Ka Nupepa Kuokoa, Volume LXI, Number 49, 7 December 1922 — Page 8

KA UKU MA KA HOOPONO I KA HANA.

Ma ka Poalima aku la i hala, i piha ai na makahiki he kanaha ia Mr. William Chung Hoon, Sr, o ka noho hana ana me ka halekuai o E. O Hall &. Son ; a i hoike no na manao mahalo a hilina: ma ka aoao o na haku hana ame na hoa limahana o kela halekuai : ua haawi ae lakou he uwaki gula me ke kaula gula he makana no ka piha ana o kela mau makahiki loihi o kona noho hana ana ma kela halekuai. Elike no me na limahana e ae, a ma na oihana hoi apau, ka hoomaka mailalo loa mai o ke anuu o ke alapii, pela ko Mr. William Chung Hoon, Sr, noho hana ana aku me ka halekuai o E. O. Hall &. Son, mai ke kulana haahaa mai, ahiki i kona lilo ana i poo no ke keena hoouna ukana o kela halekuai, a noho aku na kupakako e ae malalo aku ona, he kulana paakiki ia kakou na Hawaii, ke paa me ka hilinai piha ia e na haku hana Ma ka moolelo o ko Mr. Chung Hoon, Sr, lawelawe oihana ana maloko o kela halekuai, he kakaikahi loa na limahana i like aku me kona ano, mai na haole a na limahana o na lahui e ae o ia kona makaukau mau e hooko aku i ka makemake o ka poe apau e hoea aku ana maloko o kela halekuai. Aole ona nana i ka haahaa o kekahi mea, a i ke kiekie paha o kekahi, a i ole, ma ke ano paha o ka lahui, a hookaokoa ae oia i kana mea e hana aku ai no lakou apau, aka e eleu mau mai ana oia e halawai me ka poe e komo aku ana iloko o ka halekuai. me ka minoaka oluolu ma kona mau papalina ; o keia ano iloko o Mr. Chung Hoon, Sr, o ke ano ia nana i ume mai i na manao mahalo a makemake o kona mau haku hana iaia, ka mea i loaa ole i ka nui ame ka lehulehu o na limahana e ae. I kona hookiekieia ana ae, ma kekahi kulana i kaokoa mai kona mau hoa limahana ae, aole oia i ike i kona kau ana iluna, a hoao oia e hoololi ae i kona mau ano, a i ke ano paha o kana mau hana, koe wale no kona lawelawe ana i na hana apau o kona keena ma ke ano kuoo, a kanaka makua, me kela makee mau iloko ona, o kana mau mea apau e hana ana, no ka pono wale no ia o kona mau haku, a no ka holomua hoi o kela halekuai. O na hemahema e hanaia ana e ka poe malalo aku ona, aole oia i lawe mai ia mau hemahema, a hoolilo i mau mea ano nui, a hookau wale aku paha i na hoahewa ana maluna o ka mea i pili i'o i ka hewa, aka e hoao ana oia elike me ka hiki, e hoopau ae i ka hemahema i ikeia, me ka waiho ole aku ia mea imua o kona mau haku hana, no kona manaoio ina aole e hiki iaia ke hana i ka mea e pono ai ka hana Hemahema, i lawelaweia, alaila. ua makehewa kona paa ana i kekahi kulana, i hookauia mai ai na hilinai ana a kona mau haku hana maluna oha. Iloko nae o keia mau makahiki he kanaha, o kona noho hana ana maloko o kela halekuai, aole no i nele kona hoaoia e kona mau haku, no kona mau ano hoopono" Ua hoounaia oia ma na mokupuni lehulehu, no na hana pili i ka halekuai; ua waihoia aku kekahi mau hana ano nui nana e lawelawe mai ; iloko o ia mau hana hoao apau, ua hooko aku oia me ka pololei ; ua hookomoia aku oia iloko o ke ahi, a ua oili mai ke gula oiaio. Oiai nae, aole i maopopo i keia pepa, ka meahuna pili i ko Mr. Chung Hoon, Sr, kumu o ka lawelawe ana i kana mau hana apau me ka hoopono ; ke manaoio nei nae makou, o kona pili ana me kekahi ekalesia, kona paa ana i na kulana ko'iko'i a ano nui oloko o ia ekalesia, p ka pohaku paepae ia ana i ku ai, iloko o kana mau lawelawe hana ana apau iloko o kela mau makahiki loihi, ka mea nana i hoopakele ae iaia, mailoko mai o na hoowalewale, nana i alako aku i kekahi heluna nui o na kanaka Hawaii, ilalo o ka hoowahawahaia; a i kailiia ae ai hoi na kulana ko'iko'i mai ia lakou aku. He ehia poe kanaka Hawaii e noho hana mai nei malalo o na hale oihana nunui o keia kulanakauhale, i hapaiia ae a kau ma na kulana hilinaiia elike me Mr. Chung Hoon, Sr. ? Ke manao nei keia pepa aole hookahi! Ina paha he poe kekahi i noho hana no na makahiki i kokoke aku i ke kanaha, aole ia ma ke ano he poo no kekahi keena, e noho mana ana ma na hana apau aka ma ke ano limahana wale no, malalo o kekahi mea okoa aku, no ka hooko ana i kana mau kauoha apau. He mea na kakou na na Hawaii e haaheo ai, ka ike ana i kekahi o ko kakou hoa lahui elike me Mr. Chung Hoon, Sr., ka hilinai piha ia e kona mau haku hana. He mea liilii loa kela uwaki gula, i haawi makana ia aku iaia, ma ka Poalima nei o ka mea pookela loa, o ia no kela inoa maikai, ka mea hiki ole ke kuaiia me ke dala ame ke gula, a o ka mea hiki ole hoi ke loaa i kela ame keia kanaka, a i kela ame keia wahine. O ka maka'u i ke Akua, ka makee i ka inoa maikai ; o keia iho la no na mea ano nui e hiki ai i ke kanaka, ke lawelawe i Kana mau hana apau me ka hoopono, ke kumu e haawiia mai ai na manao mahalo a na haku hana ame na hoaloha iaia; o ka hookaokoa o ke kanaka iaia iho, mai ka pohai mai o ka poe hewa ame ka poe lalau o ke ano pauaka, pela wale no e hiki ai oia e lanakila ma kana mau hoao ana apau, e lilo i kanaka hilinaiia. E lawe mai kakou i ka moolelo o ko Mr. Chung Hoon, Sr., lawelawe oihana ana, i kumu hoohalike, a i kumu alakai no na Kanaka opio o keia mua aku, e hahai ai, me ke kanalua ole i keia pepa ke olelo ae, na ka hoopono auanei o ka lakou mau lawelawe hana ana, e hapai ae ia lakou mai na anuu haahaa mai. ahiki i ke kau ana ma na kulana kiekie, na kulana, i loaa mua ole ia kakou na Hawaii. Ma ka aoao o ke Kuokoa, ke haawi aku nei ia i na hoomaikai ana ia Mr. Chung Hoon, Sr, no ka hiki ana iaia ke paa i kona kulana maloko o kekahi hui oihana kahiko loa o keia Kuianakauhale, me ka hilinai nui ia ; a ke kalokalo ae nei keia pepa e hoomauia aku kou paa ana ia kulana, no kekahi mau makahiki loihi hou i koe.

E HOOMAU AKU I KA HANA MAIKAI E PONO Al.

Ma ka Poakolu o keia pule ae, e hoea mai ai i ka ohi ana o ka poe i komo iloko o ke Kalapu Hoahu Karisimaka, i kekahi mau huina dala mahuahua, elike me ka nui o ka lakou mau dala, i hoahu mau ai i kela ame keia pule, a hoea mai i ka pule hope o ka mahina aku la o Novemaba i hala. E hoounaia aku ana na kikoo dala banako, i ka poe apau i lilo i mau lala, no ke Kalapu Hoahu Karisimaka o keia makahiki e aneane aku nei e pau ; a ma ka pule elua o ka mahina o Ianuari o keia makahiki ae, e hoomaka hou ai ka hoahu ana, no ke Kalapu Hoahu Karisimaka o ka 1923. Aia he heluna nui o ka poe i komo iloko o ke kalapu hoahu o keia makahiki, e kauka'i aku nei, o ka loaa mai o kela mau dala alaila hoomaka aku ke kuai ana, i ka lakou mau mea i makemake ai, no keia mau la kulaia ano nui o kakou e hoea mai ana, o ia ke Karisimaka ame ka Makahiki Hou. No ke kaohi ana mai nae, i kekahi heluna nui o na Hawaii, mai ka hoolilo ana aku i ka lakou mau dala apau loa o ka hoahu ana no ko lakou mau makemake iho iloko o keia mau la, ua konoia mai makou, e uwalo aku elike me ka hiki, e hoao e hookoe i kekahi hapa o kela mau dala, no kekahi mau mea oi loa aku o ka pono, ma ka hoihoi ana aku a hoahu kaokoa, ma ke keena hoahu liilii o ka banako.

E loaa ana ma kahi o ka elua haneri me kanakolu dala i ka poe i hoahu ma ka elima dala o ka pule, he hookahi haneri me kanawalu a oi dala, i ka poe i hoahu he eha dala o ka pule, pela ke emi mai, o ka huina dala e loaa aku ana elike me ka huina i hoahuia i ka pule. Ina o ka hapalua o kela mau dala, e hookomo hou ia aku, ma ke keena hoahu liilii, a o ka hapalua, ke hoolilo no na makemake o keia mau la kulaia, e hoea mai ana i ka la e ikeia ai ka waiwai o kela mau dala i hoahu hou ia aku, ina aole ma ke kala ana ae i kekahi mau pilikia i maopopo mua ole, aka ma kekahi mau ano lehulehu e ae he nui. E ole keia Kalapu Hoahu Karisimaka, loaa ai he waihona no kekahi heluna nui o kakou na Hawaii, iloko o keia mahina hope o ka makahiki. O kakou kekahi lahui maa ole i ka hoahu dala, a i ka malama dala ma ke ano hoomakaulii ; aka nae ua ike maoli kekahi poe Hawaii, i na pomaikai o keia Kalapu Hoahu Karisimaka; a oiai he anuu mua wale no kela no ka noho ulakolako ana, ame ka nohona kuonoono ana, e komo aku kakou i ke anuu elua o ka hoahu ana ; he wahi hana ano paakiki no paha i kinohi, aka nae i ko kakou maa ana aku, e ike iho auanei kakou, aole loa i lalau keia mau a'o ana a ke Kuokoa, aka ua kokua nui aku ia, e lilo na Hawaii apau, i poe kuokoa o ka noho ana ma keia mua aku. Ua makaukau ka Banako o Bihopa ma, o ke keena hoahu liilii, e lawe aku i hookahi dala, a pii aku iluna, me ka uku ana i eha pakeneka puka o ke dala no ka makahiki; a nani loa hoi, ina maluna aku ka huina e hoahuia ana. He hookahi mea hemahema e ikeia nei iwaena o ka kakou noho ana, ko na kanaka Hawaii, o ia no ka noho hoopili wale, a noho hoolimalima aku malalo o na lahui e, me he poe malihini loa la kakou, maluna o ko kakou aina ponoi. E hoea mai ana nae i ka la e hoopauia ae ai keia noho hoopili wale ana aku malalo o ha'i, ina e laweia aku ana keia mau a'o ana a ke Kuokoa, o ia hoi, e waiho hou aku i kekahi mahele o na dala e hoounaia mai ana ma keia pule ae, a e lilo ia huina, i hoomaka ana, no ka hoomauia aku o ka hoahu ana, ahiki i ka wa e mahuahua kupono ai, no ke kuai ana i aina, a i home e noho ai. O keia ka hoahu pookela loa, ua loaa maoli he noho kuokoa ana i kekahi poe o kakou i keia la, ma keia ano iho la; oiai no nae mai ke Kalapu Hoahu Karisimaka mai no i hoomaka mai ai i kinohi, aka no ka poe hoomaopopo ole maoli no i ka waiwai o ia mea he dala, a he hoomakaulii ana, ke mau nei no ko lakou noho nele, elike no me kela manawa, mamua aku o ko lakou komo ana iloko o ke Kalapu Hoahu Karisimaka. Ke hoao mau nei ke Kuokoa, e alakai aku ia kakou na Hawaii, ma na alahele apau e hookaoka ae ai i keia lahui kanaka, mai na mea i ikeia iloko o na makahiki loihi aku nei i hala, me kela manaoio mau, o ke alahele wale no ia e loaa ai he nohona kuokoa i keia lahui ma keia mua aku, a e pau kela kauka'i wale ana aku, malalo o na kokua ana mai a na ohana ame na makamaka.

NA HANA KOKUA MANAWALEA.

Iloko o na la mua o keia pule, i hoea hou mai ai kakou i ka hoaoia ana o ko kakou mau ano, ina paha he poe kakou i makaukau e haawi aku i na kokua manawalea, no ko kakou poe iloko o ka pilikia ame ka ole? Ma ia hoaoia ana, i oili mai ai na hoike maopopo loa, aole kakou he poe nanamaka i ko kakou mau pilikia ponoi iho, aka elike me ka kakou i hana ai i na makahiki ae nei i hala, pela no i ikeia aku ai na hoailona o ke ohohia iloko o na la e hooikaika ana e loaa ka huina dala e lawa ai no ke kokua ana aku i kekahi mau hale, i makemakeia ai na kokua, no keia makahiki e nee nei. He like wale no ka huina dala uuku i haawiia, me na huina dala nunui, elike me ka nele ame ka ulakolako o ko kakou poe, ma keia hana kokua manawalea, ina ia i haawiia, me na manao oiaio, mailoko mai o ka puuwai. Aia i'o he poe pilikia, i kaa aku ko lakou malamaia ana maloko o kekahi mau home i hookaawaleia, pela na keiki makua ole, na wahine kane-make; no lakou i kauoha mai ai ka Palapala Hemolele ia kakou, i ko kakou kokua ana aku no ko lakou pono, ua kokua aku kakou, i ke keiki a ke Akua. He mea hauoli ka ike ana ma kekahi mau wahi, i ke kui'o maoli o ka haawi ana mai a kekahi poe i ka lakou mau kokua ma na kenikeni liilii loa, no ke kumu ua hoonele lakou ia lakou iho, mai ka hele ana e nana i na kiionioni, a e kuai paha i kekahi mau mea liilii; ua nana aku lakou i ka poe pilikia, no lakou na kokua i makemakeia mai ai. Ma na manawa i hoea mai ai na leo uwalo i Hawaii nei no ko kakou haawi ana aku i na kokua, i ka poe pilikia ma na aina mamao, aole kakou i hoohakalia iho, i ka haawi ana i kekahi heluna dala mahuahua, kokua manawalea, me ka minamina ole ; nolaila i ka hoi ponoi ana mai nei o keia leo uwalo ia kakou iho, no ko kakou poe pilikia, e haawi kakou i na kokua a oi ae imua o ka kakou i haawi aku ai i ka poe pilikia owaho

loa.

KA HANA HOOKUKU HIMENI.

O kekahi manao i ohohia nui ia iloko o keia mau la, i kamailioia ae e kekahi komite i kohoia, o ia no ka lilo o ka hana hookuku himeni, o ia kekahi o na hana, e malamaia aku ma ka la o ka Na'i Aupuni Kamehameha, iloko o ka mahina o Iune o keia makahiki ae e hoea mai ana. He hana ano hou keia, a he hana hoi e nele ole ai ke ohohia like o na mea apau, ke hoakoakoaia mai ko kakou mau puukani himeni no keia kulanakauhale. Ke kokua loa nei keia pepa i keia manao hookuku himeni, aole paha no ka manao e hookelakela i ka nani o ka leo, ame ka nani o ka himeni ana, aka no ka malama ana i ka inoa o na Hawaii, no ko lakou makaukau ame ka ike i ka himeni. Iloko o keia mau la e ikeia aku nei, ke nalowale loa aku nei ka loheia ana o na mele Hawaii maoli, na mele a na malihini kaahele honua, i ake mai ai e lohe, o na himeni hoololiloliia, mai ka leo a ka huaolelo, o na himeni iho la ia e meleia nei e ko kakou poe opio, me ke ku ole i ka hoihoi ke hoolohe aku. I ka malama ana aku nae i keia hana hookuku himeni, o kekahi mea e ohohia nui ia ai keia ano hana, a e nui mai ai no hoi ka poe komo iloko o kela hookuku ana, he mea pono e haawiia kekahi makana, he mea keia e hooikaika ai kela ame keia papa himeni, e nani ka lakou mele ana mai, a aole hoi e hoohaalulu i ka leo i ka wa e himeni ai.

Ma keia Poaono ae ka paina luau nui a na Demokarata, no ka lanakila i loaa ia William P. Jarrett, i elele lahui i Wakinekona. Aohe hewa o ka hele ae o ka lehulehu ma kela ahaaina, ne ka nana ole ma na aoao, no ka mea pela iho Ia i loaa ai ka heluna baloka kiekie ia Mr. Jarrett, aole ma kekahi ano e ae.

He elua mau la kulaia i koe, oili aku kakou mao o ka maka-

hiki hou. E hoao kakou e akahele ma ka kakou mau hana apau e lawelawe ai iloko o keia mau la, i maopopo ai, o kakou kekahi e hoea aku ana iloko o na hauoli ana no ka makahiki hou.

Nuhou Kuloko

He hoopii no ka aie i hooiaioia ae ka i hookomoia ae i ka aha kaapuni e C. S. Yuen e koi ana ia C. G. Bockus ma ka Poakahi nei.

Eia no ke noho hamau loa mai nei ka mea a ka Elele W. P. Jarrett e koho mai ana, i kakauolelo nana i ka ahaolelo lahui ma Wakinekona.

I Maui na luna nui o ka Ahahui Kamehameha no ke kukulu ana i ka Ahahui lala Kahekili, ka ha o na lala a ia ahahui ma ka pule aku la i hala.

Ua hoakaka ae ka Elele W. P. Jarrett i kona manao, iloko o ka mahina o Feberuari e haalele iho ai oia ia Hawaii nei, ma kona alahele i ka ahaolelo lahui.

E malamaia ana he hoike a na C. E. o na Kona ma Waianae ma keia Sabati iho, Dek. 10, a a malama pu ia ana he hoike Kula Sabati ma ia manawa hookahi.

He kaaahi kuikawa ke holo ana no Waianae ma keia Sabati iho no ka lawe ana i na lala C . E. ke loaa nae he kanaka a oi aku poe e hele ana.

Oiai ke hookokoke mau mai nei na la kulaia, e hoea mai ana he hui keaka lio hou, no ka Paka Aloha, kahi e piha mau ia nei e ka lehulehu i na la apau.

He lono lauahea ka i holopuni ae he umi-kumamalua mau koa i holo mahuka aku maluna o ka mokuahi Ida e holo aua no ka Hikina Loa ma ka po Poakahi nei.

He $104,348.82 ka loaa a na komite no na hana kokua ma ka Poakahi nei, ka la mua loa i noiia aku ai ka lehulehu e haawi mai i ka lakou mau kokua manawale'a.

Elike me na mea i hoolala mua ia, o keia Poaono iho ka la e malamaia ai o ka ahaaina luau nui a na Demokarata, no ka lanakila i loaa i ka moho Elele Lahui Demokarata.

Ma ke ano ulia i a ia ae ai he eono eka o ka mahiko o Ewa e ke ahi, ma ke Sabati aku nei i hala, a no ka hoopakele ana i kela ko i hoomaka koke ai ka wili ana, ma ka Poakahi iho nei.

Eia i Hawaii nei i keia mau la o Fred Butler ame Mrs. Butler malalo o na alakai ana a ka Papa Hawaii no ka lawelawe ana i na hana ha'i euanelio, a ke hana mai nei laua i keia manawa ma Oahu nei.

Ma ka Poaono aku nei i holo aku ai he eha lala o ke komisina limahana no ka Mokupuni o Hawaii, ma ka lakou misiona noii a ninaninau pono i ka pokole o na limahana o na mahiko.

No ke a'o ana i ka ulana moena, ka haku leihulu, ke ka upena ame kekahi mau hana akamai e ae a na Hawaii, i wehe ae ai o Fred Malulani Beckley Kahea he papa kula nana, maloko o ka halekoa, e hoomaka ana ma ka hora ehiku o keia po Poaha.

Mahope o ke, kaawale ana no na makahiki he umi-kumamalua i huli hoi hou mai ai o Kauka John Atcherley no keia kulanakauhale, kahi a kona ohana e hoohala nei i ko lakou manawa, me ke kakali aku o kona huli hoi mai imua o ko lakou alo.

O kekahi o na hana i hoolalaia no ka malamaia aku, ma ka La o Kamehameha, o ia no ka malama ana he hookuku himeni: Ua manaoia, ma ka himeni e ike ia ai kekahi hana kilakila loa i kaulana ai keia lahui kanaka, i ka maikai o ko lakou leo himeni.

Ma ke kakahiaka o ke Sabati iho nei i huli hoi mai ai ka Elele W. P. Jarrett mai kana huakai aku nei no Hawaii ame Maui, a ma ka Poakahi nei i holo aku ai oia no Kauai, e loea hou mai ai no keia kulanakauhale ma ke kakahiaka o keia Poaono iho.

Nuhou Kuwaho

WAKINEKONA, Dec. 4.— Ua hiki ole i ka ahaolelo kuikawa ke hooiaio i ka hookohu ana aku ia Lunakanawai Alexander Lindsay Jr., i kokua Lunakanawai no ka Aha Kiekie o Hawaii, ua hoopaneeia a ke kau mau. .

WAKINEKONA, Dec. 4.— Ua waiho ae na enekinia o ka oihana kaua i ka lakou hoike i aponoia i ka ahaolelo no na hoolilo iloko o keia makahiki ae no na muliwai, na awapae ame na alawai e ae he $71,515,-410, komo pu no ke awa o Honolulu $150,000, no ke awapae o Hilo $374,-000 a no Nawiliwili $300,000.

CORK Dec. 4.— Ua hoohanaia aku na mokuea i keia la no ka mauawa mua loa ma ka lele ana aku e ku-e i na koa pualu kipi Ailiki. He kanaono o ia mau koa pualu kipi e pee ana maloko o na nahelehele ma kahi kokoke i Drimoleague i make i na poka pahu mai ka lewa iho a ua manaoia ua make lakou apau loa.

SEATTLE, Dec. 4. — Ua haawi makanaia aku i keia la i ke Kapena F. H. Pearson o ka moku West Ivan, i ka manawa a ia. moku i hoopakele ai i ke kolu o ka moku Fukui Maru i piholo ai i ka moana iloko o ka 1821, he kiaha dala e ka hui mokuahi Uchida.

NU IOKA, Dec. 4.— Ehiku mau kanaka, komo pu me elua mau makai hookapu waiona i hoopai paahaoia i keia la, elua makahiki e noho ai i ka halepaahao federala. Ua ahewaia lakou no ke pani ana 160 barela ginger ale ma kahi o ka rama waiseke.

BELGRADE, Dec. 4.— Ua haalele ke kuhina nui Pachit o ka lahui Jugo Slav me kona aha kuhina i ko lakou mau kulana hana. Ua aponoia e ka Moi Peter ka lakou waiho ana mai i ka hana a ua noi aku nae e hoomau aku lakou i ka hana ana ahiki i ka loaa ana o ka aha kuhina hou.

WAKINEKONA, Dec, 4.— Ua hoikeia ae mai ka Hale Keokeo ae i keia la e haalele iho ana ka Peresidena ame Mrs. Harding ia Wakinekona nei no ka hele ana aku e hoomaha mahope iho o ka hoopanee ana o ka ahaolelo i keia makahiki ae.

NA MARE.

Herbert F. Brown ia Mary Kaukahi Pa, Nov . 29. Jos . Geo. Ahina ia Hattie K. Holt, Nov . 30. Charles E. Hogue ia Sybil M. Do-minis, Dec. 1. Charles M. Peters ia Mollie M. Kakana, Dec. 2. Roy J . Bonner ia Ellen Kanei, Dec. 2.

NA HANAU. Na Mr. ame Mrs. D. K. Kaolulo, he kaikamahine, Nov. 30. Na Robert Leslie ame Helen Perkins, he keikikane, Nov . 21. Na Wm. E. Coyle ame Nancy Tolbert he keikikane, Nov. 26. Na John Kekoanui ame Alice Alohikea, he keikikane, Dec 2. Na Mr. ame Mrs. Kaholi, he kaikamahine, Dec. 5. . Na Mr. ame Mrs. J. Haleau, he kaikamahine, Nov. 25.

NA MAKE.

Jane M. K. Beckley, ma ke alanui 15, Kaimuki, Nov. 28. R. W. Aylett, ma ke alanui Wood-lawn, Nov 29. P. Waiwaiole, ma ke alanui Wood-lawn, Nov. 29. Sam Kamokuiki, ma ke awawa o Makiki, Nov. 29. Kekuaokalani K. Frasker ma Mokauea, Nov. 30. James Helela, ma ka halema'i Pupule, Nov. 30. Kanui, K. Meyer ma ka Home Leahi, Dec. 1. John Ahuna Hoapili Jr . ma Kauikeolani, Dec. 2. Ellen K. Stone, ma Kapunahou, Dec. 2. Edward Cummings ma ka Home Leahi, Dec. 2.