Ka Nupepa Kuokoa, Volume LXII, Number 6, 8 February 1923 — Ko Ole ka Manao E Lawe Ponoi Ae i Kona Ola No ka Hoi Ana Aku o ke Kane me ka Ona i Hoao Ai ka Wahine e Make ELUA LA WALE NO KO LAUA MAREIA ANA Hoopakeleia Nae Kela Wahine Mamuli o ka Ike Koke Ia Ana o ka Poino [ARTICLE]

Ko Ole ka Manao E Lawe Ponoi Ae i Kona Ola

No ka Hoi Ana Aku o ke Kane me ka Ona i Hoao Ai ka Wahine e Make

ELUA LA WALE NO KO LAUA MAREIA ANA

Hoopakeleia Nae Kela Wahine Mamuli o ka Ike Koke Ia Ana o ka Poino

He elua wale no la, mahopo iho o kona mare ana i kana kane, i hoao ae ai o Mrs. D. Paris, e hoopokole i kona ola ana. mamuli o kona inu ana i ka hapalua o ka wai oloko o kekahi omole creoline, ma ka auwina la o ka Poakahi aku la i hala, eia nae ua ko ole ia manao ona. Mahope koke iho o ka hora ekolu o ka auwina la o kela Poakahi, i loaa aku ai o Mrs. D. Paris e wili ana i ka eha, iluna o ka papahele, o kona home ma ke alanui Ololi, Broad, a hoihoiia ae oia me ka hikiwawe loa noloko o ka halema'i o na poino ulia, kahi i lawelaweia mai ai na hana, e pau ai ka laaumake iwaho, mailoko mai o kona opu. Imua o na makai, i hoakaka aku ai o Mrs. Paris, ma ka po koke aku nei no o ka Poaono i hala, i mare ai oia i ke kane. Ma ka po o ke Sabati mai, ua hoi aku la kana kane no ko laua home me ka ona, no ia kumu, i ala ae ai ka hoopaapaa mawaena o laua. No ka lilo paha o kela ona ana o ke kane, i kumu e hoopilikia loa ia aku ai o kona noonoo, i hooholo iho ai oia, e lawe i kona ola, elike me kana mea i hana aku ai. Mahope iho o ka lawelaweia ana aku o na hana, e hoopakeleia ae ai kela wahine mai ka make mai, maloko o ka halema'i o na poino ulia, ua hoihoi loa ia oia maloko o ka Halema'i Moiwahine, a ma ka nana ana a na kauka, ua hoikeia ae, e palekana ana oia, mai ka poino mai. WAKINEKONA, Feb. 2,—Ua manaoia ma ka la apopo e hooponopono hou ia ai ka hoonoho ana i na hoa o ka aha kuhina ma kekahi la o keia pule ae. Ua hookahuaia keia hoike mua ana mamuli o ka waiho ana mai o ke kuhina kalaiaina Fale i kona kulana.