Ka Nupepa Kuokoa, Volume LXI, Number 15, 14 April 1922 — Page 4
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
UA HALA I KE ALA HOI OLE MAI.
I kuu Solomon ahonui, Welina kaua:-E oluolu mai kou ahonui, ina he rumi kaawale kekai o ka kaua ahailono, no kela poomanao e kau ae la maluna, nana hoi ia e hoike e noho ana ma kela ame keia peʻa o ka aina.
Ma ka la 7 o Feb. A.D. 1922, hora 3:30 p.m., i pauaho mai ai i keia ola ana o Mrs. Ida John Pii, ma kona home ma Paehala, Keanae, Maui, me he aihue la i ka po, pela no i kikoo mai ai na lima menemeneole o ka make, a lawe aku la i kana o ka uhana, a waiho iho la i ke kino lepo na ka ohana e paiauma aku ma keia ao mauleule.
Ua hanauia oia ma Keanae Koolau, Maui, i ka A.D. 1900 iloko o Augate 11, a ua piha iaia na makahiki he 21 me elima mahina ame eono la, o kona hanu ana i na e-a huʻihuʻi o keia ola honua ana.
He oluolu a he akahai kona kulana, he heahea, a he hookipa i na mea apua e kipa mai ana i ko makou home. Ua haālele iho oia iaʻu i kona makuahine, na kaikuane, ka ohana pooki ame ke ohana e paiauma aku ana me ke aloha maumako nona.
Ua loihi no ka hoomailo ana a ka maʻi maluna o kona kino, a ua nui no hoi na hooikaika ana no kona palekana, aka nae, ua hiki ole i ka mana o na keiki a kanaka ke paa mai, oiai ua kii mai no Oia i kana o ka uhane a lawe aku. E hoomaikaiia Kona inoa.
He hoahanau oia no ka ekalesia o Keanae, he haumana Kula Sabati ame C. E., e hooikaika ana i ka hana a kona Haku aloha, no ke ola o ka uhane; aka nae, ua waiho iho oia i kana mau hana maikai i kiahoomanao na ka Ekalesia, na hoahanau, Kula Sabati, ame ka Ahahui C. E., e hoomanao ai.
Oiai ka make e hookokoke mai ana ia mau minuke, ua hoomaikai ae la oia i ke Makua Mana Loa, no ka huikala ana mai i kana mau hewa i hana ai, a i ka amene ana, ua hookuu mai la ka hanu ola i kona kino, a niau aku la ka uhane ma ke alahele o na mea apau.
Aloha wale kuu kaikamahine hoomanawanui i na hana pono a ke Akua, e imi ana i ka pono o ka uhane, aole oia i kaniuhu mai, a hala wale aku la no.
E Kawaikau o Keanae, ua pau kou ike ana i ka helehelena o Mrs. Pii e maaloalo ana ma na pipa alanui, aole oe o ike ana iaia e hehi hou ana ma kou mau paepae puka. Ua hala, ua nalo no ka wa mau loa.
E Paehala e, ka home o kuu kaikamahine i hanaiia ai a nui, a nau i hookaawale mai i kou makuahine nei, ua pau kou hoope ana i kou mau hunakai ma na papalina aloha o kuu pookii, a pela pu hoi me Waialohe, kai a kuu kaikamahine e auau ai, i na la ikiiki o ke kau, aole oe e kapipi ana i kou mau hunawai lipolipo maluna o kona mau papalina aloha, a no ka mea ua hala puulena aia i Hilo, ua imi aku la ia Papalauahi. Luuluu wale!
E Hana ua Lanihaahaa, ame kou hale laahia ke haawi aku nei o Mrs. Pii i kona aloha a nui ia oe, oiai aole oukou e ike ana i kona mau papalina maloko o kou mau paia laahia, no ka wa mau loa, oiai ua lawe aku ka makua i kana o ka uhane, a waiho iho i ke kino lepo na ka ohana e paiauma aku ma keia ao mauleule, a pela pu hoi me oe e ka Makani Kailialoha, hui pu mai hoi me Kauapeepahaku, ua pau ko olua ike ana ia hoapaahana a ko kakou Haku aloha.
Ke haawi aku nei i ke aloha ma oʻu nei kona makuahine, aloha ouko na hoapaahana iloko o ka ke Akua hana, e hele ana i ka loa ame ka laula o a kaina; malalo o ka lep kahea a ka anela no ka hoonee ana i na hana e holomua ai i kona aupuni. Lihaliha Wale!
E lanakila ka hale o ke Akua, eia ko milimili ke ku kohana aku nei imua ou, aole oe e ike hou ana iaia e kiei a ha-lo hou ana ma kou mau paia laahia, aole no hoi oe e ike hou ana iaia e hehi hou ana ma kou mau paepae puka, no ka mea ua hala aku oia ma kela Paredaiso nani mao, kahi e loaa ai ka maha ame ke ola mau loa.
Kuu kaikamahine leo ole mai iaʻu kona mama, he mea nui hoi na ohana pokii iaia, e hooko ana i na mea apau a kona mau lima e hana ai, a ua lilo ia mau mea maikai apau, i kiahoomanao noʻu e poina ole ai, i na wa apau. Ke hapapa wale ae nei no oʻu mau lima ma ka paia, aole oe, ua hala aku la oe i ke ala hoi ole mai. Auwe kuu minamina wale ia oe-a!
Nou e Kauakukalahale koʻu anoai hope, kahi a kuu kaikamahine i hoohala ai no kekahi mau la, a ma ia noho ana ai i Honolulu i loaa ai i na pilikia ma ke kino, a mamuli o ia mau pilikia i huli hoi mai ai i ka aina nei, ahiki i kona haalele ana mai i kona makuahine nei, na kaikuanane, na kaikaina ame ka ohana apau e noho ana me ke kanikau nona, no ka hoomanao ana i ka mea i hala aku mao.
Nolaila ua pau kou ike ana e Honolulu ia Mrs. Ida John Pii e maaloalo ana ma kou mau pipa alanui, aole hoi oe e ike hou ana e Kawaiahao i kona helehelena maloko o kou mau paia laahia ua hala, ua nalo no ka wa mau loa.
Iaia i hala aku la, ua haalele iho oia i kana kane Mr. John Pii, kona makuahine, Mrs. Peke Ikaaka, kona mau kaikamahine, na kaikaina ame na pilikana lehulehu.
Nolaila e na makamaka ame na hoaloha i hui pu mai me aʻu oiai na minuke o ka luuluu ame ke kaumaha i ili iho maluna oʻu, ke noi aku nei au i ko oukou oluolu e lawe aku i kaʻu mau hoomaikai palena ole, mamuli o ko oukou hui pu ana mai me aʻu no ke ku kiai ana i kaʻu kaikamahine i haalele mai.
Nolaila, ke nonoi nei au i ka Makua ma ka lani Nana auanei e hoopiha mai i ko oukou mau waihona me na pomaikai he nui, a Nana no auanei e alakai ia kakou ma na ala maikai apau o kona inoa.
Me kuu Solomon ke aloha a nui, ame kou mau keiki o ke keena paʻi koʻu welina pau ole.
Owau iho no me ka luuluu.
MRS. PEKE IKAAKA,
ame ka Ohana
Keanae, Maui Mar. 31, 1922.
UA PAUAHO MAI O WM. PUNIKAIA I KEIA OLA ANA
Mahope iho o ke kaamaʻi ana no kekahi mau la kakaikahi wale ae nei no i hala, i pauaho mai ai o William Napunawai Punikaia i keia ola ana, ma ka home o kana wahine aloha ma ke alanui ololi Parker, ma ka hora ewalu o ka po o ka Poalima o ka pule i hala, a waiho iho la i ka ukana luuluu a kaumaha, na ka ohana e paiauma aku mahope nei.
Ma ka aoao o kona moe make, kana wahine aloha, Mrs. Maryann Punikaia, kana mau moopuna ame ka lehilehi o kano ohana e noho ana ma Honolulu nei, iloko o na minuke hope loa o kona ola ana, a hookuu aku la i kona uhane, e hoi me ka Mea Nana i hana, a waiho iho la i ke kino lepo, na ka ohana e hoomoe aku ma kahi mau o na mea apau.
He kulana nawaliwali mau no kona, mamuli o ka elemakule, aolo nae hoi i manaoia e lilo ana ia nawaliwali i kumu nana e hoopokole ae i kona mau la; o kona maʻi nana i hoohikiwawe loa i kona hopena, o ia ka hi, na ia maʻi i hoemi mau mai i kona ikaika, ahiki i ka waiho ana iluna o kahi moe, pau ka hiki ana e hele, ahiki wale no i ke kikoo ana mai la o ka anela o ka make iaia.
Ua kaa aku oia malalo o na lapaau ana mai a Kauka Hanchett, oia nae, ua hiki ole i ka ike ame ka naauao o ke kanaka ke hoopakele ae i kona ola, no ka mea ua palupalu ke kino, koe wale no ka hoao ana aku e hoomama ae i na manao pilihua iloho o ka wa o ka ehaeha.
Ua kaa aku ka hoomaemae ana i kona kino malolo o ka hui hana pahu a hoolewa o M.E. Silva, ma kela po Poalima no, a hoihoi hou ia mai, a ma ka auwina la ae o ka Poaono, i laweia aku ai kona kino wailua, a hoomoeia ma ka ilina o Puuokamalii, ma ka ilina o kana keiki hanauna Mr. Maunakea.
Na ka Rev. Robert Ahuna, i malama i ke anaina haipule ma ka home, a na Mr. J. K. Nakila hoi i malama i ke anaina haipule hope ma ka lua, a hoi aku ka lepo i ka lepo, a o ka uhane i ka Mea Nana i hana i ke kanaka.
Ua hanauia o William Napunawai Punikaia, ma Kealia, Kona, Hawaii, i ka 1838, na Punikaia (k) ame Pehu (w), a ma kona manawa i make aku la, ua piha iaia na makahiki he 84.
He eono lakou i hanauia mai e ko lakou makuahine, he elua kane, ame eha wahine, ua lawe aku ka make i ko lakou nui, a oia hoi keia i ukali aku la mahope, a koe wale no hookahi e ola nei, oia o B.K. Punikaia, e noho mai la ma Lawai, Koloa, Kauai.
Mailoko mai o keia mau kumu hoopulapula, na keiki he nui a lehulehu e ola nei; na moopuna kuakahi ame kualua, i ike ole i ka hanu hope loa o Mr. W. N. Punikaia, a maloko o ka nupepa e ike iho ai lakou, i ka nuhou kaumaha a hoolelehauli.
Ma ka aoao o ka wahine kane-make, na moopuna ame ka ohana o W. N. Punikaia i hala aku la ma ke ala hoi ole mai, ke haawi aku nei i na hoomaikai ame na mahalo ana he nui, i na makamaka ame na hoaloha, i komo pu mai me lakou iloko o ko lakou mau hora o ke kaumaha, ma ka uwe pu ana; pela hoi na makana bo-ke pua a lakou i hoohiwahiwa iho ai maluna o kona kino wailua; ame ka ukali pu ana aku ma kana huakai hoolewa no ka ilina.
E oluolu mai oukou apau, e lawe aku i ka makou mau hoomaikai, a na ke Akua ma ka lani, e haawi mai i na hoomaikai oi ae; a Nana no iloko o Kona aloha palena ole e hoomama mai i na manao kaumaha a luuluu o ka ohana.
O makou iho no iloko o ke kaumaha.
KA OHANA,
KE ANO O KE KALAIAINA
(Kakaui e Z. P. K. Kawaikaumaiikamakaokaopua.)
(Hoomauia mai.)
2. O ka poe imi i na kanawai o ka honua, ame ke ano o ka hana ana i na mea hou, he poe akamai ka nui lakou, a he poe noonoo, he poe maiau, a he poe hooikaika loa kekahi poe o lakou, a paupauoho ole. Aka, i ka wa e hai mai ai lakou i ko lakou ike, alaila, hiki i ka mea hawawa ke hoolaha aku. Aole hoi e hiki ke hookapu i ka lakou mea ike. Pono no i kela kanaka keia kanaka ke ike i kela mea i imiia.
3. He waiwai hoomau ka ike, ame ka naauao, a he waiwai laha wale aku no hoi. Aole i like me ka waiwai maoli. Ina ike kekahi i kekahi mea, hiki no iaia ke hai aku i kana mea e makemake ai; a o kela mea i lohe, hiki iaia ke hai aku i kana mea i makemake ai; a o kela mea i lohe, hiki iaia, ke hai aku i na kanaka he umi, he haneri paha, a o kela poe, hai hou aku lakou, a pela e laha loa aku ai.
Ma ka paʻi palapala, hikiwawe loa ka hoolaha aku i ka ike, ame ka naauao. He waiwai maoli keia mau mea; he waiwai like ole nae me kekahi mau waiwai. Nolaila, aole olelo nio ia keia waiwai maloko o ka olelo kalaiaina. Ua ike no ka poe kalaiaina apau, he waiwai nui loa no ka ike. Ua maopopo no ia lakou, aole loa e waiwai nui ka aina, ke naaupo na kanaka. Ua ike no hoi ka poe kalaiaina, ua pono na aina i ka poe hoolaha ike.
Nolaila, ua kau pinepine na kanawai homalu i ka waiwai o kela poe. Ma na aina naauao, i na palapala kekahi kanaka i buke, hiki no iaia ke olelo i ke alii nona ia wahi, alaila, ua kapu kela buke i na kanaka e, aole hiki ia lakou ke paʻi. Aia no ia i ka mea nana ka buke, iaia wale no. Pela no na mea i imi akamai ia. O ka mea nana i hana mua, nana wale no ia hana, elike me ka penikila.
O ka mea nana i hana mua, nana wale no ia hana. Aole pono ia haʻi ke hana ia peni me ka uku ole i ka mea nana i hanan mua. O Kona waiwai ia. O kona uku no hou no kona imi ana. O ia hoi kekahi mea e ikaika ai na kanaka i ka imi i na mea hou. No ke ano e o keia waiwai o ka ike, nolaila, he okoa ke kuai ana i ka waiwai maoli. Aole hiki ke hoiliili ma kahi hookahi, a e kau maluna o ka moku, a e lawe aku i ka iana e e kuai ai.
Ina he huluhulu, a he palaoa paha, alaila, hiki no ke lawe i ka aina e, i mea e loaa mai ai kolaila waiwai. Aole ma ka kuai ana ka waiwai o ka ike, ma ka hoopili ana no i ka hana. Ina i nui ka poe ike ma kekahi aina, aole mea e ae e waiwai ai ia aina ia lakou, o ka hoopili no i ko lakou ike i ka hana. Ina paapu ka aina i ka poe ike, a hoopili ole ia ka ike i ka hana, make loa no lakou; i ka hune, ame ka pololei. Aole waiwai ka aina ma ka ike wale no. Ua like no ka ike me na huila me ka mea e. Ina hoopiliia me ka moku holo, ka moku, he mea waiwai. Ina hoopiliia me na kaa ukana, ame na kaa kanaka, i mea huki i kela mau kaa, alaila, he mea waiwai ka huila mahu. Pela no ke hoopiliia me ka oihana hana lole, ame ka oihana olopapa, ame ka oihana kuʻi hao.
Ma keia mau olelo i oleloia ai, ua maopopo ka pili pu ana o na mea hooikaika, i kokua kekahi i kekalii. Pono e kokua ka mea ike i ka hana mamuli o ka mea hooikaika i ka hana. Pono no hoi e kokua ka mea ike i na kanawai o ka honua, mamuli o ka mea imi i ke ano o ka hana ana. Ina pela, pomaikai ka aina, e waiwai no ka aina hana pela.
Pauku IV- No na mea e mahuahua ai ka waiwai loaa ma ka hooikaika ana.
Ina o ia mau no ke kumuwaiwai, a o ia mau no hoi ka nui o ka poe hana, a o ia mau ka ikaika o ka hana ana, alaila, o ia mau no ka waiwai loaa. Aka, in a make kekahi, ua uuku iho ka waiwai loaa. Ina he aina koʻu, a hoolimalima au i ka poe hana, a hana lajou i na hora elua i ka la hookahi, loaa no iaʻu kekahi waiwai ilaila.
Ina hana lakou i na hora eha i ka la hookahi, alaila, papalua ka waiwai loaa. A ina hana lakou i na hora ewalu, alaila, papalua hou ka waiwai loa..
Ua like ka mahuahua ana o ka waiwai loaa, me ka nui o ka hana i hanaia. O ia ka kakou i ike ai i kela la i keia la. O ka poe maʻi, o ka poe elemakule, o ka poe palaualelo, aole e mahuahua ana ko lakou waiwai no ka mea, aole e hiki ia lakou e hooikaika.
Eia kekahi, he mea nawaliwali ke kanaka. Ina hooikaika loa oia, mai ke kakahiaka a po ka la, a hana i kela la i keia la, mamuli, pau kona ikaika, a lilo no ia i mea nawaliwali loa. Ina ua nui aku ka ikaika o ke kanaka, in a ua nui aku ka waiwai loaa ma ka hookaika ana. Ina i like ka ikaika o kekahi kanaka me na kanaka e, he umi, alaila, like no kona waiwai loaa ma ka hooikaika ana, me ko kela poe he umi. Nolaila ua maopopo keia mau mea.
1. Ina hiki ia kakou ke hoomahhiahia i ka hana, a pa-umi ka nui o ka hana ana, a laila, ua pa–umi ka waiwai loaa. Ina hiki i ke kanaka hookahi ke hana i ka hana a na kanaka he umi, alaila, loaa no iaia ka uku a na kanaka he umi. Ina he umi haawe ukana e waiho ana ma Wailuku, a kii kekahi kanaka i ka lio ame ke kaa, a lawe mai i kela mau haawe a na kanaka he umi, ahiki i Lahaina nei, alaila, pono iaia ka uku o na kanaka he umi. A ina hiki i na kanaka apau ke hana pela, alaila, mahuahua loa ka waiwai loaa, pa-umi no na kanaka apau. A in a imi akamai kekahi kanaka, a loaa ka huilawai olopapa, a hana kela huila i ka hana a na kanaka hookahi haneri, alaila, ua like ka hoonui waiwai ana me na kanaka olo wale hookahi haneri. A in a i nui loa ka hana i hana akamai ia pela, alaila, e waiwai loa no kela aina.
2. Eia kekahi. Ua nui loa na mea e pono ai ko ke kanaka noho ana, aole e hiki i ke kanaka ke hana oia wale. Ua makemake kakou i ka hale, i ka ai moʻa, i ka lole. Aole hiki ia kakou ke kua i ka laau ilalo me ka niho, elike me ka Biva. Aole hiki ke hoomoʻa i ka ai ma ka lawelawe ana o ka lima. Aole hoi e hiki ka lima, ke lawelawe a hana wale i ka lole.
Loaa koke no nae ia kakou ka mea e hiki ai. Hina koke no ka laau i ka hao, a moʻa koke no ka ai i ke ahi, a paa koke no ka apa lole i ka huila. Malaila i maopopo ai ka maikai io o ia mau mea kokua o ka honua. Ina loaa i ke kanaka kela mau mea kokua, hiki no iaia ke hana i ka waiwai, hana ole ia e na lima wale no.
(Aole i pau.)
KUU KANE I ALOHA NUI IA
UA HAALELE MAI IAʻU
I ka Lunahooponopono o ke Kuakoa; Welina pu kaua: E oluolu oe e hookomo iho ma kahi kowa o na kolamu o ke Kuokoa i keia poomanao e kau ae la maluna, o ia hoi, ua haalele mai kuu kane i aloha nui ia, oia o Herman Kahalewai Ke, i keia ola ana, ma ke kahiaka Poalua, Maraki 28, 1922, hora 8 a.m., a hoi aku la oia me ka Haku Mana Loa, kahi mau o na mea apau; a waiho iho la iaʻu kana wahine ame ka maua mau keiki he umi e ola nei, oia o Sam Kahalewai o David, o Mrs. Kawaihoa, Dewey, Grace, Deborah, Mable, Arthur, Clara, ame George ame 5 moopuna he 15 ka nui o ka maua mau keiki apau, a ua hala e aku no 5 ma kela ao.
No ekolu mahina kona kaamaʻi ana, a haalele mai la oia ia makou, ua hoaoia i ke kauka a me na ano apau, aka ke mea hiki ole ke paa aku, ua lawe aku la no ka Haku Mana loa, ka mea nana i hana a waiho iho la i ka ukana luuluu he kaumaha.
Auwe kuu kane aloha e, kuu makua hoi, kuu hoapili o ka po ame ke ao, he makua hoi o na lei a maua, he keiki; kuu makua hoi o ka wa loaa ame ka wa nele, ua puanuanu ka poli, ua hoi aku la no oia me ka Mea nana i hana, auwe kuu minamina pau ole.
Ma ka hale hanahao o ka Honolulu Iron Works, oia i hana ai no na makahiki lehulehu, mai ka wa opiopio mai, he kamana kana hana, ahiki i kona lilo ana i poo no ka hale kamana, ua piha iaia na makahiki he 40 o ka hana ana malaila.
Ua piha ia maua na makahiki he 32 a oi iki o ko maua noho mare ana, a ua ho no hoi ka berita a ke Akua, na ka make e hookaawale ia maua, a ua piha iaia na makahiki he 54 o kona ola ana.
Nolaila me keia mau manao kaumaha apau, ke haawi nei au ame na keiki a maua i ke mahalo a nui i ka Honolulu Iron Works ame ka poe hana apau, no ka lakou kokua he nui iaʻu, ame ka lakou makana pua he nui, a pela pu no hoi au e haawi nei i ka mahalo i ka ohana apau, ame na hoaloha, no ka lakou makana pua, ame ko lakou komo pu ana mai me aʻu iloko o ke kaumaha.
Nolaila na ke Akua no e hoopomaikai mai ia oukou apau, a pela no hoi ke Akua e hoomama mai ai i koʻu mau kaumaha ame ka maua mau keiki makua ole.
Owau no me ka luuluu,
MRS. H KAHALEWAI KE,
me ka ohana Keiki.
NA LUNANUI O KA HUI POOLA
O na lunanui i koho pono ia o ka Hui Kokua ame Manawalea o na Poola, no ka manawa o hookahi makahiki.
Jesse Uluihi, peresidena; J. K. Mokumaia, hope peresidena; George K. Kane, Kakauolelo moolelo; William F. Bush, hope; John Ke, kakauolelo ohi dala; Joesph Kalana, hope; William M. Ahia, Puuku; B. N. Kahalepuna, lunahooia; Joesph K. Kaahea; Kahunapule; Sam K. Kaawa, I@amuku.
Papa Mana Hooko Thomas Pedro, lunahoomalu, komite ninaninau. Joesph K. Kaahea, lunahoomalu komite malama ola.
O ka põe apau e makemake ana e komo i ka Ahahui Poola, a pela hoi me na lala i loaa i ka maʻi e hele ae e ike mua i keia mau lunanui o ka papa mana hooko.
GEORGE K. KANE,
Kakauolelo Moolelo.
Ka Pila
GRAFONOLA COLUMBIA
MAOPOPO KA WA E PAU AI
Na ka mea hoopaa nona iho e makaala mea nou. Ua hiki ia oe ke hulahula ahiki i ka huaolelo hope loa.
UKU LIILII KE MAKEMAKEIA
THAYER PIANO CO.,
LIMITED
148-150 Alanui Hokele
HALE UWI WAIU
-o-
MAPULEHU
PUKOO, MOLOKAI
E Hooholo Ana i ka
MOKUKUNA GESOLINA
LELEIONA
Mawaena o na Awa o Honolulu me Molokai
Geo. P. Cooke,
ONA.
Poe Lawe Hau me Waiu
O NA HAWAII
i makemake i ka pomaikai o ke Kanawai Hoopulapula o Molokai, e hoolako ia lakou iho no ka holomua ma ka loaa ana ia lakou o na Laho Mahiai me Hanai Holoholona ma keia hui kamaaina.
Ke malama nei makou i na Lako Hana Maikai Loa, pela hoi me ke PENA SHERWIN-WILLIAMS, ka mikini Umi Waiu DE LEVAL ame na lako pili i ka home o na ano apau.
Maloko o ko makou Keena o na Lako Paani e loaa no he ahua o na pu liilii ame na raifela maikai.
E.O. Hall & Son, Ltd.
NA MEAHOU MA WAIKAPU, MAUI.
Solomon Hanohano; Aloha nui kaua:-He mea hauoli i koʻu lunaikehala ame koʻu uhane ka hoomaikai palena ole i na hana o ka Ahahui Euanelia o na Mokupuni o Maui, Molokai, ame Lanai, i keia kau ma Waikapu Maui, o ia hoi keia:
He 4 haiolelo mai ka Ekalesia mai o Paia i loaa ka leo kahea o ke Akua ia lakou, e hele aku e haʻi i ka olelo a ke Akua iloko o kona kihapai.
I D. Kealoha, haiolelo no ka Ekalesia o Huelo ame Keanae.
James L. Faufata, haiolelo no ka Ekalesia o Keokeo, Maui. John Kukahiko, haiolelo no ka Ekalesia o Honokokau ame Honolua; E M. Kepoo, haiolelo no ka Ekalesia o Wananalua, Hana:
O keia mau inoa maluna ae, imua ponoi no o ka lakou kumu kahi i aʻoia ai, oia no ka Rev. Moses M. Kahiapo, Kahu o ka Ekalesia o Paia, Maui.
Owai na ekalesia e ae iloko o ke Teritore o Hawaii nei, elike me ka ekalesia o Paia nei e nana nei i keia mau la i puka na keiki a hoopiha aku i ka makalua o na ekalesia kahu ole. E pule nui kakou i ke Akua, a Nana no e kokua mai.
Koʻu aloha nui ia Mr. Lunahooponopono ame na keiki o ka papapaʻi.
KEKAHI ELELE EKALESIA,
Waikapu, Maui, Apr. 2, 1922.
KOPA MOI KEOKEO NO KA MIKINI HOLOI
He Kopa maikai loa i hiki ke hoohanaia
no na ano hana apau i pili i ka home.
Hiki ke holoi i na lole nahenahe loa me
ka pilikia ole. O kona oi loa aku o ka
maikai no na mikini holoi - No ka holoi i na pa ame holoi hale.
KUAI I PUOLO MAI KOU HALEKUAI MEAAI MAI
T.H. DAVIES & CO., Ltd.
Na Akena Wale no no ka Paeaina Hawaii
E KA POE HOOKUONOONO
KE MAKEMAKE OUKOU I NA LAKO---
No ka home a no ka aina mahiai paha e kipa aw ma ke keeno o na lako hao o ka
AMERICAN FACTORS, LIMITED
No na mea elike me keia:
Kapuahi. Meahana Mahiai. Uwea Pa Moa me Pa.
Lako Mahiai. Meahana Kamana. Pena me na Palaki.
Lako Halekuai me Pa. Pili Hao a Ano e Ae. Aila me Vaniki.
O KE KANAKA KUAI I NA LAKO HANA MAIKAI UA LANAKILA E NO OIA I KA HAPA O KA HAKAKA
Aole hiki ia oe ke lawelawe i na hana maikai me na meahana inoino. O ke kanaka e hoao ana e hana me na meahana inoino, e hoea mai ana i kona wa e kiola ai, a kuai i na mea kupono, in a he noonoo oia Aka nae ua poho wale ka manawa ame ke dala ma ka hana ana pela. Ke kuai nei o Lewers & Cooke, Ltd., i na lako hana maikai wale no.
KE MALAMA NEI MAKOU HE AHUA PIHA PONO LAULA O NA
LAKO MAHIAI AME NA LAKO KUKULU HALE
He Makemake Paha Kou i
KO'I, KIPIKUA, KOPALA, HO, HAMARE, PAHIOLO, KO'I LIILII, NA LAKO KAMANA PIHA PONO, HOANA HOOKALA, PAKEKE.
Papa o Kela ame Keia Ano, na Lako Hao, Pena, Aniani
Kakau mai a i ole kipa mai no na hoakaka. E hookoia no na auoha apau ma ka leka me ka akahela ame ka hikiwawai loa.
LEWERS & COOKE, LIMITED
Honolulu
NA I'O PIPI MOMONA WAIEA MAI NA AINA HANAI PIPI LIKE OLE MAI O HAWAII NEI
O eia i'o pipi momona, ka papa maikai hookai ma ka makeke, a ke kuai hoolilo nei makou, ma ke kumukuai haahaa, me ka hoopono maoli.
Eia keia mau kumukuai malalo loa iho o ko na makeke e ae, a hui pu iho me na kulana maemae e hoohanaia nei e makou ma ka lawelawe ame ka hoahu ana i na iʻo pipi, he mea pono e lilo ko makou makeke i makeke nou.
Pipi Ku Mokupuni………………………………………….…..15c o ka lb.
Kulana Aoao o ka Pipi………………………………………….15c o ka lb.
Kuʻekuʻe Pipi………………………………………………….12½c o ka lb.
Pipi Palai Iwi Hoehoe……………………………………………15c o ka lb.
Pipi Palai Uha……………………………………………………15c o ka lb.
Kulana Aoao Koala……………...…………………………….15½c o ka lb.
Iʻo Hipa Ku……………………………………………………...10c o ka lb.
Iʻo Umauma o ka Hipa………………………………………..…10c o ka lb.
Iʻo Hoehoe Palupalu…………………………………………...12½c o ka lb.
WAIUBAKA MAILE………………………….……………….50c o ka lb.
METROPOLITAN MEAT MARKET
E ninau no LUI; he oluolu na kukaʻi ana ma ka kaua olelo makuahine.
Hele mai, mai hilahila!