Ka Nupepa Kuokoa, Volume LXII, Number 2, 11 January 1923 — 379 KA HUINA O NA PAAMARE I OKIIA I KA 1922 I HALA. [ARTICLE]

379 KA HUINA O NA PAAMARE I OKIIA I KA 1922 I HALA.

He 379 ka nui o na paamare maloko o Honolulu i aponoia ka hookaawale ana o ka wahine mai ke kane mai, a o ke kane hoi mai ka wahine mai, no na kumuhoopii like ole, ka malama ole i ke ola, ka haalele wahi moe, ka pepehi hoomainoino ame ka moekolohe, i ka 1922, i hala aku la, a ma ka manao o ka Lunakanawai John R. Desha, o ka hoike ana ae he heluna emi loa keia ke hookukuia ae me ka heluna nui o na kanaka o na lahui like ole e noho nei maloko o keia kulanakauhale.

Wahi ana o ka hoike ana ae, {< aneane he 90,000 ka heluna nui o na kanaka e noho nei maloko o Honolulu, a ua emi iho malalo o ka hapalua o hookahi pakeneka ka heluna i hookomo ae i na hoopii okimare a i aponoia. Wahi hou ana, ma kona manao e emi loa mai ana ka heluna 0 na hoopii okimare ina e kauia ana 1 mau kanawai oi aku o ke kakauha mamua o na kanawai okimare e ku nei i nei manawa. O ka ahaolelo a noho mai ka mea kupono nana e noonoo mai i keia, ma ka manao o ka Lunakanawai Desha.

Ma kona manao ina e hooloihiia aku ana ka manawa o ka haalele ana ame ka manawa o ka malama ole ana i ke ola aole e lehulehu loa ana na hihia okimare, elike me ia i ikeia i ka makahiki i hala aku la, no ka mea ma na kanawai e ku nei i keia manawa he maalahi ]oa ka hana e hiki ai e loaa ka hookaawaleia o na mea i mareia maloko o ke Teritore o Hawaii.

Iloko o na paamare 379, i hoikeia ae la o na ili keokeo, komo pu me na Pukiki ka oi aku o ka nui, he 150; ona Kepani malalo aku 119. No na Hawaii piha ame na hapa-Hawaii, he 90; na Pilipino he 35; na Pake, he 30, Korea, he 10; Pukiki, he 5. No na Kepani makaainana Amerika, elua wale no mau paamare i noi ae no ka hookaawaleia; hookahi paamare Pake lahui e, a hookahi paamare Paele. lloko o ka makahiki holookoa elua mau paamare i hookaawaleia ma ke kanawai me ka hoopii oki ole mamuli o ka aelike ana o na aoao elua e hookaawale. He kanaono mau hoopii okimare i paioia a i hookaawaleia. He iwakalua mau hihia i hooponoponoia mawaho ahiki i ka hoolauleaia ana o na mea kuee, a ke noho mai nei ka ia mau paamare me ka maikai. O keia ka ka hana a kekahi mau lunakanawai o na aha okimare maloko o kekahi o na kulanakauhale nui o Amerika e hana mau mai la o ka hoolaulea mua i na mea mokuahana ahiki i ka hoopau ana o ke kane a i ole o ka wahine i ka hoopii i ka manawa e hookomoia aku ai o kekahi hoopii okimare.