Ka Nupepa Kuokoa, Volume LXI, Number 42, 19 October 1922 — MAI HOOHEMAHEMA I KA PONO KOHO BALOKA [ARTICLE]

MAI HOOHEMAHEMA I KA PONO KOHO BALOKA

Ma na hoike i loaa mai i keia keena, he nui okoa na kane ame na wahine Hawaii e noho mai nei ma na mahele lehulehu, i hele ole ae e hoopaa i ko lakou mau inoa, no ke koho baloka. Ua naaupo maoli kela poe, me ka manao iho, he wahi mea liilii ka pono koho baloka o ka hoohemahema ana. He hana na na aoao kalaiaina o kakou, ka makaala ana aku i ka poe o kela ano, a lawe ae ia lakou i ke keena o ke kakauolelo kalana, no ka hoopaa ana i ko lakōu mau inoa, i hiki ai ke koho baloka, ma ka la ehiku ae nei o Novemaba i ka elele lahui, ame na hoa o ka ahaolelo kuloko. Aole o kela wale no ka pilikia i ikeia; aka he nui ka poe i hele ole ae e koho i ko lakou mau baloka, ma ke koho baloka wae moho aku nei i hala. O keia no kekahi o na hana naaupo ana mana koho. Pehea la e loaa ai ka lanakila i na moho a kakau i manao ai he poe kupono no ka ahaolelo, ina e noho ana i kauhale, a i ole hele paha no kekahi mau wahi? He mau la helu wale no koe, mai keia la aku a hoea i keia Poalua ae, ka la 24 o keia mahina, o ka paa no ia o ka buke o ka poe koho baloka, nolaila aole he wa hou aku e kakali ai, aka e hele koke ae ka poe i loaa mua ole ia lakou ke kuleana koho baloka e hoopaa i r,a inoa.