Ka Nupepa Kuokoa, Volume LXII, Number 2, 11 January 1923 — PAKELE MAI KE OLA O KEKAHI MAU PAKE. [ARTICLE]

PAKELE MAI KE OLA O KEKAHI MAU PAKE.

Pakele ke ola me ka akelekele loa no nae o K. Y. Yong, kekahi o na Pake lele mokuea o Honolulu nei, nona ka mokuea i ike mau ia aku ai ka lele hookikakaha ae ma ka lewa ma kela mau la aku nei, maluna ae o ka apana o Kaimuki, Kapahulu ame Waikiki, mai haalele i ka la i ka mea mahana, ma ka auwina la Sabati nei, ma ka manawa ana i ike ai i ka poino o kekahi wahi o ka enekini a koiia aku oia e kuu iho ilalo ma kahi o ke kahua ana o ka hoomaka ana ae e lele, aka nae iaia i manao ai e kuu iho ana ka mokuea ma ia wahi ua haule iho la ka mokuea ma kahi aole i mamao loa mai ke kahawai mai a hakihaki na eheu i ka manawa i haule iho ai i ka honua; o ka mokuea ka i poino pakele ke ola o Yong ame kekahi ohua, he Pake, no he mau manuheu liilii wale no ko laua. Ma ka hoakaka a ka poe e ku aku ana nana i ka lele opeapea a ka mokuea a Yong e pailaka ana a e lele kaapuni ana ia maluna ae o Kaimuki, a he hiohiona kona e ikeia aku ana me ka maopopo loa ua halawai ia me kekahi pilikia o ka enekini o ka mokuea, ua hooikaika mau o Yong e pailaka a e kaa hoi malalo o kona mana ka mokuea ahiki i ke kuu ana ilalo aneane no ma kahi ana o ka hoomaka ana ae e lele, he wahi kokoke loa aku i ke kahawai ma ke kae o ke kahua o ka fea a ke teritore ma Kapahulu. He haumana o Yong i puka pono mai ke kula a'o lele mokuea mai ma Sana Mateo, Kaleponi, a e hoi mai no ka hoomaha ana mamua o kona holo ana akn no Kina. Ua ukali pu ia mai oia ma kana huakai no nei a hala loa aku i Kina e H. C. Wong, o Kapalakiko, he Pake lele mokuea pu elike me ia.