Ka Nupepa Kuokoa, Volume LXI, Number 24, 15 June 1922 — Page 5

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo Walohia

 

Ko Vekinia Waiwai Hooilina

 

Hoopuhiliia na Hana a ka Mea Manao

Ino---Kau i ke Aki i ka

Manawa Hope

 

            I ka hala ana eiwa la mahope iho o ka hoi ana aku o sa Wiliama i Enelani, loaa mai la iaia ka Sa Wiliama kelekalapa mua loa, e hoike mai ana i kona pae ana aku Enelani me ka palekana, a mai ke kulanakauhale o Livapulu mai ia kelekalapa ana o ka hoouna ana mai, a ua kelekalapa koke aku la no hoi oia e hoike aku ana no kona palekana ma na ano apau, a e hoike pu aku ana mai hookaumaha mai i kona noonoo nona.

            Ua maopopo iaia ma kekahi mokuahi ae e loaa mai ana iaia he leka mai ia Sa Wiliama mai, a mahope aku o ia manawa e loaa mau mai ana iaia ka leka ma kela ame keia mokuahi e ku mai ana he mau la kakaikahi wale no ke kawa, aka nae, he manaolana pho wale no keia on a, elike me ia i ikeia ma ia hope mai.

            I ka hoea ana aku o ke Sa Wiliama i kona home ma ka Hitadele Hale, loaa aku la no iaia kona makuahine e ola mai ana, ua hele a nawaliwali, a o ka huaolelo mua loa i hoikeia mai iaia, he pomaikai kona pohala hou mai, nolaila ua haawi nui oia i kona manawa ame kona noonoo maluna o ka makuahine, me ka hooikaika ma na ano apau i mea nona e ola mai ai. O ke dala iaia ia manawa ua like me ka wai ke kahe mai kona lima aku, no na hoolilo laau keia ame na uku o na kauka.

            Ua pii liilii mau ae la ka maikai o ka makuahine ahiki i kona ola ana, a me ia ano lakou o ka noho ana me ka hauoli a hala eha pule, a i kekahi la, loaa aku la iaia kekahi lono ma ke kelekalapa uweaole e hoike aku ana no ka hoohuaia ana mai i keia ao o kekahi kaikamahine nui puipui, u'i no hoi o ka helehelena, a he mau maka hoi kona i like loa me kona, a he hiohiona ma na ano apau i like loa me ko ka makuahine.

            I ka loaa ana o keia kelekalapa ia Sa Wiliama Hita hoomaikai ae la oia i ke Akua no ka hoopuka ana mai i keia ao i kekahi hua ohana mai na puhaka mai Vekinia kana wahine, a ia manawa hookahi nae au hoehaehaia kona naau no kona kaawale ana mai kana wahine mai iloko o kona manawa pilikia, a eia nae, mamuli o kona ike ana ua puka maikai mai i keia ao malamalama kana kaikamahine me ke ola maikai ua hoopihaia kona naau i ka hauoli ma kekahi ano.

            Ua pane aku oia no ke kelekalapa a ka wahine e haawi aku ana i kona aloha ame kana hoomaikai nui, a he manwa pokole ma ia hope iho ua loaa aku la ia Vekinia kekahi leka e hoike aku ana e kapaia ka inoa o ke kamaiki o Veki Mei, o ka hapa hope o ka inoa no kekahi kaikuahine ia a Sa Wiliama i aloha nui ai, a i make ai hoi he mau makahiki lehulehu mamua aku.

            I ka loaa ana aku o kela leka, a mahope hoi o ka heluhelu ana iho o Vekinia, alaiala kapa iho la oia i ka inoa o ke kamaiki o Veki, kekahi hapa o kona inoa, ame Mei, ka inoa o ke kaikuahine o Sa Wiliama.

 

MOKUNA XI.

 

            Mahope mai o ia mau la aneane e hiki ole ia Sa Wiliama ke hoomalu iaia iho a e hoomanawanui hoi me ka uumi i kona makemake e hoi hou i Amerika, kahi a kana mau mea aloha e noho aku ana kakali o kona hoi mai.

            Ua hele kona makemake a nui e ake no e hii aku iluna o kona u-ha i kana kamaiki, a e apo hou mai hoi no hookahi manawa i kana wahine aloha i kona umauma, ka wahine hoi ana i oi aku ai ke aloha i nei manawa mamua o na manwa e aku i hala.

            Eia nae, iloko o ka nui o ia uluku mau on a e hoi hou aku i Amerika, kahi o kana mau mea aloha e noho mai ana, oia mau no ka nawaliwali o kona makuahine; oia mau kona kalilolilo a mawaena oia o ke ola ame ka make ia manwa, nolaila he mea pono iaia ke hoomanawanui, ina no ka loli ae i ka maikai he mea holo wale ia aku no o Amerika, a in a no ka haule aku o ka pau ana no hoi ia o ka mea nana e kaohi iho iaia.

            O keia ma'i o ka makuahine he lolo hapa, hookahi aoao hiki ole ke oni, a o kahi i laki ai aole i hoopoinoia kona lolo, a ua lilo ka hoi ana aku o ke keiki i mea hoomama loa ae i ka noonoo o ka makuahine ma'i. Eia nae, ma ka hoomaopopo aku a Sa Wiliama he manwa wale no nona e haalele mai ai i keia ola ana, a no ia kulana nawaliwali loa ua papa loa ke Kauka Habati Ranadela aole e walaau a hoonakekeia oloko o ka hale, aole e hanaia kekahi mea e lele ai ka hauli o ka mea ma'i.

            No keia pilikia i hoopaa mau ia ai ke Sa Wiliama ma ka Hitadela i na manawa apau oiai nae ua hele oia a uiha me ka hooulukuia o kona noonoo i ka hapanui o ka manwa ; aia oia mawaena o na mea aloha elua, a he elua hoi ana mau haawe aloha e haawe mau ai, ke aloha o ka makua, a ke aloha hoi o ka wahine e kauloloa mau mai la ka noonoo o kona hoi aku e kii ia laua.

            Iloko o keia manwa ana e kakali ana o ke ola ae o ka Makuahine aole wahi huaolelo hookahi i kamailioia mawaena on a ame ka makuahine no ka mea e pili ana i kona mare ana. No kona ike i ka makemake ole o kona makuahine no ia mare ana on a, a no kona hopohopo no o lilo kona kamailio aku ia mea iaia i mea hoanoe aku i kona noo, no ia kumu hooholo iho la oia aole e kamailio iki aku i kekahi mea no ia mare ana ona, aka, e waiho maile aku no na ka makuahine e noonoo ia mea nona iho i ka manawa ana e haupu ae ai no ia mea, aka nae, ua haohao oia no ka ninau ole mai o ka makuahine iaia no ka wahine opio ana o ka mare ana, ka wahine hoi ka ohana i manao ai e hoihoi pu aku ana oia me ia i ka manawa e hoi aku ai i Enelani.

            Ma kela hoi ana aku a Sa Wiliama a hui me ke kaikuahine oia ka mea hoihoi aku, no ke kaikuahine nae, noho mai la oia i ka uahoa, me he mea la he kanka e loa oa iaia, ke ike iho la no nae o Sa Wiliama nona iho i ke kumu, no ka mea aole oia i poina i na olelo oolea a ku i ke konakona a ke kaikuahine i kakau aku ai iaia ma ka leka, me ka hiki ole iaia ke huikala mai iaia no kona hoohoka ana aku i na manaolana apau a ke kaikuahine i kau mai ai maluna on a, no ka mea, aia wale no maluna o ke kaikuanane kona kauka'i ana mai i kona mau pono apau o ke ola ana, kekahi, he wahine okoa ka ke kaikuahine o ka manao ana nana, eia nae, ua mare e aku la oia i ka wahine ana i makemake a i aloha ai he wahine nae a ka ohana i ku-e loa ai.

            Elike me ka makuahine, ua hoole pu ke kaikuahine i ka ike ana i ka wahine ana i mare ai, me ka hoole pu i ka ninau a kamailio ana mai i kekahi mea e pili ana i kana wahine, oiai nae, ua hookahaha nui ia aku oia no ka hoi pu ole ana aku o Vekinia me ia, ua nui ka makemakeia iloko on a e maopopo aku iaia ke kumu o ko ke kaikunanae hoi hookahi ana aku aole hoi ka wahine me ia, koe nae kona ninau mai, i mea e pau ae ai ia haohao iloko on a.

            La lilo keia ano hoopoipoi a hoihoi ole mai o ke kaikuahine, a pela hoi me kona ano hoonuhanuha a hoomamao mau mai iaia aku i mea no ke Sa Wiliama e inaina ai nona, a i ka hala ana o kekahi mau la ma hope iho o kona hoi ana aku, a hala no hoi na la o ke kupilikii loa, hooholo iho la oia nona iho, he mea pono e ikeia mai kana wahine oia ka mea kuleana ia home, a he mana nui hoi kona maluna o na ohua e ae apau o ia ka hale, a he mea pono i kona ohana e ike mai i kana wahine oia ka hakuwahine o ia home.

            No ia manna on a, he mau la i hala ma ia hope mai, huki aku la oia i ka Lede Hinatona, ke kaikuahine, a iloko o ka rumi waiho buke, a mahope o ka hoonoho ana iho iaia maluna o ka noho me ka hoike mau aku i kona ano oluolu ma na ano apau, i aku la.

            "E Miriama, aole oe i haawi iki mai ia'u i ka hanohano ma o ka ninau ana mai i kekahi mea e pili ana no ka Lede Hita ahiki i nei manwa, heaha la ke kumu?"

            Kunou mai la ka Lede Linetona me ka hoihoi ole, alaila aea pono ae la kona poo iluna a nana mai la me he mea la e ninau mai ana, ahoe nae he pane mai, pii ae la ko Sa Wiliama ula me ka piha loa i ka huhu a i aku la:

            "Me ka maopopo loa ua piha loa oe i ka huhu ia'u no kuu mare ana i kela wahine, a ua manao mau no hoi oe e lilo ia mare ana o'u iaia i mea nau e hoouluhua mau mai ai ia'u, no ia kumu he mea pono ia kaua e maopopo kekahi i ka manao o kekahi i keia manawa.

            "E kauoha aku ana au, a ke manao mau nei no hoi au i kuu manawa e hoihoi mai ai i kuu wahine i keia hale, e hookipaia mai oia me na hoohanohano ana a pau i kupono e haawiia aku i ka hakuwahine o ka Hitadela nei ma nei mua aku, elike me ka hanohano i haawiia aku i ka hakuwahine mua o ka Hitadela i ka manwa i hala."

            Kulou hou iho la ke poo o ka Lede Linetona ilalo, aole nae oia i hoao e owaka ae kona mau lehelehe no ka pane ana mai i hookahi huaolelo, aka nae, ma kona mau papalina a ma kona mau maka ke ike mau la o Sa Wiliama i ka naholo o ka ula.

            "He wahine oia i kupono e lilo i hakuwahine no ka Hitadela nei ma na ano apau," wahi a ke kaikunana o ka pane ana aku," o ke kulana a'u i haawi aku ai iaia ua like no ia me ke kulana i loaa aku i kekahi o na wahine hanohano a kiekie loa maloko o Ladana nei. Eia kekahi mau kii on a me a'u i nei manawa, a malia e makemake ana paha oe e ike ia mau kii."

            Alaila wehe ae la oia i kekahi mau kii ekolu o Vekinia, he mau kii i paiia ma na kulana like ole, a waiho aku la imua o ka Lede Linetona, a mahope o kona hooki ana iho i kana kamailio ana, hina aku la oia ihope o ka noho, a nana aku la i ke kaikunane pehea ana la kona helehelena i kona wa e ike iho ai i ka helhelena o Vekinia.

            Hopu mai la ka Lede Linetona me ka lawe pakahi ana ae i na kii, a ke ike aku la ke kaikunane i ka loli o kona helehelena i kela ame keia manwa ana e nana iho ana, he helehelena hoowahawaha i kana nana aku, a i kekahi manawa e pupuku ae ana ka lae o ka Lede Linetona.

            "Owai oia a owai kona makuakane?" i ninau mai ai ka Lede Linetona mahope o ka hala ana o kekahi manawa o kona nana ana iho i na kii ekolu e paa ana iloko o kona mau lima.

            "He kaikamahine oia na kekahi o na keonimana o kaleponi," wahi a Sa Wiliama o ka pane ana aku me ke ano hookoikoi o kona leo, a ma ke ano hoi e hooia aku ana aole oia he wahine opio haahaa, elike me ka ke kaikuahine i koho wale ai, aka, he wahine opio i a'oia ma na kulana kiekie apau o keia ola ana.

            "He keonimana no Kaleponi!" i pane mai ai ke kaikuahine, me ke ano hoowahawaha. "Alaila ma ke ano o kau kamailio ana mai la nona me he mea la e olelo okoa mai ana no oe he keonimana oia i like kona kulana me kou."

            "Oia maoli no ko'u manao, i lohe mai oe," me kahi minoaka ma kona mau papalina. "Ua like ko Mr. Abota kulana me ko'u ma na ano apau, koe paha keia, aole paha he koko alii iloko on a, aka, he kulana koikoi a hanohano nae kona i like loa me kekahi o na kaukaualii o Pelekane nei. Aole o ia wale, aka, he kanaka naauao oia a ua noho hoi ma na kulana kiekie o ke aupuni i kona mau la, ma na ano e lilo ai oia i keonimana ua ike aku au ia mau ano apau maluna on a, a no kana kaikamahine hoi aole i emi iho kona naauao i ko'u, a ma ka u'i aole i loaa aku i kekahi o na wahine opio o Pelekane nei. "Nui keia mau olelo pai a Sa Wiliama no Vikinia, aka, he pai oiaio no.

            "Pehea oe i aa ai e Wile e kamailio mai elike me ia au o ke kamailio ana mai la, me ko ike no he nui a lehulehu na kaikamhine u'i loa ma Pelekane nei, aole ka u'i wale, aka, ka naauao, ame ke kiekie o ko lakou kaulana ma ka hanau ana a ma ka waiwai," wahi a ke kaikuahine o ka pane ana mai me ke okalakala. "Oia ka hoi kau e hoohalike mai ia wahi kaikamahine kuaaina me kekahi o na wahine opio u'i o ka Hitadela nei!"

            Nee ae la o Sa Wiliama i ka akaaka a nui ka leo no nei mau olelo hoohaahaa a kona kaikuahine i kana mea aloha, a no kona eha i nei mau olelo a ke kaikuahine alaila i aku la:

            "Ea, o kou pai a malama i ka hanohano o ka inoa o kou ohana ke mahalo aku nui au ia oe no ia mea, e Miriama, aka nae, ke manao nei au in a no kou holo nei i Amerika, he hana hoi au e manao nei he mea pono no ia'u ke hookuu aku ia oe e holo makaikai ia aupuni no kekahi manwa e hiki mai ana, e oi aku ana kou naauao mamua o nei manawa au e kamailio mai nei. O kou mau manao ma ka ma e pili ana i ka noho ana ame ke ano o na kanaka ma Amerika, a pela hoi me na mea apau au e ike aku ana ma kela repubalika nui o ke ao, e ike ana oe nou iho i ka like ole loa o na mea au e ike aku ana me kau e koho wale nei no i nei manawa. Pehea kou manao i kou wa i ike iho la i ka helhelena o ka mea a'u i aloha ai, ka hakuwahine hoi o ka Hitadela nei ma nei mua aku."

            "O, he maikai ka helehelena" wahi a ka Lede Linetona," aka, elike ana anei ka maikai o kana mau hana me ka maikai o kona helehelena?" Aohe on a makemake maoli e haawi mai i ka mahalo oiai ua piha oloko on a i ka hoowahawaha, aka nae, no ka hoomama ana mai i ka noonoo o Sa Wiliama pela wale no oia i pane mai ai elike me ia.

            "A pehea i kau nana iho he wahi ano maikai ole anei kekahi ma kona helehelena e hoike ae ana e ka mea maikai ole maloko o kona naau?"

            "A-o-le," wale o ka pane hookanalua a ke kaikuahine.

            "A pehea, aole anei he wahi ano au i ike iho la ma kona mau ano apau?"

            "Aole no oia i nele loa ia mau ano elike me ka hiki ia'u ke koho iho ma kona helehelena ma keia mau kii a'u e ike nei," i pane mai ai ke kaikuahine me ka hooia mai ia mau mea ana o ke kamailio ana mai ia.

            "A eia nae aole i lilo ia mau ano maikai on a au o ka ike ana iho la i mea e pai a e mahalo aku ai iaia ; aole oe i ike i kekahi helehelena elike me kena maweana o na ohana alii o Pelekane nei, a e hoike pu aku au ia oe ua like ka maemae o kona naau me ka maemae o kona helehelena," wahi a Sa Wiliama o ka pane ana aku iaia i hopu aku ai i kekahi kii a nana pono iho la me kona naau ma kona mau maka.

            "Ha! Ke ike aku nei au ua haaheo loa oe i ko wahine Amerika, ua hele ko aloha ame ko makemake a nui iaia, no ke aha no la hoi kou mea o ka hoihoi pu ole ana mai iaia i Enelani nei?" i ninau mai ai ka Lede Linetona, me ka leo e hoike okoa mai ana no i kona konakona, a ia manawa hookahi ua makemake loa iho la oia ia manawa e nanahu i kona alelo a moku no kona kumukaia ana iaia iho ma o kona hoike ana ae i kona manao pihoihoi no ka wahine ana i makemake ole ai.

            Ua pii ae la ka ula ma na papalina o Sa Wiliama ia manawa. Ua maopopo iaia aole i loaa iki ka manao maikai iloko o ke kaikuahine mai kona manawa o ka ike ana iho i ke kii o Vekinia, ua like no me ko ka manawa mamua aku. O ka haakei o ke kaikuahine no ke ano o kona hanauia ana mai he koko alii iloko on a ua lilo ia i mea hoihoi ole loa nana no ka mare ana o kona kaikunane i kekahi wahine haahaa loa e hiki ole ai iaia ke huikala aku i ke kaikunane.

(Aole i pau)

 

HE KANAENAE ALOHA NO KUU HANAU MUA JOSEPH EMMSLY UA HALA.

 

            E ka Lunahooponopono o ka Nupepa Kuokoa, Welina pu kaua:---E oluolu mai oe i kkaehi wahi kaawale o ka hiwahiwa a ka lahui; e hookomo iho i keia kanaenae aloha no kuu hanaumua heleloa.

            Ua ike iho au ma ka Nupepa puka ahiahi Honolulu Star Bulletin o ka la 22 o Mei, i ka haalele ana mai o ko'u hanaumua Joseph Emmsly i keia ola honua ana ma ka la 17 o Mei, 1922. Auwe no hoi ko maua luuluu ia oe, e ko maua hanaumua ike ole ia kou kino lepo.

            Eia mua âme kou hanaumua kaikaikuahine i Honolulu nei, i ka aina hookama, aina lewa i ke kai; ua okiia kakou e ke kai, kaawale olua me ka olua mau lei, kaawale hoi makou ka ohana, ike ole i kou aho hope loa. Auwe lihaliha wale ia oe e kuu kaikuaana heleloa, haalele mai la ia makou ka ohana ame kana wahine ame na lei e paiauma aku nona ma kei no mauleule.

            Ua naha ke kiaha gula o ke ola, ua hoi ka lepo i ka lepo, o ka uhahe, ua hoi me ka Mea Nana i hana; e hoomaikaiia ke Akua mana loa, Nana no i haawi mai a Nana no i lawe aku.

            Welina aloha ia'u ka uka o Waiopua la, kuu pua a'u i iini ai e kii, a e lei hoi e; eia ka na ka make ana ka hoi e lei, kupouli ke aloha e Kanehoa, aohe e u i ka hana lokoino a ke aloha ole, ua oni wale i ke kula o Mailehune; huna na maka pe'a na lima i ke kua, o ka nahele anoano aloha mauka o Huliwale e; ke huli nei au ia oe e kuu kaikuaana kuu minamina pau ole a.

            Ke ulaia ia nei hoi au a maewaewa ko aloha ole, kuewa hoi i ke ala me ka waimaka ; me he makamaka puka la ko aloha ke hiki mai, hiki mai ko aloha, e uwe no au auwe kuu kaikuaana, kuu aloha pau ole ia oe e.

            Kuu kaikuaana mai na pali alolua o ua aina nei, mai ke awawa kuhoho lipolipo onaona o ka palai, hoopalaimaka wale ka hele ana a kuu kaikuaana, huna na maka la nalo i ke aouli' waiho i ka ukana luuluu na'u e mili, i lei a i hoapili no'u no ka po me ke ao; hiaa mau ka po moe ole ia, kaunu hewa ke kuko me ka li'a i ke aumoe, o kuu hiamoe nui he mea ole ia, paa ole ka waimaka hoopulu mau i ka lihilihi. Auwe kuu kaikuaana kuu minamina pau ole ia oe a!

            Ke hooki nei au i keia kanaenae aloha o kuu kaikuaana heleloa; ke hui pu aku nei maua me ko maua hanaumua, ka wahine i hooneleia i ke kane, na lei nio i hooneleia i ka makuakane, iloko o ka luuluu me ke kaumaha; ke pule a ke noi ae nei maua i ka oluolu o ka Makua Lani, e hoomama mai i na kaumaha mai ia oe ame na lei a kakou mae ka ohana. Nana no i haawi mai a Nana no i lawe aku; e hoomaikaiia Kona inoa.

            O maua iho no ko laua mau pokii me ke aloha.

DAVIID M. KEPANO,

MRS. K. KEPANO,

661 Queen St. Honoluu.

 

PEPEHI HE MAKUAHINE IAIA IHO ME KANA BEBE.

 

            Iloko o ka moolelo o Hawaii nei mai ka hookumuia ana mai ahiki i keia la aole i ikeia a i ole loheia kekahi moolelo no ka lawe ana oe o kekahi wahine i kona ola i mea e make ai oia a lilo kona uhane i mea kokua mai i kana kane mai "ke ao uhane" mai, elike me ia e ikeia iho ana ma ka moolelo malale nei a e hoakaka ana penei:

 

            NEWARK,--Ua make o Mrs. Maude Fancher mane. Ua make oia me kana bebe elua makahiki. Ua lawe ae oia i kona ola ponoi ame kana bebe mamuli o kon amanaoio e hiki ana iaia ke hooholomua i na hana ame ke ola ana o kana kane in a mai ke ao uhane mai oia e haawi mai ai i ke kokua ana iaia.

            No kekahi manwa loihi ka hoomailoia ana o Mrs. Maude Fanacher e kekahi maʻi, a i hoohalaia ae ai kekahi manawa o ka auwe ana i ka ehaeha ua huli a hooikaika nui oia ma ka mea e pili ana i ke ola uhane ana a o ka hopena o ia kona hoomake ana iaia iho ame kana bebe o elua makahiki, me keia manao in a e make ana oia e lilo ana kona uhane i mea kokua mai i kana kane.

            Maloko o kekahi leka ana o ke kakau ana na ke kane, o Herman Fancher ka inoa, he leka hoi ana o ke kakau ana mamua iho o kona inu ana i ka laaumake ame ka hoainu ana i ka laaumake i kana bebe, i hoakaka ai oia i kona hopohopo no ka pono o kana keiki mahope aku o kona make ana, a e hoakaka pu ana no hoi i kona manaoio in a no kona make e lilo ana kona uhane i mea kokua mai iaia. He wahine manaolo loa o Mrs. Francher i ka lilo o ka uhane o ka mea make i mea kokua i ka mea ola, elike me ia i a'oia aku ai iaia e kana kumu.

            No kekahi mau la lehulehu mahope iho o ko Mrs. Fancher inu ana i ka laau make ka hoomailo ana a ka ma'i iaia, a iloko o ia mau la he kulana kupilikii loa kona e aumeume ana mawaena o ke ola ame ka make nialoko o ka halema'i ma Newark, a e noho mau aku ana hoi kana kane ma ka aoao o kona moe me ke kiai a pule mau ana no ke ola o ka wahine, me kona hoahewa loa i ka la a ka wahine i hoomaka ai e huli nui i na mea e pili ana i ke ola uhane ana he hana hoi i alakaiia aku ai oia a i ka make.

            Eia o Arthur Conan Doyle, ke kanaka Pelekane kaulana i ke a'o ana ma na mea e pili ana i ke ola uhane ana maloko o keia aupuni i keia manawa, a i kulike me kana o ka hoakaka ana ae aole e loaa ana ka mea a Mrs. Fancher i iini ai mamuli o kona lawe ponoi ana ae i kona ola.

            Wahi a Lodge mamuli o ka Mrs. Fancher hana ponoi o ia hoi kona lawe ana ae i kona ola ponoi e lilo ana i hana hiki ole nana ka launa ana mai o kona uhane me kana kane mai ke "ao uhane mai mao."

           

            MONTREAL Iune 2.--Ua hoopii hoahewaia ae o Adelard De Lorme he kahunapule Kakolika e ke kiure i keia la no ka hewa pepehikanaka ma ka hana e pili ana i ka make ana o kona hoahanau hapa, ka mea nana ka palapala kauoha ma ka oleloiao De Lorme ka hooilina i hoakakaia maloko. Ma ka olelo a ka lunakanawai na weheia e ka ekalesia Kakolika Roma ke palaka o De Lorme. O kona hoahanau hapa i pephiia ai a make o Raoul De Lorme kona inoa.

 

            Ua Ikaika no ke Kamaliiwahine e hana mai nei i na hana me na hoa o ka papa Komisina, no ka pono o keia kuahaua hoopulapula. O keia n oke Kaahumanu o ke au hou. Eia no ka olelo a ke Akua i na kanaka, "E nana i ko oukou alakai."

 

Kopa Moi Keokeo No Ka Mikini Holoi

 

He Kopa maikai loa i hiki ke hoohanaia

no na ano hana apau i pili i ka home.

Hiki ke holoi i na lole nahenahe loa me

ka pilikia ole. O kona oi loa aku o ka

maikai no na mikini holoi--No ka holoi

i na pa âme holoi hale.

 

KUAI I PUOLO MAI KOU HALEKUAI MEAAI MAI

 

T. H. DAVIES & CO., Ltd.

 

Na Akena Wale no no ka Paeaina Hawaii

 

E Ka Poe Hookuonoono

Ke Makemake Oukou i na Lako----

NO KA HOME A NO KA AINA MAHIAI PAHA E KIPA

AE MA KE KEENA O NA LAKO PILI HAO O KA

 

AMERICAN FACTORS, LIMITED

No na mea elike me keia:

Kapuahi.                                                                    Meahana Mahiai                                           Uwea Pa Moa me Pa.

Lako Mahiai.                                                             Meahana Kamana.                                       Pena me na Palaki.

Lako Halekuai me Pa.                                              Pili Hao o Ano e Ae.                                      Aila me Vaniki.

 

O ke Kanaka Kuai i na Lako Hana Maikai ua Lanakila e no Oia i ka Hapa o ka Hakaka

 

Aole hiki ia oe ke lawelawe i na hana maikai me na meahana inoino. O ke kanaka e hoao ana e hana me na meahana inoino, e hoea mai ana i kona wa e kiola ai, a kuai i na mea kupono, in a he noonoo oia. Aka nae ua poho wale ka manawa ame ke dala ma ka hana ana pela. Ke kuai nei o Lewers & Cooke, Ltd., i na lako hana maikai wale no.

 

KE MALAMA NEI MAKOU HE AHUA PIHA PONO LAULA O NA

 

LAKO MAHIAI AME NA LAKO KUKULU HALE

 

He Makemake Paha Kou i

KOʻI KIPIKUA, KOPALA, HO, HAMARE, PAHIOLO, KOʻI LIILII, NA LAKO KAMANA PIHA PONO, HOANA HOOKALA, PAKEKE.

 

Papa o Kela âme Keia Ano, na Lako Hao, Pena, Aniani

 

Kakau mai a i ole kipa mai no na hoakaka. E hookoia no na kauhoa apau ma ka leka me ke akahele ame ka hikiwawe loa.

 

LEWERS & COOKE, LIMITED

HONOLULU

 

Na I'o Pipi Momona Waeia Mai na Aina Hanai

Pipi Like Ole Mai o Hawaii Nei

O eia i'o pipi momona, ka papa maikai hookahi ma ka makeke, a ke kuai hoolilo nei makou, ma ke kumukuai haahaa, me ka hoopono maoli.

Eia keia mau kumukuai malalo loa iho o ko na makeke e ae hui pu iho me na kulana maemae e hoohanaia nei e makou ma ka lawelawe ama ka hoahu ana i na i'o pipi, he mea pono e lilo ko makou makeke i makeke nou.

 

PipikuMokupuni……………….15  o ka lb.

Kulana Aoao o ka Pipi……………….15c o ka lb.

Ku'eku'e Pipi……………….12 1/ac o ka lb.

Pipi Palai Iwi Hoehoe……………….15c o ka lb.

Pipi Palai Uha……………….15c o ka lb.

Kulana Aoao Koala……………….15c 1/2 o ka lb.

I'o Hipa Ku……………….10c o ka lb.

I'o Umauma o ka Hipa……………….10c o ka lb.

I'o Hoehoe Palupalu……………….12 1/2c o ka lb.

WAIUBAKA MAILE……………….50c o ka lb.

 

METROPOLITAN MEAT MARKET

E ninau no LUI; he oluolu na kuka'i ana ma ka kaua olelo makuahine.

Hele mai, mai hilahila!