Ka Nupepa Kuokoa, Volume LXI, Number 43, 26 October 1922 — HE HOALOHALOHA NO MRS. S. KALAULEHUA K. K. NAIHE. [ARTICLE]

HE HOALOHALOHA NO MRS. S. KALAULEHUA K. K. NAIHE.

Mawaena o koonei mau mea luuluu. Na mea hoehaeha a ka naau pu, Iini no au, no kuu home ma-o, Kuu home maluna a mau me lesu, He Gola na apo e hui paa ai, Na hoa o'u ma-o, ma ia home maikai. Iesu nae ka hiwa a iini au, E launa me Iesu, ma kuu home mau, Mau mau, mau me Iesu, Ma kona home nani, A mau me Iesu. E Mr. Lunahooponopono o ka Nupepa Kuokoa, Solomon Hanohano: E Aloha mai ia kaua a nui loa:—E ae oluolu mai hoi oe ia'u e hookipa aku, imua o kou hanohano. No ka manawa mua loa, a e nonoi pu aku ana hoi i kou oluolu piha, ina he wahi rumi kaawale kekahi o ka kaua hiwahiwa, i koe ma ke kihi, a o ko'u wahi rumi ka hoi ia, a nau ka hoi ia, e kaomi iho i ke pihi, ke ki o ka uwila ma ka hikina, a malamalama aku ma ke komohana, i ka waihuna a ka paoo, i ka piko olu o Lehua, i ka'u puolo waimaka nunui e hana maoole nei i kuu lihilihi, no ka'u wahine i aloha nui ai: a'u hoi e imi nei. Imi au ia oe ke aloha la, Ma na paia aala o Puna, Mahea la oe i nalo iho nei la, Hoi mai no kaua e pili. I ike mai ai hoi ka maua mau keiki ame na moopuna lehulehu, na makamaka ame ko maua mau hoaloha eu a e kaana pu iho hoi i ka luuluu, ame ke kumakena ana aku nona ma keia aoao, o ka muliwai eleele o ka make. Ko iho la, ka ke Kauka Ioba i olelo ai; O ke kanaka i hanauia e ka wahiae he hapa kona mau la, a ua piha i ka popilikia; puka mai no ia me he pua la, a ua okiia aku, a holo aku no ia me he aka la, aole ia e mau, a no ka mea, ua paa kana olelo, Nana no i haawi mai, a Nana no i lawe aku, e hoonaniia ka inoa o Iehova ma na lani kiekie loa, he malu hoi ma ka honua nei, he aloha i na kanaka. He mea oiaio; ua hoi aku la ka palaho i ka palaho, a o ka uhane ua hoi aku la oia, me ka Mea Nana oia i hana mai, a kuu iho la kona luhi, a paa pu iho la kana hana maanei! Ma ka makahiki aku nei i hala, ua hoomaopopoia aku la, ka hoomahuahua loa ana mai o ka nawaliwali maluna o kona kino, a ua imi pu ia aku no hoi, me na lapaau naauao ana ia manawa hookahi, eia ka auanei, ua nui loa aku ka pilikia, *** o ka mea hiki ke hana ia *** ma na la hiki mua iho nei *** hine o Augate 19, 1922, a'u *** i moeuhane mua ole ai, eia ka auanei, ua kipa koke mai la na anela, me ko lakou mau lima menemene ole, a kailiku ae la i ke aho hope loa, a upo'i iho la hoi kona mau lihilihi maka, no ka wa mau loa, ma ko maua home aloha, ma Waipuka, Niulii N. Kohala, a waiho iho la i kona kino, e moe oni ole ana ma kona moe make, a e hooipo pu ana hoi me Niolopua i ke ka pua ohai, i na kau a kau, a ma kona moe make, e hoopuni pu ia ana hoi, e ka maua mau keiki aloha, ame na moopuna lehulehu a maua, na makamaka, ame ko maua mau hoaloha, no ke kaana pu ana iho hoi, i na waimaka o ka luuluu, ke kaumaha, a kumakena, ame ke aloha paumako, no ka'u mea aloha *** i mana-ka ia'u, e kuoe hele i ke ala me ka waimaka. Walohia wale hoi au e, a'u hoi i huli aku a nana i na wahi a maua i pipili aloha ai, a ua like ia me he waimapuna la, ka pipii hana maoole i kuu manawa e, he hiamoe hoi ko'u, hoala ana oe, e ke aloha e! A'u hoi e hoomanao poina ole nei i ko wehi; ia onaona Nuuanu i paia e ka ahihi, o kuu lihi ike ole aku ia Lanihuli, ke huli nei ka manao la ia Kaluailana, o ia wailele mai i ka lau o ka pali, pali mai na maka la, e na hoa i aloha no au i ka luna o Walikanahele, wali aku la, ha ka pua o ke Kamakahala. Hala ole ke aloha kipa hewa ianei. I walea ai no hoi kaua i ka la'i o Haliilua, i ka huli a ka nalu i Kalehuawehe, e wehe wale no oe i ka pili a ke aloha aole e hemo, he kawelewele kahiko ia, ua paa ia nei. Ua nohea aloha no ka ohu me ka noe, i noho no hoi au a manao aku ia oe, nau no hoi ka hala, he hooulu i ka la ino, e pae hope ka pono, he awa no ha'i, he wahi aloha no kuu mea aloha ua hala. Ma kana huakai heleloa, ua haawiia na leo kanaenae aloha maluna o kona kino lepo, a mailaila i malama hope ia ai, na hana hoomaikai maluna o kona kino lepo, e hoi no ka lepo i ka lepo, a no ka mea mai ka lepo mai no oe, a o ka uhane i ka Mea Nana oia i hana mai, no ke kakali ana aku i ka leo o ka pu a ka anela no ka hoala hou ana mai i ka poe apau ma na ilina, a'u hoi e manaoio loa nei, aia oia me ko kakou Haku aloha, ma kela Paradaiso nani mau loa ma-o. Ua hanauia kuu mea aloha mai ka puhaka mai o kona mama Kapalikaukini (w) ame kona papa, Kikaha ma ka lae kaulana ma Upolu, Kohala Akau, ma ka mahina o Ianuari 1, 1854, a ma kona manawa i haalele mai ai i keia ola honua ana, ua hoohala ia eia na makahiki

67 ame 7 mahina me 19 la, iloko o na haawina o ka hauoli, ame na inea o keia ola mauleule ana. He mea oiaio, i na la hiki mua o ke kupulau, o kona mau la opio, ua hoao aku oia e kui, a e lei i ka pua Melekule he kane, a i kona ike ana, ua iini koke oia iloko ona e hooulu a e hoolaha aku, a mailoko mai o ko laua puhaka, i oili mai ai he mau hua maemae, elua. Ka mua o Lonokahiauokalani (w) ame kona pokii kaikunane Kuhaiki, a mailoko pakahi mai o laua, i puka mai ai na moopuna kuakahi a kualua, a hoolaupa'i hoi i ka aina, no lakou ka huina o 17 kuakahi me 2 kualua, a ma ka manawa i pauaho mai ai o kana aloha mua, a ua iini hou oia, e kui i kana manai i ka pua lani ahiahi, oia hoi ka mea e kakau nei i keia manewanewa aloha no kuu lei poina ola, a mailoko aku o ko maua mau puhaka, ponoi aku i oili hou aku ai, na hua maemae e hoolaupa'i hou ana i ka aina, o ia hoi he 5 keiki (k) ame 5 kaikamahine, a mailoko mai o ka maua mau keiki, i hoohua mai ai i na moopuna he 13, a'u hoi e haaheo nei, iloko o ko'u mau la kanikoo, a kaua no hoi e ike pu iho nei, e kuu Mr. Lunahooponopono he iki no hoi kahi kanaka, ua hanaia ka hana, mokaki a'u no hoi e minamina nui nei, o na makuahine maikai apau, e like aku me keia ke ano. Wahi a Solomona ka naeau i olelo ai, o na wahine noho pono apau, he papale alii ia no ka lakou mau kane, a'u pu no hoi i ike pono iho ai, i ke kaumaha ame ke koikoi ka loa ka laula, ka lahilahi ka manoanoa, ke kiekie ame ka hohonu, o ke aloha, i pipili paa ia ai, iloko o na makahiki he nui o 45 a oi. He makuahine noho pono, a aloha ohana, a i kana mau keiki, a pela pu no hoi me kana mau moopuna aloha, he makuahine hooikaika i loko o na hana pono, o ko kakou Haku aloha, i paulele nui ai, a maluna ae o na mea apau, a ua lilo pu no hoi au, kana kane i lei a-i nana, ahiki iho la i ka wa i uina poha ai ke kaula gula maemae o ka materemonio, a okaoka liilii pu iho la hoi ka pakeke wai ma kae o ka luawai. He mea oiaio, ua naha iho la ka hale a ke aloha, e kipa mai ai, aloha, aloha wale kuu hoapili, kuu hoa kaunu a haihai lau lima a ke aloha, o na pali ku'i alolua kaulana eiwa o Honokane, ame ka wai hoi e hoohuelo nei i na pali, i pali ku kanono iho la, i ke alo o Kaukini, i ka lawai'a manu. Manu iho la hoi kuu hoa, noho mai la i kanahele, a o ka hele no hoi a ka wahine u'i, aohe puu aohe kee. Me he kahua kee la, ko aloha e ke'a nei i kuu umauma, e hapahapai nei, i kuu manawa. Aloha, aloha wale au i kahi wai e Waieli, elieli ke aloha kuonoono i ka waihona, e kaomi a e ana i ka waimaka, e oe pa'a, a oe paa, he holo na ka lio i houa i ke kui, na ka ua no e kuehu i ka nahele, i hoao ae hoi au, i pau ke kuhihewa i ke kawaha mai, ma ke kuahiwi o Maui, mai hoomahui aku oe, i ka pua o ka hala, ua hala ka pono a ke kikina mua, eia hoi au ka akimalala pani muliwai, ho ae ka ihu o ka lio i paniolo i honi hooma-u i ka pua o ka loke, he wehi no kuu mea aloha ua hala, aloha, aloha, wale! Ma keia wahi la, ke hookuu nei au i kuu waimaka, e hele elike me kona makemake; a maluna ae o na mea apau, ke haawi aku nei au a me na keiki ame na moopuna aloha a maua, i ka makou mau hoomaikai palena ole, mai ka mole aku o ko makou mau puuwai, i na makamaka, ame ko maua mau hoaloha, no ke ku kiai ana, ame na wehi pua hoi i haawi ia mai ai, ame na makana e ae, no ka hoohiwahiwa ana iho, maluna o ka makou mea aloha, a e oluolu pu hoi oukou, e lawe aku i neia mau mea me ke aloha kuio. A na ke Akua no auanei, e ninini iho i kona aloha, ame ka holoi pu ana ae, i ko kakou mau waimaka o ke kaumaha, ame ka luuluu. O keia ka'u leo pule, ma ka inoa o ko kakou Haku o Iesu Kristo, Amene. Me oe pu hoi e Mr. Lunahooponopono ko'u aloha nui, no kou ahonui ana mai i ka'u puolo kumakena, ame na keiki limahei o kou papapa'i, ko'u welina hope. Owau iho no me ka luuluu, J. K. NAIHE, Na Keiki na Moopuna, ame ka Ohana. Waiapuka, Niulii, N. Kohala Oct. 6, 1922. CHICAGO, Oct. 22.—Elima haneri mau makai hou e paku'iia aku ana me ka puali makai o Kikako nei i keia pule, no ka hoao ana e kinai i na hewa karaima lehulehu. Me keia heluna hou e hiki aku ana ma kahi o 6100 ka huina nui o na maka'i maloko o keia kulanakauhale.