Ka Nupepa Kuokoa, Volume LXI, Number 44, 2 November 1922 — I MAU HAAWINA DALA KA KOOLAUPOKO NOI. [ARTICLE]

I MAU HAAWINA DALA KA KOOLAUPOKO NOI.

Ma ka halawai hope a ke Koolaupoko Improvement Club o ka noho ana ma ka hale hookolokolo o Kaneohe ua lehulehu na kumuhana waiwai no ka pono o ia apana i kamailio a i hooholoia. He halawai i akoakoa nui ae ai ko Kaneohe, Waikane, Punaluu, Kahaluu ame ko Kailua mau makaainana. Ua hooholoia ma ia halawai e noi ae i ka Papa o na Lunakiai no ka hoolako ana ae i alahele a i dala no ka halihali ana i na kahaka i ka manawa e paniia ana ke alanui Kamehameha. E noiia ae ana ka Meia e hookomo iloko o kana hoike e waiho ae ana i ka ahaolelo a noho mai no ke noi ana ae i kekahi haawina dala no ka pono wai o Kaneohe, Heeia, ame na aina hookuonoono o Halekou. Ua hooholo pu ia halawai e haawi i ekolu mahina hoomaha ia E. I. Kellett ke kakauolelo o ke kalapu e hele hoomaha ma Amerika no kekahi hana a no ka hoomaha ana. O ka ninau e pili ana i ka hoomaemae ana ma na hana alanui aupuni ma Kaneohe ame Heeia ua waihoia ae i ka Enekinia Orht o ke aupuni kulanakauhale. O ka mea wale no nae i loaa i ke kalapu mai ka enekinia aku he palapala e hoakaka ana i na huahelu no na hoolilo a ma ka manao o na lala o ke kalapu ua alo ka enekinia aole i hoakaka maopopo aku i kona manao. Ua hahana ka a ua hala he manawa loihi o ka paio ana o na hoa maluna o keia kumuhana. Ma na manao i hoakakaia he $1500 i hooliloia e ke keena oihana o ka enekinia i kela ame keia mahina maloko o ka apana o Koolaupoko a aneane he 85 pakeneka o keia huina i hooliloia no ka hoomaemae ana ma kapa alanui i ka hapa o ke alanui holopuni Kamehameha kahi no ka i pau mua i ka hanaia, a i kanuia ai e ka enekinia i ka mauu he makahiki i hala. Ua hookohu pu ia e ia halawai he komite o elua lala no ka hookipa ana aku i na moho i ka manawa e haiolelo ai lakou ma Waikane a ma Kaneohe, a e ninau mai keia mau komite ia mau moho e hoea aku ana no ka lakou mau mea e hana aku ana maloko o ka ahaolelo no ka pono o na makaainana e noho ana maloko o ia mau apana. O na inoa i koho ia maluna o keia komite oia ka Hope Makai Wally Davis ame Mrs. Rachel Achong a ua makaukau ka keia komite i na ninau no ka waiho ana mai imua o na moho e hoea aku ana ilaila.