Ka Nupepa Kuokoa, Volume LXII, Number 12, 22 March 1923 — MANAOIA UA PIHOLO ILOKO O KE KAI. [ARTICLE]

MANAOIA UA PIHOLO ILOKO O KE KAI.

Ua nui ka haohao ame ka hopohopo pu o ka ohana o Manuel Perreira no kona pale kana, ahiki i ka Poakahi nei, no ka mea mai ka po Poaono mai ka nalowale ana aole i hoi iki aku i ka hale. He kanaka palaki kamaa o Manuel Perreira no ke ala ololi Cunha. No ka nui haohao loa o ka ohana o Perreira ua hele okoa ae lakou e hoike i ka Makai Nui Rose, ma ka Poakahi nei no ko Perreira holo ana i ka lawai'a maluna o ka waapa me kona mau hoa ma ka auwina la Poaono aku la i hala ma ka hora 5 mawaho ae o Kaimana Hila aohe nae i hoi iki mai ahiki i na hora aumoe o ka po Sabati nei. Ua hoomakaia ka huli ana ma ia kapakai o Laeahi ma ka Poakahi nei a ma ka poalua nei. Ua hoikeia aku ka lohe i na makai o na kuaaina ma ka po Poakahi e makaala aku ma na kapakai o keia mokupuni no kekahi waapa i hoakakaia aku na ano apau, ka waapa hamama a Perreira ame kona mau hoa i kau ai a holo aku i ka lawai'a, a i haalele iho ai i ke awa ma ka po Poaono i hala.