Ka Nupepa Kuokoa, Volume LXI, Number 52, 28 December 1922 — E LILO I MAU LALA NO KE KALAPU KARISIMAKA [ARTICLE]

E LILO I MAU LALA NO KE KALAPU KARISIMAKA

E hoomaka ana ma ka Poakahi, ka Ja 8 o ka mahina ae nei o lanuari, e wehe hou ia ai ke Kalapu Hoahu Karisimaka, o ka hanako o Bihopa ma, nolaila ke kono ikaika nei keia pepa i na Hawaii, e lilo i mau lala no kela kalapu, ma ka hoahu aria i kekahi mau dala kupono maloko olaila. Ua lilo keia kalapu hoahu Karisimaka i kukuluia ae e kela hanako, i mea kokua nui aku i kekahi heluna nui o na ohana lehulehu maloko nei o keia kulanakauhale, no ka mea iloko 0 na la mamua aku o ke aku la i hala, e ikeia ana na makuahine Hawaii, e kuai ana i mau lako no ko lakou mau ohana, me na makana na na kamalii, ka mea hiki ole i kekahi mau makuahine, i na makahiki aku nei i hala, ke hana pela, no ka loaa ole o ke daJa e kuai ai ia mau mea. Aole he hana paakiki ka hookaawale ana i kekahi mau dala liilii loa, o na nkuhana o na kane, i kela ame keia pule, no ka hoahu ana iloko o kela kalapu, ina e makee i'o na Hawaii, e loaa kekahi waihona no lakou, ke hoea mai i ka pau ana o ka makahiki, o ka mea nui wale no, o ia ka hoao ana e kaohi mai 1 ka lu wale ana i ka nui o ka lakou mau dala o ka pule, no kekahi mau hana e hoopomaikai ole mai ana ia lakou, amē ko lakou mau ohana. Aia i'o no he nui o na hoolilo o ka noho ana, ma keia kulanakauhale, ua lawa no nae, na ukuhana e loaa nei i ka hapanui o na Hawaii o ka pule, e hiki ai ke kiolaia he mau dala iloko o keia kalapu hoahu Karisimaka, me ka hoopilikia ole mai i na ohana lehulehu, me kekahi mau mea e pono ai ko lakou ola ana. Nolaila i ka wehe hou ana aku i keia kalapu hoahu, no ka 1923, e hoao kakou e na Hawaii, e lilo o kakou ka hapanui, o na lala iloko o kela kalapu.