona.

Aia o Kalala, ke kaikuahine o ka Haku Fanadale ma Kanale Hale kahi i noho ai, ma ke ano he kokoolua no Miss Kalani, a i kela ame keia manawa, e hoea aku ana ka Haku Fanadale, no ka hoohala ana i kona manawa, me kana wahine hoopalau ame kona kaikuahine.

He kanaka ka Haku Fanadale i maa i ke pakike mau ana i kona kaikuahine i na manawa apau, eia nae, ma keia noho ana mai a Kalala me Miss Kalani, ua konoia mai ka haku opio e hoolohe aku oia i na a’o ana mai a kona kaikuahine.

“Ua ku a uluhua maoli au i kou noke mai i ke kamailio ia’u e Kalala, a ua aneane au e ku a haalele ia oe ame Miss Kalani. He oiaio, ua noho aie au ia Miss Kalani, mamuli o kona kokua ana mai i ko’u mau pilikia apau, ua lilo kela hana ma kona aoao, i kumu hoohauoli loa mai i ko’u manao.”

Ma kela mau olelo i noke okoa ae ai ua haku nei i ka akaaka, me ka hoomau hou ana mai i ke kamailio ana:

“He hookahi wale no a’u mea hoihoi ole, o ia kona kaualako ia’u me he wahi keiki uuku la, e hooko wale aku no i kona mau makemake.”

“Aole anei o ka mahina o Iune, ka wa i hookaawaleia ai, no ko olua mareia? Ina pela, he mau mahina no koe, au e hoohauoli ai ia oe iho, mamua ae o ka paa ana o kou ihu i ka uwea.”

“Ae, he mau mahina nui no koe, alaila hoea mai i ka wa e hookoia ai ka mare mawaena o maua. eia nae, aole he hana maalahi na’u ka hoomamao ana mai ko’u mau hoaloha mai, no ka mea ua pilipaa ko makou noho ana.”

“Eia no ka mea oiaio loa e kuu kaikunane, i pipili wale mai no kela mau hoaloha ou, no ka ike mai i ka nui o kau dala, a ke ole au e kuhihewa, ua oi loa mai ka nui o kou mau hoaloha iloko o keia mau la, no ko lakou ike mai, ua pau kou mau aie i ka ukuia a he nui kau mau dala. e noke ai i ka uhauha. no ko lakou hauoli. E hoomanao oe e kuu haku, eia oe ke uhauha wale nei i na dala a Miss Kalani; aole keia wahine i haawi mai i kana mau dala. no ke kokua ana ia oe, malalo o kekahi kumu e ae, no ka makee wale mai no ke kokua ana ia oe. malalo o kekahi kumu e ae no ka makee wale mai no e lilo oe i kanaka nui ma keia mua aku. Ina e malama oe i kou kulana, me ka makee i kou inoa maikai, o oe kekahi o na kanaka ano nui loa. a ko’iko’i no hoi iloko nei o ka aina, e kau mai auanei na maka o ka poe waiwai a hanohano maluna ou.

“E hoolohe mai oe i ka’u mau olelo, a e lawe aku hoi i keia mau a’o ana a malama. Ina e manao oe e hookipa mai i kou mau hoaloha. a e hoohauoli aku i ko lakou mau manao, e lawelawe aku oe ia hana, ma kahi mamao. aole maanei nei. He mea oiaio, ua ku-e mau mai oe i ka’u mau a’o ana no kou pono, i na makahiki ae nei i hala, iloko nae ia o kou mau la kamalii, i keia wa, he kanaka makua oe, ua oo kou noonoo, a ua hiki loa ia oe ke ike mai, ke kamailio wale aku nei no au no kou pono, ame kou hauoli, e hoopakele ana hoi ia oe, mai ke alakoia aku e lilo i kanaka hoowahawahaia e ka poe maikai iloko nei o ka aina.”

“Aole o’u nana, i ka mea a na kanaka e kamailio mai ai no’u, owau no ka i ike i ka’u mea pono e hana aku ai. Ua like pu no ko Bela manao me ko’u, aka no ka hooluolu ana aku nae ia oe e Kalala, e hoao no au e hana ma na mea e oluolu ai kou manao. He hookahi wale no a’u mea e kaumaha nei nou e kuu kaikuahine. o ia ka loaa ole o kou home ponoi, eia nae, aole no keia i lohi loa. e hoea mai ana no he la, e loaa ai ka noho kuokoa ana ia oe.

“Eia no oe e Kalala i na makahiki o ka wahine u’i, a he nui na kane kupono loa nau ma keia wahi. He hookahi nae kanaka a’u i iini loa ai, e lilo mai oia i kana heu. oia o Danakota, oia kekahi kanaka nui o kona waiwai, e hiki ai ke haawi i ahaaina nui, ma kona la e mare ai i kana wahine. He mau kaikamahine nunui kana ekolu a eha paha, i nele i ka makuahine, e hoohauoliia aku auanei ko lakou manao, ke lilo aku oe i makuahine no lakou.”

“He keu aku oe a ke kanaka paarula ole. ua makehewa maoli kela inoa hoohanohano maluna ou e Hale. Pehea la i loaa ole ai ia oe na manao maikai elike la me ka hapanui o na kanaka keonimana?”

“E noi aku ana au i kau mau huikala ana mai e Kalala; malia ua ikaika loa aku nei paha ka’u ma olelo ia oe, aka nae aole e hiki ia’u ke alo ae, mai ke kamailio ana aku, elike me ka’u kauoha, no ka hooponopono ana i ke alahele e loaa ai ia’u ka pomaikai, a iloko o ia manawa hookahi, e ohi ana no oe i kekahi pomaikai nui. Heaha la ka hana a Danakota o ka hoea ana mai no Kanale Hale nei; malia paha no ka ike ana ia oe? E hoao au elike me ka hiki ia’u ke hana, ma ka hoolilo ana i keonimana elike me kou makemake. O ka mahine keia o Maraki, iloko ae nei o Iune e hookoia ai ka mare, aka nae e hoao aku ana au e hoopanee i kela mare a hoea i ka mahina o Sepatemaba.”

“Heaha iho la ke kumu e hoopanee ai i ko olua mare? E noho hamau oe e kuu haku, ke lohe nei au i ka hele mai o Bela, o loaa pono mai auanei ko kaua kamailio maluna o ka ninau, no ko olua mare.”

E nanea ana no laua nei, ua weheia mai la ka puka me ke kiei ana mai o Miss Kalani iloko, a iaia i ike mai ai i ka holo aku o ka Haku Fanadale. lamalama ae la kona helehelena, a komo koke mai la iloko, me ka hele pololei ana mai no kahi o kana kane hoopalau e noho ana @ iloko no hoi o kela manawa, i ku ae ai o Kalala, a hemo aku la iwaho, no ka haawi ana i manawa no na ipo, e hoohenoheno ai.

Aia o Miss Kalani ke noho la maluna o na u-ha o ka Haku Fanadale, me ke apo ana mai ma na maka o ua haku nei alaila pane mai la:

“O ka piha ana keia o na pule ekolu, o kou kaawale ana e Hale mai ia’u aku, nolaila ke kakali aku nei au. i kela mau honi hoomaumau au i hoalo ai no keia mau pule!’

“E kala mai oe e Bela, ua kuhihewa maoli au, eia no la o Kalala iloko nei o keia rumi, o ke kumu ia o ko’u honi ole ana aku nei ia oe. O kekahi no hoi, ua hele au a maluhiluhi maoli; no ka mea he alahele loa kela mai Mote Kalo mai me ka hoomaha ole; aole no au i kipa ae nei no ko’u home, a ia’u i hoea mai nei no kou home. o ka nuku iho la na olelo mua loa a Kalala, e noke mai ai i ke kamailio ia’u, nolaila e ike mai oe, ua hele maoli ko’u mau noonoo a pioloke.”

Ka’ika’i malie ae la ka Haku Fanadale i kana wahine hoopalau, a hoonoho aku la iluna o ke koki, aia no hoi o Bela, ke puliki la ma ka a-i o ka Haku Fanadale, me ka hoihoi loa, no kela hana a Hale iaia, a o ia ka ua o Miss Kalani i pane mai ai:

“Heaha kou mea i hoouna mua ole mai ai i kekahi kelekalapa, no kou huli hoi mai, i hiki ai ia’u ke hoouna aku i kaa no ka hoihoi ana mai ia oe? Ua hiki no ko Kalala noke ana i ka nuku ia oe, i kou noonoo ole maoli no, a ua aneane no au e nuku aku ia oe me ka ikaika loa. Aole keia he huhu ia oe, aka ua hele au a piha me ka hauoli, no kou hoi ana mai nei, me he mea la ka hoi, o na pule ekolu au i kaawale ai, mai ia’u aku, ua like pu ia me na makahiki ekolu o ko kaua kaawale ana. Aole au i makemake e hoehaeha aku i kou noonoo, ma ka hoopuka ana aku i na olelo e eha ai oe.”

(Aole i pau.)