Ka Nupepa Kuokoa, Volume LXI, Number 20, 18 May 1922 — E Kuai i Kau Mau Meaai ma Kahi Emi [ARTICLE]

E Kuai i Kau Mau Meaai ma Kahi Emi

Ina he makemake oe e koe nui kau mau wahi kenikeni liilii maluna o na meaai, he mea pono e kilohi ma na hoolaha e puka mau nei maloko o na nupepa. Aia maloko o na nupepa e hoolaha mau ia nei kekahi mau halekuai e kuai hoemi nei i na meaai. Eia maloko o koia pepa ke puka mau nei ka hoolaha a Bailey Groceteria me ke kumukuai o kekahi o kana mau meaai, a ina e hoohalikeia me ke kumukuai o na meaai e kuaiia nei ma na halekuai o na meaai e ae, e loaa ana ka ike he emi maoli no na meaai ma keia halekuai. Eia ke kuaiia nei ke kope hina o Kona malaila no ke 30 keneka o ka paona; o ke kopa Sapolio he 3 i ka hapaha; kini aila palai Crisco, he 25, 30 a 70 keneka o ke kini hookahi, he kumukuni i loaa ole i na halekuai e ae. Nolaila, he mea pono no ke nana ma kahi emi, malaila e hoolilo ai i ke dala, a o ka hana ana pela, o ka hookumu ana no ia i ka hoomakaulii.