Ka Nupepa Kuokoa, Volume LXI, Number 29, 20 July 1922 — HE HOALOHALOHA NO LOT KALUAOKALANI KAUWE. [ARTICLE]

HE HOALOHALOHA NO LOT KALUAOKALANI KAUWE.

'' Ka Lani kuu Home e maha mau ai, Pokole paa ole kuu noho maanei, No keaha e ohumu, ke kau paa pu mai, Na Eha, na Luhi, na Kaumaha e." Mr. Lunahooponopono o ka Nupepa Kuokoa, ka hiwahiwa a ka Lahui, Welina kakou: E oluolu oe e hookomo iho ma kahi kaawale o ka kakou hiwahiwa i kela poomanao e kau ae la maluna a nau hoi ia e kaomi iho i ke pihi uwila, i lele aku ai kona malamalama ma na kihi eha o ko Hawaii Paeaina aloha, i ike mai ai na kini haipule, na makamaka, na hoaloha ame na ohana aku i koe i ike ole i kona hanu hope loa e noho nei ma na kaiaulu aloha o ka aina, o Lot Kaluaokalani Kauwe, ua hala, a ua moe aku oia i ka moe kau a moe hooilo. Elike me ka uwila i anapu mai, pela no ka nuhou kaumaha i pahola ae ai ma ke kakahiaka o ka la Sabati, lulai 16, 1922, o Lot Kaluaokalani Kauwe, ua hala, ua moe no ka wa mau loa; Auwe! Walohia wale! Aole no i loihi loa kona noho pu ana me makou iloko o ka hana a kona Haku aloha (Iesu), ma ka la 1 o lanuari 1922, i hoohui pu ia mai ai oia me kana wahine iloko o ka Ekalesia Makua o Kawaiahao mai ka Ekalesia mai o Pukaana, Hookena; ua piha iaia na mahina he eono ame umi-kumamaono la o kona noho hoahanau ana no ka Ekalesia Makua o Kawaiahao, a iloko o keia manawa pokole loa aole oia i hoopau wale i kona manawa, aka ua komo pu mai oia ma na hana, ua wae ao ka hope Kahu Kula Sabati Samuel Toomey iaia i kumu kula Sabati no na makuakane opio o ka Ekalesia a ua paa oia ia wahi a hiki i kona moe ana aku la, oia no ka hope alakai himeni o ke Kula Sabati o Kawaiahao, me ka minamina nui i kona moe koke ana: Walohia wale! Nolaila, o makou, ke Kahu, na luna ame na hoahanau o ka Ekalesia makua o Kawaiahao ma o ko makou komite la, ke komo pu aku nei makou iloko o ka luuluu a me ke kaumaha no ka aui hikiwawe ana aku o ko makou hoahanau i aloha nui ia, a pela hoi e ka makuahine, e oluolu oe e hookipa aku i keia hoomanao aloha o auamo aku me oe i na kaumaha ame na luuluu i kau iho maluna o kou mau poohiwi, no kau mea aloha i hala. O kou ehaeha ana o ko makou ehaeha ana no ia, o kou kanikau ana, o makou pu ilaila, a ke pule nei makou i ke Akua nona ka maluhia, e lawe ae i na kaumaha ame na luuluu ma iia kakou ae, a Nana no, ma Kona lokomaikai e holoi ae i na waimaka o ka walohia, mai o kakou ae, no ka mea, Nana no i haawi mai, a Nana no i lawe aku. E hoomaikaiia Kona inoa. Hooholoia i hookahi kope i ka wahine kane-make, Mrs. Lucia Makohilani Kauwe, ame ka ohana, hookahi i ka Nupepa Kuokoa a i Ka Hoaloha. O makau iho no me ke aloha luuluu, ma o ko makou komite la. J. K. NAKILA, D. P. KAHAULELIO, JAS. H. HAKUOLE, Honolulu, Iulai 16, 1922. —