Ka Nupepa Kuokoa, Volume LXI, Number 34, 24 August 1922 — MAI HOOPALALEHA E NA MANA KOHO [ARTICLE]

MAI HOOPALALEHA E NA MANA KOHO

Ke hamama nei ka buke hoopaa inoa, o ka poe kupono i ke koho haloka, o ke Kulanakauhale a Kalana o Honolulu nei ī keia manawa, i na la apau mai ke kakahiaka mai ahiki i ke ahiahi, a koe na Poaono, ma ka hora umi-kumamalua o ke awakea e paa ai ke keena oihana o ke kakauolelo kalana. O ka poe i hoopaa ole i ko lakou mau inoa, o ka wa kupono keia no lakou e hele ae'ai e hoopaa i ko lakou mau inoa, o hiki ole auanei ia lakou ke koho baloka, ma keia kau koho w.ae moho iho, ma ka la 7 o ka mahina o Okatoba. E hhomanao nae, ma keia hoopaa ana aku i na inoa, i hiki ai ke koho baloka, ua pili wale no ia i ka poe i hoopaa ole i ko lakou mau inoa, ma ke koho baloka kuikawa aku nei o kakou. O ka poe i koho baloka; ma ke kau koho mau, he elua makahiki ae nei i hala, iloko o ka mahina o Novemaba, o ka 1920, a i koho ole nae, ma ke koho baloka kuikawa iho nei, no na n>oho elele lahui i Wakinekona, aohe o lakou hoopaa hou ana i ha inoa; ua lawa kela hoopaa ana i ka 1920, e loaa'āi ke kuleana ia lakou, e koho hou ai i keia makahiki. Ina he poe kekahi, i nee aku, mai ko lakou mau wahi mua mai i noho ai, a i koho ai i ko lakou mau baloka, ua hiki ia lakou ke hele ae, e hoololi i ko lakou wahi e koho baloka aku ai i keia manawa, ke makeniake lakou e hana pela. Mai kakali wale, a hoopaneenee wale i ka manawa, o lilo auanēi ia hoopaneenee ana i kumu e liui ai ka hana mahope kku, a e.hooneleia ai paha, i ke kuleana e koho i na moho ma keia koho baloka wae moho. O keia koho baloka wae moho e hoea mai ana, o ke koho baloka oi aku ia o ko kakou makaala, a makee i' ko kakou pono koho; no ka mea, ma keia koho baloka ana, e wae ai kakou i na kanaka kupono, no ka hele ana e hana i na kanawai kaulike no kakou, malok'o o ka ahaolelo kuloko, a pela pu hoi ke koho ana i ka moho kupono, no ke kulana elele lahui i Wakinekona. He'mea mau i kekahi poe o kakou, kā olelo ana, aohe o lakou noonoo nui'no keia kau koho wae moho; aia ka lakou noonoo, no ke kau koho nui iloko o Novemaba. Aole he pololei o ka manao ana pela, oiai ia kakou auanei e hoohemahema ai, i ko kakou pono ly>ho, he mea ia e lanakila ai, ka poe i ,hiki ole ke hilina'iia, no ka hana mai i ke kaulike, nolaila i wahi e lanakila ai, na kanaka kupono, ka poe hiki ia kakou ke hilina'i aku, no ko lakou hana mai i na kanawai maikai, ua ili iho ke ko'iko'i maluna o na mana koho, ka hoohana ana aku i ko lakou kuleana, ma ke ano e mihi ole ai kakou ma keia hope aku. Ua pili keia hoeueue ana, i na mana koho baloka apuni keia Teritore, ka poe i hiki ole ke koho baloka ma keia kau koho wae moho, e hele ae e hoopaa i ko lakou mau inoa ma na keena i o na kakaUolelo kalana lehulehu o kakou.