Ka Nupepa Kuokoa, Volume LXI, Number 32, 10 August 1922 — NA DEMOKARATA MA KA NINAU MOHO ELELE LAHUI. [ARTICLE]

NA DEMOKARATA MA KA NINAU MOHO ELELE LAHUI.

Mamuli o ka oili okoa ana mai nei o Kauka Raymond a ku iwaho, ma ke ano, oia kekahi moho elele lahui, ma ka aoao Demokarata, ma keia kau koho wae moho ae o kakou e hoea mai ana, ua hookauia ae kela aoao kalaiaina, ma ke kulana j paonioni, ka mea i manaoia i kinohi, aohe hoa paio o William P. Jarrett i keia kau wae moho, no ke kulana elele lahui i Wakinekona. Akahi iho la nae a kohu pono ka paio ana o na moho elele lahui, o na aoao kuloko o kakou, ua loaa he hoa paonioni i kela ame keia aoao t nolaila e ku ana na Demokarata ma ka lakou mau moho iho, a pela hoi na Repubalika, e ku ai mahope o ka lakou mau moho, ine ke kaukai ole aku o na moho Repubalika, : ko lakou ikaika pakahi, maluna o na kokua ana mai a na Demokarata, koe wale no paha, na hoaloha pilipaa loa o kela mau moho, o ka aoao Demokarata. Ma na hoailona maopopo loa e oiliili mai nei iloko o keia mau la, aole he hana maalahi na W. P. Jarrett, ke alualu ana e loaa iaia ka waeia ae, i moho na ka aoao Demokarata, elike me ia i manaoia ai i kinohi, no ka mailoko ponoi ae o kekahi poe Demokarata, i hoike okoa ae ai lakou, i na manao ku-e iaia, ma ke ano, aole oia i kupono no ke kulana elele lahui; a | aole hoi oia he kanaka, i hooikaika no ka aoao, iloko o naj makahiki, ana e paa ana i na kulana oihana, i hapaiia ae ai oia a kau iluna. ] Ua pololei o Kauka Raymond, i olelo ae ai, o kahi loa no Jarrett e noho ai ma Hawaii nei no, ina he makemake kona e haawi aku i na kokua ana i na Hawaii, ma o na kulana oihana la, aole malaila wale iho la no pau, aka ua nele oia i ka ike ame ka makaukau e hiki pono ai iaia ke hooko aku i na hana apau, i pili i ke kulana elele lahui mai Hawaii aku nei ma Wakinekona, koe wale no a he mea okoa ae kekahi me ia ma ke ano he kakauolelo nana, oia auanei ka mea nana e lawelawe i na hana maloko o ka ahaolelo lahui. Ua nui na Demokarata i kulike ko lakou manao me ko Kauka Raymond, a no ia kumu, aole lakou i huna iho i ko lakou manao, no ko lakou koho ole iaia, ma keia kau koho wae moho, aka e koho ana lakou, i ka mea a lakou i manaoio ai, iwaena o na moho Repubalika, ua lawa oia i ka makaukau, no ke kulana elele lahui, e haaheo ai o Ilawaii nei ame na Hawaii nona. Ma ka olelo ana ae ma ke ano nui, aole ka lokahi ame ka wai lana nialie, iloko o na Demokarata, elike me ia i akeia aku ai e oili mai, ma keia hakoko kalaiaina o kakou; ke kumu hoi i waiho ai o L. L- McCandless ame Jonah Kumalae, i ko laua holo moho elele lahui ana, e ike aku ana no kakou, ma ka manawa e komo kino aku ai iloko o ka enaena o ka hoouka kalaiaina ana, i ka oiliili mai o kekahi mau hana, i lilo ai i kumu nana e hooku-ee i kela kulana lokahi i ikeia iloko o kela aoao kalaiaina, i na kau aku nei i hala. Ua hoohokaia ka manao o kekahi poe Demokarata, o ka hoolala ana e haawi mai i ka lakou mau kokua ana i ka moho nawaliwali iloko o ka aoao Repubalika, me ka manao, pela wale no e lanakila ai ka lakou moho, ma ke koho baloka laula iloko o Novemaba ae nei; he paani kalaiaina hoi, a lakou i hoohana ai me ka holopono loa, ma ka manawa e alualu ana na moho Repubalika, i ke kulana meia no ke Kulanakauhale a Kalana o Honolulu nei, no ke ku-e ana ia J. J. Fern. E wae na Demokarata i ka lakou moho elele, maiwaena ae o na moho elua e holo nei, pela hoi me na Repubalika, e wae ae ai i ka lakou moho, maiwaena ae o na moho e alualu nei i kela kulana; o keia ke kalaiaina oiaio, a hoopono, a ma ke koho baJoka aku o Novemaba e kaupaona ai i na moho, i waeia o na aoao a elua, a koho aku, i ke kanaka oi ae o kona kupono, elike me ke kulana makaukau, a hiki ke hilinai, no kona iini ame ka makemake, e hana aku i ka pono kaulike no keia Teritore, anie kona mau makaainana.