Ka Nupepa Kuokoa, Volume LXII, Number 9, 1 March 1923 — HE KANAWAI HOOPILIKIA. [ARTICLE]

HE KANAWAI HOOPILIKIA.

Ina e lilo ka bila kanawai i hookomoia ae e ka Mea Hanohano Wilder, i kanawai, e hookapu, a e papa ana i ka lawai'aia maloko ae nei o ke awa, me na ano lawai'a e ae, aka me ka makau wale no, pela mawaho ae nei o Waikiki, e hoea mai ana i ka wa e oi loa mai ai ka pipii o ka i'a, i oi aku i ke kumukuai o keia manawa, e ukuia nei e ka lehulehu. Ma keia bila kanawai, ua hookapu pu ia ka hele ana e lawai'a me ka upena kiloi, koe wale no a loaa mua ka laikini, e kau ana i hookahi dala, ka uku laikini no na makaainana Amerika, a iwakalua dala no na lahui e; a e kaupalena pu ana i ka maka 0 ka upena kiloi e hanaia ai, i ekolu iniha ke akea. I ka nana aku, he elua no manao nui o ka hookomoia ana ae o keia bila kanawai, o ka mua, e hookoeia na i'a liilii, no ka hoopulapula ana; a o ka lua, e hapa mai na lahui e, e hele 1 ka lawai'a me na upena kiloi. Ke hoomanao nei keia pepa, ua hoakaka maopopo mai ke Kanawai Kumu o Hawaii nei, no ke kuleana i na makaainana Amerika apau, ke lawai'a ma na kai o Hawaii nei, a koe na lahui, i lilo ole he mau makaainana Amerika, mawaho aku o na mile ekolu, kahi i noa ia lakou ke lawai'a o ia hoi ma ka moana kai hohonu; o ka mea apiki nae, eia no na lahui e, ke lawai'a mai nei, ma na wahi i papaia, a ke kaili aku nei i ka oihana lawai'a mai na kupa Hawaii aku. Ile oi loa aku ka pono, ma ke kumukuai o ka i'a, ka hooponopono kanawai e hanaia mai ai, aole o ka imi mai i kekahi alahele, e hooi hou ia ae ai ka pipii o ke kumukuai, e papalua, a e papakolu aku ai ka puka, o ka poe kuai hoopukapuka o na makeke o kakou.