Ka Nupepa Kuokoa, Volume LXII, Number 10, 8 March 1923 — NA UPENA LAWAI'A O KA WA KAHIKO AME KA LAKOU HANA [ARTICLE]

NA UPENA LAWAI'A O KA WA KAHIKO AME KA LAKOU HANA

(Kakauia e Z. P. K. Kawaikaumaiikamakaokaopua.) (Hoomauia mai.) Aia na wehewehe ana a kakou iluna o ka upena kuu. O ka rula ina ua hiki hope aku oe i kahi e hanaia ana ka upena, a ku oe a nana i ka hana a keia poe, a lawelawe ole oe e hana, a pe'a ko lima mahope o ke kua, e noke ia ana oe i ka hailiili i na olelo like ole; oiai, o keia kuakii au, he hoopaoa ana ia. O ia ka rula a ka poe kahiko. Huhu loa ka poe kahiko i kela ano hana. A ina hoi oe i hele a noho a lalau kou mau lima i ka pohaku a hikiikii i ka upena, aole loa he leo e kamailio mai ana ia oe. Elua ano o ka upena kuu ana; i ke ao ame ka po. Aole no i like loa ka upena kuu o ke ao me ko ka po. O ko ke ao, e olelo aku ana oe e, hele kakou i ka upena kuu; i ka po aole e olelo ana ka poe kahiko e hele kakou i ka upena kuu. O ka lakou olelo, a keia po hele kakou i ka auaukai, a i ole, auwana. O ka hele ana a ka poe kahiko i ka po, aole lakou e hoi hou iuka, ahiki i ka pae ana i kauhale. Maloko wale no lakou o ke kai e au ai, a pae i kahi i makemakeia ai e pae. Aia i ke kanaka paa i'a, he kaula loihi ehiku anana ka loa, ua kuiia ka i'a, a o ia iho la ke eke e hoo ai ka i'a. Oiai, o ka lawai'a ana o ka po, aole i'a liilii e hei ana; he i'a nunui wale no. O ka palani, o ka nenue, o ka mu, ame na

i'a nunui like ole apau. O ka hana wale no ia a keia kanaka o ka huki i keia kaula me ka i'a, a pae i ka aina. Aole maka'u ka poe kahiko i ka mano; a heaha la ia mea ia lakou. O keia ke kolu o na upena lawaiʻa ma kahi papau iki mai o ke kai. O ka ha o na upena o ka upena ula. O keia ano upena a ka poe kahiko, he upena haahaa no keia, aole kiekie loa elike nie na upena e ae. He iwilei no a he muku; a o ka maka o ka upena he ma, aka, o keia ano upeua, maluna no o ka waa e lawe ia ai e hookuu. E hookuuia ana no keia ano upena ma na kai kohola aole hohouu loa. Ua like no me ko ka upena kuu; he pohaku no ko ka alihi olalo; a o ke kakaalawa hoi o ko ia nei; aia wale no na pohaku nunui ma na kihi o ka alihi olalo. Aia ma ke poo o ka alihi oluna, he mau kaula kawelewele, e hoopaa ana i na laau mouo. He mea ia e mau ai ka malo'elo'e a ku pololei ka upena iluna. Ina he nui ka ula, e pau loa ana i ka hei i keia ano upena; a he upena luhi ole no; lawe aku no kukulu a ao ka po, kii aku e huki. He lawa loa keia' ano upena i ke kanaka hookahi. (Aole i pau.) OTTAWA, Mar. # I.—Ua hoopioia e ka aha senatc Canadian i keia Ia ka bila e hoomahuahua ae ana i ka makahiki koho haloka o na wahine mai ka 21 a ke .'!0.