Ka Nupepa Kuokoa, Volume LXI, Number 17, 28 April 1922 — I Kiahoomanao no Kuhio [ARTICLE]

I Kiahoomanao no Kuhio

Ivla ka paina awakea a ke Kalapu Hoeueu Hawaii, o ka malama ana ae ma ke awakea o ka Poalima aku nei i hala, j kohoia ae ai kekahi komite, no ka hoolala ana akū i na hana e holopono ai kekahi manao, no ke kukulu ana aku i kiahoomanao no ke Keikialii Kuhio ma ke ano i halehui, kahi o na ahahui Hawaii apau e akoakoa ae ai, no ka malama ana i ka lakou mau halawai, a mau hana e ae e hapaiia ae ana e ka lehulehu. He umi dala i haawiia ae i ke Kakauolelo Brown o ke Teritore e kekahi kanaka Hawaii ma ke ano he hoomaka ana no kekahi waihona, e ku aku ai he home no na ahahui Hawaii. O keia kekahi o na manao kilakila loa. O ke ku ana aku o kekahi halehui, ma ka inoa ka Hale Kuhio, he kiahoomanao kupono loa ia, e o mau aku ai kela inoa, no na hanauna he nui ma keia hope aku. Ua nele maoli no na ahahui Hawaii o kakou i kekahi' halehui maopopo loa, ma keia kulanakauhale, o ka hui Poola wale no paha ka ahahui e ku nei i loaa kona hale hui ponoi; o na ahahui e ae,. ke malama pei i na halawai ma kela ame keia hale, e loaa mai ana me ka oluolu loa o kā auhau, a haawi manawale'a mai paha.

Ina no ke ku aku he hale o keia ano ma keia kulanakauhale, he nui na hana i manaoia, e waiwai ai kela hale, mawaho ae o ria halawai a na ahahui, o ia no ka malama ana aku i na ahamele, na aha hoolaulea, a mau hookuku himeni paha, o ke āno i ike mau ia, ma na manawa e noho ai ka ahahui Euanelio o ka Paeaina ma keia kulanakauhale. Aia iloko o ka puuwai o na kanaka Hawaii apau, me ke komo pu mai no o na ili keokeo, ka hoomanao mau ana i ka inoa o ke Keikialii Kuhio; ua ikeia na hoike maopopo loa, no kona hiipoiia iloko o ka noonoo o ka hapanui o na makaainana o keia Teritore, a ma ka manawa i pau ai kana hana ma ka honua nei; he o ia mau no ka makamaka hou o kela mau hoomanao ana nona ahiki i keia wa; a ina no ke konoia aku*o ka lehulehu, e haawi niai i na kokua ana no keia kiahoomanao, a©lfe he kanalua ana ke olelo ae, e hiki ana e loaa na kokua, no kona ku aku iloko o kekahi manawa pokole loa. Ma ka aoao o keia pepa, ke hoike aku nei ia, i kona manao hauoli, no keia hoolala ana, e kukulu aku i kiahoomanao no ke Keikialii Kuhio; he inoa wale no o na pono ame na pomaikai, no ka poe no ia e ola nei, nolaila, o na hana o keia ano, he mea pono i na Hawaii apau ke kokua!