Ka Nupepa Kuokoa, Volume LXI, Number 11, 17 March 1922 — AOLE E HOEA MAI ANA KE KEIKIALII O WALE IANEI. [ARTICLE]

AOLE E HOEA MAI ANA KE KEIKIALII O WALE IANEI.

O ke kono a Kiaaina Farrington, i hoouna aku ai i ke Keikialii o Wale, e kipa mai no Honolulu nei, m& kana huakai huli hoi no kona home, ua hiki ole iaia ke ae mai, i kulike ai me kana pane, o ka loaa ana mai i Honolulu nei, i keia mau la iho nei. Ua hoounaia aku kela kono e ke kiaaina, i kekahi manawa pokole ae nei i hala, mamuli o ka makemake o na kanaka Pelekane e noho nei ma keia kulanakauhale, nolaila o kela manaolana o lakou, no ka ike hou i ke Keikialii o Wale mawaho ae nei o Waikiki, ua poho wale ia. Ma ka hoike i loaa mai i ke Kanikela Pelekane W. J. Davis, mai ke Keikialii mai o Wale, e hoike mai ana oia i kona manao kaumaha, no ka hiki ole ke ae mai i ke kono i waihoia aku imua ona, no ka mea ua paa m,ua ka papa hoonohonoho, no ke alahele e hoea hou aku ai no Ladana, o ia no ka holo ana ma ke &la oki o Suez.