Ka Nupepa Kuokoa, Volume LXII, Number 13, 29 March 1923 — NA UPENA LAWAI'A O KA WA KAHIKO AME KA LAKOU HANA [ARTICLE]

NA UPENA LAWAI'A O KA WA KAHIKO AME KA LAKOU HANA

(Kakauia e Z. P. K. Kawaikaumaiikamakaokaopua.) Ka upena paouou. O keia kekahi upena helu ekahi e pau ana na i'a like ole o ke kai papau. O ke ano o keia upena, he upena poepoe. Eha laau ulei; e moe aku ana keia ulei, ahiki i kekahi puka kaula, alaila hooku'i mai ana kekahi ulei; pela no e hana ai a pau na ulei i ka hookomokomoia; alaila poepoe ae la ka upena. He mau hanai no ko keia ano upena; eha hanai, ua like me na hanai o ka aei opelu. Aia maluna o keia mau hanai, ke kaula e huki ai i ka mole o ka upena, he wahi pohaku a-la maikai uuku kupono no, a ua puka mua no, a malaila ke kaula hikii malalo o ka mole o ka upena, kahi e hoopaa ai na i'a pakali. Aia ma na aoao o keia upena paouou, he mau wahi eke liilii. I hanaia keia mau wahi eke, i mea e poho ai ka upena, aole e kakaia a maloeloe. Ina makemake ka mea e hana ana, he opule paha kana i'a i makemake ai, e pono iaia e loaa ka opule, ina e hei ana i ka upena kuu. Ua hooniakaukau mua ia he hinai e kooholoia ai ka i'a; a i ke kakahiaka e makaala ana ka mea lawai'a e hele i kahi e kuuia ai keia upena, no ka mea, he laki loa keia. ua loaa i ka upena kuu. A ina aole i loaa keia i'a, e hele ana oe ī kakahiaka nui e luuwana.

He upena keia, aia i ke kakahiaka nui loa, e kuuia ai. A i ka loaa ana o ka wana, e pakiki oe a palahe, alaila, hookomo iloko o ka upena, a hookuu aku i ka upena i ke au; o ia ka olelo a kahiko; o kahi e kuu ai ka upena, he au ia. (Aole i pau.)