Ka Nupepa Kuokoa, Volume LXII, Number 1, 4 January 1923 — KE KALAPU HOAHU KARISIMAKA O KA 1923 [ARTICLE]

KE KALAPU HOAHU KARISIMAKA O KA 1923

E hoomaka ana ma keia Poakahi ae, ka la 8 o ka mahina o lanuari nei, e wehe hou ia ana ke Kalapu Hoahu Karisimaka, | o ka Banako o Bihopa ma; nolaila a hoea mai ia manawa, he mea pono i na Hawaii ke komo nui i mau lala no keia kalapu, no ka mea pela wale no e hiki ai e loaa kekahi waihona dala mahuahua. no ke kokua ana mai i na ohana iloko o na la kulaia e laa ke Karisimaka ame ka Makahiki Hou. He hookahi kumu o ka hoohauoli o na kanaka ia lakou iho. iloko o keia mau la kulaia i hala aku nei, o ia no ko lakou iako ana me ke dala, he dala hoi i loaa mai, mamuli o ka lilo ana he mau lala no keia Kalapu Hoahu Karisimaka; ina aole i komo iloko o kela kalapu, ua maopopo loa, aole he mau hoohaueli ana, aole he kuai ana, i mau lako no ka noho ohana ana; o ka poe i komo mau i mau lala no keia kalapu, ua ike maoli lakou i ka pomaikai o ka hana hoahu, me ia ike i ka pomaikai, aole ana no e nele ko lakou lilo i poe hikimua, ma ka lilo ana i mau lala ma keia wehe hou ana i ke Kalapu Hoahu Karisimaka. Aia he heluna nui o ka poe i hoahu i ka lakou mau dala iloko o keia kalapu i hoolilo i ka lakou mau dala apau loa, no na hoohauoli ana o ke Karisimaka ame ka Makahiki Hou; no ke kuai ana i ka lakou mau mea apau i makemake ai; me ka noonoo ole, e hookoe aku i kekahi mau dala mahuahua, no na la ino, no na pilikia i maopopo ole, a mau hemahema e ae paha o ka noho ohana ana, o ka poe o kakou i komo iloko o keia manele, aole iakou e oleloia he poe naauao. 0 ka poe naauao, o lakou ka poe i hoolilo i kekahi mahele o na da!a i hoahuia iloko o kela kalapu, no na hauoli ana, kuai paha i ko lakou mau mea hemahema, a hookoe i kekahi mahele o ia mau dala, ma ka hookomo hou ana aku iloko o na hanako, kahi maluhia, a i kela ame keia manawa e hoea mai ai o na pilikia kupilikii, e laa paha ka ma'i iloko o ka ohana, a i ole make paha iloko o ka ohana, ua maopopo loa kahi e kikoo aku ai no ke kala ana ae i kela pilikia, a no kekahi mau hemahema a mau hana e ae paha i kuluma i ko kakou noho ohana ana. He anuu mua wale no ka hoahu ana iloko o ke Kalapu Hoahu Karisimaka, no ka hoomaa ana ia kakou i ka hana hoahu dala. Ina ua hiki ina kanaka ke hoahu mau i kela ame keia pule, i kekahi mau dala uuku, me ka hiki ia lakou ke hoomanawanui, ma ka waiho malie ana, me ka unuhi ole ahiki i ka mahina hope o ka makahiki, alaila aole ke Kuokoa nei i ike, i kekahi mau kumu, e hiki ole ai ia kakou, ke wehe kaokoa i mau buke banako, ma kekahi mau mahele e ae o ka hoahu dala ana. 1 ko kakou lanakila ana ma ke anuu mua, aole loa he kanalua ana, no ka ukali pu aku o ia haawina hookahi, ma kekahi mau ano hoahu daīa e ae; o ka mea nui wale no, o ia ka hiki ia kakou ke uumi me ka hoomanawanui i na makemake o ke kino. e hiki auanei ka hana hoahu dala, e lilo ai kakou na kanaka Hawaūi, i poe lako a kuokoa o ka noho ana, a e pau hoi ko kakou ikeia ana mai he lahui nele a pilikia maoli.