Ka Nupepa Kuokoa, Volume LXI, Number 21, 25 May 1922 — Ka Ninau Wai no na Aina Hoopulapula [ARTICLE]

Ka Ninau Wai no na Aina Hoopulapula

I ka nana aku, me he mea la, e kaa ponoi mai ana maluna o ko kakou ahaolelo, ka hooholo ana i kekahi haawina dala, no ka hoohana ana aku, i wahi e loaa mai ai ka wai, no ka hoolako ana i na aina hoopulapula ma Molokai, no ka oihana mahiai. Ua kauka'i aku nei ke aupuni federala, no kana mau kokua ana mai, i kela mahele o na hana e pono ai ka hoopulapula ana i na Hawaii; o ka lono nae i loaa mai i Hawaii nei, hē hana ia, na ko kakou ahaolelo e noonoo; ina pela i'o, alaila o ko kakou manaolana wale no i koe, no ka hoea mai i ka lako ana o na aina ma Molokai i ka wai, aia maluna o ko kakou ahaolelo; a ma kekahi olelo ana ae hoi, maluna o na senatoa ame na lunamakaainana a kakou e hoouna aku ana i ka ahaolelo, ma keia kau ae e hoea mai ana. Ua nui ka wai i hoomaopopoia; a ua hoolalaia no hoi ke ano o na hana e hoea mai ai ka wai no na aina hoopulapula, i manaoia; o ka mea wale no i koe, o ia ke dala; nolaila ina i makee kakou, no ka holomua o ka hana hoopulapula, alaila he mea pono loa e loaa he waihona dala no kela hana, ina no ia he mea e koiia mai ai e hoopuka aku i na bona aie, i wahi e loaa ai ke dala. O ka Hon. Norman K. Lyman ia i oili okoa ae nei a ku iwaho, ma ke ano e hoike ana no kona lilo hou he moho elele lahui, iloko ae nei o ke koho baloka wae moho, e hoea mai ana, ma ka aoao Repubalika. Eia no ka nui ae o ke hoopu mai nei, a ke kakali mai nei paha, a kokoke ike aku i ka wa koho baloka; a ke haha mai nei paha kekahi poe, i ko lakou ikaika. He makehewa i ko kakou poe Hawaii ke manao e loaa i kekahi o lakou ka waeia ina he nui a lehulehu o lakou e alualu ana i keia kulana, e lilo ana ko lakou ikaika i mea ole, mamuli o ko lakou nui loa; o ka hana naauao, a o ka mea kupono maoli no ia, o ia ko lakou hui ana ae a kukakuka like, e unuhi ka hapanui i ko lakou mau inoa, a hookuu ae i kekahi mau inoa kakaikahi; ina aole e lawelaweia kela hana, alaila aole no he manawa e hookoia ai kela iini o na Hawaii, i kanaka Hawaii ka elele lahui e pono ai