Ka Nupepa Kuokoa, Volume LXI, Number 49, 7 December 1922 — LILO O LANAI I KA HAWAIIAN PINEAPPLE COMPANY [ARTICLE]

LILO O LANAI I KA HAWAIIAN PINEAPPLE COMPANY

Ma ka Poalua iho nei ka holopono ana o ke kuai a ka Hawaiian Pineapple Company i na aina, na holoholona ame na lako apau a Farnk F. Baldwin ame Harry A. Baldwin maluna o ka Mokupuni o Lanai. Mahope iho o ka hookaaia ana ae o ke kumukuai i aelikeia o $1,100,000, ua aponoia ka waiho ana ae o na luna nui kahiko ame na lala o ka papa alakai o ka Lanai Co., Ltd., i ko lakou mau kulana pakahi. Ua lilo aku na kuleana apau o ka hui Lanai i ka Hawaiian Pineapple Company, a ua koho liou ia he mau luna nui hou no ia hui, o ia keia: James D. Dole, peresidena; Kenneth B. Barnes, kakauolelo,- R. S. West, puuku. Ua onaia e ka Lanai Co., Ltd., ka mokupuni holookoa o Lanai a koe he 1000 eka, he mau apana kuleana, pau pu me na holoholona, bipi, hipa, na hale ame na lako e ae o ia aina hanai holoholona. E hooHiau aku ana ka hui hou i ka hana hanai holoholona ana, aka ma ka mea maopopo loa, e hoomaka aku ana ia e kanu i ka halakahiki ma kahi o 20,000 eka i kohoia, ke hiki aku i ka wa pono. O ka hana mua a ka Hawaiian Pineapple Company i hoolala ai o ia ka mahi ana maluna o na aina i lilo iaia ma Waialua i keia makahiki me ka waiho aku i na aina ma Lanai ahiki i ka manawa pono e ikeia ana no ka mahi ana aku ia aina. O kana hana mua mamua o ka hoomaka ana aku e mahi i ka halakahiki o ia ka hana ana i ke awapae, na alanui ame na hale no na limahana, a ina pela ana, aia no ke komo ae o na halakahiki mai ia mokupuni mai iloko o ka makeke i ka 1927.