Ka Nupepa Kuokoa, Volume LXI, Number 25, 22 June 1922 — AOLE HE KANALUA ANA NO KA LOAA O KA HOLOMUA [ARTICLE]

AOLE HE KANALUA ANA NO KA LOAA O KA HOLOMUA

Eia i Hawaii nei o Kauka Elwood Mead, ka haole loea ma ka hana hookuonoono i na aina o Kaleponi, i kauohaia aku nei e ke Komisina Home Hawaii, no ka nana ana i na aina hoopulapula ma Molokai, malalo o na lilo o kela komisina. Ua hele kino aku nei oia e ike i na aina o Kalamaula, a ma kana ike, ua kulike loa ke ano o kela aina, me na aina ma Kaleponi, o ia ke kauka'i ana aku maluna o ka wai, e hiki ai! ke ulu na meakanu e makemakeia ana. j Ma ka manaoio o keia loea o na hana hookuonoono, mai ka elima ahiki i ka umi-kumamakahi eka, ke kupono i ka ohana: hookahi. e lawe ai i kela mau aina hoopulapula, o ka nui kupono ( kela e lawa ai i ka ikaika o kekahi ohana ke malama, me ka loaa maoli o ka holomua ia lakou; o keia ka mea oiaio, i ikeia no na kanaka mahiai ma Kaleponi; o ka alunu wale ana aku, | a oi mamua o kela mau eka, he hana hiki ole ia, i ke kanaka i j nele me ke kumuwaiwai e hoohana ai i kona aina. Ua pomaikai maoli ke Komisina Home Hawaii, i ka ae ana mai'o keia loea, e hele mai no Hawaii nei, no ke kokua ana i ka hana hoopulapula iwaena o keia lahui Hawaii, e loaa ana ia kakou na ike ano nui, no na nuu hikimua o ka holomua o keia hana hoopulapula. Ua manao kakou na kanaka Hawaii, o ka nui o na eka aina ,e loaa i kekahi mea, o ka oi ia o ke kupono; ma ka hoakaka nae a keia kanaka loea, aole i lawa ka ikaika o kekahi kanaka me kona ohana, e hana ai maluna o kela aina, e oili mai ai ka hopena holomua, e pomaikai ai oia ame kona ohana, koe wale no paha ka manao alunu, me ka waiho okoa mai no o kekahi hapa nui o ka aina, me ka mahi ole ia. Aole a kakou hoohewahewa ana i kela mau hoakaka. O ka uuku mai o na eka aina e loaa i kekahi kanaka, e hiki pono ana iaia ke mahi i kela mau eka, me ka hiki ke malama me ka maikai; e hoolilo ana hoi i kekahi manawa nui, ma ka makaala ana i kana mau holoholona; na ka poe he kumuwaiwai maopopo loa ko lakou, e hiki ai ke hoolimalima i na limahana, na lakou e piikoi aku i na eka aina nunui, aole na ka poe i nele, me na dala mahuahua i kinohi, no ka hoohana ana i ko lakou mau aina hoopulapula. Aole nae he mau hoohalahala ana, no na eka he iwakalua ka haahaa, a ke kanawai i hookaawale ae ai, no keia hoi ana aku e noho maluna o na aina hoopulapula, aka nae, ma o na hoakaka la, a keia haole loea, e loaa mai ana ka ike i na Komisina Home Hawaii, e hana i kekahi hoololi i ke kanawai, ma ke ano e oi ae ai ke kupono, elike me ia a na kanaka mahiai o Kaleponi e hana mai nei. Ma ka nana ana i na hoakaka a keia kanaka loea, a he manao oiaio no hoi ia, e pono ai e hoololiia ke kanawai Home Ilawaii, e hoemi loa ia mai na eka aina, e loaa i e kaukai ana e lawelawe i na hana mawaho aku o ko lakou mau aina hoopulapula ,no ka mea, aole he manawa o kela poe e noho paa ai e hana maluna o ko lakou mau aina, aka o na wahi eka kakaikahi, i haawiia aku ia lakou, ua lawa ia no ko lakou mau ohana e noho ana i ka hale, e hana ai; me ka waiho ole mai o kekahi hapa nui o ka aina, me ka hana ole ia aku. Pehea nae na hooikaika ana a na Komisina Home Hawaii, i na alahele e holomua ai, ka hana hoopulapula, pela hoi me na hoakaka a kekahi kanaka loea i na hana hookuonoono; ua ili iho ke kū'iko'i nui, maluna o na Hawaii, ka hana kino maoli ana aku me ka ikaika, ma na aikihele apau, e oili i'o mai ai ka holomua, o ko lakou noho ana,' a e ohi ai no hoi i na pomaikai o kela hana.