Ka Nupepa Kuokoa, Volume LXI, Number 47, 23 November 1922 — KE KALAIWAA ANA AME KONA MAU ANO. [ARTICLE]

KE KALAIWAA ANA AME KONA MAU ANO.

(Kakauia e Z. P. K. Kawaikaumaiikamakaokaopua.) (Hoomauia mai.) Ua hiki aku nei kakou i ka hina ana o ka laau waa, a ua ihiia kona ili, i mea e ulii ai i ka hale, a o ka noho ana o ke kualiiwi, o ke ahi no ke kapa o mehana ai, a ua lawa kou noho ana i ka kuahiwi i kahi paa huluhulu hookahi. Ina aole ahi e a mau ai a ao ka po, he mea makehewa i kekahi mea kino ikaika ke olelo ae, ina owau he mea ole ia anu, ina aole alii. Oia ke loaa ana i ka ma'i huki, ame ka lolo ua wehewehe mua aku au mamua i ka ho-a ana o ke ahi, aole e pono i wahie maloo walo no, e pono i wahie maka pauku nunui, i ao ka po a po ka la, ahiki i kou hoi ana i kahakai. Ua hina ka laau ilalo a o ke oki aku koe i ka eulu, a ua kapaia ka welau o na laau waa apau he eulu Ina ua huli ka waha o ka laau ilalo e ulolohi ana a he hana nui no na ke kanaka hookahi e hana ai. Me ke kaula wale no e pono ai, aia ma kau wahi i ike ai, o ia kahi e huli iki ae ana ia oe, alaila, hele oe e oki i laau nui a loihi kupono, e hiki ai ia oe ke hapai. Alaila, nakinaki oe i ke poo o ka laau au e huki ai me ka laau waa; nakuku oe i ke kaula, ma ka welau o ka laau loilii, alaila, huki mai oe ma ke kaula au i hoopaa ai i ka laau loihi, ina he waa ia eha elima ka loa, he mea liilii loa ia i ke akamai, ike o ka poe kahuna kalaiwaa, I ke ano huli kapakahi ana o ka waa, e hana oe i kekahi lua poopoo ma ka waha o ka waa, alaila, wehe oe i kela laau a hookomo ma kela lua au i pao ai i ka laau, a hoomaka oe e huki, a me he mea la, aole i hanaia, a o ka liuli ae la no ia o ka waha iluna. A no keaha mai ke kumu o na hana nui e hiki ai i ke kanaka hookahi ke hana? Eia he mau akua kalaiwaa ko lakou, aole i nele kekahi kahuna kalaiwaa, i ke akua. I ka huli ana o ka waha o ka waa iluna, alaila, paukuku i ka laau waa mai mua mai a hala ihope, a i ole mai hope mai hele imua. I kou paukuku ana, e paukuku oe a loaa ka i'o ulaula, mai kahi niao a i kekahi niao, me kou malama loa i ke oki ana o moku loa auanei kekahi niao, a na ia niao e houuku i ka waa i ka wa e pahola aku ai i ka waha o ka waa. A ua kapaia kela paukuku, he momona, a he kea; a i ka pau ana i ka paukuku, e wawahi i kela paukuku me ke koilipi, mai mua a hope o ka waa. Alaila, pahola oe i ka waha me ke ko'iholu, e hooiliwai ana a pololei. O ka maikai o keia hana ana, o ka maikai no ia apau ka waa. Ua pau ae la i ka pahola ka waha, o ka auwaha koe ialoko. O ka hana ana iloko, e okioki huinakolu oe, mai kahi niao, a i kekahi niao, mai hope mai a mua. Aole okioki loloa i ka huinakolu, mahope pipili a ulolohi ka uhau ana a ke koilipi. Aka, o ka poo akamai, ua like keia mea he waa, me he mea paani lealea la na lakou. Aka, ia kaua ka mea akahi akahi, he hana nui maoli, ame ka hauhiliki o ke ko'u iloko o ka waa. Alaila, olelo mai la ke kaliuna kalaiwaa, penei e hana ai oe, aole no e hiki 0 loaa ia oe ka ike no ka mea, he akua kalaiwaa ko lakou la. Aole o lakou maka'u i ka ahua a naha ole paha; apau iki oloko o ka waa, alaila, hili owaho o na aoao i kela momona, a kea hoi apau ka hili ana i na aoao elua, alaila, iho iho la ke ko'i kukulu, a ilaila oe e ike ai i ka poe akamai i ke kau o ka pa-ka o ke ko 'i kukulu aole uuku a nunui kekahi pa-ka he like loa, a he nani oe ke nana aku. O ua waa nui nei eha a elima ka loa, ua lilo loa ae la ia i mea mama no ka ma, ua hiki i ka laau mama e hoohulihuli i kau wahi e makemake ai. A pau na aoao i ke ko'i kukulu, mai mua ahiki ihope, alaila, o ka hooliuli koe o ka waha ilalo, i pau ka iwikuamoo o ka waa a maikai a pololei owaho, alaila, huli hou iluna, i hoomaemae hou ia ai oloko. E kala mai ia'u, no ke kupunakane kualua o Panila Kamauoha, o Palikauoha ke kualua, a o Panila ke kupunakane kuakahi. (Aole i pau.)