Ka Nupepa Kuokoa, Volume LXII, Number 12, 22 March 1923 — Loaa ka Makuahine o Kekahi Bebe Make i Laweia e Huna Ae he Wahine Haole Opio Kahuma'i no Kona Hanau Ana Mai i Kana Bebe ua Make me ka Lawe Ana e Huna Iloko o ka Lua [ARTICLE]

Loaa ka Makuahine o Kekahi Bebe Make i Laweia e Huna

Ae he Wahine Haole Opio Kahuma'i no Kona Hanau Ana Mai i Kana Bebe ua Make me ka Lawe Ana e Huna Iloko o ka Lua

Mahope iho o ka noii ana a ka oihana makai i ka makuahine o kekuhi bebe hanau hou i make, a i owiliia iloko o kekahi pwolo, a hunaia aku iloko o ka lua, o ka pa e pili kokoke ana i ka hale auau o ka lehulehu ma Waikiki ae nei, i hoea mai ai i ka loaa ana o ka mea a na makai i makemake loa ai, a o ua makuahine la, oia no kekahi o na wahine haole opio kahuma'i oloko o ka Halema'i Moiwahine. Ua hunakele loa nae kela wahine i ka hoike ana ae i kona ohana ame ka makuakane nana ka bebe, koe wale no kona hoakaka ana ae, o ka makuakane o kela bebe he kanaka oia i ike nui ia ma keia kulanakauhale, a he wahine kana me ka ohana e noho nei, a aole oia i makemake e hookaumaha aku i ka manao o kela kanaka. Ma ka auwina la o ka Poakahi, ka la 12 o keia mahina, i ikeia ai kela wahine opio e kekahi mea i ka lawe ana a waiho i ka puolo 0 kana bebe make, iloko o ka lua, a ua hookolo aku kela kanakā. mahope ona, ahiki i ka maopopo ana o kona wahi i noho ai. Mamuli o na hoakaka a kela kanaka i pololei ai ka hookolo ana a na makai, ahiki i ka loaa ana o kela wahine opio, a i ka wa i hoakakaia aku ai imua ona, ua ikeia kona lawe ana a waiho i ka puolo o ka bebe nike, ua ae okoa mai la oia oia no ka makuahine o ka bebe. Ka Hanau Ana o ka Bebe Aole i huna iho kela wahine opio 1 kona hanau ana i ka bobe, aka ua hoike oia i na mea apau, ame kana mea i hana aku a-i no ka bebe, i

wahi e ike ole ia mai ai, e ka nui ae o na kahuma'i. Ma ke kakahiaka o ka Poaono, oia i hanau ai i kana bebe, maloko o kona rumi, a i ka wa i hanau mai ai, ua make, nolaila ua hookomoia ka bebe eia maloko o kekahi wahi kupono, alaila hele aku la e lawelawe i kana mau hana maamau maioko o ka halema'i. Ua hoomanawanui no oia ma kana mau hana me ka nawaliwali o kona kino, ma kela Poaono, ke Sabati mai ahiki i ka Poakahi, a i kona kaawale ana ma ka auwina la 0 ka Poakahi, ia wa oia i lawe ai 1 ka puolo o kana bebe a huna ma kela wahi i ikeia ai oia. Ua manao no ka oia e kanu maoli i ka bebe, aka mamuli o ka nawaliwali o kona kino, pela i liiki ai iaia ke hana pela, a lawe aku la a waiho ma kela lua o ka pa, ma kahi kokoke i ka hale auau. Ua nanaia kela bebe e Ke kauka, a ma kana hoakaka, ua make kela bebe i kona wa i hanau mai ai. Aole e Hopuia Mamuli o kela ike a ke kauka, na kaawale ka makuahine opio, mai ke karaima pepehikanaka, nolaila ua hooholo na luna oihana kulanakauhale, aole e lawe mai i kekahi hoopii, e ku-e ana i ka wahine opio; no ka mea, ma ko lakou manaoio ua lawa na hopena hoohilahila i kau aku maluna o kela wahine, no ka hoopa'i ana iaia no kana mea i hana ai. Ua hoopauia kela wahine opio kahuma'i mai ka noho hana ana maloko o ka halema'i, i ka manawa i ikeia ae ai kona hanau ana i ka bebe.