Ka Nupepa Kuokoa, Volume LXI, Number 14, 7 April 1922 — KAAWE HE KAIKAMAHINE KEPANI IAIA IHO. [ARTICLE]

KAAWE HE KAIKAMAHINE KEPANI IAIA IHO.

He lono i loaa ae mai Hilo mai e hoakaka ana no ka hoopokole ana o kekahi kaikamahine Kepani i kona mau la o ke ola ana ma o ke kaawe ana iaia iho me kekahi lei-a-i ma kekahi manawa o ka po o ka Poalua o ka pule aku la i hala. He kaikamahine oia nona na makahiki he 17 a nona hoi ka inoa o Hifuko Fujita, a i kona mau makua ka loaa ana aku o kona kino e lewalewa mai ana ma na hora o ka wanaao o ia Poalua. Ma kona manawa o ka loaa ana aku aohe e kala kona make ana, pela ka hoomaopopo a na makua. He rumimoe kaawale ka ko kela kaikamahine mai ko na makua aku maloko o kekahi hale hoolimalima mahope aku o ka Paka Mooheau. Ma ke ahiahi o kela Poalua he helehelena maikai no ka kona me ka ike ole ia aku o kekahi hiona e hoike mai ai no kona kaumaha a ehaeha paha no kekahi mea ana o ka noonoo ino ana, no ia kumu ua hiki ole e maopopo kona manao o ka lawe ponoi ana ae i kona ola. Ua hoikeia aku kona make ana i ka oihana makai a ua malamaia he aha koronero no ka ninaninau a noii pono ana i ke kumu o kona make ana. Ua koho wale ia he ipo kana i aloha ai a no ka hoole ana o na makua i ka mare aku ia ipo i lawe ponoi ae ai oia i kona ola.