Ka Nupepa Kuokoa, Volume LXI, Number 15, 14 April 1922 — KUU KANE I ALOHA NUI IA UA HAALELE MAI IA'U. [ARTICLE]

KUU KANE I ALOHA NUI IA UA HAALELE MAI IA'U.

I ka Lunahooponopono o ke Kuokoa; Welina pu kaua: E oluolu oe e hookomo iho ma kahi kowa o na kolamu o ke Kuokoa i keia poomanao e kau ae la maluna, o ia hoi, ua haalele mai kuu kane i aloha nui ia, oia o Herman Kahalewai Ke, i keia ola ana, ma ke kakahiaka Poalua, Maraki 28, 1922, hora 8 a. m., a hoi aku la oia me ka Haku Mana Loa, kahi mau o na mea apau; a waiho iho la ia'u kana wahine ame ka maua mau keiki he umi e ola nei, oia o Sam Kahalewai, o David, o Mrs. Kawaihoa, Dewey, Grace, Deborah, Mable, Arthur, Clara, ame George ame 5 moopuna he 15 ka nui o ka maua mau keiki apau, a ua hala e aku no 5 ma kela ao. No ekolu mahina kona kaama'i ana, a haalele mai la oia ia makou, ua hoaoia i ke kauka a ma na ano apau, aka he mea hiki ole ke paa aku, ua lawe aku la no ka Haku Mana loa, ka mea nana i hana a waiho iho la i ka ukana luuluu he kaumaha. Auwe kuu kane aloha e, kuu makua hoi, kuu hoapili o ka po ame ke ao, he makua hoi o na lei a maua, he keiki; kuu makua hoi o ka wa loaa ame ka wa nele, ua puanuanu ka poli, ua hoi aku la no oia me ka Mea Nana i hana, auwe kuu minamina pau ole. Ma ka hale hanahao o ka Honolulu Iron Works, oia i hana ai no na makahiki lehulehu, mai ka wa opiopio mai, he kamana kana hana, ahiki i kona lilo ana i poo no ka hale kamana, ua piha iaia na makahiki he 40 o ka hana ana malaila. Ua piha ia maua na makahiki he 32 a oi iki o ko maua noho mare ana, a ua ko no hoi ka berita a ke Akua, na ka make e hookaawale ia maua, a ua piha iaia na makahiki he 54 o kona ola ana. Nolaila me keia mau manao kaumaha apau, ke haawi nei au ame na keiki a maua i ka mahalo a nui i ka Honolulu Iron Works ame ka

poe hana apau, no ka lakou kokua he nui ia'u, ame ka lakou makana pua he nui, a pela pu no hoi au e haawi nei i ka mahalo i ka ohana apau, ame na hoaloha, no ka lakou makana pua, ame ko lakou komo pu ana mai me a'u iloko o ke kaumaha. Nolaila na ke Akua no e hoopomaikai mai ia oukou apau, a pela no hoi ke Akua e hoomama mai ai i ko'u mau kaumaha ame ka maua mau keiki makua ole. Owau no me ka luuluu, MRS H. KAHALEWAI KE, me ka ohana Keiki.