Ka Nupepa Kuokoa, Volume LXII, Number 4, 25 January 1923 — KA AHAOLELO E NOHO MAI ANA. [ARTICLE]

KA AHAOLELO E NOHO MAI ANA.

He mau pule kakaikahi wale no koe, alaila noho mai ko kakou ahaolelo kuloko, iloko ae nei o ka mahina o Feberuari. Ma na kau ahaolelo lehulehu i kaahope aku nei, me he mea la. o kekahi hana haule ole ma ka aoao o na hoa o na hale kaukanawai a elua, o ia no ka hookomo ana he mau bila kanawai o kela ame keia ano. a o ka hapanui o ia mau bila, ua kiolaia aku iloko o ke ie opala, a he kakaikahi na bila i lilo i kanawai. Ua hoopauia kekahi manawa nui o ka ahaolelo, ma ka noonoo ana ia mau bila kanawai kupono ole i kiolaia, ua hooliloia aku he huina dala mahuahua no ke pa'i ana ame ka hooponopono ana i ua mau bila nei; no keia kumu, i makemake ai keia pepa e hoonaauao aku i na hoa o ka ahaolelo e noho mai ana, e kapae aku i na hana o kela ano. aka e hooliloia na mahina elua e noho ai o ka ahaolelo, i mau la e lawelaweia ai na hooponopono ahaolelo, i ike maoli ia ke kupono. E laweia mai na bila kanawai, i hoomaopopoia he mau bila maikai ia, a kupono hoi, elike me na hemahema i ikeia o ke au o ka ma-

nawa e nee nei; e hanaia mau hoololi kanawai, ma na wahi 0 na kanawai mua e ku nei, i ikeia ka hemahema, a kupono ole, a e hoopau loa ia na kanawai, i lilo i mau mea hoonani wale iho no, no na buke kanawai o kakou. He nui na ninau ko'iko'i, e laweia mai ana imua o ka ahaolelo e noho mai ana, he mau ninau pili i ke ana auhau, pili 1 ke kula olelo Kepani, a pili i ka oihana hoonaauao o Hawaii nei, ame kekahi mau ninau e ae, i pili i na hana o ka lehulehu; iloko nae o ia mau ninau apau, e pono i na hoa o ka ahaolelo, ke noonoo me ke akahele loa; mamua ka pono o na haku makaainana, a mahope aku na mea e ae. E hoea mai ana na noi i mau bilā haawina, mai na keena oihana lehulehu mai o ke Teritore, na hoomahuahua ukuhana o na luna oihana o ke Teritore ame na kalana o kakou; na bila haawinā no kekahi mau hana hou; iloko o keia mau noi apau, e hoaoia mai ai ko kakou mau hoa oloko'o ka ahaolelo; o ka keia pepa e kauleo e aku nei, mai pupuahulu i ka hooko ana aku ia mau noi, aka e lawela\yeia na noonoo akahele ana ma na ano apau, a ma na noi wale no i kupono i'o, malaila e hooko aku ai. Ua loaa no ka ike ame ka hoomaopopo ana i na poo o na keena oihana o ke Teritore e noho mai nei, e hoole mai ana ka ahaolelo, i ka haawi ana mai, i ka huina piha o na haawina a lakou e noi mai ana, no keia kumu, i alualu ai lakou i kekahi mau huahelu kiekie, i ka wa e pokepokeia mai ai, e loaa mai ai kekahi huina puuhuahelu mahuahua, ka mea hiki ole e loaa mai, ina e hoopololei loa ana ka lakou noi ana rnai, elike me ka haawina dala i manaoia, ua lawa no na makahiki elua e hoea mai ana. E lilo ko kakou ahaolelo e noho māi ana, i ahaolelo nui o na bila maikai e hooholoia; i ahaolelo hoemi lilo, a i ahaolelo e haawiia aku ai na mahalo ana a ka lehulehu o na makaainana, no ka lawelaweia o na hooponopono ahaolelo apau, maluna o ke ana o ka naauao ame ke kaulike; i ahaolelo e hookaokoa ana i kana mau hana, mai na ahaolelo o na kau aku nei i hala, e lilo ai i kumu alakai, no na kau ahaolelo o keia mua aku. " .