Ka Nupepa Kuokoa, Volume LXI, Number 49, 7 December 1922 — MAKEMAKEIA NA KAO APAU MA HAWAII E LUKUIA. [ARTICLE]

MAKEMAKEIA NA KAO APAU MA HAWAII E LUKUIA.

No ka makemake ana e lukuia ana na kao ahiu apau maluna o ka Mokupuni o Hawaii e noiia'ae ana kekahi haawina dala nui i $80,000 i ka ahaolelo kuloko a noho mai elike me ia i hoikeia ae. Ua manaoia ua nui a lawa loa keia huina dala no ka luku holookoa ana i na kao apau ina nae e loaa a e komo pu ae ana kekahi poe koa e kokua ia hana. Ma ke kau mehana aku la i hala aneane ma kahi o ka 7,000 mau kao i lukuia e na kanaka makua ame na kanaka opio, eia nae, o ka hapa hea la ia o ka mano o na kao e holo mai la ma na kualono ame na kuahiwi o Hawaii, he nui hou aku koe e hele laula mai la me ka hoopoino i na laau ame na launahele ma na kuahiwi, a ke hoopoino pu mai la hoi lakou i na kumulaau hoolulu ua e loaa nui ai ka wai a e pono ai na mea ulu. Aole o ka mokupuni wale no o Hawaii kahi i laha nui ai na kao ma na mokupuni no apau, aole no hoi o ke kao wale no ka mea hoomake i na kumulaau opiopio i na dia ahiu no kekahi e holo mai la ma Molokai. E lukuia na holoholona hoopoino laau apau e pono ai, ina he make laau.