Ka Nupepa Kuokoa, Volume LXI, Number 14, 7 April 1922 — KA MAUA LEI ALOHA HE KEIKI UA HALA [ARTICLE+ILLUSTRATION]

KA MAUA LEI ALOHA HE KEIKI UA HALA

Mr. Sol. Hanohano, Aloha oe:—E oluolu mai hoi kou ahonui i ka maua wahi puolo o ka ehaeha e kau ae la maluna, e hookomo iho ma kahi kaawale o ka kaua hiwahiwa, ka elele mama nana hoi ia e aha'i aku apuni na mokupuni, i ike mai ai hoi na makamaka ame na hoaloha o kuu leialoha, John Aalona Kahaleanu Jr. Me ka puiwa a hikilele no hoi i ka ha'iia ana mai ma ke kelekalapa, o John Kahaleanu ua make hikiwawe loa ma ka la 16 o Ianuari, ma San Pedro, Cal. He oiaio ua komo aku ka leialoha a maua i ka navy i ka makahiki 1918, a no ka nui o ko maua aloha ame ke kaumaha i ka maua keiki, pela maua e kakau nei i kona moolelo. Ua hanauia o John A. Kahaleanu ma Kaheka, Paia, Maui, i ka la 5 o Feberuari, 1897, ua piha iaia na makahiki he 24 a oi, a haalele mai la ia maua ame kona kaikuahine.

Ua hanauia oia mai ko maua puhaka aku, Mr. ame Mrs. Kahaleanu. I ka piha ana o na makahiki 7, ua ikeia aku kona ano oluolu, akahai, hoolohe, aloha makua oiaio. I kona piha ana he 16 makahiki, ua hiki iaia ke hooholo i ka mahu palau a kona makuakane e hana ana malalo o ka Hui o Baldwin, a no ka noonoo nui iloko ona e ike i na aina nui o Kaleponi, peia oia i hele ai a haalele iho ia maua ma ka mahina o Mei, la 12, 1915, oia i kau aku ai maluna o ka mokukuna Melrose. I kona hiki ana ma Seattle, ua leka mai oia ia maua e kaapuni ana oia i na aina nui, ahiki i kona komo ana i ka navy i ka mahina o Feb., 1918, ua molia aku i kona ola no ka pono o kona aupuni Hawaii. Kakau hou mai oia ua makaukau kona moku, o ia hoi ka Hairfax o holo i Palani, ua hoouna mua mai oia i kona kii me kona aahu piha o ka navy. He eiwa mahina a pau koke no hoi ke kaua. Ua leka hou mai oia ia maua me keia, e kuu dear mother, ina ike pono oe i ke kai o keia wahi, ua like me ka pali ke kiekie, ua hoopiholoia kekahi moku e lawe ana i ka ohua me na ukana, ua kauohaia na moku e holo me ka mama e hoopakele, i ka poe i pilikia; i ka holo ana ua eo i ko'u moku e kau ana 25 mile i ka hora; a lilo ka makana helu ekahi, o ia hoi ke kiaha dala. Ma kona huli hoi ana mai, ua loaa kuu leialoha i ka ma'i flu i ka 1919, leka mai oia, aia oia iloko o ka navy hospital, malalo o ka malama ana a Uncle Sam. Ia leka ha'i mai ana oia, i na mea apau, e pili ana i kona mau hui ana i komo ai ekolu, 1 liberty bond, hui inikua i kona ola, me kona uku mahina, a malalo iho, my dear mother, give my aloha to papa and sisters, and I be home some day. Good bye, goodbye mother. Ka leka hope no hoi ia a kuu lei, pau kona leka ana mai ia makou ahiki i kona la i make ai, lohe mai la ma ke kelekalapa ua make i ka hora 3 a. m., Ianuari 16, 1922, ma San Pedro, Calif., a ua kali hoomanawanui maua i ke aloha i ka maua lei he keiki, ahiki i ka 25 o Feb., i hala iho la, akahi no a ike i ka helehelena me ke kaumaha; luuluu wale. Ua hiiia mai kona kino wailua e ka moku lawekoa Buford ahiki i Honolulu, kau maluna o ke Kilauea ahiki i Kahului, ma ia wahi kaa malalo o ka lawelawe ana a ke komite o ka Red Cross, F. B. Cameron, kau maluna o ke kaaahi no Paia, hiki i ka home aloha hora 7:30 o ka Poaono, ka la 25. I ka manawa i weheia ae ai o ka pahu, owaho loa e kau ana ke ke'a pua mawaho, a ua wiliia kona pahu me ka hae Amerika, a maluna o ke pani o kona pahu e waiho ana o kona kino, he papainoa me na huaolelo e kau ana penei: In memory of John Kahaleanu. From his shipmates. From the U. S. S. Vestal. Ka nui o ke kaumaha o kona mau pahu he 600 ame ka pahu o kona aahu pono kino 102 paona. Nolaila hoomaikai nui no makou i ke aupuni Amerika no ka hanohano nui i loaa i ka leialoha a maua. He kanikau he aloha nou e J. A. Kahaleanu, kuu lei poina ole i na kau a kau, aloha no o Kaleponi, ka hau hookuakea i ka ili o kuu kama; hii hele ia mai nei e ka halelana i ke kai, e na ale o ka moana, luuluu wale ka leialoha a maua, he keiki. He keiki hoomanawanui, oluolu, akahai, he aloha makua oiaio, pomaikai na keiki i like me kona ano, iloko o ko maua ohana. Ua pii mai oia mailalo mai ahiki i kona kau ana i ka papa ekahi, o ia hoi he wiliki helu ekahi no ka papa elua o ka U. S. S. Vestal. Ma ke Sabati, la 26 ae, i hoomoeia aku ai kona kino wailua, ma ka ilina Kakolika o Kuau. Maluna ae o keia mau mea apau ke waiho nei makou i ko makou mau manao luuluu o ke kaumaha na ka Makua lani e hoolana mai. O makou apau me ka haahaa, MR. ME MRS. KAHALEANU, MR ME MRS. COELHO.

JOHN A. KAHALEANU JR.