Ka Nupepa Kuokoa, Volume LXI, Number 19, 11 May 1922 — O KEAKAMALUNUIOKALANI UA AUI AKU LA [ARTICLE]

O KEAKAMALUNUIOKALANI UA AUI AKU LA

Me ka haupu mua ole, ua lilo i Hiikua, i haalele iho ai kuu mama anake, Mrs. Keamalu, i keia noho ana, a hoi aku la me Kini o ka po nui hoolakolako. Ma ka aina uluwehi o Laie i ka eheu manu i ka la ekahi o Aperila i hala aku la, i hookuu iho ai oia i kona kino honua e moe me ka maluhia no ka wa mau loa. Heaha la hoi ke kanaka he mahu no ia i pua ao a nalo aku, pela i'o no! Ua hanauia kuu anake ma Ohukuhale, Poniuohua, Molokai, ke kahuahale hoi i hanauia ai o Kauhuhu ka mano nona na pali Koolau o ka Moku o Hina i oleloia e kolaila kupa, he kae'ae'a, mai ka puhaka mai o Keliiaeaumoku, Oopa, ka muli loa o ka hanau ana o ka mama, a o ka hope o Kalunaihaupu. Ua luhi no oia ia'u ke keiki a kona kaikuaana, i ko'u wa uuku no, i mare ai oia i kana kane mua no Molokai no, a mamuli no o ke au hoololi o ka manawa, ua wehe ae la ka pea o ke kalepa holo i Honolulu nei, waiho i ko kano i ka aina hanau. Noho iho la i ka uluwehiwehi o ke kaona, i ka huikaulua i Pololewa, halawai me ko Kauai keiki u'i, lilo i Kauai, a kupa kamaaina a lu'a wale oia. Aole he hua mai kona puhaka mai, aka ua lawe ae oia i na keiki a ka ohana o ke kan«, a hanai a nunui, a kani moopuna ia lakou. I ka hala ana aku o ia kane ma kela aoao, ua lawe hou ae la oia ia Kailikole, ke koiki kupa o Waikiki,

i kokoolua no kona mau la luahine. I ka hala ana o ia hoa, ua koe iho oia e noho i ka Ohua lane, a na ka aui o ke au o ka manawa i hoo- j nee ae iaia mailaila ae, a hoi aku la i ke Koolauloa, a waiho i kaea ka iwi o kamahele. Aole no i loaa mai ia'u ka lono ahiki i ka la elua iho la o Mei nei, akahi no a pa'e ka lono kaumaha no ka hele ana o kuu mau makua elua, a o keia no hoi ka panina o na keiki a Keliiaeaumoku Oopa, i hanau ai. Nolaila ua lilo i mea kaumaha ia'u, ke hoomanao ae i ka nui o ka maikai a lakou i pulama ai no'u, a elike me kela ohana ame keia ohana i halawai me keia hopena, pela no i loaa ai ia'u ia haawina hookahi. Owau ka ka ke aloha i o-o ia a eha, Me he maka koholua la i ku i ka ili, Ka ukeuke ika pili o ka houpo, Ke huai nei ka waimaka kulu i kai lihilihi, Paele i ka manawa ka houpo oloko a, A ke aloha me he ahi kila la, Ka ukeuke i ka pili e ka houpo, Huihuila makilikili i ke kiionohi, Paku'i kenakena i ka uahi a ke aloha la, Auwe kuu makuahine e! Kuu makua i ka pe'a hala o Luia, Ke waha mai la i ke kua o Kaukaopua, Ma ka maha laau o Aahoaka, ! Ili ke ko'eko'e anu Maunahina, Kulanalana ke ki poohiwi o Hihimanu, Pulupe i ka waimaka ke one o Mahamoku. Ia ene puarose i ke alo o Hanalei, Ua hala e! Ua hala kuu pua ala Kookoolau, Ua ku ae a hina i Kawaipao, Ua moe hookalohe me Kaumaka, Aia la me na lehua o Luluupali Ko hehi mai la i ke one o Maniniholo, I ka puu nalu kai i ke alo o Puuhinahina, Hina ke kino waiho moe malie, Moe a i ke kai o ko Haku e! He haku kalalea he pane poo no Anahola, Ke kuka aoao mai la me Hooipo, Me ka pakee wai nui i ka nalu o Makaiwa, E paku ana i ka lulu o Waimahanalua, I ka pa-u nua kalukalu o Puna e, Puna makuu na ke aloha i ke kanaka, Ke wawalu nei iloko o'u mo he lima la, Auwe kuu makuahine hele loa e! Waiho i Laie ke aka malu ohai, Hoi uhane i ke one kulaiwi, E ike i ke kahapili ai ole a Kaiakea, Aloha ia kaha hoanoano a Kalailuahine, I na la'i elua a ka manu i ke one o Hilia e, Nani ka hilihewa o ka'u moe i ka po nei, Hopu au i ke aka aole ke kino. Nuu i ka waimaka ka puni a ke aloha la, Auwe kuu mama hele loa el Ua moe aku la oia i na la palupalu, aia kona i ke kana-walu-kumamalua a oi, me ka manao ilihia, ke pahola aku nei keia pulima i ka puili aloha nou e ka Lunahooponopono, ame kou mau limaluhi. E ahonui hoi ,e hookomo iho iloko o kou moku kino lahilahi. Me ka pawaiouli, S. K. KEKOOWAIOWAILUA. 2332 Liko Lane, Pauoa. -