Ka Nupepa Kuokoa, Volume LXI, Number 25, 22 June 1922 — UA PONO KA HOOPAUIA ANA. [ARTICLE]

UA PONO KA HOOPAUIA ANA.

Mahope iho o ka noonoo ana o ke komisina makai, i kana olelo hooholo, no ka hihia o ka Makai Ben Lauahi, malalo o ke kumu hoopii, o ia kona lilo ana i mea ku-e i kana oihana, ma kona ano he makai, o ia ka lawe ana i na kini opiuma mailuna aku o kekahi kaa otomobile, ua lokahi kela komisina, no ka pili 0 ka hewa ia Lauahi, a ua hoounaia aku ia olelo hooholo, i kl Hope Makai Nui Asch, e kauoha ana e hoopauia o Ben Lauahi mai kona noho ana iloko o ka oihana makai. O na hooikaika ana a ke komisina makai, e oili ae kekahi mau hoike mai ia Ben Lauahi ae, no ke komo pu o kekahi mau makai iloko o kela hana hookahi, elike me kana i lawelawe ai, ua poho wale ia; aka nae, ua hana ke komisina i ka mea pono loa, ma ka hoopau ana aku i kela makai, no kona kupono ole, e lilo i mea hooko i ke kanawai, oiai no oia e hakihaki ana i ke kanawai. Ua hoea ae he noi a ka Hope Makai Nui Asch imua o ka papa o na lunakiai ,no ka hoomahuahua hou ia ae o ka oihana makai, i hiki ai ke hoemiia mai na hana hakihaki kanawai e hdlopapa ne; ma keia kulanakauhale. He noi kupono no kela, ua hapa loa maoli na makai e hiki ole ai ke ikeia aku na hana karaima e lawelaweia mai nei ma kekahi mau wahi; aka nae, aia wale no a hoike mai na makai, iloko o ka oihana i keia manawa, i ko lakou hooko i'o ana, i ka hana i ukuia aku ai lakou e ka lehulehu, alaila ikeia ka waiwai o kela hoomahuahua ana ae i ka oihana makai; aka ina me keia ano epa no e lawelaweia mai nei o na hana o kela keena, alaila aole no e oili mai ana kekahi mau hopena maikai, ma ka hoomahuahua hou ana ae i ka oihana makai. Aole na hoa o ka papa lunakiai he poe e ae wale mai ana 1 na noi, elike me kela ae la a ka Hope Makai Nui Asch, o ka waiho ana aku, no ka mea aole lakou i pohihihi i ka hana a na makai; a ina e hoole mai ana lakou i kela noi, aole no lakou ka hewa, aka no kekahi poe makai no, i ko lakou lilo ole ana i poe makee i ka lakou oihana, a i ka uku hoi a lakou e ohi mau nei i kela ame keia mahina. He mea maikai ole paha ka hooleia aku o kekahi noi kupono, mamuli o na hana epa, a kekahi mau makai; he mea nae keia e a'oia aku ai na poo ma ka oihana, he poe kauwa hooko kauoha wale no lakou, o ka lehulehu ka mana ame ke kuleana maluna o lakou, a ua makee ka lehulehu e ike i ka lawelaweia ana o na hana o kela keena, me ka hoopono.