Ka Nupepa Kuokoa, Volume LXI, Number 19, 11 May 1922 — Page 5

NUPEPA KUOKOA HONOLULU, T. H., POAHA, MEI 11, 1922.

 

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea Manao

Ino ---- Kau i ke Aki i ka

Manawa Hope

 

            "No'u iho aohe o'u makemake e ho'okikina wale aku no ia oe e mare mai ia'u in a he hana ku-e aku ia i kou lunaikehala.  Wahi a ko makuakane i olelo mai nei a maha loa ana ka kona uhane in a e ike mai ana oia ua lilo i wahinemare na'u  Makemake oia e haawi mai ia oe na'u i kona manawa e kaakaa mai ana kona mau maka.  eia hou, i ko kaua manawa e mareia ai, e noho pu mau aku ana au me oe a imua hoi on a no ka malama ana aku iaia ma na ano apau e hiki ana ia kaua, no ka hoomaha ana aku i kona uhane, a e hoomaha ia ae ai hoi oe mai na hana a pau e makaala mau aku ai iaia.   E hoike mai i kou manao oiaio, e Vekinia, e hana koke ia anei ia, a i ole aole paha?"

            "o kou makemake io maoli no nae ia, a i ole no ko papa makemake wale no paha oe i hoopili wale aku ai no i kou manao no ka hoomama ana kau i kona noonoo?" i ninau ae ai ke kaikamahine i hooluuluuia ka naau

            "O, e kuu Vekinia, i ka la e lilo ai oe na'u, o ia ana ka la pomaikai loa iloko o na la o kuu ola ana, oiai nae, no kou pono aole o'u makemake e lilo kou la i mareia ai i la hoehaeha i kou lunaikehala, aka nae, aole hiki ia'u ke alo ae, aole no hoi e hiki ia'u ke haawi aku i na hoohauoli ana ia oe oiai oe e noho ana iloko o keia haawe luuluu no kou makuakane.  E vekinia e oluolu oe e hooholo koke i kou manao, i nei manawa; in a no kou ae maikai mai e mareia kaua hoike mai pela me ka maopopo, a in a hoi no kou hoopanee a kahi wa aku, hoike mai no pela, aka o ka hoike koke mai o ia ka oi aku o ka miakai, no ka pono o ko makuakane."

            No kekahi mau minku ko Vekinia kakali ana no kana pane, alaila i ae la me ka leo liilii loa; "ke haawi aku nei au i ko'u ae."

            "O ia wale iho la no anei kau pane, e kuu aloha? Mamuli wale no anei o ke noi a ko makuakane i ae ai oe aole hoi mamuli o kou makemake io maoli? Aole anei ou makemake io e lilo i wahinemare na'u?"

            "E Wile, me ka hauoli nui o kuu naau e ae aku nei au e lilo nau; aka, o kuu makuakane, kuu makuakane! e haalele mai ana anei oia ia'u?" wahi a kana ninau, me ka ehaeha nui, iaia i hoomaopopo iho ai i ke kumu o keia mare kokeia o laua mamuli no ia o ka ike o kona makuakane i kona hopena ua kokoke loa mai.

            Kulou iho la ke Sa Wiliama e honi iho la iaia ma ka lae, a puana ae la i keia mau huaolelo:

            "Na na lani e hoopomaikai mai ia oe, e kuu mea aloha, a Nana no hoi e kokua mai ia'u ma ka hoolilo ana aku i kou mau la o keia mua aku i mau la hauoli loa iloko o kou ola ana, elike me ia au i haawi mai la i ka hauoli nui ia'u i keia la.

            Alaila hoonoho iho la oia ia Vekinia i luna o ka punee, no ka mea ua aneane loa e pau ke aho o Vekinia no ka noke loa i ka uwe a no ka luuluu loa no hoi o kona uhane ia manawa.  Hooponopono iho la oia i ka uluna no Vekinia e moe iho ai, huli iho la i ka paku o ka puka aniani ilalo, i paa ae ka malamalama, a hele malie aku la ahiki i ka puka ana iwaho.

            I kona hoi hou ana mai iloko o ia rumi he hora mahope iho loaa mai la o Vekinia iaia ua maha loa kona naau kaumaha a ua pau no hoi kona uwe ana, eia nae, no keia haawina kaumaha loa ana i ike iho ai ia Vekinia o ia kekahi i haawe pu i ka ehaeha i loko o ia mau minuke i aneane hiki ole iaia ke kaohi iho i kona mau waimaka.

            Hoike iho la oia ia Vekinia ua hoi aku ke Kauka Waiaka i ke Kulanakauhale Verekinia, a ua hoomakaukauia e laua na hana a pau no ka hoea mai o ke kahunapule no ka hoohala ana i ke Sabati ae no ko laua mareia ma ia la, no ka mea, o ia ka manawa a Mr. Abota i makemake ai ma ia la laua e hoohuiia ai ma ka mare

            Aohe a Vekinia mea e kamailio mai ai o ka haawi wale mai no kona i kana hoomaikai.  O ka Poalua nei a laua e kamailio ana, a elima la mahope mai e hooliloia ae ai oia i wahinemare na Mr. Hita.  I kana noonoo iho me he mea la he moeuhane wale no ia iaia.

            Ma ka auwina la o ka Poano mai hoea mai ana kekahi keonimana elemakule a ku ana mamua o ka puka hale o Mr. Abota.  Maluna o ia o kekahi kaalio nui e hukiia ana e kekahi mau lio eha, a maluna pu o ia kaa kekahi pahulole nui, a kauohaia aku la ke kanaka e lawe ia pahulole i ka rumi moe o Vekinia maluna, a he elua mau puolo nunui e ae i haawiia aku ia Chi Lu e malama.

            No keia mau ukana o a@ hoea ana mai ia huli mai la o Vekinia e nana i kana aloha me na maka i piha i ke pahaohao, me he mea la e ninau mai ana nawai keia mau ukana i kauoha, eia nae, he minoaka wale no ka pane i loaa aku iaia no ia ninau ana, alaila lawe aku la oia e hoolauna i@ua o Vekinia imua o Mr. Tonakona, ke kahunapule, a ua hookipaia mai no hoi oia e Vekinia me ka maikai e hiki ana'iaia, elike me kona ano oluolu mau, e hoike ana hoi i kona kulana lede oiaio, a oiai ke pahunapule e nana mai ana i kawahine opio ua hookahahaia aku oia no ka paa rula maoli o ka lede opio, a no ka ui no hoi kekahi o kona helehelena, a no ia kumu no paha i makahei ai ka barona Pelekane a i koho ai ia Vekinia i wahine nana.

            I ka manawa i hoikeia aku ai i ke kahunapule kana hana i makemake ai oia e hele mai, ua hooholo koke oia i kona mamao, me ka hookaulua ole a kahi wa aku, no ka pono o ke kanaka e make aku ana; eia nae, o kana o ka manao wale ana, he paaimare paha kana e hoohui ana o ka poe haahaa i noho ma kuaaina a o ka eli gula ka hana, aole oia i moeuhane he kaukaualii no Pelekane ke kanaka e hoohuiia ana me kekahi wahine opio i aoia me ka maikai a he lede oiaio hoi ma kona mau ano apau, eia a i kona hoea ana mai, a ikemake i na mea e hoohuiia ana, ua hookahakahaia kona naau ia ike ana no ka mea he wahi kuaaina loa ia, a he poe hana ka hapanui o ka poe e noho ana ma na wahi elike me ia.

            Mahope iho o ka pau ana o ka aina ahiahi no ka hora hookahi ko ke kahunapule hoohala ana i kekahi manawa me Mr. abota, a ua hoopihaia kona naau me ke aloha no ka mea ma'i.  I kona mnawa i hui ai me Mr. Abota ua loaa koke iaia ka ike he kanaka naauao a kulana kiekie o Mr. Abota, ma ke ano o ka Mr. Abota mau olelo, a ma kona kulana no hoi, koe wale no aole hiki iaiai ke ike maopopo oiai he kanaka ma'i o Mr. Abota ia manwa, o ka mea hoopahohao nui i kona noonoo o ia no ke kumu o ka nee ana mai o keia kanaka ana i koho iho ai he kulana kiekie kona mamua, a o kahi iho la ka keia e noho ai, a ua lilo ka moolelo pohihihi o ka mea ma'i i mea noonoo nui nana.

            I ko Vekinia manawa o ka hele ana mai e haawi i kona aloha i ka makuakane mamua o kona hoi ana aku e moe, elike me kana hana mau i maa iaia mamua aku, huki iho la ka makukane ilalo a kokoke loa iaia, a i ae la:

            "E kuu lei, pehea la aole anei e lilo ana kou mare aku i mea hoehaeha i kou noonoo, a i ole i mea eeke paha nau, oiai ua kokoke loa mai kou manawa e lilo aku ai oe na ke kanaka okoa?"

            "Aole, e papa, me ka hauoli loa au e haawi aku nei ia'u iho na Br. Hita," wahi a Vekinia o ka pane ana iho.

            "He hauoli io no anei kou no kou lilo aku i wahinemare na ke Sa Wiliama? E hoike mai oeia'u i ka mea oiaio loa a mai huna i kou manao?"

            "Elike ka hauoli me ka hiki ia'u oiai oe e ma'i ana, e papa," i pane iho ai o Vekinia me na waimaka e hiolo iho ana ma kona mau lihilihi.

            "No ia pane au ua loaa loa iho la ia'u ka maha.  Na ke Akua e hoopomaikai mai ia oe, e kuu lei, elike ka malamalama o kou mau la o ke ola ana ma nei mua aku me ka malamalama o ka la.  Ke haawi aku nei au ia oe iloko o ka Sa Wiliama malama ana mai me ka hauoli nui o kuu naau, no ka mea, ke manaoio nei au he kanaka maikai loa oia, a e haawi mai ana no oia i kana malama ame kana kiai ana ia oe me ka maikai loa ma na ano apau.

            "E lalau mai oe i keia ope pepa malalo o kuu uluna; ae, oia kou waiwai hooilina a o ka'u makana hoi ia oe no kou la e mareia ai; nou kena mau mea a pau, e Vekinia, e hana aku oe elike me kou makemake, a ua hoohiki mai no hoi o Sa Wiliama ia'u e haawi mai ana no oia i kekahi makana i oi aku ka nui mamua o kena, a e hoike mai ana oia ia oe mahope aku

            "Ua ike au i kou holohe ame kou aloha ia'u, me ka malama i ka'u mau kauoha ma na ano a pau i na manawa i hala aku la, a elike me ia mau ano maikai ou, pela no au e manaoio nei e malama pu ana no oe i ka laahia o kou inoa ke lilo aku oe na Sa Wiliama, a ke hauoli loa nei au no kou ola ana ma nei mua aku.  Aole hiki ia'u ke noi aku i kekahi mea i oi aku ka maikai mamua o keia nou, o kou malama wale no i na kanawai o ke Akua ame kau kane."

            "O, e papa, in a no hoi e hiki ana ia'u ma kekahi ano ke hana aku i mea nou e ola ae ai a e kaawale aku ai hoi kena ma'i mai a oe aku, hauoli maoli au, aka" a hooki pu iho la o Vekinia i kana kamailio ana me ka hiolo o na waimaka, no ka hiki pono ole ke hoomau aku i ke kamailio ana

            Aia ka hiohiona o ke kaumaha ma na maka o ka makuakane, ke ike iho la o Vekinia i ka haale mai o kona waimaka, a he mau minuke ikiiki loa ia o ke aloha o ke keiki i ka makua, a pela hoi ka makua i ke keiki, a me ka hoomanawanui ka makuakane o ka pane ana ae i ka i ana:

            "Mai kamailio hou kaua no ia mea i nei manawa no ka mea ua hala ka wa pono, a mai hookaumaha loa no hoi oe i kou noonoo no'u, no ka mea, he mea hoehaeha pu mai ia ia kaua a elua, oiai aole o'u makemake e ike aku i ka helehelena haikea a kaumaha o kekahi wahine e mareia aku ana ma ka la apopo.  O ke aloha no kou, e hoao oe e hooluolu ia oe mai na manao kaumaha mai apau a mai na luhi mai hoi ame na manao hoopihoihoi."

            Alaila honi hou mai la oia i ke kaikamahine, a e aneane ana oia e hookuu mai i ke kaikamahine, eia nae, hopu hou mai la kona lima a i mai la me keia mau leo kaukau; E noho oe me ka haahaa loa malalo o kau kane, no ka mea, oia aku ana kou makua ma nei mua akul ma na mea apau ana e kauoha mai ia oe, malaila wale no oe e hoolohe aku ai; e noho aloha pu oe me ia, i lilo oe i mea nui iaia, ma ia ano wale no e loaa ai ia olua ke ola hauoli ana ma nei mua aku.

            "Heaha ana kou lole e komo ai ma ka la apopo ma ko manawa e mareia ai?"

            "Aohe au i haawi i ko'u noonoo no ia mea i nei manawa, no ka piha ame ka lilo loa o ko'u noonoo maluna ou, Eia nae, manao au o kela lole kilika no hoi au i kauoha ai i Kapalakiko iloko o ke kupulau i hala, he lole no hoi a'u o ke komo mau ole ana maanei, ua kupono loa ia lole no ka la apopo, pela kuu manao e papa, aole anei ou manao pela?"

            Nui iho la ka hanu o ka makuakane i a manawa me ke kani ana iho o ke uhu, a pane mai la:

            "Ke manzo nei au pela, no ka mea, o ia wale no kou lole maikai loa a i kupono hoi no ka mare o ka'u lole i makemake ai nou e mareia ai i lole keokeo, aka, e hoao no hoi paha oe e kahiko ia oe iho elike me ka maikai loa au e ike ana, o ka pau ae paha o ia la no ka mea, ihea auanei kaua e lalau ae ai  no ka mea, ke ike mai la no hoi oe ia'u i nei manawa ua pau ka hiki ke hoomaopopo aku nou," wahi a ka makuakane me na waimaka ma kona mau papalina, me ka haalulu pu hoi o kona leo

            Alaila kulou iho la o Vekinia a honi iho la ma ka lae o ka makuakane no elua a ekolu manawa, mamua o kona haalele ana iho i ka makuakane; ua piha loa kona naau i ke kaumaha no ke aloha i ka makuakane, elua ana mea aloha e auamo ai, ke aloha hoi o ka makua a o ke aloha hoi o ke kanaka e hoohuiia aku ana oia ma kekahi la ae.

            Mamua o kona haalele ana iho i ka rumi o kona makuakane ma'i, huli hou mai la oia e nana i ka waiho aku o ka makuakane a oili loa aku la iwaho.

           

Mokuna IX - Ko Vekinia La Mare

 

            Ia Vekinia i oili aku ai iwaho halawai koke aku la no oia me Sa Wiliama, a mahope o ka hopu ana mai iaia i mai la:

            "Aole au e kaohi ana ia oe a loihi mai kou hoi ana aku e hooluolu, aka hookahi wale no a'u mea e makemake nei e kamailio aku ia oe a o ia keia, ke loaa mua nei keia manao lili iloko o'u no ka mea e pili ana i ka nanaina o ka Lede Hita o nei mua aku ma kona la e mareia ai, a no ka mea, e loaa ana ia oe na mea apau au e makemake ana no ka la apopo maloko o kekahi pahulole, kela pahulelo no a'u i kauoha aku nei e laweia i kou rumimoe maluna."

            Ua hookahaha kokeia ko Vekinia manao ia manawa, a huli ae la e naha iluna ia Sa Wiliama no ia kamailio ana iho la ana pela ma ke ano me he mea la e ninau ae ana.

            "Ua hoouna aku nei au i ke kauoha ma ke Kauka Walaka la i na kelalole akamai loa e hiki ana e loaa iaia maloko o kela pahulole, a e hoomanao iho oe, o ke alole maikai loa ia e hiki ana e loaa iloko o keia manawa pokole loa, a ke kakali mai la hoi no kau nana ana iho ma ka rumi maluna."

            "oluolu, lokomaikai a piha noonoo maoli no oe e kuu aloha," wahi a Vekinia o ka mahalo ana mai, me ka helehelena o ka hauoli.  O papa kekahi e hauoli pu ana.  O kona kaniuhu ana mai no ia la no ko'u holako oleia ana me na aahu kupono no ka mare, eia ka ua noonoo mua oe!"

            Alaila e lilo ana i mea hoohikilele loa aku i kona noonoo i kona manawa e ike mai ai i kou kahikoia ana me kela aahu mare ou," wahi a Sa Wiliama o ka pane ana mai.

            "Pela ana ka mea oiaio, nolaila mai hoike iki aku kaua no ia mea ahiki i ko kaua manawa e mareia ai, i mea hookahaha aku iaia.  Pehea ana la au e haawi aku ai i ka'u hoomaikai nui ia oe?  Malia paha ua palaka loa au, aka nae, ma ka mea oiaio loa no, ea, aole au i haawi iki i ko'u noonoo no ia mea he lole mare, no ko'u manao no aole paha he mea e makemake mai ana ia'u ma keia wahi, i pane aku ai o Vekinia.

(Aole i pau)

 

KE ANO O KE KALALAINA

 

(Kakauia mai e Z. P. K. Kalokuokamaile.)

(Hoomauia mai kela pule mai)

 

            Ka mahiai ana o ka aina maloo ame kona mau loina, ame na aina wai ame na loina. 

            O ka mahiai ana i ka aina maloo he elua ano.  1. - He waele no me na lima i ka wa kahiko.  A o ke kumu no paha, aole i ulu ka mauu Hilo ia mau la, a ua ike au he mauu kukaepuaa wale no ka mauu e ulu ana ia mau la. Ina he kihapai mahakea he umikumamalima anana ka loa, a he umi anana ka laula, aole e kani ka hora 12 m., ua pau i ka waeleia.  O ke kumu aole mauu e ae e ulu ana me keia mauu kukaepuaa.

            Ua hiki loa i ke kanaka e waele ana i na mala; in a paha i loaa ka mauu HIlo ia wa, i na ua pipuli mamau ka apona a ka ua i ka lani. 

            Ekolu ano mahiai ana i na kihapai: 1. - Keehau.  2. - Kaelehua.  3. - Ilileho.  O ke Keehau, e mahiai ana oe mahope aku o ka napoo ana a ka la, oiai, na po mahina konane o Akua, Hoku, ame Mahealani.  O na hora no apau au i makemake ai o ka po e mahiai.  Aia no ka pau o ka hana ana he puka no ka la.  He Keehau ia mahiai.

            2. - Kaelehua. - O ke Kaelehua, oia no ka mahiai, mai kakahiaka nui a hiki i ka hora 11 a.m., ahiki i ka hora 12 m., a no ka pau koke o ka hana ame ka nui ole o ka hou o ke kino, ua kapaia keia ano mahiai ana e ka poe kahiko, he Kaelehua.

            3. - Ilihelo. - O keia ano mahiai ana mai kakahiaka nui a napoo ka la, ua nui loa ka hana, a ua nui loa ka hou, a pipili ka lepo i ke kino. Ua kapaia keia mahiai e ka poe kahiko, elua ano.  Ilihelo, a he Ilipilo.

            2. - Eia ka lua o ka mahiai ana o ka wa kahiko, he puhi i ka mala me ke ahi.

            O ka rula, e waele mua oe i kona mau kuaiwi apuni ka mala, a kaawale na aoao eha.  Elua manawa au e puhi ai i ke ahi; in a i ke ao, ua hiki no, a ina i ka po ua hiki no, a ua kamaaina ka mea e kakau nei i ka mahiai o ka wa kahiko, a ko'u mau kupuna a me ko'u mau makua i kuhikuhi mai ai. 

            Eia kekahi mau a'oa'o a kuu mau kupuna a me o'u mau makua.  No ke ano o na inoa o na makalua o kanu ai i ka huli, he like ole na inoa; he elima inoa a ka poe kahiko i kapa aku ai i na makalua o ka huli e kanu ai. Eia ko lakou mau inoa:

            1.  Hoo-wa. 2. Okupe. 3. Puepue. 4. Paeli a i ole, Pahu. 5. Pakukui

            1. - Hoo-wa - O keia makalua, hoo-wa, hookahi no o'e ana a ka oo hou ka huli, elike me ka nui o ka huli o ka makalua au i makemake ai, a e haohao ana no oe e ka mea akahi a ike i ke ano o keia kanu ana; oia aole i wali ka lepo e kuu kupunakane, pehea auanei e ulu ai ka huli i ka paakiki o ka lepo 'Noho malie oe, a e holohe mai oe i kuu a'o aku.'

            Aole o ke kanu ana i ka huli pau ka hana ana, aole.  A oilo ae ka nahelehele, ekueku aku oe a pii ae na ha o ka huli, ekolu a eha lau, hoowaliwali hou oe i ka lepo o ka makalua, a me ka wehewehe ana i na ha e pili ana i ka huli, i hamama ae, a in a e loaa koke i ke kuaua, e ike auanei oe i ua ha nei au i wehewehe ai i ka piha i ka wai, a hoomaka koke ka ulu o ka huli. A in a aole oe e hana elike me keia, e puo'a ana me ka a-iloa; aole e io ana, a hookahi no au mea makaala o ka nahelehele, mai hookoe i kekahi nahelehele iloko o ka huli kalo a e malama oe elike me ka malama ana i ke keiki, ahiki i kona nui ana, a pela no oe e malama ai ahiki i ke apo ana, a paa i ke po'i ma'u, alaila, holo oe i Kaleponi no hookahi makahiki oia mau no me ka nahele ole.  A he oiaio no ame ka pololei na a'o ana a kuu kupunakane, a ua hana au a ua ike ia ano kanu.  Aa no a lawelawe na lima,, ike i ka hai mea keokeo, wahi a kahiko.

            2. Okupe. - O ka Okupe, in a hookahi a elua hou ana a ka oo hookomo na huli elua ekolu ahiki i ka elima huli o ka makalua hookahi, a ua kapaia no hoi he kukini kekahi inoa.  O ke kumu i kapaia ai, oia hoi, ua nui ino loa ka huli, a in a e kanu ana elike me ka rula, elua a ekolu huli o ka makalua, aole e pau ana a paa e ka mala.  A e pau ana i ka palahu, a kiolaia Olelo mai la kuu kupunakane ia'u, mai kiola iki oe hookahi huli, o nana mai auanei ke kalo ia oe.  He maka no ko ke kalo; a oia ka mea i kanuia ai elima a eono, i ka makalua hookahi, i nalo ke kohina o ka huli i ka lepo, aole e hoohalahala na aumakua hooulu ai.  A ua pololei io no na olelo a kuu kupuna kane.  Ua hana au elike me keia.  Nui loa io no ka huli i kekahi manawa, aole mala i pau, kanu aku la eha, alima, eono i ka makalua, hoomanao ae la i ka olelo a kahiko, mai kaulai i ke kohina o ka huli i ka la o nana mai ia oe.

            3. Puepue - Ua hanaia keia no na kihapai kalo opaopa, aole nui kahi lepo.  Alaila, kii oe i ka lepo i kahi e, a lawe mai ma kau wahi i makemake ai, malaila ia puepue.  Oiai, in a aole oe e hana me keia, a kanu aku no oe iluna o kahi pahoehoe e maloo ana i ka la.  Ua hana au i keia elike me ke kuhikuhi a kuu kunpunakane, a he oi aku ko i nei ulu in a he wa ua.  O kau huli o kanu ai i waioea, e ike auanei oe elima a eono no mahina io keia keia kalo, ke hoi mau ka wai a ka ua. 

            4. Paeli. - o ka Paeli he hoowali no ka lepo o ka makalua a wali, alaila, kanu ka huli, a o ka paeli no ka makalua hana mauia e na poe mahiai kalo i keia wa, apuni ka aina ke hele oe ma kela wahi keia wahi.

(Aole i pau.)

_____________________________________________________________

 

PAA HOU AE NO IA POE HANA WAIONA.

 

___________

 

            O ka waina, ka bia, ka lemuhao ame kekahi mau waiona e ae ka i paa ae i ka hopuia e Colburn ame kona mau kanaka ma ke kakahiaka Poalua aku la i hala ma ke alanui umi-kumamaluna, ma Kaimuki.  He Kepani i hopuia nona ka inoa o Soichi Yokomizu, a ma ka oleloia oia ka ona nana ia mau ano waiona like ka i paa pu ae i ka hopuia a hoopiiia ae no ke ku-e i ke kanawai hookapu waiona.  He Kepani mua no ka keia i paa i ka hopuia no nei hana ku-e kanawai no, elike me ia a Colburn o ka hoike ana ae.

            O na Akena Ah Fat, Kanae, Moriyama, Ornellas ame Onouye ka i kipa aku i ka hale o Yokomizu, he hale elua papahele a i hoopuniia hoi me ka ulu hei apuni.  I ka huliia ana aku o na wahi apau o ia hale ua loaa aku la na ano waiona waiona i hoike ia ae la maluna, ua hunaia iloko o ka lepo malalo o kekahi mau pohaku nui, a he wahi kokoke loa aku i ka Papu Ruger kahi o ia mau waiona o ka hunaia ana.

            He 56 mau omole hookahi kuata bia i loaa aku, he 71 mau omole hookahi paina bia, ame kakini omole hookahi kuata okolehao i loss aku, a mawaho ae o ia he elima mau omole hookahi kuata waina ame ekolu omole elua kuata waiona inoa ole.

            O S. Hirowatari, ke Kepani i hopuia ai ma ka Poakahi he $75 kona hoopa'i me na koina o ka aha federala.  O keia ke Kepani i hopuia ai ma ke Tin Can Alley.  O Murakami, ka wahine i hopuia ai no ia hewa like he $250 hopa'i me na koina o ka aha  O keia ka lua o kona hewa a pela i koikoi loa ai kona hoopa'i.  Ma ke alanui Pauahi kokna wahi i hopuia ai.  Ma Waikiki, ma ka apana Makale, he Pake o Poo Chan, ka i paa ae i ka hopuia ma ka Poakahi i hala no ka loaa ana aku hookahi ipuhao puhi rama 25 galani me hookahi galani okolehao ame 150 galani rama i hoawaawaia ma kona wahi.  He $117 kona hoopa'i me na koina o ka aha.

______________________________________________________________________________________________________

Kopa Moi Keokeo No Ka Mikini Holoi

 

______________

 

He Kopa maikai loa i hiki ke hoohanaia

no na ano hana apau i pili i ka home. 

Hiki ke holoi i na lole nahenahe loa me

ka pilikia ole.  O kona oi loa aku o ka

maikai no na mikini holoi - No ka holoi

 i ka pa ame holoi hale.

 

_______________

 

KUAI I PUOLO MAI KOU HALEKUAI MEAAI

MAI

 

_______________

 

T. H. Davies & Co., Ltd.

 

Na Akena Wale no no ka Paeaina Hawaii

______________________________________________________________________________________________________

 

E ka Poe Hookuonoono

Ke Makemake Oukou i na Lako----

 

            NO KA HOME A NO KA AINA MAHIAI PAHA E KIPA

AE MA KE KEENA O NA LAKO PILI HAO O KA

 

AMERICAN FACTORS, LIMITED

 

No na mea elike me keia:

Kapuahi.                                                                      Meahana Mahiai.                                             Uwea Pa Moa me Pa.

Lako Mahiai.                                                               Meahana Kamana.                                          Pena me na Palaki.

Lako Halekuai me Pa.                                                 Pili Hao a Ano e Ae.                                       Aila me Vaniki.

______________________________________________________________________________________________________

 

O ke Kanaka Kuai i na Lako Hana Maikai ua Lanakila

e no Oia i ka Hapa o ka Hakaka

 

Aole hiki ia oe ke lawelawe i na hana maikai me na meahana inoino.

O ke kanaka e hoao ana e hana me na meahana inoino, e hoea

mai ana i kona wa e kiola ai, a kuai i na mea kupono, in a he noonoo

oia.  Aka nae ua poho wale ka manawa ame ke dala ma ka hana ana pela. 

Ke kuai nei o Lewers & Cooke, Ltd., i na lako hana maikai wale no.

 

KE MALAMA NEI MAKOU HE AHUA PIHA PONO LAULA O NA

 

LAKO MAHIAI AME NA LAKO KUKULU HALE

 

He Makemake Paha Kou i

KOʻI, KIPIKUA, KOPALA, HO, HAMARE, PAHIOLO, KOʻI LIILII, NA

LAKO KAMANA PIHA PONO, HOANA HOOKALA, PAKEKE.

 

Papa o Kela ame Keia Ano, na Lako Have, Pena, Aniani

 

Kakau mai a i ole kipa mai no na hoakaka.  E hookoia no na

kauoha apau ma ka leka me ke akahele ame ka hikiwawe loa.

 

LEWERS & COOKE, LIMITED

HONOLULU

______________________________________________________________________________________________________

 

Lawa Pono ka Poe i na I'o Hipa ma ke

Kuai Hoemi a ka Makeke Metropolitan

ma ka Poakolu Aku Nei

 

            Nui na ohana i hoolawa maikai ia me na i'o hipa hou a palupalu, ma ke kuai hoemi a ka Makeke Metropolitan ma ka Poakolu nei no ke kumukuai haahaa loa o 7 keneka o ka paona.  Eia na Makuahine o na Home ke komo mau nei malaila i kela ame keia la, no ka haawi ana i ka lakou mau hoomaikai ana i ka Lunanui, Mr. Lui, no kana mau hana kokua nui loa, ma o kela kuai hoemi ana e haawi mau nei malaila i kela ame keia pule.

 

He Kuai Hoemi Hou no ko Keia Poakolu Ae

 

            Ina he makemake kou e hoolawa i kou Ohana Nui me na I'o Bipi Ku momona, e hele mai no keia Makeke, a e loaa no ia oe me ke Kumukuai Emi Loa i loaa mua ole ia oe ma na Makeke e ae apau.

 

METROPOLITAN MEAT MARKET

 

E ninau no LUI; he oluolu na kuka'i ana ma ke kaua olelo makuahine. 

Hele mai, mai hilahila!

______________________________________________________________________________________________________