Ka Nupepa Kuokoa, Volume LXI, Number 9, 3 March 1922 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

  

 

HALA O MRS. ATCHERLLEY NO HAWAII

 

            Ma ka Mauna Kea o ka Poaono aku nei i hala, i haalele iho ai o Mrs. Mary Haaheo Atcherley, kekahi o na moho hookoa, ma ka aoao Demokarata, ma kona huaka’i hookaika baloka no Hawaii, a ma ia mokuahi hookahi no hoi, i hala aku ai o John H. Wise, no ka hui pu ana aku me, Sam E. Kalama ame Harry A. Baldwin, a i hookahi ko lakou holo like ana aku no Hawaii, ma keia misiona hookahi no.

            Ua lawe pu aku o Mrs. Mary Haaheo Atcherley me ia ia Theodore Awana, ma ke ano o kona kokoolua ia ma kana huaka’i hooikaika baloka.

            I kulike ai me kana papa hoonohonoho, mamua o kona haalele ana iho ia keia kulanakauhale a kalaiaina mua ma Hilo, ma ke ahiahi o ke Sabati nei, alaila hoomaka aku ke kaahele ana e kaapuni i ka Mokupuni o Hawaii, e hala ai iaia kekahi mau pule malaila, mamua o kona hoi ana mai no Maui ame Molokai.

            Ua paa loa ka manao o Mrs. Atcherley, o na mana koho baloka wale no ke kuleana na lakou e kaupaona mai i kona kupono e lilo i moha elele lahui ame ka ole, nolaila, e hooikaika ana oia ma na ano apau e paio me kona mau hoa mokomoko maluna o ke kahua kalaiaina, no kona lanakila, a no kona haulehia paha ma ka pahu baloka, a o na mana koho wale no ke kuleana e kauoha mai ai iaia e noho ma Hawaii nei, a o lakou no hoi ke kuleana e hooholo ai, no ko lakou hoouna iaia i Wakinekona.

            O na pohihihi iloko aku nei o na la i hala, no ke kulana makaainana o kana kane, ua hoopauia i keia manawa, mamuli o ka loaa ana mai o na hooiaio ana, he makaainana Amerika o Kauka Atcherley, iloko o ka makahiki 1020, nolaila ua hikiiaia ke holo moho, aka o kona kuleana nae e paa ai i kekahi kuiana oihana kohoia e ka lehulehu, ke waiho nei ia me ka pohihihi.

            Maloko o ke kahuahana a Mrs. Atcherley, e holo nei, e hoao aku ana oia e loaa mai he haawina mai ke aupuni federala mai, no ka hanaia o na alanui maloko nei o keia Teritore, e loaa pu mai hoi he mau haawina kokua, pili i ka oihana hoonaauao ma Hawaii nei.

            O kekahi o kana mau mea ku-e loa i hookomo maloko o kana kahuahana, o ia no kona ku-e ikaika i ka hookomoia mai o na limahana Pake, i Hawaii nei, ao na mahiko, o keia kekahi e kana mauna kii baloka, e pahele ai i ka noonoo o na mana koho baloka apuni keia Teritore.

            Ua kulike ko Mrs. Atcherley manao me ko Kamalae, maluna o ka ninau hoopae limahana, a mai ka pohai mai o na limahana, e loheia mai ai na manao mahalo no kela mau moho, no ka hooikaika ana e kupale, no ko lakou pono, me ka noonoo ole iho nae o ka hookomoia mai o na limahana i Hawaii nei, ke alahele wale no, e hiki ai lakou ke hoomauia aku ma ka lakou mau hana nunui o ka uku, e ohi nei i keia la.

 

KA AHAHUI PONO KOHO BALOKA O NA WAHINE.

 

            No ka hoopau ana ae i na pohihihi o ka lehulehu, i kekahi ahahui i hoalaia ae nei e na wahine haole o keia kulanakauhale, ma ka inoa League of Women Voters (Ahahui o na Mana Koho Wahine), he ahahui keia, aole no ke komo ana iloko o na hana  kakaiaina, aka no ka hoonaauao ana i na wahine, ma na loina apau i pili aku i ke koho baloka ana.

            Ua hiki i na wahine o na lahui like ole maloko nei o keia Teritore ke lilo i lala nokeia ahahui a-i ole hele ae paha e hoolohe ma na halawai a ka ahahui e malama ana i hiki ai ia lakou mau hoaloha ma na mea pohihihi i pili o ke koho baloka ana.

No ka hookupono ana i keia ahahui, ua kohoia he komite ma kekahi manawa ae nei i hala, no ka hoomakaukau ana i ke kumukanawai ame na rula o ka ahahui.  Ma ka pule aku nei i hala, i waiho ae ai kela komite i kana hoike maluma o ke kumukanawai, a ma keia Poalima e waiho ae ai i ka hoike maluna o na rula. E malamaia ana kela halawai malokoo ka hale waiho buke o ke aupuni, ma ka hora ekolu o keia auwina la.

            Aia a pau na mea i ka hooponoponoia, no ka onipaa o keia ahahui, alaila e homaka aku ana ka hooikaika ana, e komo iwaena o na wahine, no ko lakou lilo mai i mau lala no keia ahahui.

            Ua hiki i na wahine Demokarata me na Repubalika e lilo i mau lala no keia ahahui, a no ka mea he nui na wahine i maopopo ole i na loina ano nui o ke koho baloka ana, a pela hoi me na loina e lawelawe mau ia nei iloko o na halawai a na kalapu kalaiaina, nolaila e lilo ana ko lakou komo ana iloko o keia ahahui i kumu no lakou e naauao ia. hoopaiia ana i ia kauka i kumu e ae, e oi aku ai manuua o na kane.

 

 

E KOEMILA MAI ANA KA UKUHANA.

 

 

            Ma ka Poalua aku nei i hala i haawi ae ai ka papa hooko o ka hui mokuahi holo pili aina i ke apono ana, e hoemila mai ka ukuhana o ka poe apau e noho hana nei maluna o na mokuahi o kela hui, i umi pakeneka, o ko lakou mau ukuhana e loaa nei i keia manawa.

            I wahi nae e hoopilikia ole ia aku ai ka poe no lakou na uykuhana e hoemiia mai ana, ua hooholoia, e hoemi mai i elima pakeneka o ne ukuhana, e hoomaka ana ma ka la i o ka mahina ae nei o Aperila, a o kekahi elima pakeneka aku, iloko o ka mahina o Mei e hoomaka ai ka hoemi ana.

            Ua ukali aku keia hana a ka hui makuahi holo pili aina, i na hoemi ukuhana i lawelaweia e na hui mokuahi nunui o Amerika, o na kapakai o ka Pakipika ame ka Akelanika, a pela hoi ke kauoha a ka Papa o na Mokuahi o Amerika Huipuia, no ka hoemi ana i na ukuhana o ka poe apau e noho hana ana maluna o na moku o ke aupuni.

            Ma ka hoakaka a na lunanui o ka hui mokuahi holo pili aina, ua oi aku ka pii o na ukuhana e loaa nei i na limahana o na mokuahi ma Hawaii nei mamua o na ukuhana o na kanaka oluna o na mokuahi o ka hui Matson.

            O ke kumu o ka poe e noho hana nei maluna o na mokuahi holo pili aina, mamuli mai no ia o na olohani i hoalaia e na limahana, iloko o kekahi mau manawa ae nei i hala, i ka wa e pipii loa ana na kumukuai o na meaai, a i ke emi ana mai o na meaai i keia wa, a hui pu iho, me ka hoimiia mai o na ukuhana, o ka poe e noho hana nei maluna o na mokuahi o na kapakai ma Amerika Huipuia; nolaila aole i pilikia loa na limahana oluna o na mokuahi ma Hawaii nei, he 10 pakeneka wale no ke hoemiia o ko lakou mau ukuhana.

E KAPILILA AKU ANA HE MOKUAHI NUI.

 

            Mamuli o ka ikeia i ka lawa kupono ole o ka mokuahi Mauna Kea, no ka halihali ohua ana mawaena o Honolulu nei ame Hilo, e kapiliia aku ana kekahi mokuahi nui ma keia mua koke aku, i hiki aku kona mau hoolilo ma kahi o ka hookahi miliona dala a oi.

            I hakalia wale no ka hoomaka ana aku i ke kapili ana i kela mokuahi hou, i ke apono mai o ka papa hooko, o ka hui mokuahi holo pili aina.  Ina no ka hana koke ia ku o kela moku, alaila e paa ana ia iloko o ka makahiki hookahi.

            He mokuahi nui keia, i ike ole ia kona lua, iwaena o na mokuahi e holoholo nei, ma na kapakai o Hawaii nei, o ka nui o na ohua, o ka papa ekahi, he 334 a he 100 ohua o ka papa ekolu, o ia hoi na ohua oneki, e ikeia nei maluna o na mokuahi.

            E hanaia ana i mau wahi no na ohua oneki e hiamoe ai, elike me ko na mokuahi, nunui, e kipa mau mai nei i keia awa, mai na aina mamao mai; no ka mea ua ikeia ka pilikia, i ka wa ino, ua kono okoa ia aku na aliimoku, e hoihoi i kela mau ohua iluna o na oneki, i wahi e pilikia ole ai lakou.

            He mokuahi keia, nona ka holo o 17 mile i ka hora, e hiki ai ke haalele iho ia Honolulu nei ma ka hora elima o ke ahiahi, a ku aku no Hilo, i ka hora ehiku o ke kakahiaka o kekahi la ae.

 

 

E KOHO ANA IA BALDWIN

 

            “Ua olelo ae au mamua, a mahope iho o ka ahaelele Repubalika, e koho aku ana au ia McCandless, aka nao, i ka wa a na Demokarata i olelo ae ai maloko o ka lakou kahuahana, ua manao lakou, he nui ka Kuhio mau mea i hana ai no Hawaii nei, ame na olelo e ae o kela ano like, ia wa i ike iho ai au, he hana pulapu wale no, kela, nolaila e koho aku ana au ia Baldwin.

            O ka leka malalo iho nei, ua hoopukaia ae ia maloko o ka Advertiser, o ka Poakahi iho nei, na kekahi moho e ae.

            Penei kana leka i hoiie ae ai i ke akea:

            “E ka Lunahooponopono o ka Advertiser:  He kanaka Hawaii au, i makemake e ike i ka waeia ae o kekahi Hawaii no ke kulana elele lahui, no ke pani ana i ka makalua o ko kakou Keikiahi aolha ma Wahinekona, a ke manao nei no au, i kanaka Hawaii ka mea kupono, no ke kiai ana i ka pono o keia aina malaila”.

            “Ua makemake au e ike aku i kekahi kanaka Hawaii e pani ana makuhi o ko kakou Keikialii, aka nae ina au e koho ana no kekahi haole, ua oi ae ka pono o ko’u koho ana ia Baldwin, mamua o ke koho ana i kekahi kanaka i hoinoino mau ia Kuhio, no na kau a kau, a i oi loa aku kana hoinoino ana i keia wa nona, oiai ua make oia, a ua makemake oia e pahele i wahi e loaa mai ai na baloka ma ke kamailio ana i na mea maikai nona. Aole he poe hupo na kanaka. Hawaii elike me ka Link McCandless i manao ai no lakou.

 KANAKA HAWAII.

Honolulu, Fehemari 25, 1922.

 

 

HE HOALOHAOLHA NO MRS. MAIKAI KEANU.

            E oluolu mai e ka mea hanohano Mr. Solomon Hanohano, ka Lunahooponopono hoi o ka Nupepa Kuokoa, e hookomo aku hoi i keia hoaloha iloko o ka poli aloha o ka kakou hiwahiwa “Ka Nupepa Kuokoa,” ke Kaupu hoi o ka ale heihei o ka moana Pakipika a iaia hoi e kipa aku ai ma na ipuka o ka ohana, na hoaloha, ame na kini lehulehu i kamaaina ia Mrs. Maikai Keanu, a noho mai la me ka nanea, e ha’i aku hoi ia lakou i keia lono o ke kaumaha, penei:  O Mrs. Maikai Keanu na hala; ua hala hoi i ke ala hoi ole mai.  Aloha wale!

            Ma ka auwina la o ka Poalua 14 o Feberuari, A. D. 1922, oiai ka ohana e nanea ana, nana ana hoi me ke aloha ame ke kaumaha i ko lakou makuahine aloha, a e aneane aku ana paha i ka manawa o ka hapalua o ka hora eha (4:30) o kela auwina la, Poalua poina ole, ua puana ae la ko lakou makuahine aloha i keia huaolelo hope loa i ku i ke aloha ame ka walohia penei:  “E haalele ana au ia oukou.”  I ka pau ana o keia hualoelo, upo’i iho la oia i kona mau maka, a moe aku la no ka wa mau loa. Ua kii mai la ka anela o ka make, a lawe, aku la i kona aho hope loa. Luuluu wale!

            Ua moku ae la ke kaula dala; ua naba hoi ke kiaha gula, a ua nana hoi ka pakeke wai ma ka punawai. Ko iho la ka olelo a ka buke nui i hoike mai ai ma ka buke a Kekahunal penei:--E hoi ka lepo i ka honua, elike me ia mamua, a o ka uhane, e hoi ia i ka Akua Nana ia i haawi mai; a no ka mea. Nana no i haawi mai, a Nana no i lawe aku. Walohia wale!

            Ua hanauia o Mrs. Maikai Keanu, i ka A. D. 1849, ma Pulehu, Kula Maui, mai ka puhaka mai o Kahakapau (w) ame Monomanu (k).  Ua noho iloko o ka berita maemae o ka mare me Mr. Keanu mai kona wa opio, a haalele wale mai la no.  He kanahikukumamakolu (73) ka nui o kona mau makahiki, o ke ola na maluna o ka aina o Iehova i haawi mai ai iaia. Ua haalele iho oia mahope nei, he kane; he mau keikikane; mau kaikamahine, mau moopuna, e paiauma ana i ke aloha no ko lakou makuahine aloha.

            He hoahanau o Mrs. Maikai Keanu no ka mahele Ekalesia o Paihiihi, o ka Ekalesia o Paia, Maui, He haumana no ke Kula Sabati. He lala no ka Ahahui Hooikaika Kristiano o na makua, a i ka makahiki aku nei i hala, he hope peresidena oia no ka Ahahui Hooikaiki Kristiano o na Opio, o ka mahele Ekalesia o Paihiihi.  He makuahine hooikaika pu no iloko o ka Kristo hana, elike me ka ikaika i loaa iaia, a na ka ma’i ame ka nawaliwali i waiho mai ai oia i ka hana.

            Nolaila, o makou, na hoahanau o ka mahele ekalesia o Paihiihi, na haumana o ke Kula Sabati; na lala o ka Ahahui Hooikaika Kristiano o na makua ame na lala o ka Ahahui Hooikaika Kristiano o na opio, ma o ko makou komite la; ke komo pu nei a kaana pu i keia haawe o ke kahmaha i kau aku maluna o ka ohana.  E noi ana hoi i ka Makua Lani e lawe aku i keia haawina o ke kaumaha, a e hoomamaia mai na manao kaumaha o ka ohana.

            Nolaila e hooholoia, i hookahi kope o keia hoalohaloha i ka ohana, i hooneleia i ka makuahine; i hookahi i ka Nupepa Kuokoa,” a i hookahi i ka pepa “Ka Hoaloha.”

            Owau iho no me ka haahaa,    MOSES PANUI,

K. K. O. Ahahui C. E. Makua.

 

 

KA AHAHUI O NA LAHAINALUNA O MAUI.

           

            E halawai ana ka Ahahui a na Lahainaluna o na Mokupuni o Maui, Molokai, Lanai, ma ka Iuakini o ka Ekalesia o Waikapu, Poakolu Maraki 29, hora 1:30 p. m. Ua makemakeia na Lahainaluna pilikia ole e hiki mai,

 

 

HOOLAHA

PEPA UHI NO KA HALAKAHIKI

 

            Ma keia ke haawiia aku nei ka hoolaha, ua loaa aku nei i ka Hawaiian Pineapple Co., Ltd., o Honolulu, Hawaii, wale no na pono mai ia’u aku no ke Teritore o Hawaii, e pili ana i ka hana mahi halakahiki, malalo o ka’u mau ana hoohalike, malalo iho nei, e pili ana i na ano o ka hooi ana ae i ka ulu ana o na meakanu ma na meapili i ke po’i ana a uhi ana paha:

Helu Ana U. S.                                                           La i Hoopukaia Ai

1,196,219.....................................................................Augate 29, 1916

1,227,898..........................................................................Mei 29, 1917

1,249,355................................................................Dekemaba 11, 1917

1,274,527.......................................................................Augate 6, 1918

1,276,887.....................................................................Augate 27, 1918

1,287,267................................................................Dekemaba 10, 1918

1,296,173.....................................................................Maraki  4, 1919

1,372,995.....................................................................Maraki 29, 1921

1,372,996.....................................................................Maraki 29, 1921

1,372,997.....................................................................Maraki 29, 1821

1,372,999.....................................................................Maraki 29, 1921

1,377,566..........................................................................Mei 10, 1821

1,382,069.........................................................................Iune 21, 1921

1,396,269.................................................................Novemaba 8, 1921

Hoopuka Hou ia 15,231..

...............................................................................Novemaba 22, 1921

            Ua aeia ka Hawaiian Pineapple Co., Ltd., malalo o ka’u laikini ia lakou, e laikini liilii aku ia ha’i no ka hoohana ana, ma ka hana mahi halakahiki maloko nei o ke Teritore o Hawaii, i ka’u mau ana hoohalike e pili ana i ke po’i ana.  E hanaia na hoolala ana me ka Hawaiian Pineapple Co., Ltd., no ka laikini liilii ana.

(Kakauinoaia)    CHARLES FRANKLIN ECKART.

Honolulu, Hawaii, Feb. 1, 1922.  

6493—Mar. 3, 10, 17.

 

NA LEO OLIOLI MAI NA HEIAU MAI, NA KAIHUAKAI A KO KA PO POE

 

            Mr. Solomon Hanohano:-- E ae mai i na ulono mai ka po mai.  Ua loheia na leo e olioli ana ma na wanaao e na la e na pule mua o Ianuari, he nui na hooia i hoikeia mai.  Ua hiki mai he keiki Pukiki ponoi na ko’u wahi hoaloha e hana pu nei me a’u, a olelo mai kona papa oiai oia, ma Waipahu kana hana, ua hoike mai la oia i kana meahou i kona papa.  He elua ona manawa i ike maka aku ai, i kekahi huakai kanaka nui, e ka’i ana, oluna o ke kino aole ike pono ia oiai, he uahi wale no mai mua a hope o ka huakai, aole o ia wale no, he nui no lakou.

            Mr. Lunahooponopono.  E ae mai no i keia hoike i lohe pono ia aku ame keia mau ike maka pololei, akahi wale no ka ike, aole i ka Hawaii ponoi wale no ka ike, akahi ka ike i ka lahui Pukiki, akolu ka lohe i kekahi Poko Riko, a pela pu no paha apuni na moku, me keia mau hoailona, pela no ke Akua i hookaawale ae ai i kekahi ohana i alii, a i makaainana wahi no a kana olelo ano nui:  O ka mea e hoole i ka ke alii, hoole no oia i ka ke Akua.

            Mr Lunahooponopono, e ane kakanalua ana paha oe.  Ua manao ae la no hoi au, e hooku’i aku paha auanei a oiai, he nui no na hoike kupaianaha paha e hoopukaia mai ana, mai kekahi mai a ke poe i lihi launa aku ilaila, kuemiemi mai la keia ihope, akahi no ka hoike; ua hala na la o ka mahaku o na’lii, ua alaliu mai la ka la o ka p.m., a komo okoa no ialoko o ka hale. O J. K. Kalanianaole, kekahi o na keiki a Kahalepohaku me Kinoiki.

            Ua haalele lakou ia Koloa, Kauai, a hoi mai a noho ma ke poo o ke alanui Papu me Kula, ma Auwaiolimu, malaila laua i pohai ai me keia poe keikikane, ua ike au i ko lakou wa liilii, a hoounaia i ke kula iloko.  Ua puni apuni na moku i ke kamaaina i kona ano, kona helehelena a moloko o kona puuwai, he aloha i ka Hawaii lahui.  E nana i kona make ana, na haku’i oni ole a ko ka po.  Heaha ko ke ao?  He haina no aia ahiki hou mai ka Haku.  Umia iloko ke aloha alii. He 74 makahiki wale no i koe, Poaono ka honua wahi a Petero.

            I keia mau la hope o ka honua, aia kekahi kanaka Maoli kahuna ma Nukilani, ua hookaakaa ae oia i ka maka o kekahi makapo, mailoko mai o kona makuahine, a ua ike na ano ma’i like ole apau, mamua iho nei o ke Kalikimaka e hiki aku ana he 10,000 poe ma kona hale ia la, elua wale no pulle i hanaia ai na hale no keia 10,000 poe, e lawa ai, mai na wahi like ole mai.

            He nui ka waiwai o keia kanaka e hoolawa ai i ka ai ame ka i’a, na lako moe ame hale, he kupakako kana, a maheleolelo, o keia paha ka Iesu elua e nana Mat.XXIV.

            Nohea mai hoi keia manaoio? Mailoko mai o ka lili paha? Nui ino kahuna anaana e halakika  mai nei iluna o ka aina houluulu, he kahuna Poto Riko kekahi, hoohoia mai ana, e kauhale i ke anaana ke hele nei e hookahuna i kauhale; ke pau mai nei kahuna i ka holapuia, me a manao paha e nalo.

            Aia o Iehova o na kaua maluna iho, ke Akua o Aberabama, o Isaaka o Iakobo ke Akua o na kaula, a o ka poe pono, o ka hale o Iseraela, ke nana mai la maluna pono iho.  Aole he poeleele ilaila, maopopo maikai, ua moe anei na maka o na makai o ka ekalesia?  Aole i moe, ua poina paha!

            Owai keia kuikui puupuu kaulana o Laie, Elua wahine, 2 puupuu hookahi kaikamahine, a pakela kuu wahi moopuna wahine ma ka apua, ina no he poe hou ae, aole no e nele ka walawale, oiai, he puipui no a he lawai’a a owai hou mai ana la?

            Ke holopono nei ka wilipoi a J.W. K. Makahanohano o Laie, o ka wilipoi mua a Mrs. Iwa, e lilo ae ana i ka hui wilipoi hou no o Laie.

            E hooala aku ana o Mose Kaaipuaa, M. Kauaulalena, Aikake Kanakanui, J. A. Kahiona i hui kanu ai, a oiai ke pii mahuahua mai nei na hui wilipoi, a i hui lawai’a o na olaelae pohaku o ka aina lewa nei.

            Nohea mai la hoi keia makani e pahili nei i na Koolau? Aole he makani o Tahiki i like me keia.  Na keia makani i pahili ae i na kualipi papali o Kaliuwaa, a maihiia kekahi pohaku a Kamapuaa a haule mai la a pa pono maluna o na poohiwi o kekahi keiki opio o Kaluanui a make loa, iaia i luu aku ai iloko o ke ki’o wai kaulana a Kamapuaa i aneane aku i ka 18 he keiki hanau oia no ka aina, a pakele ka nui o kona mau hoa.

            Ke manao nei au, ua lawa a hu, keia mau itamu o ka aina lewa o Kanehunemoku, ke ae mai hoi paha ka Mr. Lunahooponopono, a Kaulelewaihui a kona mau keiki hooni mikini o ka uwila e haloke ana.

                                                                        J. A. KAHIONA,

 

 

NA LEKA KII OLE IA MAI AHIKI I FEBERUARI 25, 1922.

Aarona, Wm              Kanoa, Henry

Opu, Sol                  Kema, G

Huluhulu, M N            Makua, S

Kaiwa, Mrs Hattie         Keahi, Mrs C K

(3)                         Nohoanu, K

Kaiehu, K                  Nao, Mrs. C K

Kaimi, A                   Pio, Miss L

Kapua, Jno (4)              Poole, Chas

Kalima, P                   Wailehua, Sam

Kaluna, K

 

 

 

 

NEW PALAMA THEATER

“KA HALEKEAKA NANI MAWAHO AKU O HONOLULU”

SABATI—“ THE AFFAIRS OF ANATOL.”

POAKAHI—“THE MAN WHO LOST HIMSELF.” POALUA—“LOVE’S BATTLE.”

POAKOLU—“THE GARTER GIRL.”

 

EMPIRE

Hoikeike mau, 12 m. a 10:15 p. m. Poaono, 10 a. m. a 10:15 p.m.

                        Elua hoikeike Sabati, 6:30 ame 8:30.

Ke Paani Nei—“ BABE” RUTH iloko o “HEADIN HOME.”

Hoomaka Sabati—“HELENE CHADWICK iloko o “SCRATCH MY BACK.”

Hoomaka Poaha –BUCK JONES iloko o “JUST PALS.”

 

HAWAII

Ke Paani Nei –“ THE GIRL FROM THE FLYING X RANCH” ame “THE HEART OF THE NORTH.”

                        Hoomaka Poakahi—“UNCLE TOM’S CABIN.”

                      Elua Hoikeike, po Sabati, 6:30 ame 8:30.

Ukukomo—55 Keneka; Noho i Hookaawaleia, 85 Keneka.

 

LIBERTY

Hoikeike i na la apau, koe ke Sabati, hora 2:45.

Elua Hoikeike, Poaono ame Sabati, 6:30 ame 8:30.

Ke Paani nei—LOUISE GLAUM iloko o “GREATER THAN LOVE.

Hoomaka Sabati—MARY PICKFORD iloko o “HEART OF THE HILLS.”

Hoomaka Poaha—MARC MACDERMOTT iloko o “EVEN AS EVE.”

 

 

Hawaii Bank of Commerce,

LIMITED.

Alanui Moi, Mawaena o na Alanui Papu ame Bekela

HE BANAKO HOAHU LIILII

Ua Hiki Ia Oe ke Hoahu Mai ka 10 Keneka Mai a Pii Aku

E HELE MAI E KUKA PU ME MAKOU.

Hemo ka Puka i na La Apau mai ka Hora 9 a.m. a ka Hora 2 p.m.

 

 

NA MEAAI

Waiu Federala, Kini Nunui..................................................$1.20 Kakini

             Waiu Federala, Kini Liilii.........................................................60   “

             Carnation, a i ole Alpine, Nunui...........................................$1.30    “

             Carnation, a i ole Alpipne, Liilii...............................................65     “

             Waiu Kia................................................................................$2.20    “

             Pia Hapuu Hawaii...............................................................60 no 1.00

             Kopaa Keokeo o Honolulu nei.......................................17 lb. no 1.00

Kopa Crystal White..........................................................................20 auka no 1.00

Palaoa o 10 Paona eke...........................................................................................45

 

He Kuai Mau Makou Malalo Iho

BAILEY’S GROCERERIA

 

 

 

O NA HAWAII

            i makemake i ka pomaikai o ke Kanawai Hoopulapula o Molokai, e hoolako ia lakou iho   

            no ka holomua ma ka loaa ana ia lakou o na lako Mahiai me Hanai Holoholona ma keia   

            hui kamaaina.

           

            Ke malama nei makou i na lako hana maikai loa, pela hoi me ke Pena Sherwin-Williams,    ka mikini uwi waiu De Leval ame na lako pili i ka home o na ano apau.

 

Maloko o ko makou Keena o na Lako Paani e loaa no he ahua o na pu liilii ame na raifela   maikai.

 

 

 

Kopa Moi Keokeo No Ka Mikini Holoi

 

 

He Kopa maikai loa i hiki ke hoohanaia no na ano hana apau i pili i ka home.  Hiki ke holoi i na lole nahenahe loa me ka pilikia ole.  O kona oi loa aku o ka maikai no na mikini holoi—No ka holoi i na pa ame holoi hale.

 

KUAI I PUOL MAI KOU HALEKUAI MEAAI MAI

 

T.H. Davies & Co., Ltdl

 

Na Akena Wale no no ka Paeaina Hawaii.