Ka Nupepa Kuokoa, Volume LXII, Number 15, 12 April 1923 — Mahuka na Kaikamahine o ke Kula ma Kamoiliili Ae Nei Pau Loa Nae Lakou i ka Paa a Hoihoi Hou Ia Ae Noloko o ke Kula Hoopololei me ke Kipakuia Ana Hookahi Kaikamahine [ARTICLE]

Mahuka na Kaikamahine o ke Kula ma Kamoiliili Ae Nei

Pau Loa Nae Lakou i ka Paa a Hoihoi Hou Ia Ae Noloko o ke Kula Hoopololei me ke Kipakuia Ana Hookahi Kaikamahine

Ma ka Poakolu o ka pule aku nei i hala, i holo mahuka aku ai he umi-kumamaono mau kaikamahine mailoko aku o ke kula hoopololei ma Kamoiliili, o kahi nae o ka laki, ua paa hou lakou i ka hopuia, a hoihoiia ae noloko o ka halekulu, ine ke kipaku okoa ia ana o kekahi kaikamahine, nona ka inoa o Hattie Kailiwai, mailoko aku o ke kula, ma ke ano, oia ka mea nana i hookomo i ka manao iloko o na kaikamahine e ae, e holo mahuka. Ma ke kakahiaka o kela Poakolu, i loaa ae ai ka lohe i ka oihana makai no ka holo mahuka ana o kekahi mau kaikamahine elima mailoko aku o ke kula, a ma ia po iho, i holo mahuka hou ai he umi-ku-mamakahi mau kaikamahine. Ma ka hora elima o kela ahiahi, i loaa aku ai ka lohe i ka oihana makai, no ka ikeia ana o kekahi mau kaikamahine mahuka, e pee ana maloko o ka mala halakahiki ma Palolo, i ka hele ana aku nae 0 na makai e huli, aole he mea i loaa aku ia lakou, aka ma ka hora umi-kumamakahi o kela po, ua loaa aku la he ekolu mau kaikamahine ma ke alanui Beritania me ke alanui Makiki, a ho elima mau kaikamahine i loaa ma ia wahi hookahi no, mahope mai, a hoihoi hou ia aku noloko o ke kula. He hookahi kaikamahine i hopuia, oiai oia e kau ana maluna o ke kaa otomobile o kekahi koa, a ma kana hoakaka, o kela koa, ka mea nana i hoomahuka iaia, eia nae, ua hoole ae na kumu o ke kula i ka oiaio o kela hoike. Mahope mai, ua loaa liilii aku la na kaikamahine aku i koe, ahiki 1 ,pau loa ana i ka paa, a o ka mea i hanaia aku maluna o'lakou,

o ia no ka hoopa'iia ana he eono mau kaikamahine, ma ka haawiia aua ia lakou he apana palaoa wale no me ka wai no ka pule hookahi, a kipakuia hoi hookahi, m«x\loko aku o ke kula. Wahi a Miss Young, ka mea nana e hoomalu nei i ke kula hoopololei o na kaikamahine, o Hattie Kailiwai, ka mea nana i hoala aku i kela pilikia iwaena o na kaikamahine o ke kula. Ma ka la 27 o Maraki, 0 Hattie Kailiwai ame kekahi kaikamahine okoa aku ka i holo mahuka mua, a ma ka la 30 mai o kela mahina no, ua hoihoi hou io. aku Ia kela mau kaikamahine e na makai i ke kula. Ma ka la 31 no o Marakl, ua holo mahuka hou aku la no o Hattie Kailiwai, a paa no nae i ka hopuia, a ma keia manawa nae, he haole koa kona kokoolua o ka hele pu ana, me ka hoike ana ae, o kela ka mea nana i hoomahuka iaia. Ma ke kakahiaka o ka la Sabati, Aperila 1, ua aihue iho la kekahi poe kaikamahine he umi-kumama-kolu ka nui i na u-pa no ka ako ana i na lauoho, he ewalu o kela mau kaikamahine i ako i ko lakou mau lauoho a like me ka lauoho o na keikikane, a he elima hoi i ako 1 na lauoho a pokopoko kupono, elike me ia e ikeia nei iwaena o kekahi poe kaikamahine. Ua kauia he hoopa'i maluna o kela mau kaikamahine, a mahope mai, i hoomaka ai ua mau kaikamahine nei e holo mahuka, elike me na mea i hoikeia ae nei maluna. He 135 ka nui o na kaikamahine e noho nei maloko o ke kula hoopololei ma Kamoiliili, me ke a'oia i ke kuke, ame na hanalima, pela me ka ike i ana o ka malamj ana i na home. " '