Ka Nupepa Kuokoa, Volume LXI, Number 23, 8 June 1922 — LILO WALE KA BONA O F. W. LAW I KE AUPUNI. [ARTICLE]

LILO WALE KA BONA O F. W. LAW I KE AUPUNI.

Hooleia ke noi a ka loio ma ka aoao pale e ka Lunakanawai Prank Andrade maloko o ka aha kaapuni ma ka Poakahi nei, o ke noi i waihoia ae ai e George K. French, ka loio o Fred W. Law, o ia hoi e hoopau ka aha i kana kauoha kanawai mua e hoakaka ana e laweia ka bona o $2000 o Law ma kana hoopii hoohalahala imua o ka aha kie-' kie. Ua hoahewaia o Fred W. Law e ke kiure ma kekahi manawa aku nei i hala no ka hoopa'i lawe ana i ka waiwai 'i haawiia iaia e malama, a ua kauia aku ka hoopa'i paahao maluna ona aole e emi iho malalo o hookahi makahiki hoopaahao ma ka hana oolea maloko o ka halepaahao o ke Teritore. No keia hoopa'i i kauia aku maluna ona ua hoohalahala oia, ma o kona loio la, i ka olelo hooholo a ke kiure imua o ka aha kiekie, a no kona hoea ana ae imua o ia aha ma ka manawa e kaheaia mai ai o kona hihia, a i mea hoi nona e hiki ai e noho e mawaho ua haawi ae oia $2000 bona no ka hooiaio ana no kona hoea ae imua o ka aha i ka manawa e kaheaia ae ai. Mahope koke iho no o ko Law haalele mai no ia ia Hawaii nei a holo aku la no Kanada, kahi i hoikeia mai ai aia oia malaila i nei manawa. No kona hoea' ole ana ae imua o ka aha ua*kukalaia ae la ka lilo wale ana o kona bona e ka aha ma ka pule aku la i hala, a ua ukuia ae ia huina e ka poe na lakou i kuhope no ua o Law.