Ka Nupepa Kuokoa, Volume LXI, Number 52, 28 December 1922 — HAUOLI MAKAHIKI HOU KAKOU! [ARTICLE]

HAUOLI MAKAHIKI HOU KAKOU!

(Jiai o keia ka helu hope loa oka Nupepa Kuokoa, e puka aku ai i keia makahiki, a komo aku kakou iloko o ka makahiki hou. ma keia Poakahi ae, ke haawi e aku nei ia, i kona aloha makahiki hou, imua o na kaukani o kona poe heluhelu. Aloha Makahiki Hou kakou apau! Ma ko kakou ola ana, me he mea la, o ka la mua o ka makahiki, a i ike mau ia hoi ma kekahi inoa, ka La Makahiki Hou, o kekahi ia ona la ano nui loa; i ka loaa ana o kela la ia kakou, e hoopihaia ana ko kakou mau manao, me ka hauoli, no ka hooloihiia ana mai o ko kakou ola ana ahiki i ka hala ana aku 0 ka makahiki kahiko, a oili mai hoi ka la mua o ka makahiki hou. Aia he mau kumu lehulehu ma ko kakou aoao, ko na makaainana o Hawaii nei e hauoli ai ma keia la, no ka mea i ka huli ana aku ihope, i ka la mua o ka nee ana mai o ka makahiki 1022, e pau ana ma ka po o keia Sabati iho. ua komo aku kakou iloko o ia makahiki me na haawina pookela o na pomaikai, i loaa mai ia kakou. mamuli o ka lokomaikai o ke Akua, ka Mea nona mai na pono ame na pomaikai o ko kakou noho honua ' ana. Me ia mau haawina pookela loa, i nee mai ai ko kakou ola ana? ahiki i keia la, a i oi ae no paha, i ko ka makahiki aku nei 1 hala; i ka loaa ana ia kakou o ka makahiki hou, e hoopiha ia kakou iho me na mea apau e hoohauoliia ai ka manao; he hauoli, o ke ano hoonani, a hoalohaloha aku i ko kakou | Makua ma ka lani. j Ia kakou i ike ai, maloko o na nuhou kelekalapa, i kela ame keia manawa, no na poino, na popilikia ame na auwe ana a kekahi mau lahui kanaka o ka honua nei, e ku mau ana kakou maluna o ko kakou aina iho, me ke kaawale o ia mau haawina mai ia kakou aku. Aole ka ma'i ahulau me kakou, aole ka wi, ke kaua, ame na hana e ae e hookaumahaia ai ka manao o ka lahui kanaka, aka o ka maluhia, ame ka oluolu o ka noho ana, 0 ka lako ame na pomaikai, na haawina pookela i loaa ia kakou, iloko o keia makahiki holookoa. No keia mau haawina la, a no na mea no apau i loaa ia kakou, ka mea i loaa ole i na lahui e ae o ka honua nei, aia i'o he mau kumu kupono loa, no kakou e komo ai me na manao hoomaikai, iloko o na hauoli ana, no ka makahiki hou e hoea mai ana. I ko kakou hoikeike ana nae i ko kakou mau manao hauoli no ka makahiki hou, e hoike ae kakou ia mau mea, ma ke ano ku i ka naauao, e ukali ole mai ai he mihi ana mahope aku. He mea maa ia kakou ka lahui Hawaii, ka malama ana i mau paina hoohauoli ma ka la makahiki hou; o kei akekahi o na hana maikai, a kupono no hoi i hoomaaia ia kakou, ina nae 1 malamaia ia mau paina, me kela manao hauoli, no ka hooloihi ana mai o ke Akua i ko kakou mau ola, ame ka hoopomaikai ana mai ia kakou me na mea apau e pono ai ko kakou noho ana: aole hoi he mau paina, i hoalaia ae no na lealea o keia kino, me ka lilo o ka waiona, oia kekahi o na mea e kokua mai ia mau lealea. L"a kamaaina kakou i na paina o kela ano, mailoko mai o ka hauoli ame ka lealea ana, e oili mai ai he mau hakaka ana, he mau hana karaima, ame na poino he nui; o na paina i hanaia me kela manao iloko o ka poe na lakou ka paina, malalo o ke koloka. he paina makahiki hou, aole he pololei, a ua makehewa ka hana ana ia mau paina, ua ahona ka noho malie ana, me ke komo ole aku iloko o na hoomakaukau ana, no kekahi hana e hookomo aku ana iloko o ka pilikia. E hoao kakou elike me ka hiki, e kaohi mai ia kakou, mai ke komo ana aku iloko o na hoohauoli ana, a hu wale aku mawaho o na palena kupono; he hauoli o ka hoomaikai ame ka hoalohaloha i ke Akua, no ka loaa ana ia kakou, o ka la mua o ka makahiki; e nonoi ana i Kona lokomaikai, e kiai a malama mai ia kakou me Kona aloha, ahiki i ka loaa ana ia kakou, o ia makahiki hou aku. E loaa ia kakou ka hoomaopopo ana, aole ma kekahi ano e ae, i hoea mai ai kakou iloko o keia mau la hope o keia makahiki; aka no ka lokomaikai wale mai no o ke Akua; a i wahi e mau aku ai ia aloha maluna o kakou, ua ili mai ke ko'iko'i ma ko kakou aoao, ka hana aku i na mea apau, e kau ole mai ai na poino ame na popilikia maluna o kakou ame ko kakou mau ohana. Me na kalokalo ana no ko kakou komo i'o aku iloko o na hauoli ana no ka makahiki hou, ke haawi hou aku nei ke Kuokoa i kona aloha makahiki hou: Aloha Makahiki Hou kakou apau!