Ka Nupepa Kuokoa, Volume LXI, Number 21, 25 May 1922 — He Hana Kupono na ko Honolulu Nei Poe [ARTICLE]

He Hana Kupono na ko Honolulu Nei Poe

Iloko ae nei o ka mahina o lune, e piha mai ana keia kulanakauhale, i na lala o ka hui malu, mai na wahi like ole mai o Amerika Huipuia, ame ko lakou mau ohana; nolaila ua ili mai maluna o na makaainana o keia kulanakauhale, ke ko'iko'i, 0 ka hoomaemae ana ae i ko kakou kulanakauhale, ma ke ano kupono, no ka hookipa ana mai i keia mau malihini ko'iko'i, e holo mai ai na mahalo ana mai na malihini. No ke kulana maemae o ko kakou kulanakauhale nei, ua ili aku ke ko'iko'i maluna o na luna oihana o ke kalana, ka hoomaemae ana, aka nae iloko o ia manawa hookahi, e loaa ia kakou ka ike, ua kono pu ia mai kela ame keia makaainana, e lawe ae i ke kulana hoomaemae i ko kakou mau home; ma ka hookaawale ana aku, i na mea maikai ole apau, pela hoi i ko kakou mau hale oihana, ma ka hoonalowale ana aku, i na mea ku ole i ka hoihoi, ke nanaia mai. Aole he mea uuku ke kipa makaikai ana mai o kela mau lala o na hui malu, i ko kakou kulanakauhale nei, aka he mea ano nui loa ia, oiai, ia lakou e hoohala ana i kekahi mau la ma keia kulanakauhale, a hala loa aku paha ma na niokupuni e ae, e lilo ana lakou i poe hoolaha aku no ko kakou fnau ano, ame na ano kilakila apau o Hawaii; ma ia hana auanei a kela poe, e hooi loa ia ae ai ko kakou ikeia mai e ka poe owaho; e hooia aku ana ko kakou hookaulanaia, a o ka hua ia hana, oiano ke kipa mau mai ona malihini, no ka hoolilo ana ia Hawaii nei, i wahi makaikai nui ia, iloko o na kikina apau o ak makahiki. Iloko o na la o kela mau malihini e hoohala ana maanei me kakou, e waiho iho ana lakou i kekahi huina dala mahuahua loa maanei, me ke kaapiini ana o ia mau dala, iloko o na oihana like ole; o keia ka kakou mea i ake aku ai/ e kipa mai na malihini makaikai i o kakou nei; nolaila e hana aku kakou 1 na mea apau, e hoohihi 'maoli ai no ka manao o kela mau malihini, a na lakou auanei, e kono aku 1 ko lakou mau hoaloha, no ka hele ana mai e ike maka no lakou iho, i ka nani o ka Paredaiso o ka Pakipika. £ hoea mai ana na kanaka ko'iko'i o na kula'iia like ole, he mea maikai ka hui pu ana me lakou. Ua lohe nui kekahi poe o lakou, no na mea maikai o Hawaii nei, a oiai he mau la no ka kakou e kakali aku ai, mamua o ko lakou hoea ana mai i Honolulu *nei, wa kupono loa keia, e hooi ae ai kakou, i na maikai ame ka maemae o keia kulanakauhale, a oi aku, mamua o ka lakou mea i lohe wale ai. Ua lawa 1 o Hawaii nei, i na hiona nani, e hoohihi ai na manao o na malihini makaikai, aka nae, e lilo ko kakou ku'lanakauhale, i hoike mua loa, no ia mau hiona nani a kilakila, ma ko kakou hoao ana e hooi ae, i ke kulana o Honolulu nei o keia la. ,