Ka Nupepa Kuokoa, Volume LXII, Number 2, 11 January 1923 — HOOIAIO O COOKE, NO KA HOOLIMALIMAIA O NA AINA. [ARTICLE]

HOOIAIO O COOKE, NO KA HOOLIMALIMAIA O NA AINA.

Ma ka Poakolu o ka pule i hala aku la ka hooiaioia ana ae e R. A. Cooke, kekahi o na hoa o ka papa alakai o ka Hui American Sugar, ka lono i hauwawaia ae ai ua hoolimalimaia aku e ka hui 5000 eka he aina kanu halakahiki ma ka hapa komohana o Molokai i ka hui o Libby, McNeill & Libby no ka manawa o 17 makahiki.

O Maunaloa, ma ka hapa komohana loa o Molokai, he hapa ia o ka aina hanai holoholona o ka ohana Cooke. He aina kula panoa ia i mahi ole ia no kekahi mau makahiki lehulehu i hala, aia ma ia wahi kekahi mau mea oiaio e hoike mai ana he wahi i noho nui ia e na kanaka Hawaii i kela au kahiko, e laa na papohaku ame na kahuahale, a ma kekahi mau wahi he hiohiona e hoike ana ua kanuia me ka uala.

Aohe wai ma kela hapa komohana o Molokai, he wai kai ka wai e loaa ma kahi kokoke i kapa kahakai, a e i wale aku nei no ka la ka loaa ana o ka wai kuahiwi mamuli o kekahi paipu wai i hoomoeia mai mai na owawa mai mauka loa aku o Kaunakahakai ahiki i na pahuwai nunui ame na luawai hookio maluna o kahi kiekie o Maunaloa, a mailaila aku.i hookaheia ai ma na wahi like ole o ke kula holoholona.

Ma na kahanapali maluna loa ka o Maunaloa kahi ulu nui o ka mauu pili hale ame ka mauu pilipiliula ame kekahi mau ano mauu e ae i lawe ia aku e kanu malaila, a ma na wahi e pili ana i kahakai he ulu kiawe wale no, nolaila o kela hapa komohana o Molokai kekahi aina hanai holoholona maikai loa, ma na wahi haahaa o ka aina he mau wahi kupono loa no ka palau 'ana no ke kanu ana i ka halakahiki.

Ua hauwawaia ae ko L. E. Arnold, ke kakauolelo o ka hui kanu halakahiki, hoike ana ae he 1000 eka ka kela wahi e kanuia aku ana me ka halakahiki i keia makahiki, a me he mea la ina no ke oo o ka halakahiki o Honolulu, nei ana no kahi e laweia mai ai a hanaia iloko o ke kini, ke ole nae e ku koke aku kekahi hale hana kini halakahiki ma Molokai.

Ma ke Kakaako Misiona, ma keia Poaono iho e kuaiia aku ai he mau waiwai o na ano like ole, i ka poe apau e hoea ae ana malaila me na kumukuai oluolu loa.