Ka Nupepa Kuokoa, Volume LXI, Number 52, 28 December 1922 — HAINA NANE. [ARTICLE]

HAINA NANE.

Aia la, aia la, ke kau mai la ke ao makani, He Olauniu ko Kahaloa, He Waiomao ko Palolo, He Kuehulepo ko Kahu'a He Kukalahale ko Honolulu, He Ao-a-oa ko Mamala, He Olauniu ko Kapalama, He Haupeepee ko Kalihi, He Ho'e'o ko Moanalua, He Moae-ku ko Ewaloa, He Kehau ko Waiopua He Waikoloa ko Lihue, He Manuunuu ko Puuloa, Kaiaulu ko Waianae, He Ko piliehu ko Olopua, Hulilua na makani o Kaena, No Waialua ka makani ke pa mai, He nihi mai ma ka lae o Kaena, He Puukaala iho ma Kaala, He Kehau ko ka po, He kiu ka makani makai mai, He Malualua iho ma Nae, E Mr. Lunahooponopono o ka Nupepa Kuokoa; Aloha a nui:--E oluolu oe ina he wahi kaawale kekahi o na kolamu, no'u ia wahi. Ua ike iho la au i ka nane a J. W. K. Kakelamaluikaleo. Ea, ua ike no hoi oe ua pipii na meaai, eia ka i kenikeni no ka uku la hana alanui. O i huhu wale ai no ka Hui Uniona o Amerika i ke kiiia o na Pake Ki-niki-u o Kina i umi-kumamalima keneka o ka la hana. Aohe paha he poe e huli mai ana i keia nane; no ka mea, wahi a ka Pake Kini-ki-u, pikinini; a no ka manao hoi o keia Pake he nane paakiki paha keia e pane ole ia nei, a nolaila eia iho ka haina ame ua wehewehe ana a ke keiki o ka Pali Kapu o Keoua malalo iho. I ala ae auanei oe i ke kakahiaka nui Poaha, e pi'o ana ke anuenue mamua pono o ka puka o ko hale hoomanao iho oe, he kapuai akua ia mai ka Pali Kapu aku nei kona mau wawae o ke ku ana. Mahele 1. O kuu mua, ua ike a kamaaina no oukou, a ua noho pu no au me oukou a lilo au i kauwa na oukou, e hooko ana hoi i ka makemake o ke kanaka. Owai au ia oe? Haina. Ka-ke. O ke Ka-ke no hoi keia iluna o na moku, a iuka nei no hoi o ka aina e huki ana i na ukana. Mahele 2. Kuu hope, ua ike a ua kamaaina no oukou, eia au la, he aiwaiwa noluna, aohe kiamanu e hei ai. Owai la hoi au ia oukou? Haina. La. O ka la no keia oluna, aohe kanaka e hiki aku i kahi o ka la. Ina i huiia kuu mua me kuu hope, alaila, e ike ae ana no oukou ia'u e hooipoipo ana ke aloha me ka pela ahamaka kahulihuli. Owai ka pela ahamaka kahulihuli ma ka olelo Hawai Kumu? Haina. Kakela. Owai kuu inoa piha ma ka olelo Hawaii kumu i ka ke ao holookoa olelo ana? Haina. Kakelamaluikaleo. Pehea aohe pii o ka okakala i ou kumupepeiao

Me na keiki hoonohohua o ka papapa'i kuu aloha nui me ka Lunahooponopono. Z. P. K. KAWAIKAUMAIIKAMAKAOKAOPUA. Keiki o ka makakila niho Elapani. pani. Aole e pii ka manene i na kumupepeiao o ke keiki o Uwahipouli he hoomaneoneo kau hana, hao mai no ke pa'i a mahanahana, iliki hou ia mai!--L.H.