Ka Nupepa Kuokoa, Volume LXI, Number 15, 14 April 1922 — Page 6
| This text was transcribed by: | Kamehameha Schools Gift To Dr. Chun |
| This work is dedicated to: | Dr. Michael J. Chun |
Ka Nupepa Kuokoa
KE KILOHANA POOKELA NO KA LAHUI HAWAII.
He Moolelo no
NA PUUWAI ELUA
A I OLE
Ka Hewa o ka Wahine---He Moolelo i Owiliia me na Haawina Hoopihoihoi Noonoo o ke Au o ka Manawa
"Aia he mau mea lehulehu loa a kaua e nana aku ai ma ka aoao e pono ai kou makuakane, aka aole nae e ikeia kela mau mea, ahiki i ka huli ponoia ana aku o na hana apau i lawelaweia. he mea maa keia i ike mau ia ma na wahi apau, o ka honua nei, o ka hoahewa ka mua, me ka huli pono ole, in a paha ua pili ka hewa a hewa ole i kekahi mea.
"No'u iho, he manaolana mau ko'u i na manawa apau, e hoea mai ai i ka la e auhee aku ai ka ino, a nohoalii mai ka maluhia. Ua hoea mai la au no ke kokua ana aku ia oe ame mama, a no keia home, in a o Keaka maoli ka mea nana i kukulu, a o olua like, ka i kokua aku ma ka hoolako ana i na lako hale, alaila aole loa je wahi kuleana iki o kela kanaka i loaa mai nei ia'u mawaho, e noho mai ai malaila."
"Aohe maopopo ia'u o ka mea e hana aku ai no ko maua pono, o keia iho la ke kumu nui a'u i makemake loa ai e hoi mai o Keaka, oia ka ike i na mea apau."
Ke ike la o Kapena Ivana, i ke poho o na manaolana o Ela e upu aku la no ka hoea mai o Keaka Mebure, aole nae ona makemake e hoike mai i kana aloha, no ka nalowale honua ana o kona kaikunane, me ka ike ole ia ma kona wahi hana no na hora he iwakalua-kumamaha i hala aku, o lilo auanei ia i kumu e hooi loa ia aku ai ke akumaha o Ela.
Haalele iho la na opio ialoko o kela keena, a hele aku la noloko o ka rumi hookipa, kahi a Mrs. Mebure e noho mai ana, me na manao nauki no ka hoea koke ole mai o kana keiki, i hiki ai ke hoauheeia aku, na ao omamalu o ka pilikia e halii ana maluna o lakou.
Mahope o ka ike ana aku o Kapena Ivana ia Mrs. Mebure, a ia lakou hoi i noho iho ai no ka launa ana, pane mai la o Mrs. Mebure.
"Ua hiki loa ia Keaka ke hoopau ae i keia mau pilikia, e ka hihi wale ia mai nei, oia hookahi wale no ka i kamaaina i na hana a kona makuakane, a ma ka'u koho aku, he mau pulapu wale no keia ma ka aoao o ke aupuni, i wahi e kaa aku ai malalo o ka malu o na luna oihana kekahi, mau palapala a kuu kane e waiho nei.
"Ua ku a hoonaukiuki maoli au i ka hana a kela makaikiu, o ka hoounaia ana mai e ke aupuni, no ka mea, ma kahi o kona hoakaka pono mai ia maua, o ke ano o kana hana i hoounaia mai ai, me ka pupuahulu wale no oia e lawelawe ai i kana hana, me ka huliia oloko nei o ko maua home; a o ka mea nana i hooi loa mai i ke kaumaha o ko maua noonoo, o ia ka ili ana mai o keia pilikia, me ka maopopo mua ole, a iloko hoi o ka manawa i loaa ai na manaolana hauoli no ka'u keiki, mamuli o kau kokua ana iaia, e lilo i haku no kekahi oihana ma Ladana.
"Ua hoohuoi wale no nae au, e hoea mai ana kekahi pilikia, mamuli o ka lelele o ko'u oili, eia ka he mea oiaio no ia. Ua loaa mua no ia'u keia ano haawina mamua aku o ka haalele ana mai o kuu kane ia makou, me ka hikiwawe loa. E kii aku oe e Ela, e ho-a ae i kekahi kukui, aole paha e hoea koke mai ana o Keaka a hala hou he hora mai keia manawa aku, o ka'u nae e ha'oha'o loa nei, o ia kona hoouna ole mai i kekahi kelekalapa, in a ua kau mai oia maluna o ke kaaahi, i ole hoi kakou e kakali makehewa aku iaia."
I ka loaa ana mai o ke kukui, nanea wale aku la no lakou, me ka hoao ana aku o Kapena Ivana, e pane i na ninau apau a na lede, e waiho mai ana imua one elike me kana i ike ai he pono a iloko o kela kuka'i olelo ana a lakou, i maopopo loa ai ia Ivana. aole kela mau lede i ike i na moolelo e pili ana i na haba i lawelaweia e Mr. Mebure maloko o na nupepa.
Ua ala lakou ma kela po, ahiki i na hora o ke aumoe me ke poho o na manaolana no ka hoea mai o Mebure, oiai no nae o Ivana hookahi wale no ka i ike, aole e hoea mai ana kona hoaloha, o kana nae e nalu mau ana iloko ona, pehea ana la oia e hoike aku ai i ka makuahine ame kana kaikamahine, no ka nalowale ana o Keaka no kekahi manawa loihi?
Mamuli o kela aumoe loa, nonoi okoa aku la o Ivana, i kona mau hoa, e hoi oia noloko o kona rumi no ka hooluolu ana, o ka mea apiki nae, iaia i hoi aku ai e hiamoe, aole he hiki iaia ke hiamoe, nolaila ala okoa ae la oia iluna, me ka hoi ana aku a noho ma ka puka aniani, oiai he konane maikai ka malamalama o ka mahina ma kela po, ua nanea maoli oia i ka nana iwaho, a iloko no hoi o kela manawa hookahi, ke nalu pu la oia , no kahi i nalowale ai o Keaka, ame ka hopena i kau aku maluna on a.
Oiai oia e noho la ma ka puka aniani, me ka noonoo nui ana no kona hoaloha, akahi no oia a haupu mai, no kana misiona i hoolala mua ai, no ka hele ana aku e hui kino me Miss Kalani, a o ia kana i hooho ae ai:
"Ua palaka maoli au, no ka'u huakai e ike ia Miss Kalani, nawai hoi e ole ka poina, i ka oili ana mai o keia pilikia, i ka manawa i moeuhane mua ole ia. E holo aku ana nae au i Kanale Hale, i ka la apopo, me ko'u nana ole, ina au e ikeia mai ana e ka poe i kamaaina mua ia'u. Ma ka la apopo, e hoouna aku ai au i kekahi leka i ka oihana kaua, me na hoakaka apau, e pili ana i na kumu, o @ hoike mua ole ana aku ia'u iho, imua o ko'u mau poo ma ka oihana."
Ma kela manawa nae, i hoohikileleia ae ai oia, i ka lohe ana aku i ka nakeke mai o kekahi mea mawaho o ka hale, a hoomanao ae la oia, malia paha o Keaka ua hoi mai la, nolaila kiei aku la oia iwaho o ka puka aniani, o kana mea nae i ike aku ai, he kanaka kino loihi, e kamailio pu ana me ka makaikiu, a hoomanao iho la keia, he kanaka kela i hoea mai, no ka lawe ana ae i ke kulana kiai, a e hoi aku ka mea mua, no ka hoomaha ana.
MOKUNA XVIII.
Ma ke kakahiaka ana ae o kekahi la mai, aole he nuhou i loaa mai e pili ana no Keaka Mebure, he mau kelekalapa ka Ivana o ka hoouna ana i Ladana ma kela kakahiaka, aole nae he pane i loaa mai, e hoolanaia ai kona manao, o ka pane wale no, o ia ka maopopo ole o kona wahi i nalowale ai, ame ka hopena i kau aku maluna ona.
Ua hoopilikia loa mai ko Ivana noonoo no kona hoaloha, nolaila hele okoa mai la oia e hui pu me ka makaikiu e kiai ana mawaho o ka hale, ke kanaka keia i kahiko iloko o ka oihana makaikua, a ua maopopo iaia na hihia ano nui o na ano like ole i lawelaweia ma na wahi apau o ke ao nei.
O ka pane a ka makaikiu i haawi mai ai no kana mau ninau, e pili ana no ka Keaka Mebure, wahi e hele ai, ame ka hopena i kau aku maluna ona, o ia keia:
"Ma ko'u manaoio, he hookahi wale no mea maopopo loa e pili ana i kela kanaka opio. Ma o na palapala a'u i hoonua aku ai i ko'u mau poo ma ka oihana, ua lawa loa ka ike, no ka launa mau ana o ke keiki me kona makuakane ma ka leka, a ua maopopo iaia kahi o kona makuakane e noho mai nei, ame kana hana, malalo iho la o kela mau kumu, ua lawa loa ia no ka hopuia aku o Keaka Mebure, in a nei no kona ikeia ma kekahi wahi, ma ke ano, ua komo pu oia iloko o ka hewa a kona makuakane i hana ai, a o ka lua, ua lilo oia i mea kokua aku i wahi e paa ole ai kona makuakane i ka hopuia."
"Aole loa e hiki ia'u ke manaoio aku i kau mau olelo hoahewa maluna o kuu hoaloha, oia kekahi o na kanaka pololei loa ma kana mau hana apau, ua maopopo loa iaia, aia maluna on a ka noonoo nui ana o kona makuahine ame kona kaikuhine, no ka pono o ko laua noho ana, a o kona nalowale honua ana iloko o keia manawa, aole ia no kona manao maoli e haalele ia laua, aka ai kekahi hana eha i hookauia aku maluna ona," wahi a Kapena Ivana, no ke kupale ana i knoa hoaloha.
"Aohe mea hiki ia'u ke kokua aku ia oe e ka hoaloha, he mea wale no au i hoounaia mai no ke kiai ana i keia home. Ma ko'u manao nae, me he mea la aia ko hoaloha, ma ke alahele e halawai pu aku ai me kona makua kane, a i ole aia oia ma kekahi wahi kahi e pee ai, me ka hoike aku i ka makuakane, i ka nuhou e pili ana i ka ikeia ana o ke karaima ana i hana ai. No kekahi mau mahina ae nei i hala, ko laua hooholo leka mau ana mawaena o ka makuakane ame ke keiki, eia nae aole i loaa mai kekahi hoike, no ke kaawale ana aku o Mebure makua, ma na aina mamao, ma ia ano, ua ulu ae kekahi manao hoohuoi, eia no oia ma Enelani nei kahi i pee ai."
Nanao iho la ka makaikiu iloko o ka pakeke o kona kuka, a haawi mai la ia Ivana i kona pepa inoa, oia o Toma Liki, a e hoakaka pu ana hoi kela pepa inoa, i kana oihana he makaikiu ame kona wahi i noho ai ma Ladana.
"Aole au he makaikiu malalo o ka oihana a ke aupuni, aka ua kiiia mai ai no keia hihia. Ua noho makaikiu au no na makahiki he umi i hala ae nei malalo o ke aupuni, a ua waiho aku i kela oihana, no ka lawelawe ana i ka'u oihana ponoi iho. Ua waihoia mai keia hihia iloko o ko'u lima, aka nae, in a he hana pohihihi kekahi au i ike ai ma keia mua aku, a i manao oe, e hookolo aku ma kahi e hoauheeia aku ai kela pohihihi, alaila ua hiki ia oe ke hilinai mai maluna o'u, pela iho la au i haawi aku la i ko'u pepa inoa ia oe."
Nana iho la o Kapena Ivana, i ka pepa inoa a i mai la: "No keia manawa aole a'u hana e waiho aku ana imua ou, aka koe wale no paha, kou hookolo ana aku ahiki i ka maopopo ana o kahi i nalowale ai o kuu hoaloha."
E hoao aku ana nae o Ivana e hoi no kahi o ka hale e ku mai ana, ua kahea mai la ka makaikiu iaia, me ka pane ana mai:
"E huikala mai oe ia'u e Kapena Ivana, in a au e a'o aku ana ia oe, e koi koke aku i ka makuahine ame kana kaikamahine, e haalele iho i ko laua home, a hoi aku ma kekahi wahi okoa e noho ai me ka hakalia ole.
"No na ukana apau maloko o kela hale, ua hiki ia laua ke lawe pu me laua, a i ole hoolilo aku paha i ka poe e makemake mai ana, oiai ua ike au i na likiki hookaa apau, i hanaia ma ka inoa o Mebure opio. Ke kamailio aku nei au i keia ia oe ma ke ano hoaloha, no ka mea ua maopopo loa ia'u, aole e palekana ke ola o kela mau lede in a laua e paakiki iho ana i ka noho ana maanei nei.
"Aia he nui a lehulehu wale o ka poe e noho nei ma keia wahi, i kamaaina i ka ohana Mebure, o ka oi loa aku o ka papa haahaa o na kanaka, ka poe i puehu aku ka lakou mau dala i hoahu ai maloko o ka banako malalo o ka Mebure mau hana apuka, nolaila in a e ala mai ana ka manao inaina iloko o kela poe, he hana paakiki ka hoomalu ana aku ia lakou, pela hoi ka hoopakele ana ae i na lede, nolaila e ike mai oe e ka hoaloha, no ko laua pono wale no au e hoike aku nei i keia mea imua ou. Aole i maopopo i na lede, ke ko'iko'i o ka pilikia e hoopuni nei ia laua i keia manawa."
Ua hele ka helehelena o Kapena Ivana a kaumaha maoli, iaia e hoolohe aku la i kela mau hoakaka a ka maakikiu, a o ia kana o ka ninau ana mai:
"Manao anei oe, ua like aku ka pilikia o na lede, elike me kau i kamailio mai nei ia'u?" Aole loa au i noonoo mua no keia mea!"
"Aole loa he wahi kanalua iki oloko o'u mamua o ka napoo ana o ka la, e hoopuniia ana kela hale e na kanaka, i hele a piha me ka inaina, a he hana hiki ole loa iau ke hoomalielie aku ia lakou, koe wale no paha ke kauoha ana i kekahi pualikoa; oiai nae he nui ka manawa nou e kokua aku ai ia laua, aohe hewa o ke kaawale mua i kahi mamao, mamua o ka hoea ana mai o ka poino."
No kekahi mau minuke, aole e hiki ia Kapena Ivana, ke pane koke mai, hele mai la oia a piha i ke pohihihi no na mea a ka makaikiu i kamailio mai la iaia, aka nae, iaia i noonoo pono iho ai me ke akahele, me ha mea la, ke kau okoa mai la imua on a, kekahi hana ku i'o i ka hoopoino i ke ola o na lede, nolaila hopu aku la oia i ka lima o ka makaikiu, a pane aku la:
"Aole i maopopo ia'u, ke ano a'u e hoomaikai aku ai ia oe, no keia mau hoakaka au i waiho mai nei imua o'u, no ka pono o na lede; ina no kou kaawale mai keia hana ae, alaila ke waiho aku nei au i kekahi hana nui iloko o kou mau lima, o ia no ka hookolo ana aku ma ka meheu o Keaka Mebure, kuu hoaloha. Na'u no e uku ia oe, elike me kau e koi mai ai!"
Me ke kakali ole aku o ka lohe i ka pane a ka makaikiu, huli aku la o Ivana hoi, no kahi e ku mai ana o ka hale, me na kaina wawae kaumaha, aia wale no kona mau maka ilalo kahi i nana ai, no ka mea ike iho la oia, ua ili aku ke ko'iko'i maluna ona, i ka makaala ana aku i ka pono o kela mau lede iloko o ko laua manawa o ka pilikia.
Ma kela kakahiaka, ua kamailio okoa aku oia ia Ela ame kona makuahine, nana e hele e naua i ka haleleka, ina paha he leka kekahi na lakou. He hookahi wale no leka i loaa aku iaia, he leka mai ia Keaka Mebure mai, na ua o Kapena Ivana, me kona kelekalapa okoa ana aku i ka hui e noho hana ana o Mebure, pela no hoi i ka haku hale, o kahi a Mebure e noho hoolimalima ana, a o ke kolu o na kelekalapa ana i hoouna aku ai ma kela kakahiaka, i ka Loio Malo, ina paha ua ikeia, a i ole ua loheia paha kekahi mea e pili ana no Mebure. He hookahi no pane o ka hoikeia ana mai no kana mau kelekalapa, aole i ikeia o Mebure, mahope iho o kona haalele ana aku i kona keena hana, ma kela auwina la, a ua o Kapena Ivana e hoomanao mau la.
I ka hoea ana aku o Kapena Ivana no ka hale, e kakali mai ana no na lede elua iaia o ka hoi aku, he hookahi ko lakou ai like ana, i ka aina kakahiaka. I ka noho ana iho o ua o Kapena Ivana ilalo, kiola aku la oia i kona papale maluna o kekahi pakaukau uuku, alaila kamailio aku la i na lede:
"Aole he leka i loaa aku nei ia'u ma ka haleleka, koe wale no he hookahi leka mai ia Keaka Mebure mai ia'u, me na olelo uuku loa maloke olaila, me kona hoakaka ole mai i kana wahi i hele ai, ame kona wahi e noho mai nei. Ua waiho mai oia i na hooponopono ana apau iloko o ko'u lima, a oiai, aole he mau kuhikuhi maopopo loa mai iaia mai, no ka mea e hana aku ai, ma ko'u manao nae, e haalele koke kakou i keia wahi i keia la no, me ke kakali hou ole aku.
"He mea hookahaha aku paha keia i ko olua noonoo e na lede, aka nae, o keia wale no ka hana pono iloko o keia manawa o ka pilikia. E waiho mai olua i na hooponopono ana no keia mau lako hale iloko o ko'u lima, a na'u e haawi i ke kauoha, i kekahi mea kupono maanei, nei, no ka hoouna ana ae no Ladana. E noho ana kakou maloko o kekahi hokele, no ka manawa pokole, aia a loaa kekahi hale kupono, ia wa kakou e hoi aku ai a noho malaila, nolaila aole he hoolilo ana aku i keia mau lako hale ua loaa mua, he hoemi ana mai ia i na hoolilo ana aku i keia mau lako hale ua loaa mua, he hoemi ana mai ia i na hoolilo, o ka noho ana aku ma kela home hou."
(Aole i pau)
He Moolelo no
PITA NIKOLA
A I OLE
Ke Duke i Haalele Aku i Kona Kulana Hanohano a Lawe Mai i ke Kulana Makaainana
"Heaha la hoi, aia no ia i kou manao, he nui loa ka manawa nou e noonoo ai. Iloko o ka mahina hookahi, a i ole eono paha pule e hoea hou mai ana no au no ka ike ana ia oe, a in a ua hoololu ae oe i kena manao ou, alaila e komo pu mai oe iloko o ka ohi ana i na pomaikai a'u i hoomakaukau mua ai nou; a i hoole mai no oe, o kou kuleana no ia. Ua hiki no ia'u hookahi ke hooko i ka'u hana, aka no ko'u manao hoi, o oe ka mea e maalahi ai ia hana, aka no ko'u manao hoi, o oe ka mea e maalahi ai ia hana, pela wale no au i ake nui ai, i elua kaua ma keia hana hookahi."
"Aole loa o'u makemake e komo hokai wale aku no iloko o kau hana, a oki loa aku hoi ko'u lilo ana i mea ku-e aku ia oe."
"Ke kaumaha loa nei au, no kou paakiki e Nikola, aka ua hiki no nae, malia aole no he pilikia ma ko'u hana hookahi ana aku. He lio ko'u ua makaukau, aia iloko o ka ululaau kahi i ku ai, a ma ke kaaahi lawe waiu o keia kakahiaka nui, e kau aki ai au no Pilikelepia. Pehea e hoike aku ana anei oe i ko'u wahi e hele nei?"
"Aole he pomaikai e loaa mai ia'u, ma ka hoike ana ae i na mea e pili ana ia oe."
"Ua pono e Nikola, o ke aloha no kou, a hui hou aku kaua i ka wa pono!"
Aohe a Nikola pane aku no ka haawi ana mai o Kimo Koka, i kona aloha, aka nae i ka hala ana aku o ua kanaka nei, wehe ae la oia i ka puka a hamama, pela hoi me na puka aniani, no ka hookomo ana mai i na ea oleole iloko o ka hale, me he mea la, ua hele oloko o kela hale, a piha me na ea haumia, mamuli o ka noho ana o Kimo Koka maloko o laila.
I kela noho hookahi ana iho o Nikola, ke noonoo la oia, no na olelo apau a Kimo Koka ikamailio aku ai iaia, pela hoi kekahi mau meahuna, a kela kanaka o ka hoike ole ana mai. Ma kana koho iho, aia kekahi meahuna pohihihi i pili ia Beni Kamerona, ua ike maoli oia i ka hele o ka helehelena o Kimo Koka, a kunahihi, i ka wa i lohe mai ai i kela inoa. O ka mea nae ana e pohihihi loa la, o ia kekahi hana pohihihi loa, elua i aa ole ai e kamailio ae, a hooholo iho la oia, he mau kanaka kela i komo aku iloko o kekahi hana karaima puuwai clecle, ana nae e hiki ole ai ke hooiaio i ke ano o ke karaima i hanaia.
Oiai no ua o Nikola e noonoo la, kani ana no ka bele o ke kelepona, o kona ku ae la no ia, a hopu aku la i ka ohe hoolohe, a pane aku la:
"Halo, ua hala aku nei kela kanaka; ua hookuu aku nei au iaia, elike me kau kauoha ia'u. He manawa loihi kona i noke mai ai i ke kamailio. Aole oia e hoea hou mai ana a hala ka mahina hokahi, a malia paha oi aku mamua o kela manawa. Aole e hiki ia'u ke hele aku e hui pu me oe i keia po, e hoomanawanui a ke kakahiaka o ka la apopo, ua lawa ka'u hana no keia pe, nolaila o ke aloha no kou," o ke kau ae la no ia o Nikola, i ka ohe hoolohe o ke kelepona, me kona hoihoi ole mai la, no kona alakaiia ana iloko o kekahi hana pohihihi.
MOKUNA XII.
Iloko o na hana hoopihoihoi noonoo ma kela po, aole ia i lilo i kumu e hoohiaaia ai o ke kanaka opio, i hakalia no a kau kona poo i ka uluna, o ka lilo aku la no ia, a na ke kani kapalili o ka bele o ke kelepona, i hoala ae iaia, o ke ano nui o kela kelepona, e kauoha mai ana o Makuaia iaia e hele koke aku ma ia kakahiaka, no ke kukakuka ana no na mea i hanaia ma ka po aku i hala; ua hookahaha loa ia mai nae kona noonoo, no ka hoakaka ole mai o Makuaia e pili ana i ka hana ki pu lawelaweia ma ka po mamua aku.
Mahope nae o ka noonoo ana iho o Nikola i kana mea e pane aku ai, hoike aku la, e hoea aku ana oia no ka hale o kona haku, ma ka hora umi o kela kakahiaka, no ka mea he makemake kona e hui pu me ka makuahine hanauna o Beka Kamerona a e niele aku i kana mau mea i ike no Kimo Koka.
I kela kau ana aku o ua o Nikola, i ka ohe hoolohe o ke kelepona, ia wa i kamailio wale ae ai no iaia iho: "He keu aku no paha a ka piha maalea o kela kanaka, me ka manao e nalo ana kana hana ki pu malu o ka po nei, e ike ana oia, i ke ahuwale o kana mau hana i keia la. I kinohi o ko'u noho hana ana mai no keia kanaka, ua makaukau au e hana aku no kona pono wale no, aka iaia i hoao mai ai i ka po nei, e komo hokai wale mai ka'u hana, ua pau ko'u nana ana aku no kona pono."
Komo awiwi iho la o Nikola i kona mau lole, me ka holo ana aku no ke kahawai e holoi ai i kona maka, alaila hoi mai la no kona hale, me ke kau ana aku i kona ipu kope iluna o ke kapuahi, a noho iho la e kahi i kona umiumi, aia no hoi iloko o kela manawa hookahi, ke noonoo pu la no oia, i na hana o ka po mamua aku, i mau ai no ka makamaka o na mea apau iloko o kona noonoo, i ka wa e hui pu aku ai me kona haku.
Me he mea la kana hoomaopopo iho, ua oi loa aku kona kulana me Beka Kamerona, mamua o na mea e ae. Malia paha, mamuli mai ia o kona manao kuhihewa e hooliloia ana ka hauoli o kela kaikamahine, i mea ole, in a nei no ka oili ae eia ka o Kimo Koka, o kona makuakane ponoi loa ia. Ma kekahi ano nae ke noonoo ae ke pohihihi loa la no kona noonoo, no ke kumu i hookauia aku ai o ka weli maluna o Mrs. Bekena, ka makuahine hanauna o Beka Kamerona, a iaia hoi i hoomanao ae ai no ko Kimo Koka ano, iaia i hoopuka ai i ka inoa o Beni Kamerona, ua hele maoli ka helehelena o kela kanaka a kunahihi; nolaila ua hoopohihihi maoli ia aku kona noonoo, ma kana mau mea apau i ike ai.
Ke hoomanao pu la no hoi ua o Nikola, i ka nana pono mai o Kimo Koka iaia, me he mea la, he akua lapu oia. Ina o Beni Kamerona i'o kona inoa, alaila heaha ke kumu o kela kanaka, i ae ole mai ai imua o ua o Nikola, iaia i ninau aku ai, ina oia kela kanaka?
Aole he hoohewahewa ana i koe iloko o Nikola, ina he pili kekahi o Kimo Koka ia Beka Kamerona, alaila aole loa kela o ke kanaka kupono, e kaa aku ai o Beka malalo o kona malu, no ka mea ua komo kuhohonu kela kanaka iloko o na hana karaima nui, eia nae, in a o kela makuakane ponoi o Beka, he kuleana nui kona e koi mai ai e hoi aku kana kaikamahine me ia e noho ai, a alakai aku iaia, iloko o na hana karaima, i maa iaia iloko o kona ola ana.
I ka makaukau ana o ua Nikola, haalele iho la oia i kona hale, a pii aku la no ka hui pu ana me kona haku. Ma kahi nae o kona hele pololei aku ma ke alanui e moe ana mamua mai o ka hale o Mr. Makuaia, hoolalau wale ae la no kana hele ana ma kekahi moali alanui, maloko o ka ululaau, a hoea no kahi i ku ai o ka hale kaa, mailaila mai noloko o ka halekuke kahi ana i makemake ai e hui pu aku me Mrs. Bekena.
Maloko no o ka halekuke kela wahine, i ka wa i komo aku ai o Nikola, a ia ike ana mai iaia nei, nana mai la ka helehelena kuoo, a ike koke aku la no o Nikola, aia ka manao pee iloko o kela wahine, e hunakele, i kana mau mea apau i ike ai, nolaila o ka hana pono wale no ma ko Nikola aoao, o ia ka hoohele ana mai i kana kamailio ana ma ke ano hoolalau, ahiki i kona ike ana, ua nanea loa o Mrs. Bekena, o kona wa auanei ea i pahu pono mai ai i na ninau, i pili loa i na mea a kela wahine, i ike ai no Kimo Koka.
"I hele mai la au e hui pu me oe e Mrs. Bekena, no kuu makemake e kamailio pu kaua no na mea e pili ana ia Beka Kamerona," i hoomaka aku ai o Nikola e kamailio, me ka piha hoihoi.
Haawi mai la o Mrs. Bekena i noho no Nikola e noho iho ai ilalo, ua hoole mai la nae ke kanaka opio, me kona ku no iluna, a hilinai aku la ma ka paepae o ka puka aniani, @ ka nana ana aku iwaho, ma ke ano hoolalau.
Hoakaka aku la ua o Nikola, i kona hoomaopopo ana i ka maikai o ka leo o Beka i ka himeni, a oiai o kekahi ia o kana kalena i a'o ai a lehia, ma kona manaoio, he mea pono e loaa na hoonaauao keikei ana ia Beka, ma ka ike himeni ame hookani piano.
Iloko o kela mau kamailio a Nikola, ike mai la oia, i ke auhee ana aku o kela nanaina uahoa maluna o ka helehelena o Mrs. Bekena, o ke kumu mai, no ka maopopo ole iaia o ke kumu oiaio, o kela hoea ana aku o Nikola, e hui pu me ia ma kela kakahiaka.
Hoomau aku la no o Nikola i ke kamailio ana, no na mea e pili ana i ka hoea ana aku o Keka Wala no kona hale, ma ka la aku mamua, a koi ikaika aku la ia Beka, e hoi no kona wahi, a oiai o Mrs. Bekena ke kuleana nui maluna o kela kaikamahine hoike mai la o Nikola, i kona makemake e a'o ia Beka i ka ike himeni, ke ai mai oia me ka maikai, a mahope aku o kekahi manawa kupono, e hoi aku ai o Beka ma Nu Ioka, no ka hoomahuahua ana aku i kona ike ame ka makaukau ma ka himeni.
Ke hoolohe loa mai la o Mrs. Bekena i kela mau olelo a Nikola e pili ana i ke a'o ana aku ia Beka, i ka ike himeni a ma ka Nikola hoomaopopo mai, aole he hoihoi iki o kela wahine ia Keka Wala, no ka mea ua ku maoli ka hana a kela kanaka i ka hoouluhua, e hoohune mau ana ia Beka Kamerona, no na makahiki elua i hala aku.
Ua hiki loa ia Nikola ke ike mai, ua komo aku ka makemake iloko o kela wahine, e loaa i'o ka ike himeni ia Beka, oiai ua maopopo no ia Mrs. Bekena, he oi ae ka maikai ame ka u'i o ko Beka leo i ka himeni, mamua o ka nui ae o ka poe e noho ana ma kela wahi; a ua hoike okoa mai la no hoi ua wahine nei, aole he mea kuleana e ae i na mea a Beka e hana ai, o kela kaikamahine wale no, oiai ua kanaka makua oia, aia ma kahi o ka iwakalua-kumamahiku, ua ike oia i ka mea pono e hana ai, a pela pu hoi me ka hewa.
"Ua luahine au i keia manawa e Nikola," i pane mai ai o Mrs. Bekena, "a ua ike au i na ano pilikia like ole, o kela ame keia ano. Ina aia iloko o Beka ka makemake ame ka hoohihi ia oe, alaila he mau kumu maikai loa ma kou aoao, e hoohauoli ia ai kou manao no ia mea. Ina ua makemake i'o o Beka e hele aku no kou hale, oia ponoi no ka lunakanawai nana e hooholo ia ninau, me ke kuleana ole o kekahi mea e ae, e paa mai ai, a e kauoha mai ai paha i kana wahi e hele ai. Ina he makemake a makemake ole kekahi iloko ou nona, oia no ka i ike i kana mea pono e hana ai, me ka hiki ole ia'u, ma ko'u ano makua ke komo hokai wale aku ma kana mau mea apau e manao ai e hooko aku.
"Ma ka'u hoomaopopo nou e Nikola, ua kaokoa loa ae kou mau ano, mai ka nui mai o na kanaka e noho nei maanei, aole a'u mau mea e hoohalahala ai nou. Ina he oiaio kau mea i hoike mai nei, no kou makemake e kokua aku ia Beka, ke manaoio aku nei au i ka oiaio o kena manao; aka ina he manao kanaka kekahi iloko ou, no kela kaikamahine, e ao oe o hoea mai he la nou e mihi ai me ka walania loa."
"Ke manao nei au, o kela noonoo hope ou, he noonoo kuhihewa wale no ia, a ke noi aku nei au ia oe e Mrs. Bekena, e hoihoi hou aku ia mau olelo," wahi a Nikola, me ka luliluli ana iho o kona poo.
"Malia ua pupuahulu loa ko'u hoopuka ana aku nei i kela mau olele, a ke ae nei au e hoihoi hou mai, me ka nonoi aku i kau mau huikala ana mai. Ua ike au, aole o Beka launa nui me kela ame keia mea ana i kamaaina ai, a o oe wale no ke kanaka a'u i ike, i kona hoopipili mau, a ina aia i'o iloko o kela kaikamahine ka hoohihi ia oe, alaila oia hoohihi ana, aole o kekahi mea e ae."
"He makemake wale no ko'u e kokua aku iaia, i lilo ai kona ola ana i mea waiwai loa," wahi a Nikola i pane aku ai me ka leo kuoo. "Aole o'u wahi kanalua iki, no ka holopono o ka'u mau mea i noonoo ai no ka pono o kela kaikamahine; a ua ike no hoi au, he kaikamahine aapo loa o Beka, i kaokoa mai kekahi poe kaikamahine mai."
"O kau mau mea e kamailio mai nei e Nikola no Beka, ua kamaaina mua au i kona ano, a o ka mea oi loa aku, e heluhelu mau ana oia i na buke o kela ame keia ano. Aia iloko o Beka ka makemake nui, e loaa iaia ka naauao ma na mea apau. Mea kai la i ak pau ana o kona manawa e hele ai i ke kula, a pau kona huli ana i ka naauao, aole pela, eia no oia ke heluhelu nui nei i na ano buke liko ole e loaa aku ana iaia.'
"O kena maoli ka makemake iloko o'u, o ia no ke kokua ana aku, ma ka hoonaauao ana ia Beka, e lilo oia i pukani kaulana loa ma ka himeni. Ua hiki loa ia'u ke hapai aku iaia iluna, a lilo i wahine kaulana ma keia hope aku, ke ae mai oe me ka maikai, e lilo au i mea e ku aku ana mahope o ke kua o Beka, a onou aku iaia imua."
"He manao maikai no kena ou e Nikola, aka aihea auanei ka'u dala, e hiki ai ke hoonaauao iaia?"
"Aole a kaua noonoo ana no ka ninau dala i keia manawa, ua hiki loa ia'u ke a'o aku iaia ma na koina mua loa o ka ike himeni, a iloko o ka wa pono, na'u e noonoo aku i ke alahele, e hiki ai ke hoomahuahuaia ae kona hoonaauaoia ana."
"Alaila e lawe aku ana anei oe i na ko'iko'i apau o ka hoonaauao ana ia Beka malalo o kou mau hoolilo ponoi?" wahi a Mrs. Bekena, me kona piha loa i ke kahaha.
"Ina aole he alahele e ae e loaa ai iaia ka hoonaauaoia, alaila owau ponoi no ka mea nana e kokua aku, ma ka hoolilo ana ia Beka, i wahine kaulana loa i ka himeni, a o keia kekahi kumu nui o ko'u makemake loa ana e kamailio ia oe i keia kakahiaka.
"Aole nae no ke kokua wale ana no ia Beka Kamerona, ka manao nui o ka'u huakai i hoea mai nei, aka no ke kokua pu ana aku kekahi ia oe e Mrs. Bekena. Ua loaa mai ka ike ia'u, aole i loaa ka noho oluolu ana, me ka maluhia ma Pohaku Eleele nei. I kinohi, aole he mea i maopopo ia'u no ke kulana oiaio o ka maka'u ana o Mr. Makuaia, aka mahope o ka noii akahele ana, ua oi aku ka ike i loaa mai ia'u, mamua o kekahi mea i noho loihi maanei nei, a koe wale aku no paha o Mr. Makuaua; a o kekahi o ka'u mau mea i ike, o ia no ak loaa ole o ka maha ia oe, i ka noho ana maanei nei, a ua hopilikia pu ia aku hoi o Beka ma kekahi ano."
Ma key mau olelo hope a NIkola e kamailio aku nei, ku ino ae la o Mrs. Bekena iluna, me ka hoi hou ana mai o kela hiona uahoa a halii iho la maluna o kona helehelena, me ka pane ole mai nae, a o ia ka Nikola i hoomau aku ai i ke kamailio ana:
(Aole i pau)