Ka Nupepa Kuokoa, Volume LXI, Number 33, 17 August 1922 — ANEANE MALOKO O EONO PULE MAI KEIA LA AKU E WEHEIA AI KE ALANUI HOLOPUNI [ARTICLE]

ANEANE MALOKO O EONO PULE MAI KEIA LA AKU E WEHEIA AI KE ALANUI HOLOPUNI

I kulike me ia a ka Enekinia kulanakauhale Orht o ka waiho ana ae i kana hoike imua o ka papa ma ka Poakolu o ka pule aku la i hala aia ma kahi o ak aneane i ka eono pule, pela kona manao, e wehe hou ia ai ke alanui holopuni no ka holo ana o na kaa mama, koe na kaa lawe ukana kaumaha. Elike me ia ana o ka hoike ana ae ma ka Poakolu aku la ka hoomaka ana o E. J. Lord, ka mea lawe aelike, e uhi i kahi o ke alanui i pau a i makaukau hoi i ka hanaia i ke konakalika, e hoomaka ana mai kahi aku o ke alanui ma Heeia i hanaia ai a koe aku nona ka loa 1200 kapuai, kahi a ka mea lawe aelike e hana mai la i nei manawa. Ina no ka malie maikai, elike me kana hoike e pau ana ma kahi o 200 kapuai e paa i ka uhiia o ke alanui me ke konakalika i ka la, a ua manaoia iloko o eono la e paa loa ai i ka uhiia me ke konakalika kahi o ke alanui i hamama a i makaukau no ka halii ana me ke konakalika. Ma ka aelike i hanaia iloko o na la he 30 e waiho ai ke alanui i uhiia me ke konakalika i paakiki ke konakalika, a ma kona manao ua hiki no ia alanui ke holoia e na kaa otomobile mama maloko o na pule ekolu, koe na kaa nunui kalaka lawe ukana, o lilo ke kaumaha o ia mau kaa i mea hoopoino i ke konakalika i haliiia ai aole i maloo loa. I ka manawa e pau ai ka hana a ka mea lawe aelike i ke alanui ma Heeia, e hoololi ae ana oia i kana hana ma ke alanui o Waimanalo, ma ia alanui he 3000 kapuai ka loa e uhi ai me ke konakalika, mai kahi aku i pau ke alanui i ka haliia me konakalika ahiki i ka halewili ma Waimanalo.