Ka Nupepa Kuokoa, Volume LXII, Number 9, 1 March 1923 — HE HANA HOOHEMAHEMA MAOLI. [ARTICLE]

HE HANA HOOHEMAHEMA MAOLI.

Ma ka halawai a ka papa o na lunakiai o ke Kulanakauhale a Kalana o Honolulu nei, ma ka po o ka Poalua aku la i hala. i hoikeia ae ai e ka Lunakiai Kumalae, ka loaa ana aku o kekahi kaa kalaka o ke kalana ua haaleleia i ke alanui, a ua laweia aku kela kaa eia no kona home, ma ke ano, e hoopakele ana i kela waiwai o ka lehulehu, mai ka lilo ana aku i ka poe kolohe ame ka poe aihue. Ua lilo nae kela hana ma ka aoao o ka Lunakiai Kumalae, i mea ahewaia e na hoa o ka papa. no kona hoihoi ana i ke kaa kalaka no kona wahi, aole hoi he hoike ae i ka oihana makai, i hiki' ai ke hoihoiia ma kahi e waihoia ai o na kaa o ke kalana. Ma ka mea oiaio maoli, ua lilo kela kukuluia ana o ke kaa kalaka o ke kalana iwaho o ke alanui i ka po, i hana hoohemahema, i ka waiwai o ka lehulehu, a e lilo i hana na na lunakiai, ke kauoha ana i na kaa apau o ke kalana, e hoihoiia maloko 0 ka halekaa, i na po apau, me ka waiho ole ia ma na wahi, 1 noho ai o ka poe e hoohana ana i kela mau kaa. Ua maikai ke koi ana a na hoa o ka papa lunakiai, i na luna oihana e hoohana ana i na kaa o ke kalana, aole e hoohanaia kela mau kaa, no ka holo lealea ana, mawaho ae o na hora hana o ka la; nolaila he hana kupono loa na lakou, ka papa pu ana, i na limahana e hoohana ana i na kaa kalaka, e hoihoi pu ia na kaa kalaka apau maloko o kahi waiho kaa o ke kalana, o ke alahele wale no ia e maluhia ai ka waiwai o ka lehulehu, a e palekana ai mai na poino mai. O kekahi o na bila maikai loa e pono ai e lilo i kanawai, 0 ia no ka bila a ka Mea Hanohano Paschoal o ka hookomo ana ae iloko o ka hale o na lunamakaainana, e kauoha ana i ka oihana hoonaauao, e hookohu aku i na haumana apau o ke kula a'o kumu i hookuuia mai me na palapala hoomaikai 1 mau kumukula, ma na wahi hakahaka apau e ikeia ana; ua like keia me kekahi olelo ana ae, mamua e hookohuia ai na haumana oloko o kela kula, i mau kumukula, a mahope ka noonooia aku o na kumukula maiwaho mai. — Ina nei no ka holo o ka bila a ka Mea Hanohano Silva o ka hookomo ana ae, e hoololi ana i ke koho ana i na hoa o ka papa lunakiai, o ke Kalana o Hawaii, alaila e lilo ana ka lunahoomalu o ka papa lunakiai, i kekahi mea e kohoia ana i hoa no ka papa, mai ka apana ae o Hilo Hema; me ke kuleana ole o kekahi mea ma na apana e ae e holo mai ai no kela kulana. E huhu loa ana na wahine apuni keia Teritore i ka Mea Hanohano Silva, ina nei no ka lilo o ka bila i hookomoia ae eia iloko o ka hale o na lunamakaainana, i kanawai, e kauoha ana, e auhauia na wahine apau, i loaa ia lakou ka mana koho baloka. elike me ia i auhauia ai na makaaianna kane.

Ua nui na kanawai ahaolelo e ku nei i keia manawa, o ka pilikia i ikeia, o ia no ka hooko ole ia o kela mau kanawai, aka ua hoopahemahema wale ia, me ka pakele o kekahi poe, mai ke kau ana aku o na hoopa'i ko'iko'i maluna o lakou.