Ka Nupepa Kuokoa, Volume LXI, Number 23, 8 June 1922 — He Mea Hookakaha Maoli i Ka Manao [ARTICLE]

He Mea Hookakaha Maoli i Ka Manao

Maiwaena mai o na haumana o ke Kula Kiekie o Hawaii, i hookuuia i keia makahlki, ka elua hoi o na manawa, o ka puka pono ana mai o na haumana mai kela kula mai, he ekolu wale no mau keiki Hawaii; o ka nui He poe keiki Pake, Kepani ame Haole; he mea keia e hookahahaia ai o ko kakou manao, no ka haule ino o na Hawaii, ma ka huli ana i ka naauao ame ka ike. Ua pomaikai maoli kakou ma Hawaii nei r ;.i ke ku ana he kula kiekie maanei, elike me na kula kiekie ma Amerika, ma ka hooemiia mai o na hoolilo, o ka hoouna.ana i na keiki no kela mau kula kiekie; nolaila o kakou na Hawaii, ka i hoopomaikai loa ia, no ka laweia mai o ka ike ame ka naauao a kokoke imua o ko kakou alo; o ka mea apiki nae, he keu aku kakou a ka poe haule hope loa, ma ka ike ana i keia pomaikai; o na Pake, na Kepani ame na Hāole, ke hoouna nei i ka lakou mau keiki iloko o ke kula kiekie o Hawaii, me kela manaoio, aia a hookuuia mai kela kula mai, me na degere hoohanohano no ka lakou mau hana akeakamai i hooikaika ai, alaila e hiki pono auanei ia lakou ke lawelawe aku i na hana no lakou e pono ai, me ka holomua, aole me ke kulana hookuanui o ke ola ana. Aole kakou na Hawaii i nele i na kaikamahine opio ame na keiki opio, e hele nei ma na kula elike me Kamehameha, Sana Lui ame Punahou; o ka pilikia wale no, i ka manawa e hookuu pono ia mai ai kela poe keiki, mai keia mau kula mai, o ka pau iho la no ia o ka huli ana i ka naauao, a hoomaka koke aku la no e huli i na hana, oiai nae, o ka hana pono a lakou e hana ai, o ia no ke komo hou ana aku iloko o ke Kula Kiekie o Hawaii; maloko o kel.a kula,, e a'oia mai ai ma ka hana ike a pili akeakamai, a ke keiki e koho ai. O ke koikoi nui loa ma ka hoomau ana aku o na keiki a kakou i ka huli ana i ka naauao, ma ka manaoio o keia pepa, aia no ia ma ka aoao o na makua, i ko lakou ku ole aku mahope o ke kua o ka lakou mau keiki, a haawi aku i na kokua ana elike me ka hiki, no ka hoopau f>ono ana ae o na keiki, i ka liuli ana i na ike kiekie, i kokoke iipua o ke alo. Aole makou e hoole aha, aia kekahi pilikia ma ka aoao o na keiki, o ia ka paupauaho koke i ka huli ana i ka naauao ame ka ike, me he mea la nae, ua emi iho na ahewa ana maluna o lakou, no ke kulana e ikeia nei i keia mahawa, mamua o na ahewa e hookauia aku maluna o na makua. Pehea, e ae aku anei kakou, i ko kakou kulana emi hope, o ke ano aku,ia o ka nee ana o keia lahui kanaka? E ku wale aku anei kakou, a nana i na keiki o na lahui e ae, e holomoku ana i ka imi naauao ana, me ko kakou hooikaika ole i ka kakou poe keiki iho, e hoouna ma na kula hoonaauao? I ka nana aku, e lokahi ana kakou ma ka pane ana ae aole o kakou makemake ia kulana; ina pela, e ku iluna me ka malo'elo'e,, a e lilo na makua i poe hooikaika, i ka lakou keiki, e huli nui i ka naauao; a e lilo no hoi na keiki i poe makemake, me ka iini ia mea he naauao, ka mea i oleloia, ka makua o keia mua aku.