Ka Nupepa Kuokoa, Volume LXI, Number 22, 1 June 1922 — KA WAE LUNANUI O NA KALAPU. [ARTICLE]

KA WAE LUNANUI O NA KALAPU.

Ma keia po, e malama ae ai na kalapu Repubalika apuni keia Teritore he halawai, no ka wae ana i na lunanui o na kalapu, no keia makahiki elua e nee aku nei; a no ka wae pu ana ae hoi, i na moho no ka ahaelele Repubalika, e noho mai ana maloko nei o keia kulanakauhale, iloko o ka mahina o lūlai. Ua hoeueu mau aku keia pepa i na Repubalika oiaio apau, e komo kino iloko o na hana kalaiaina, ma o ko lakou lilo ana he mau lala no na kalapu kalaiaina, maluna o ke kahua o ka hoopono ame ke kanaka makua. Iloko o na manawa ae nei i hala, ua lilo na kulana lunanui 0 na kalapu, i kekahi poe i kahua, no ka paani ana i na kalaiaina o ke ano limanui, a poholalo; no keia ano hana i oi loa ai ke kupono, o ke komo kino ana mai o ka poe kupono a makee i ke kalaiaina maemae iloko o na kalapu; ma ka lilo ana paha i mau lunanui, a i ole i mau lala no kela mau kalapu. Ma ka hoouka kalaiaina kuikawa i hala aku nei, aole i nele ka hoohanaia ana o na kalaiaina popopo e kekahi poe i maa 1 na hana poholalo, ke waiho nei na mea oiaio loa, no ia mau hana poholalo, iloko o ka lima, o na komite kuwaena Teritore; a ua lioao hoi kekahi poe, e alo ae, ma kekahi mau ano e hoemiia mai ai ka ikaika oka moho aka aoao Repubalika. Aole kakou i makemake, e hoomauia aku na hana o keia ano, e ka poe i maa i na kalaiaina popopo, o ka kakou hana kupono loa, o ia no ke kapae ana ae, ia poe mai ka noho iunanui ana no na kalapu, a e hoonoho aku i ka poe, i hiki ke hilinai, no ka hapai ana ae i ke kulana o na kalapu, ame na hana kalaiaina, ma na anuu kiekie o ka maemae, e loaa ai na manao mahalo, i ka poe, na lakou e hoohana ana i na kalapu o kakou; a e haawiia ai no hoi he mau haawina a'o maikai loa i ka poe kolohe, aole c mau ka hele lanakila ana o kela mau hana. I ke kohoia ana o na lunanui o na kalapu, he mea pono ia lakou, ke komo kino iloko o na mana koho, o ko lakou mau mahele koho iho; a hoikeike aku, i na kumu kupono apau, e komo mai ai iloko o ka aoao kalaiaina; a e haawi hoi i na kakoo ana, i na hoina alakai Repubalika; aole o ka noho malie wale iho no, a kauka'i aku na ka poe makemake, e hele mai e komo iloko o ke kalapu Repubalika. E malama mau i na halawai kukakuka, ma na manawa kupono apau e ikeia ana, ina aole ma kekahi wahi i hookaawaleia, aka ma na wahi, e akoakoa nui ia ana e na kanaka, he mea ia e pumehana ai na liana kalaiaina, a pela no hoi e loheia ai na manao hoonaauao, maluna o na ninai! apau no ka pomaikai laula, o na mana koho baloka. O na elele e waeia ae ana ma keia po, no ka ahaeliele, he poe lakou e akoakoa aku ana ma ka ahaelele iloko o ka mahina ae nei o lulai, no ka noonoo ana mai i kekahi kahuahana kalaiaina, no na moho o ko kakou ahaolelo kuloko, a no ka moho elele lahui i Wakinekona. Aole he kuleana o kela ahaelele e noonoo ai, a e wae ae ai paha i kekahi moho, a mau moho no na kulana oihana, a kakou e koho baloka aku ai, he ninau ia, i kaa maoli aku ke kuleana o ka hooholo ana, iloko o na mana koho, ma ke koho baloka wae moho iloko ae nei o ka mahina o Okatoba, a pela hoi ma ke koho laula aku o ka mahina o Novemaba. Mai hoohuikau kakou i kela ninau ma ka wae ame ke koho ana aku ina elele; koe wale no, ka wae ana ae ika poe kupono,

i poe hiki ke hilinaiiia aku, e hana mai ana lakou i kekahi kahuahana kaulike, e'nana ana, aole wale no, no ka pono o kekahi puulu, a pohai paha, aka no ka pono laula, o na makaainana o keia Teritore, me ka nana ole ia ma ka ili a ma ke kulana paha.